Te sbiil te Jehová: ¿Jayebto skʼoplal ta koʼtantik?

1, 2. ¿Bin-utʼil ya jnaʼtik te kʼax mukʼ skʼoplal ta yoʼtan Jesús te sbiil te Jehová?

TE Jesús kʼax mukʼ skʼoplal ta yoʼtan te sbiil te Jehová, melel jaʼ te machʼa sbabial la skoltaybey skʼoplal te sbiil te sTate. Jich bitʼil la kiltikix ta yan artículo, la slokʼes sba ta yoʼtan yuʼun ya xlaj ta swenta te sbiil te Jehová, yuʼun ya skoltaybey skʼoplal te sbiile (Mar. 14:36; Heb. 10:​7-9). Sok ta slajibal te Wentainel ta jmil jaʼbil, te Jesús sok spisil yoʼtan ya yakʼbey ta skʼab te Jehová te wentainel yuʼune, jich ya yichʼ chʼultesbeyel te sbiil te Diose (1 Cor. 15:​26-28). Spisil te bin la spas te Jesús sok te bin ya xbajt spasxan ta swenta te sbiil te Jehová, ya yakʼ ta ilel te kʼax kʼux ta yoʼtan te sTate.

² Te Jesús xtaluk ta Balumilal ta swenta sbiil te sTate (Juan 5:43; 12:13). La yakʼtiklanbey snaʼ te jnopojeletik yuʼun te sbiil te sTate (Juan 17:​6, 26). Nojpteswan sok la spas milagroetik ta swenta sbiil te Jehová (Juan 10:25). Ta jun oración te la spas ta stojol te jnopojeletik yuʼun, jich la yalbey te Jehová: «Kanantaylana ta swenta te abiil» (Juan 17:11). Jich yuʼun, teme mukʼ skʼoplal ta yoʼtan Jesús te sbiil te Jehová, ¿bin-utʼil ay-a te ay machʼa ya yal sba te jaʼ jchʼuunjel pero te maba ya snaʼbey te sbiil te Jehová sok te maba ya stuuntesbeye?

3. ¿Bin ya kilbeytik skʼoplal ta artículo ini?

³ Te smelelil jchʼuunjeletik ya jpastik tulan ta skʼayinbeyel stalel te Jesús sok jaʼnix jich mukʼ skʼoplal ta koʼtantik te sbiil te sTate (1 Ped. 2:21). Ta artículo ini, ya kilbeytik skʼoplal te machʼatik ya yichʼik bael «te lek yachʼil kʼop yuʼun te Wentainel» yichʼojbeyik te sbiil te Jehová (Mat. 24:14). Jaʼnix jich ya xbajt kiltik jayebto ay skʼoplal ta koʼtantik ta jujuntul te sbiil te Jehová.

«JPAM LUM TA YOLILIK TE YA X-ICHʼBOT YUʼUN TE SBIILE»

4. 1) ¿Bin la yalbey te jnopojeletik yuʼun te Jesús te kʼalal nopol ya xmoix bael ta chʼulchan-a? 2) ¿Bin jojkʼoyel ya xbajt kakʼbeytik sujtib?

⁴ Kʼalal nopol ya xmoix bael ta chʼulchan-a te Jesús jich la yalbey te jnopojeletik yuʼune: «Yame awichʼ awuʼelik te kʼalal ya xjul ta atojolik te chʼul espiritue. Testigo ya xkʼoex kuʼun ta Jerusalén, ta spamal skʼinal Judea sok ta Samaria, sok kʼalalto ta stiʼil te balumilale» (Hech. 1:8). Jich yuʼun te lek yachʼil kʼop ma jaʼuknax ya yichʼ cholel ta Israel, jaʼnix jich ya yichʼ cholbeyel te ants winiketik ta spisil nacionetik yuʼun ya xjuʼ ya x-ochik ta jnopojeletik yuʼun te Jesús (Mat. 28:​19, 20). Kilbeytik skʼoplal te bin la yal te Jesús: «Testigo ya xkʼoex kuʼun». ¿Yabal skʼan ya yal te machʼatik yachʼil ya x-ochik ta jnopojeletik jaʼnax testigo ya xkʼotik yuʼun te Jesús, o jaʼnix jich ya skʼan ya snaʼbeyik te sbiil te Jehová? Ta capítulo 15 yuʼun te Hechos ya skoltayotik ta stabeyel te sujtib te jojkʼoyel-abi.

5. ¿Bin-utʼil la yakʼik ta ilel te jpuk-kʼopetik sok te ancianoetik ta Jerusalén te mukʼ skʼoplal te ya yichʼ naʼbeyel sbiil te Jehová? (Jaʼnix jich ilawil te dibujo).

⁵ Ta jaʼbil 49, te jpuk-kʼopetik sok te ancianoetik ta Jerusalén la stsob sbaik yuʼun ya yalbeyik skʼoplal te bin ya skʼan ya spasik te machʼatik ma jaʼuk judioetik yuʼun ya x-och ta jchʼuunjeletik. Ta slajibal te tsoblej, te Santiago te schaʼyijtsʼin te Jesús, jich la yal: «La scholbotik kaʼiytik ta lek te Symeón [Pedro] te kʼalal ta sbabial buelta te Dios lek la yil te jyanlumetik yuʼun ya slokʼes jpam lum ta yolilik te ya x-ichʼbot yuʼun te sbiile». ¿Machʼa sbiil? La yalbey skʼoplal te bin la yal te j-alwanej Amós, kʼalal jich la yal: «Yuʼun jich te ants winiketik te jilemik pajal ya sleik sok spisil yoʼtanik te Jehová sok spisil te ants winiketik yuʼun te nacionetik te jaʼ ants winiketik te yichʼojbonik te jbiile. Jich ya yal te Jehová» (Hech. 15:​14-18). Jaʼ yuʼun, te yachʼil jnopojeletik ma jaʼuknax ya xbajt snopik ta swenta te Jehová, jaʼnix jich ya yichʼbeyik te sbiile. Jaʼ ya skʼan ya yal-abi te ya yichʼik naʼbeyel sbaik ta swenta te biilil-abi sok te ya yakʼik ta naʼel.

6, 7. 1) ¿Bin yuʼun xtaluk ta Balumilal te Jesuse? 2) ¿Bin-a te kʼax mukʼ skʼoplal tal spas ta Balumilal te Jesuse?

⁶ Juluk ta koʼtantik te sbiil te Jesús ya skʼan ya yal «te Jehová jaʼ Jkoltaywanej». Jich yuʼun, te Jehová la stuuntes te Jesús yuʼun ya skoltay spisil te ants winiketik te ay schʼuunel yoʼtanik. Te Jesús xtaluk ta Balumilal yuʼun ya yakʼ te skuxlejal ta stojol spisil te ants winiketik (Mat. 20:28). Kʼalal la yakʼ te stojol kolel, la yakʼ te ya xjuʼ ya jtatik perdón ta swenta te jmultik sok te ya xjuʼ ya xkuxinotik ta sbajtelkʼinal (Juan 3:16).

⁷ Jaʼ yuʼun, ¿bin yuʼun ya skʼanik te stojol kolel te ants winiketik? Jaʼ ta swenta te bin kʼot ta pasel ta tsʼunbil kʼinal Edén. Jich bitʼil la kiltikix ta yan artículo, te sbabial jmeʼ jtatik te Adán sok te Eva la skontrainik te Jehová sok jich la xchʼayik te kuxlejalil ta sbajtelkʼinal (Gén. 3:​6, 24). Pero ma jaʼuknax mukʼ skʼoplal te skolel te ants winiketik ayto yan te bin kʼax mukʼxan skʼoplale: la yichʼ bolobtesbeyel skʼoplal te sbiil te Jehová (Gén. 3:​4, 5). Jich yuʼun, te skolel te stsʼumbal te Adán sok te Eva snitojbey sba skʼoplal sok te bin kʼax mukʼxan skʼoplale: te schʼultesbeyel sbiil te Jehová. Te bitʼil te Jesús jaʼ tikunbil tal yuʼun te sTate, leknax la yichʼbey te sbiil sok jaʼ te machʼa la schʼultesbey ta lek te sbiil te Jehová.

8. ¿Bin ya skʼan ya xkʼot ta yoʼtanik sok ya skʼan ya schʼuunik spisil te machʼatik ya x-ochik ta jnopojel yuʼun te Jesús?

⁸ Spisil te machʼatik ya x-ochik ta jnopojel yuʼun te Jesús, chikan teme jaʼ judioetik o maʼuk ya skʼan ya xkʼot ta yoʼtanik sok ya skʼan ya schʼuunik machʼanix-a te ya yakʼ te kolel, te jaʼ te sTat te Jesús, te Jehová (Juan 17:3). Jich bitʼil te Jesús, jaʼnix jich ya yichʼik naʼbeyel sbaik ta swenta te sbiil te Diose. Ya skʼan ya xkʼot ta yoʼtanik te mukʼ skʼoplal te ya yichʼ chʼultesbeyel sbiil te Jehová. Jichme ya staik-a te skolelike (Hech. 2:​21, 22). Jich yuʼun, spisil te jnopojeletik yuʼun te Jesús ya skʼan ya snopik ta swenta te Jehová soknix ta swenta te Jesús. Ta slajibal te oración te la spas te Jesús te ya jtatik ta Juan capítulo 17, jich la yal: «La kakʼbeyix snaʼik te abiile sok yame kakʼxan ta naʼel, swenta yuʼun te skʼuxul awoʼtan te ay ta jtojol jaʼnix jich ayuk ta stojolik-euk soknix te junuk ayon ta stojolike» (Juan 17:26).

«HAʼEX TESTIGOHEX CUʼUN»

9. ¿Bin-utʼil ya skʼan ya kiltik te sbiil te Jehová?

⁹ Jich bitʼil la kiltikix, te schʼultesbeyel sbiil te Jehová jaʼ te bin kʼax mukʼ skʼoplal ya skʼan ya yil spisil te smelelil jchʼuunjeletik (Mat. 6:​9, 10). Kʼax mukʼ skʼoplal ta koʼtantik te sbiil te Jehová sok te maʼyuk yan biilil te pajal soke. Sok ya skʼan ya kakʼtik ta ilel ta swenta te bintik ya jpastik. ¿Bin ya skʼan ya jpastik yuʼun ya xkoltaywanotik ta schʼultesbeyel sbiil te Jehová sok te ya kakʼtik ta ilel te jaʼ lotiletik te bin la yal te Satanás ta skontrainel te Jehová?

10. ¿Bin ya yalbey skʼoplal te capítulo 42 kʼalal ta 44 yuʼun te Isaías? (Isaías 43:9; 44:​7-9; jaʼnix jich ilawil te fotoetik).

¹⁰ Ta capítulo 42 kʼalal ta 44 ta libro yuʼun Isaías, ya yichʼ cholbeyel skʼoplal bin-a te ay ta jwentatik spasel yuʼun ya yichʼ chʼultesbeyel sbiil te Jehová. Ta capituloetik-abi, te Jehová ya skʼanbey te ants winiketik te ma x-ichʼot ta mukʼ yuʼune, te akʼa yakik ta ilel teme smelelil te sdiosik o teme yuʼun-nix ay-ae. Jaʼnix jich, te Jehová ya skʼanbey te ayuk machʼa ya yakʼ ta ilel te yuʼun-nix smelelil-a te bin ya yal te diosetik-abi, pero maʼyuk machʼa ya xjuʼ yuʼun spasel (kʼopona Isaías 43:9; 44:​7-9).

11. Jich bitʼil ya yal Isaías 43:​10-12, ¿bin ya yalbey Jehová te j-abatetik yuʼune?

¹¹ (Kʼopona Isaías 43:​10-12). Te Jehová jich ya yalbey te j-abatetik yuʼun: «Haʼex testigohex cuʼun te hoʼon Dioson». Ya skʼan te yakuk yakʼbeyik sujtib te jojkʼoyel ini: «¿Ay bal yan dios ta jtojol?» (Is. 44:8). Jaʼ jun majtanil kuʼuntik te ya kakʼbeytik sujtib te jojkʼoyel-abi, ta swenta te bin ya kaltik sok te bin ya jpastik. Ya kakʼtik ta naʼel te jaʼnax smelelil Dios te Jehová sok te maʼyuk yan biilil te kʼax toyol ay te bitʼil te sbiile. Ta swenta te bin yilel ya xkuxinotik, ya kakʼtik ta ilel te kʼux ta koʼtantik te Jehová sok te jun koʼtantik ya kakʼ jbatik, manchukme ya yakʼ bayal jwokoltik te Satanás. Jichme ya xkoltaywanotik ta schʼultesbeyel sbiil te Diose.

12. ¿Bin-utʼil kʼot ta pasel te albilkʼop te ay ta Isaías 40:​3, 5?

¹² Te j-alwanej Isaías jaʼnix jich la yal ta jun albilkʼop te ay machʼa ya sjambey o ya schajpanbey te «be yuʼun Jehová» (Is. 40:3). ¿Bin-utʼil kʼot ta pasel te albilkʼop-abi? Te Juan J-akʼ-ichʼjaʼ la schajpan te be yuʼun Jesús, te xtaluk ta swenta sbiil te Jehová sok te kʼopoj ta swenta te sbiile (Mat. 3:3; Mar. 1:​2-4; Luc. 3:​3-6). Te Isaías jich la yalxan: «Ya xchicnaj te yutsilal te Jehová» (Is. 40:5). ¿Bin-utʼil kʼot ta pasel te albilkʼop-abi? Kʼalal xtaluk ta Balumilal te Jesús la skʼayinbey ta lek te stalel te sTate, jich kʼoem te jaʼ xtaluk ta Balumilal te Jehová (Juan 12:45).

13. ¿Bin-utʼil ya xjuʼ ya jkʼayinbeytik stalel te Jesús?

¹³ Kʼalal ya jkoltaybeytik skʼoplal sbiil te Jehová, jichme yakotik ta skʼayinbeyel stalel te Jesucristo. Jich bitʼil te Jesuse, jaʼnix jich kichʼojbeytik te sbiil te Jehová sok ya kalbeytik spisil te ants winiketik spisil te bintik tʼujbil spasoj. Pero, yuʼun ya jkʼotestik ta pasel te bin ay ta jwentatik spasele, ya skʼan te ya kalbeytik te ants winiketik spisil te bintik spaso sok te bin ya spas te Jesús yuʼun ya schʼultesbey sbiil te Jehová (Hech. 1:8). Te Jesús jaʼ te testigo te kʼax mukʼ skʼoplal ta stojol te Jehová sok jaʼnix jich ya jpastik-euk (Apoc. 1:5). Jaʼ yuʼun, ¿jayebto skʼoplal ta koʼtantik ta jujuntul te sbiil te Jehová?

¿BIN-UTʼIL YA KAKʼTIK TA ILEL TE MUKʼ SKʼOPLAL TA KOʼTANTIK TE SBIIL TE JEHOVÁ?

14. Jich bitʼil ya yal te Salmo 105:​3, ¿bin yaʼiyel ya kaʼiy jbatik ta swenta te sbiil te Jehová?

¹⁴ Tseʼel koʼtantik ta swenta te sbiil te Jehová (kʼopona Salmo 105:3). Te Jehová ya smulan te ya xkʼopojotik sok stseʼelil koʼtantik ta swenta te sbiil sok te ya jtoybeytik skʼoplale (Jer. 9:​23, 24; 1 Cor. 1:31; 2 Cor. 10:17). Stoybeyel skʼoplal te Jehová, jaʼ ya skʼan ya yal te ya yakʼ stseʼelil koʼtantik te jaʼ jDiostik. Jaʼ mukʼul majtanil kuʼuntik te ya kichʼtik ta mukʼ te sbiil sok te ya xkoltaywanotik ta slekubtesbeyel skʼoplal. Maʼyuk bin-ora ya xkʼexawotik ta yalel ta jaʼ Testigootik yuʼun Jehová, chikan teme ta kaʼteltik, ta escuela, ta jlumaltik o chikan te banti ayotik. Te Pukuj ya skʼan te yakuk jkom jbatik ta yakʼel ta naʼel te sbiil te Jehová (Jer. 11:21; Apoc. 12:17). Jaʼnix jich, te lotil j-alwanejetik yuʼun te Satanás ya skʼan te yakuk xchʼay ta yoʼtanik te sbiil te Jehová te ants winiketik (Jer. 23:​26, 27). Pero, te joʼotik kʼux ta koʼtantik te sbiil te Jehová sok ya jkʼan ya kalbeytik yutsil skʼoplal ta «sjunal cʼahcʼal» (Sal. 5:11; 89:16).

15. ¿Bin smakojbey skʼoplal te yalel te sbiil te Jehová?

¹⁵ Ma jkom jbatik ta yalbeyel te sbiil te Jehová (Joel 2:32; Rom. 10:​13, 14). Yalbeyel sbiil te Jehová ma jaʼuknax ya skʼan ya yal te ya jnaʼbeytik sba sok te ya jtuuntesbeytik te sbiil te Diose. Tey ochem skʼoplal-a te ya jnaʼtik bin yilel stalel te Diose, te ya smukʼulin koʼtantik, te ya jkʼanbeytik koltayel sok tojobtesel (Sal. 20:7; 99:6; 116:4; 145:18). Jaʼnix jich, tey ochem skʼoplal-a te ya kalbeytik te yantik ants winiketik ta swenta te sbiil sok te taleliletik yuʼune, te ya jtijbeytik yoʼtanik te yakuk sujtes yoʼtanik sok te yakuk sjeltay te skuxlejalik yuʼun jich lek ya x-ilotik yuʼun te Jehová (Is. 12:4; Hech. 2:​21, 38).

16. ¿Bin-utʼil ya xjuʼ ya kakʼtik ta ilel te jaʼ jpaslot te Satanás?

¹⁶ Ya kalbeytik yutsil sbiil te Jehová manchukme ya xkʼax jwokoltik (Sant. 5:​10, 11). Kʼalal jun koʼtan ya kakʼ jbatik ta stojol te Jehová manchukme ya xkʼax jwokoltik, jich ya kakʼtik ta ilel te jaʼ jpas lot te Satanás. Ta skʼajkʼalel te Job, te Satanás jich la yal ta stojol te j-abatetik yuʼun te Jehová: «Spisil bintic ay yuʼun te winic ya yacʼ yuʼun te scuxlejale» (Job 2:4). Te bin la skʼan la yal, jaʼ te spisil te ants winiketik jaʼnaxlaj ya x-abatinik ta stojol Jehová teme lek ay te skuxlejalike, pero yalaj yijkitayik teme ya xkʼax swokolike. Te bitʼil jun yoʼtan la yakʼ sba te Job la yakʼ ta ilel te jaʼ lotil-abi. Jaʼnix jich, te joʼotik jaʼ majtanil kuʼuntik te ya kakʼtik ta ilel te maʼyuk bin-ora ya kijkitaytik te Jehová, manchukme bayal wokolil ya yakʼbotik te Satanás. Schʼuunoj koʼtantik te ya xbajt skanantayotik te Jehová ta swenta te sbiile (Juan 17:11).

17. Jich bitʼil ya yal 1 Pedro 2:​12, ¿binxan-utʼil ya xjuʼ ya kalbeytik yutsil skʼoplal sbiil te Jehová?

¹⁷ Ya kichʼtik ta mukʼ te sbiil te Jehová (Prov. 30:9; Jer. 7:​8-11). Te bitʼil kichʼojbeytik te sbiil te Jehová sok te ya xkʼopojotik ta stojole, te bin yilel te jtaleltik ya xjuʼ ya yakʼ ta ichʼel ta mukʼ o ya sbolobtesbey skʼoplal (kʼopona 1 Pedro 2:12). Jaʼ yuʼun ya skʼan ya jpastik ban kʼalal ya xjuʼ kuʼuntik ta yalbeyel yutsil skʼoplal te Jehová ta swenta te bin ya kaltik sok ta swenta te bintik ya jpastik. Jichme ya xkoltaywanotik ta yalbeyel yutsil skʼoplal te sbiil te Dios, manchukme ma tojotik.

18. ¿Bin-utʼil ya kakʼtikxan ta ilel te mukʼ skʼoplal ta koʼtantik te sbiil te Jehová? (Jaʼnix jich ilawil te nota).

¹⁸ Jaʼ mukʼ skʼoplal ta koʼtantik te sbiil te Jehová ma jaʼuk te bin ya snop ta jtojoltik te ants winiketik (Sal. 138:2). ¿Bin yuʼun te jich ya kaltike? Melel te bitʼil kʼux ta koʼtantik te sbiil te Jehová, jaʼ ya jpastik spisil te bin ya smulane. Pero ay baeltik te ants winiketik ya stseʼlayotik yuʼun sok ya slabanotik.a Te Jesús la yakʼ ta yoʼtan te ya xlaj jich bin-utʼil jtul chopol winik ta swenta yakʼel ta ichʼel ta mukʼ te sbiil te Jehová. Jich bitʼil ya yal te Hebreos 12:​2-4, jich la spas sok «maʼyuk skʼoplal la yil te kʼexlal la sta yuʼune», ya xjuʼ ya kaltik te ma jaʼuk mukʼ skʼoplal la yil te bin ya snop te ants winiketik ta stojol. Te bin baem ta yoʼtan spasele, jaʼ te skʼanojel yoʼtan te Diose (Mat. 26:39).

19. ¿Bin yaʼiyel ya awaʼiy aba ta swenta te sbiil te Jehová sok bin yuʼun?

¹⁹ Tseʼel koʼtantik ta swenta te sbiil te Jehová sok jaʼ majtanil kuʼuntik te ya kichʼtik naʼbeyel jbatik bitʼil testigo yuʼun Jehová. Jaʼ yuʼun, maʼyuk skʼoplal ta koʼtantik te tseʼlayel yuʼun te ants winiketik o te ya slabanotik. Te bin mukʼ skʼoplal ta koʼtantik jaʼ te sbiil te Jehová, ma jaʼuk te bin ya snopik ta jtojoltik te ants winiketik. Jaʼ yuʼun kakʼoj ta koʼtantik te maba ya jkom jbatik ta yalbeyel yutsil skʼoplal sbiil te Jehová, manchukme ya yakʼ jwokoltik te Satanás. Teme jich ya jpastike, jich bitʼil te Jesús, ya kakʼtik ta ilel te jaʼ mukʼ skʼoplal ta koʼtantik te sbiil te Jehová.