¿Anaʼojbal-a?

¿Bin yuʼun kʼax lamal yoʼtan te Esteban kʼalal tekʼel ta stojol te skontratak?

TE Esteban tekʼel ta sit te 71 ta tul juesetik te jkʼaxel tulan yoʼtanik te ay yaʼtelik ta Sanedrín, jaʼ te mukʼul chajpajibal yuʼun te judioetik. Jaʼ winiketik te mukʼ skʼoplalik ta nasione. Jaʼ ikʼbilik tal yuʼun te mukʼul sacerdote Caifás te aytonax cheʼoxeb u te jaʼnix la yil-euk te ichʼot ta kʼop te Jesús te banti la yichʼ nopel te ya yichʼ milele (Mat. 26:57, 59; Hech. 6:8-12). Talik tsobol lotil testigoetik. Pero kʼalal te juesetik te ay yaʼtelik ta Sanedrín la yilik te Esteban, chamnax yoʼtanik, melel la yilik te jich yilel bitʼil sit yelaw chʼul-abat (Hech. 6:13-15).

¿Bin-utʼil-a te lamal yoʼtan te Esteban kʼalal la sta tulan utsʼinele? Te kʼalal mato stsakojik bael ta Sanedrín, jkʼaxel baem ta yoʼtan spasel te aʼtelil akʼbil ta kongregasion, jaʼ koltaybil yuʼun te chʼul espiritu yuʼun te Diose (Hech. 6:3-7). Kʼalal la yichʼ ichʼel ta kʼop jaʼnix akʼbot smukʼul yoʼtan yuʼun te chʼul espiritu sok ay bin jultesbot ta yoʼtan yuʼun (Juan 14:16, nota). Ta kapitulo 7 yuʼun Hechos ya jtatik bin la yal te Esteban ta skoltayel sba sok spisil yoʼtan ta stojol te jchajpanwanejetik, tey chikan ta ilel te jultesbot ta yoʼtan yuʼun te chʼul espiritu veinteniwan parte yuʼun te Escrituras Hebreas (Juan 14:26). Pero la yichʼxan yip te schʼuunel yoʼtan kʼalal la yil ta najalsitil te Jesús te tekʼel ta swaʼel kʼab te Diose (Hech. 7:54-56, 59; 7:60, TNM).

Yaniwan sta skʼajkʼalel te ya kichʼtik ichʼel ta kʼop-euk sok te ya kichʼtik utsʼinel o nutsel (Juan 15:20). Pero teme kʼayemotik ta yakʼbeyelxan yip te schʼuunel koʼtantik ta swenta te sKʼop Dios sok baem ta koʼtantik spasel te kaʼteltik ta stojol, yame x-aʼtej ta jtojoltik te schʼul espiritu te Jehová. Jaʼnix jich ya kichʼtik akʼbeyel yip koʼtantik yuʼun ma stsalotik te kontrainel sok te lamaluk koʼtantik-a (1 Ped. 4:12-14).