14 Vaʼun, xi laj yalbun li Jeovae: «Li j-alkʼopetike yakal chalik ta jbi albil kʼopetik ti mu meleluke.+ Muʼyuk la jtakik batel, muʼyuk laj kalbeik mantal xchiʼuk mi jaʼuk la jkʼoponik.+ Kʼalal chalboxuk albil kʼopetike, jaʼ chalik li kʼusi mu meleluk akʼbil yilike, li kʼusi jecheʼ chilik ta tʼunole* xchiʼuk li loʼlavanej oy ta yoʼontonike.+

15 »Xi chal li Jeovae: ‹Yuʼun muʼyuk la jtakik talel, maʼuk melel li albil kʼopetik chalik ta jbie. Mi la achikintabeike, tanpuk chabatik kuʼun, vaʼun chachamik xchiʼuk chchamik li j-alkʼopetik ti chalboxuk jecheʼ albil kʼopetike›».+