JOSUE

1 Kʼalal chamem xa ox li Moises ti jaʼ yajtunel Jeovae, li Josue*+ ti jaʼ xnichʼon li Nun xchiʼuk ti jaʼ yajtunel+ Moisese, xi albat yuʼun li Jeovae: 2 «Li kajtunel Moisese chamem xa.+ Jaʼ yuʼun, totsan sventa xatuchʼik jelavel xchiʼuk jteklum li Jordane, batan li ta osil ti bu chkakʼbeik li jteklum Israele.+ 3 Chkakʼboxuk skotol li osil ti bu chatekʼan avakanike, jech ta jpas jech kʼuchaʼal laj kalbe ta jamal li Moisese.+ 4 Li avosilike chlik ta takixokol balumil kʼalal to ta Libano xchiʼuk kʼalal to ta mukʼta ukʼum, jaʼ li Eufratese —jaʼ skotol li yosil j-etetike—+ li ta stukʼil smaleb kʼakʼale te chpaj kʼalal ta Mukʼta nab.*+ 5 Muʼyuk buchʼu tstsalot ti kʼu sjalil kuxulote.+ Te ta jchiʼinot+ jech kʼuchaʼal la jchiʼin li Moisese. Muʼyuk chkiktaot xchiʼuk muʼyuk ta jtenot komel.+ 6 Tsotsuk me avoʼonton xchiʼuk mu me xachibaj,+ yuʼun voʼot chavikʼ batel li jteklum li ta osil ti laj kakʼ ke ta stojolal smoltotakik chkakʼbeike.+

7 »Tsotsuk me avoʼonton xchiʼuk mu xachibaj xchiʼuk kʼelo me lek ti xavakʼ ta akuxlejal skotol li Mantal laj yalbot komel li kajtunel Moisese. Mu xakʼejpʼuj* ta batsʼikʼob mi jaʼuk ta tsʼetkʼob*+ sventa oyuk lek apʼijil ti buyuk noʼox chabate.+ 8 Teuk noʼox me ta ave+ li slivroal Mantale, aptao xchiʼuk nopbo skʼoplal ta kʼakʼal akʼobal sventa xavakʼ ta akuxlejal skotol li kʼusi te tsʼibabile;+ yuʼun jech lek chbat li kʼusitik chapase xchiʼuk oy lek apʼijil ti kʼusiuk noʼox chapase.+ 9 ¿Mi mu lajuk kalbot mantal ti skʼan tsotsuk avoʼonton xchiʼuk ti mu xachibaje? Mu me xnik avoʼonton xchiʼuk mu me xaxiʼ, yuʼun li Jeova Dios avuʼune te chchiʼinot ti buyuk noʼox chabate».+

10 Vaʼun, li Josuee xi laj yalbe mantal li j-abteletik ta jteklume: 11 «Batanik ti bu spasoj skarpanaike, xi xavalbeik mantal li jteklume: ‹Chapano aveʼelik, yuʼun li ta yoxibal kʼakʼale chatuchʼik jelavel li Jordane, cha-ochik batel li ta jteklume xchiʼuk chavuʼuninik li osil ti chakʼboxuk+ li Jeova Dios avuʼunike›».

12 Li Josuee xi laj yalbe li jrubenetik, jgadetik xchiʼuk li j-oʼlol snitilulal Manasese: 13 «Vuleso ta ajolik ti xi laj yalboxuk mantal+ li Moises ti jaʼ yajtunel Jeovae: ‹Li Jeova Dios avuʼunike laj yakʼboxuk li osil liʼe sventa jun avoʼonton te xanakiik. 14 Li avajnilike, li anichʼnabike xchiʼuk li achonbolomike liʼ chkomik ta osil ti laj yakʼboxuk Moises liʼ ta jot* Jordane,+ pe skotol li soltaroetik ti lek xuʼ yuʼunike+ lek xcholet chbatik, jaʼ jbabe chbatik, jaʼ patil to li avermanotakike.+ Skʼan xakoltaik 15 jaʼ to mi laj yakʼbe xkux yoʼonton Jeova li achiʼilik ta vokʼel jech kʼuchaʼal la spas ta atojolalike. Li stukik eke ta xuʼuninik li osil ti ch-akʼbatik yuʼun li Jeova Dios yuʼunike. Vaʼun, xuʼ xa xasutik talel li ta osil ti laj avichʼik akʼbele sventa te xanakiik xchiʼuk xavuʼuninik, jaʼ li osil ti laj yakʼboxuk Moises ti jaʼ yajtunel Jeova li ta stukʼil slokʼeb kʼakʼal ta Jordane›».+

16 Xi la stakʼbeik li Josuee: «Ta jpaskutik skotol li kʼusi chavalbunkutike, chibatkutik ti buyuk noʼox chatakunkutik batele.+ 17 Jaʼ jech ta jchikintabotkutik jech kʼuchaʼal la jchikintabekutik li Moisese. Jaʼ noʼox akʼo xchiʼinot li Jeova Dios avuʼun jech kʼuchaʼal la xchiʼin li Moisese.+ 18 Buchʼuuk noʼox ti mu stsak ta venta li kʼusi chavale xchiʼuk ti mu xchʼun li amantale akʼo chamuk.+ Jaʼ noʼox tsotsuk me avoʼonton xchiʼuk mu me xachibaj».+

2 Vaʼun, li Josue ti jaʼ xnichʼon li Nune ta nakʼal* la stak batel chaʼvoʼ jpaʼivanejetik* ti te likik batel ta Sitime.+ Xi laj yalanbee: «Bat kʼelik li balumile, pe jaʼ mas xakʼelik kʼu yelan li Jerikoe». Batik li chaʼvoʼ viniketike, te kʼotik ta sna jun jchonbail ants ti Raab+ sbie. Te komik. 2 Xi kʼot aʼyej ta stojolal li ajvalil ta Jerikoe: «¡Kajval!, ochik tal nax ta akʼobaltik j-israelal viniketik, tal spaʼiik* li jlumaltike». 3 Jaʼ yuʼun, li ajvalil ta Jerikoe xi la stakbe batel mantal li Raabe: «Lokʼeso tal li viniketik ti liʼ oyik ta anae, yuʼun tal spaʼiik* sjunul li jlumaltike».

4 Li antse bat snakʼ* li chaʼvoʼ viniketike. Laje, xi la stakʼ li antse: «Jech ta melel, liʼ ayik li viniketike, pe mu jnaʼ bu likemik tal. 5 Lokʼik batel kʼalal ch-ikʼub xa osile, jaʼo kʼalal jutuk xa skʼan xichʼ bajel stiʼ li jteklume. Mu jnaʼ bu batik, pe xuʼ van xataik to ta be mi anil labatike». 6 (Pe li antse yikʼojan xa ox muyel ta sjol sna, la snakʼ* ta lino ti te kʼiil yuʼun ta sjol snae). 7 Jaʼ yuʼun, li viniketike anil xa batik ta stukʼil Jordan, te ta ukʼumaltik.+ Kʼalal lokʼik batel li viniketik ti bat nutsvanikuke, laj yichʼ makel li jteklume.

8 Li antse muy batel ta sjol sna kʼalal muʼyuk toʼox vayemik li chaʼvoʼ viniketike. 9 Xi laj yalbe yaʼiike: «Jnaʼoj lek ti chakʼboxuk Jeova li osil liʼe+ xchiʼuk xiʼemunkutik xa tajek avuʼunik.+ Skotol li jnaklejetike muʼyuk xa stsatsal yoʼontonik ta akojik,+ 10 yuʼun kaʼiojkutik ti kʼalal lalokʼik ta Ejiptoe takin kom yuʼun Tsajal nab li Jeovae.+ Kaʼiojkutik xtok li kʼusi la apasbeik li chaʼvoʼ ajvalil yuʼun j-amorreoetike, jaʼ li Seon+ xchiʼuk Og+ ti te la amilik ta jot* Jordane. 11 Kʼalal kʼot ta jchikinkutike, toj xiʼel likʼotkutik,* muʼyuk xa buchʼu ti tsots koʼontonkutik ta akojike, yuʼun li Jeova Dios avuʼunike jaʼ Dios ta vinajel xchiʼuk ta balumil.+ 12 Tana un, avokolikuk, jamal xavalik ta stojolal Jeova ti jech kʼuchaʼal laj kakʼ ta ilel tukʼil kʼanelal ta atojolalike, jaʼ jech xavakʼik ta ilel tukʼil kʼanelal ta stojolal li yutsʼ yalal jtot eke xchiʼuk akʼbeikun junuk senyail ti lek avoʼontonike.* 13 Skʼan xapasik ta perton li jtote, li jmeʼe, li jchiʼiltak ta vokʼele xchiʼuk skotol li buchʼutik te nakal ta snaike; koltaunkutik sventa mu xichamkutik».+

14 Xi laj yal li viniketike: «¡Jaʼ chkakʼkutik ta prental* li jkuxlejalkutike!* Mi muʼyuk buchʼu chavalbeik ti kʼusi jnopoj ta jpaskutike, chkakʼkutik ta ilel tukʼil kʼanelal ta atojolalik xchiʼuk tukʼ chkakʼ jbakutik ta atojolalik kʼalal mi laj yakʼbunkutik Jeova li balumil liʼe». 15 Ta tsʼakale, la sjokʼan yalel ta chʼojon ta ventana li viniketike, yuʼun li snae te tsakal xchiʼuk li smuroal jteklume. Jech, te spasoj sna ta smuroal li jteklume.+ 16 Xi laj yalanbe batele: «Batanik li ta vitstikaltike, te xanakʼ* abaik oxib kʼakʼal sventa mu staoxuk li buchʼutik tsaʼoxuke. Mi sutik xa ox talel li buchʼutik tsaʼoxuke, xuʼ xasutik batel ti bu lalikik tale».

17 Xi laj yalik li viniketike: «Li kʼusi laj aval ti akʼo xkakʼ kekutike,+ jaʼ noʼox me jech ta jpaskutik 18 mi la jkilkutik ti te chukul ta aventana li tsajal chʼojon ti jaʼ chiyalkutik-o avuʼun kʼalal mi li-ochkutik tal li ta jteklume. Ikʼo talel ta ana li atote, li ameʼe, li achiʼiltak ta vokʼele xchiʼuk li yutsʼ yalal atote.+ 19 Mi oy buchʼu lokʼ ta stiʼ ana ti lek xa chakʼ sba ta ilele, chkom ta sba stuk li xchʼichʼele, maʼuk ta jmulkutik. Pe mi oy buchʼu junukal laj yil svokol kʼalal te tikʼil ta anae, jaʼ chkom ta jbakutik li xchʼichʼele. 20 Pe mi laj aval ti kʼusi jnopoj ta jpaskutike,+ muʼyuk jmul chikomkutik ta sventa li kʼusi laj aval ti akʼo xkakʼ kekutike». 21 Xi la stakʼ li antse: «Jechuk xkʼot ta pasel kʼuchaʼal chavalike».

La stakan batel, jech la stam batel sbeik. Vaʼun, li antse la xchuk ta sventana li tsajal chʼojone. 22 Batik li ta vitstikaltike, oxib kʼakʼal te komik jaʼ to ti kʼalal sutik talel li buchʼutik yakal tsaʼvanike. Xjoyet tajek saʼelik ta bebetik, pe muʼyuk la staik. 23 Li chaʼvoʼ viniketike yalik talel li ta vitstikaltike, la xtuchʼik jelavel li ukʼume, vaʼun batik ta stojolal Josue ti jaʼ xnichʼon li Nune. La xchapbeik skotol li kʼusitik la snuptanike. 24 Xi laj yalbeik li Josuee: «Laj yakʼbutik xa Jeova sjunul li lume.+ Skotol li jnaklejetike muʼyuk xa stsatsal yoʼontonik ta jkojtik».+

3 Li Josuee sob xa tajek lik ta yokʼomal xchiʼuk lokʼik batel ta Sitim+ xchiʼuk skotol li j-israeletike,* te kʼotik ta Jordan. Te echʼ yuʼunik akʼobal kʼalal mu to chjelavik batel ta jot Jordane.

2 Li ta yoxibal kʼakʼale, li j-abteletike+ echʼ xanik ti bu spasoj skarpanaik li jteklume, 3 xi laj yalbeik mantal li jteklume: «Mi laj avilik ti xkuchojik xa batel xkaxail strato Jeova Dios avuʼunik li paleetik ti jaʼ jlevietike,+ skʼan noʼox me xatotsik sventa xatsʼakliik batel. 4 Pe mu me toj nopoluk tijil xabatik, skʼan chaʼmil xukʼubil* snatil xavilik li kaxae; mu xanopajik batel mas, yuʼun jaʼ noʼox sventa xanaʼik bu chatam batel abeik ta skoj ti jaʼ to sba velta te cha-echʼike».

5 Li Josuee xi laj yalbe li jteklume: «Chʼultajeso abaik,+ yuʼun li okʼome oy kʼusitik toj echʼ noʼox labal sba tspas ta atojolalik+ li Jeovae».

6 Li Josuee xi laj yalbe li paleetike: «Kuchik batel li xkaxail+ tratoe, voʼoxuk jbabe chabatik yuʼun li jteklume». Jaʼ yuʼun, la xkuchik batel li xkaxail tratoe xchiʼuk jaʼ jbabe batik.

7 Vaʼun, li Jeovae xi laj yalbe li Josuee: «Li avi kʼakʼale, chlik jtoybot akʼoplal ta sat skotol li Israele+ sventa snaʼik ti ta jchiʼinot-o+ jech kʼuchaʼal la jchiʼin li Moisese.+ 8 Xi xavalbe mantal li paleetik ti xkuchojik batel li xkaxail tratoe: ‹Mi lakʼotik ta stiʼil li ukʼum Jordane,+ ochanik li ta Ukʼume, pe te vaʼal xakomik›».

9 Li Josuee xi laj yalbe li j-israeletike: «Nopajanik tal, aʼio avaʼiik kʼusi chal li Jeova Dios avuʼunike». 10 Xi laj yal li Josuee: «Jaʼ jech chanaʼik ti kuxul li Dios ti liʼ xchiʼukoxuke,+ jpʼel skʼoplal tsnuts lokʼel ta atojolalik li jkanaanetike, li j-etetike, li j-eveoetike, li jperisitaetike, li jguirgaseoetike, li j-amorreoetike xchiʼuk li jebusetike.+ 11 Li xkaxail strato Yajval spʼejel balumile jaʼ jbabe chbat avuʼunik xchiʼuk ch-och batel li ta Jordane. 12 Jaʼ yuʼun, tʼujik 12 ta voʼ viniketik li ta snitilulal Israele, jun vinik ta jujuchop nitilulal.+ 13 Chpaj yok li ukʼum ti chlik tal ta akʼol kʼalal naka noʼox tstekʼan* yakanik ta yut ukʼum Jordan li paleetik ti xkuchojbeik batel li Xkaxa Jeovae, jaʼ xkaltik, li Yajval spʼejel balumile. Li voʼe te tsʼanal chkom jech kʼuchaʼal kʼalal makbil yok li ukʼume».+

14 Kʼalal mu to chtuchʼik jelavel Jordan li jteklume, lokʼik batel ti bu spasoj skarpanaike. Jaʼ jbabe batik ta stojolal jteklum li paleetik ti xkuchojik batel li xkaxail+ tratoe. 15 Li buchʼutik xkuchojik batel li Kaxae kʼotik ta Jordan, kʼalal naka noʼox la stekʼan yakanik ta yut voʼ li paleetik ti xkuchojik batel li Kaxae (li vaʼ kʼakʼal ti jaʼo yorail tstsobbeik sat li kʼusitik chichʼ tsʼunele, nojem tajek yok li Ukʼum ti chmal to lokʼel ta jujujot stiʼile),+ 16 paj yok li ukʼum ti chlik tal ta akʼole, te tsʼanal kom jech kʼuchaʼal kʼalal makbil yok li ukʼume. Nom to tajek ti bu la stsʼan sbae, te to ta Adan ta stsʼel jteklum Saretan. Yan li yok ukʼum ta olone te bein-o batel ta nab Araba, li nab Muertoe.* Jaʼ jech paj yok li ukʼume, vaʼun la xtuchʼik jelavel ta yeloval Jeriko li jteklume. 17 Li paleetik ti xkuchojik batel li xkaxail strato Jeovae te vaʼal-o komik ta yut ukʼum Jordan ti takin xa oxe+ jaʼ to ti kʼalal jelav batel skotolik ta jot Jordan li jteklume.

4 Li Jeovae xi laj yalbe Josue kʼalal naka noʼox la xtuchʼik jelavel Jordan sjunul li jteklume: 2 «Tʼujo 12 ta voʼ viniketik li ta jteklume, jun vinik ta jujuchop nitilulal.+ 3 Xi xavalanbe mantale: ‹Tsobik 12 ta pʼej ton li ta oʼlol Jordane, te xalokʼesik ti bu stekʼanoj yakanik li paleetike,+ ichʼik lokʼel ta jot ukʼum, te xavakʼik ti bu ch-echʼ avuʼunik akʼobale›».+

4 Jaʼ yuʼun, li Josuee la stakan ta ikʼel li 12 ta voʼ viniketik ti te la stʼuj lokʼel ta stojolal j-israeletike, jun vinik ta jujuchop nitilulal. 5 Vaʼun, xi laj yalanbee: «Ochanik batel ta Jordan ta yeloval li Xkaxa Jeova Dios avuʼunike, ta jujuntal skʼan xakajan talel ta anekebik jpʼej ton, jujupʼej xatsakik talel sventa li jujuchop snitilulal j-israeletike. 6 Li tonetik taje jaʼ tsvules ta ajolik li kʼusi la spas Dios ta atojolalike. Mi xi tsjakʼboxuk ta mas tsʼakal li anichʼnabike:* ‹¿Kʼu yuʼun liʼ avakʼoj li tonetik liʼe?›.+ 7 Xi skʼan xavalbeike: ‹Yuʼun li ukʼum Jordane paj yok ta yeloval li xkaxail+ strato Jeovae. Kʼalal jelav li ta ukʼum Jordane, paj yok li ukʼume. Li tonetik liʼe chtun sventa snaʼobil yuʼunik sbatel osil li jteklum Israele›».+

8 Li j-israeletike jech tajek la spasik kʼuchaʼal albatik mantal yuʼun li Josuee. La stamik 12 ta pʼej ton li ta yutil ukʼum Jordan jech kʼuchaʼal albat yuʼun Jeova li Josuee. Jujupʼej la stsakik lokʼel sventa li jujuchop snitilulal j-israeletike. Laj yichʼik batel ti bu ch-echʼ yuʼunik akʼobale, te la stsopanik.

9 Li Josue eke te la slats 12 ta pʼej ton ta oʼlol yutil li ukʼum Jordane, te la slats ti bu la stekʼan yakanik+ li paleetik ti xkuchojik li xkaxail tratoe. Li tonetike te oy-o kʼalal to avie.

10 Li paleetik ti xkuchojik li Kaxae te vaʼal-o komik li ta ukʼum Jordane jaʼ to ti kʼalal pas yuʼun jteklum skotol li kʼusi albat yuʼun Jeova li Josuee. Jech la spasik kʼuchaʼal onoʼox albat yuʼun Moises li Josuee. Ti kʼu sjalil taje, li jteklume la suj sbaik sventa xtuchʼik jelavel li ukʼume. 11 Kʼalal naka noʼox jelav sjunul li jteklume, te skʼelojik ti kʼalal jelav li Xkaxa Jeovae xchiʼuk li paleetike.+ 12 Li jrubenetik, li jgadetik xchiʼuk li j-oʼlol snitilulal Manasese lek xcholet jelavik kʼuchaʼal soltaroetik,+ jaʼ jbabe jelavik ta stojolal j-israeletik jech kʼuchaʼal albilik onoʼox yuʼun li Moisese.+ 13 Te van 40 mil soltaroetik ti stsakoj batel yabtejebik sventa paskʼope, echʼik ta yeloval Jeova, batik ta takixokol balumil ta stenlejaltik yuʼun Jeriko.

14 Li vaʼ kʼakʼale, li Jeovae la stoybe skʼoplal Josue ta sat skotol li j-israeletike.+ Li j-israeletike lek laj yichʼik ta mukʼ* Josue ti kʼu sjalil kuxul jech kʼuchaʼal lek laj yichʼik ta mukʼ li Moisese.+

15 Li Jeovae xi laj yalbe li Josuee: 16 «Albo mantal li paleetik ti xkuchojik xkaxail+ Mantal* ti akʼo lokʼikuk li ta ukʼum Jordane». 17 Jaʼ yuʼun, li Josuee xi laj yalbe mantal li paleetike: «Lokʼanik xa tal li ta Jordane». 18 Kʼalal lokʼik ta Jordan li paleetik ti xkuchojik li xkaxail+ strato Jeovae xchiʼuk kʼalal naka noʼox la stekʼan yakanik li ta takin balumile, ta ora noʼox lik beinuk yan velta li voʼe xchiʼuk lik maluk lokʼel ta jujujot stiʼil+ kʼuchaʼal onoʼoxe.

19 Ta slajunebal kʼakʼal yuʼun li sba ue lokʼik ta Jordan li jteklume xchiʼuk te la spas skarpanaik ta Guilgal+ ta stsʼak Jeriko ta stukʼil slokʼeb kʼakʼal.

20 Li Josuee te la slats ta Guilgal+ li 12 ta jpʼej ton la slokʼesik ta Jordane. 21 Li Josuee xi laj yalbe li j-israeletike: «Mi xi tsjakʼboxuk ta mas tsʼakal li anichʼnabike: ‹¿Kʼusi smelolal li tonetik liʼe?›,+ 22 xi xachapbeik li anichʼnabike: ‹Kʼalal echʼ xtuchʼik Jordan li Israele takin ti bu echʼike,+ 23 yuʼun li Jeova Dios avuʼunike laj yakʼ takijuk li ukʼum ta jtojolalkutike, jech-o takin kom jaʼ to ti kʼalal lijelavkutike. Li Jeova Dios avuʼunike jech la spas kʼalal laj yakʼ takijuk ta jtojolalkutik li Tsajal nab sventa xijelavkutike.+ 24 Jech la spas sventa xil skotol jteklumetik ta spʼejel balumil ti oy sjuʼel li skʼob Jeovae+ xchiʼuk jaʼ sventa xaxiʼtaik-o* li Jeova Dios avuʼunik eke›».

5 Kʼalal la stakijes ukʼum Jordan li Jeova sventa xtuchʼik jelavel li j-israeletike, kʼot ta xchikinik skotol li ajvaliletik yuʼun j-amorreoetik+ ti te nakalik ta stukʼil smaleb kʼakʼal* yuʼun Jordane xchiʼuk skotol li ajvaliletik yuʼun jkanaanetik+ ti te nakalik ta xokon nabe. Kʼalal naka noʼox kʼot ta xchikinike, nik yoʼontonik*+ xchiʼuk muʼyuk xa buchʼu tsots yoʼonton yuʼunik ta skoj li j-israeletike.+

2 Li Jeovae xi laj yalbe Josue li vaʼ kʼakʼale: «Meltsano kuchiluetik ta pedernal ton sventa xavakʼbe yichʼ sirkunsision*+ li viniketik ta Israele. Xchibal xa velta ti jech chichʼ pasel li sirkunsisione». 3 Jaʼ yuʼun, li Josuee la smeltsan kuchiluetik ta pedernal ton xchiʼuk te laj yakʼbe yichʼ sirkunsision ta Guibeat-Aaralot*+ li viniketik ta Israele. 4 Ti kʼu yuʼun laj yakʼbe yichʼ sirkunsision Josue li viniketike, jaʼ ta skoj ti chamemik xa ox skotol li viniketik ochemik ta soltaroal* ti lokʼik talel ta Ejiptoe. Jaʼo chamik kʼalal nom xa ox yiktaojik li Ejiptoe,+ jaʼo kʼalal te xa ox oyik ta takixokol balumile. 5 Skotol li krixchanoetik ti lokʼik ta Ejiptoe yichʼojik sirkunsision, pe skotol li buchʼutik te xa vokʼik ta takixokol balumil kʼalal lokʼemik xa ox ta Ejiptoe muʼyuk yichʼojik sirkunsision. 6 Li j-israeletike 40 jabil+ xanavik ta takixokol balumil jaʼ to ti kʼuxi cham sjunul li jteklume, jaʼ xkaltik, li viniketik ochemik ta soltaroal ti lokʼik ta Ejiptoe, jaʼik li buchʼutik muʼyuk la xchʼunbeik smantal li Jeovae.+ Li Jeovae laj yakʼ ye ti muʼyuk bu chakʼbe yilik li balumile,+ jun balumil ti bu oy lek leche xchiʼuk pome,+ jaʼ li balumil ti laj yakʼ ye Jeova chakʼbe steklumale.+ 7 Jech oxal, li Diose jaʼ xa laj yikta ta xkʼexol moltotiletik li nichʼnabiletike.+ Taje jaʼ li buchʼutik akʼbat yichʼik sirkunsision yuʼun li Josuee, yuʼun muʼyuk laj yichʼik sirkunsision kʼalal jaʼo chanavik ta takixokol balumile.

8 Kʼalal laj xa ox yakʼbeik yichʼ sirkunsision sjunul li jteklume, te komik ti bu spasoj skarpanaike jaʼ to ti kʼalal tsatsubike.

9 Li Jeovae xi laj yalbe li Josuee: «Li avie, laj xa jlokʼes* ta atojolalik ti chkʼexlaltasoxuk li j-ejiptoetike». Jech oxal, Guilgal*+ la sbiin li osil taje, jech-o sbi kʼalal to avie.

10 Li j-israeletike te to komik ta Guilgal. Li ta mal kʼakʼal ta 14 yuʼun li ue la spasik li Kʼin Koltaele,+ te la spasik ta takixokol balumil ta stenlejaltik yuʼun Jeriko. 11 Vaʼun, li ta yokʼomal kʼalal echʼ xa ox li Kʼin Koltaele, lik slajesik li kʼusitik chlokʼ ta osile, la sveʼik pan ti muʼyuk slevaduraile*+ xchiʼuk la slajesik bakubtasbil sat tsʼunobiletik. 12 Li ta yokʼomal taje, kʼalal la slajesik li kʼusi chlokʼ ta osile, muʼyuk xa ox chyal tal mana. Muʼyuk xa la staik mana li j-israeletike,+ jaʼ xa lik slajesik li kʼusitik chlokʼ ta yosilal Kanaan li vaʼ jabile.+

13 Kʼalal jaʼo te nopol oy ta Jeriko li Josuee, la stoy batel sat, laj yil ti te vaʼal jun vinik+ ti stsakoj s-espadae.+ Nopaj batel li Josuee, xi la sjakʼbe li vinike: «¿Mi jchiʼilotkutik o mi kajkontraotkutik?». 14 Xi la stakʼ li vinike: «Li voʼone takbilun talel kʼuchaʼal bankilal yuʼun yajsoltarotak Jeova».+ Li Josuee la snijan sba xchiʼuk la skejan spatan sba ta lumtik. Xi laj yalbe li vinike: «Kajval, ¿kʼusi mantal tal avalbe li avajtunele?». 15 Li bankilal yuʼun yajsoltarotak Jeovae xi laj yalbe li Josuee: «Lokʼo li axonobe, yuʼun chʼul balumil ti bu vaʼalote». Jech la slokʼ xonob ta anil li Josuee.+

6 Li Jerikoe lek bajal stiʼ ta skoj li j-israeletike; muʼyuk buchʼu xuʼ xlokʼ mi jaʼuk buchʼu xuʼ x-och.+

2 Xi albat yuʼun Jeova li Josuee: «Ta melel, kakʼojbot xa ta akʼob li Jerikoe, li ajvalil yuʼune xchiʼuk li yajsoltarotak ti lek xuʼ yuʼunike.+ 3 Skotol li viniketik ochemik ta soltaroal avuʼunike skʼan xchan yakanik* ta sjoylejal li jteklume, jun velta akʼo sjoyibtaik. Vakib kʼakʼal jech skʼan xapasik. 4 Vukvoʼ paleetik akʼo yichʼik jelavel jujun xulub tot chij ti jaʼ jbabe chbatik ti jaʼ ta patil tijil chbat li Kaxae. Pe li ta svukubal kʼakʼale skʼan xachan avakanik* vukub velta ta sjoylejal li jteklume, jech xtok, li paleetike skʼan sjupan xkachuik.+ 5 Mi laj yichʼ jupanel li xulub tot chije —jaʼ noʼox mi laj yaʼiik chbakʼ* li kachue—, skʼan tsots x-avanik sventa paskʼop skotol li soltaroetike. Vaʼun, ta jech noʼox chlom yalel li muroetike.+ Ti bu vaʼalik li soltaroetik une te akʼo tukʼ muyikuk batel».

6 Jaʼ yuʼun, li Josue xnichʼon li Nune la stak ta ikʼel li paleetike, xi laj yalbe yaʼiike: «Ichʼik batel li xkaxail tratoe, jech xtok, vukvoʼ paleetik skʼan xichʼik batel jujun xulub tot chij ti jaʼ jbabe chbatik ti jaʼ ta patil tijil chbat li Xkaxa Jeovae».+ 7 Vaʼun, xi laj yalbe li soltaroetike: «Likanik, bat chano avakanik* ta sjoylejal li jteklume, jech xtok, li soltaroetik ti stsakoj yabtejebike+ jaʼ jbabe akʼo batikuk, jaʼ ta patil tijil chbat li Xkaxa Jeovae». 8 Jech kʼuchaʼal albatik yuʼun Josue li soltaroetike, li vukvoʼ paleetik ti yichʼojik jelavel jujun xulub tot chij ta yeloval li Jeovae jaʼ jbabe batik xchiʼuk la sjupan li xkachuike, jaʼ ta patil tijil bat li xkaxail strato Jeovae. 9 Li soltaroetik ti stsakoj yabtejebike jaʼ jbabe jelavik batel, jaʼ ta patil tijil batik li paleetik ti tsjupanik kachue. Li jtsop soltaroetike te tijil chbatik ta spat Kaxa kʼalal jaʼo tsjupan xkachuik li paleetike.

10 Li Josuee xi xa onoʼox yalojbe mantal li jteklume: «Mu me xa-avanik, mi jaʼuk xakʼopojik. Mu me kʼusi xlokʼ ta aveik jpʼeluk jaʼ to mi xi laj kalboxuke: ‹¡Avananik!›, vaʼun jaʼo cha-avanik». 11 Laj yal mantal ti akʼo sjoyibtaik ta Xkaxa Jeova li jteklum Jerikoe, jun noʼox velta la sjoyibta yuʼunik, laje sutik batel ti bu spasoj skarpanaike, te echʼ yuʼunik akʼobal.

12 Li ta yokʼomale sob xa tajek lik li Josuee xchiʼuk laj yichʼbeik batel Xkaxa+ Jeova li paleetike. 13 Li vukvoʼ paleetik ti yichʼojik jujun xulub tot chije jaʼ jbabe batik, jaʼ tijil bat ta patil li Xkaxa Jeovae, mu xpajik ta sjupanel li xkachuike. Li paleetike te tijilik batel ta spat li soltaroetik ti stsakoj yabtejebike, yan li jtsop soltaroetike te tijilik batel ta spat li Xkaxa Jeovae. Li paleetike mu xpaj ta sjupanel li xkachuike. 14 Li ta xchibal kʼakʼale jun noʼox velta la xchan yakanik* ta sjoylejal li jteklume, laje sutik batel ti bu spasoj skarpanaike. Vakib kʼakʼal jech la spasik.+

15 Sob xa tajek likik li ta svukubal kʼakʼale, jaʼo kʼalal naka noʼox sakub tal osile. Vukub velta la xchan yakanik* ta sjoylejal jteklum li vaʼ kʼakʼale, koʼol la spasik svukubal velta. Jaʼ noʼox li vaʼ kʼakʼale vukub to velta+ la xchan yakanik ta sjoylejal li jteklume. 16 Li paleetike la sjupan xkachuik kʼalal vukub xa ox velta la sjoyibtaik li jteklume, vaʼun li Josuee xi laj yalbe li soltaroetike: «¡Avananik,+ yuʼun li Jeovae laj xa yakʼ ta akʼobik li jteklume! 17 Skʼan xichʼ lajesbel skʼoplal ta j-echʼel+ li jteklume xchiʼuk skotol li kʼusitik te oye; yuʼun skotol li kʼusitik te oye, jaʼ yuʼun li Jeovae. Jaʼ noʼox kuxul xaviktaik li jchonbail ants Raabe+ xchiʼuk skotol li buchʼutik te oy ta snae, yuʼun la snakʼ* li chaʼvoʼ j-almantal la jtaktik batele.+ 18 Sventa mu xpichʼ avoʼontonik yuʼun li kʼusitik jpʼel skʼoplal chichʼ lajesele+ xchiʼuk sventa mu xatsakike,+ mu xanopajik batel ta stojolal. Yuʼun mi jech chapasike, chavakʼbeik svokol li jchiʼiltaktik ta Israele, vaʼun jpʼel skʼoplal chichʼik lajesel avuʼunik.+ 19 Pe skotol li plata, li oro xchiʼuk li kʼusitik pasbil ta kovre xchiʼuk ta takʼine chʼul kʼotemik ta stojolal Jeova.+ Skʼan xavichʼik batel ta yavil skʼulejal Jeova».+

20 Kʼalal laj yichʼ jupanel li kachue,+ avanik li soltaroetike. Kʼalal naka noʼox laj yaʼiik laj yichʼ jupanel kachu li soltaroetike xchiʼuk kʼalal tsots avanik sventa paskʼope, jin li muroe.+ Laje, li soltaroetike muyik batel li ta jteklume, ti bu stukʼil oyike ta jujuntal te tukʼ muyik batel, jech laj yuʼuninik li jteklume. 21 La slajesbeik skʼoplal ta espada skotol li buchʼutik te oy ta jteklume, viniketik, antsetik, kerem tsebetik xchiʼuk li buchʼutik oy xa sjabilalike, laj kʼalal ta tot vakax, chij xchiʼuk vuro.+

22 Li Josuee xi laj yalbe li chaʼvoʼ viniketik ti ay spaʼiik* jteklume: «Ochanik batel ta sna li jchonbail antse, bat ikʼik talel xchiʼuk skotol li buchʼutik te oy ta sna jech kʼuchaʼal laj avakʼ aveik ta stojolale».+ 23 Jaʼ yuʼun, li viniketik ti ay spaʼiik* li jteklume laj yikʼik talel li Raabe, laj yikʼbeik talel li stote, li smeʼe, li xchiʼiltak ta vokʼele xchiʼuk skotol li buchʼutik te oy ta snae; laj yikʼik lokʼel skotol li yutsʼ yalale,+ te to laj yikʼik batel ta spat ti bu spasoj skarpana li Israele, lek kʼotik.

24 La xchikʼik li jteklume xchiʼuk skotol li kʼusitik te oye. Pe li plata, li oro xchiʼuk li kʼusitik pasbil ta kovre xchiʼuk ta takʼine laj yichʼik batel ta yavil skʼulejal Jeova.+ 25 Li Josuee jaʼ noʼox kuxul laj yikta+ li Raab xchiʼuk stot xchiʼuk skotol li buchʼutik te oy ta sna stote. Li Raabe te kom-o ta naklej ta Israel kʼalal to avie,+ yuʼun la snakʼ* li chaʼvoʼ j-almantal ti takatik batel ta Jeriko yuʼun li Josuee.+

26 Li vaʼ kʼakʼale, xi jamal laj yakʼ ye li Josuee:* «Chopol kʼoptabiluk ta stojolal Jeova buchʼuuk noʼox ti tsnop tsvaʼan yan velta li jteklum Jerikoe. Mi lik yakʼbe snakleb li jteklume, chcham li sba xnichʼone, mi laj yakʼbe smak stiʼ li jteklume,+ chcham li slajeb xnichʼone».

27 Te chiʼinbil-o yuʼun Jeova li Josuee+ xchiʼuk puk batel skʼoplal ta spʼejel balumil.+

7 Pe li j-israeletike muʼyuk tukʼ xakʼ sbaik, yuʼun muʼyuk la xchʼunik mantal ta sventa li kʼusitik albil skʼoplal ti skʼan xichʼ lajesel ta j-echʼele, yuʼun li Akan+ xnichʼon Karmi ti jaʼ smom Sabdi li ta yutsʼ yalal Sera ta snitilulal Judae oy kʼusi la stsak ti albil skʼoplal chichʼ lajesel ta j-echʼele.+ Ta skoj taje, tsan skʼakʼal yoʼonton Jeova ta stojolal li j-israeletike.+

2 Li Josuee la stak batel viniketik ta Ai,+ te likik batel ta Jeriko. Li Aie nopol xil Bet-Aven xchiʼuk te xkom ta stukʼil slokʼeb kʼakʼal ta Betel.+ Xi laj yalanbe batele: «Batanik, muyanik batel sventa xbat apaʼiik* li osile». Jech oxal, li viniketike muyik batel sventa xbat spaʼiik li Aie. 3 Kʼalal sutik talele, xi kʼot yalbeik li Josuee: «Mu persauk xmuy batel sjunul li jteklume. Lek noʼox ta chaʼmil o oxmil viniketik sventa jtsaltik li Aie. Mu xalubtsan sjunul li jteklume, mu persauk xmuy batel skotolik, yuʼun jutebik noʼox».

4 Jaʼ yuʼun, te van oxmil viniketik muyik batel, pe nutsatik tal yuʼun li viniketik ta Aie.+ 5 Li viniketik ta Aie la smilik 36 viniketik xchiʼuk te noʼox ta stiʼ jteklum lik snutsik lokʼel kʼalal to ta Sebarim,* te la smilik komel ta yalebaltik. Ti kʼu toʼox yelan spatoj yoʼonton li jteklume kʼunib batel, ul batel jech kʼuchaʼal voʼ.

6 Ta skoj taje, la sliʼ ta jatel skʼuʼ spokʼ li Josuee xchiʼuk la skejan spatan sba ta lum ta yeloval Xkaxa Jeova. Jech xtok, te patal-o kʼalal chʼayem xa ox batel kʼakʼale, te xchiʼuk li moletik ta Israele. Jech-o te tsvij pukuk* ta sjolik. 7 Xi laj yal li Josuee: «Kajval Jeova ti voʼot Mukʼul Jpasmantalote, ¿kʼu yuʼun ti jech noʼox laj avakʼ jtuchʼkutik li Jordan sventa tal avakʼunkutik ta yok skʼob li j-amorreoetik yoʼ slajes jkʼoplalkutike? ¡Ti teuk likomkutik ta jot* Jordane, jun noʼox koʼontonkutik ti jechuke! 8 Pasun ta perton, Jeova, ¿kʼusi xa xuʼ xkal ti vi yelan jatavik ta stojolal yajkontratak li Israele? 9 Mi laj yaʼiik jkʼoplalkutik li jkanaanetike xchiʼuk skotol li jnaklejetik ta yantik lume, chtal sjoyobtaunkutik sventa stupʼbe skʼoplal jbikutik li ta sba balumile. Pe ¿kʼusi chapas ta sventa li amukʼul bi une?».+

10 Li Jeovae xi laj yalbe li Josuee: «¡Likan!, ¿kʼu yuʼun ti te patalot ta lume? 11 Laj xa spas smul li Israele. Muʼyuk stsakik ta venta li jtrato+ ti laj kal mantal akʼo xchʼunike. Yuʼun la stsakik li kʼusi albil skʼoplal chichʼ lajesel ta j-echʼele,+ laj yelkʼanik+ xchiʼuk te la snakʼik* ti bu yakʼoj li kʼusitik oy yuʼunike.+ 12 Jaʼ yuʼun, li j-israeletike muʼyuk tstsal yuʼun li yajkontraike. Chjatavik ta skoj li yajkontraike, yuʼun xkoʼolajik xa kʼuchaʼal li kʼusi albil skʼoplal chichʼ lajesel ta j-echʼele. Mi muʼyuk chalajesbeik skʼoplal ta atojolalik li kʼusi albil skʼoplal chichʼ lajesel ta j-echʼele,+ muʼyuk ta jchiʼinoxuk yan velta. 13 ¡Likan, chʼultajeso li jteklume!+ Xi xavalbe yaʼiike: ‹Chʼultajeso abaik sventa okʼom, yuʼun xi chal li Jeova ti jaʼ Dios yuʼun Israele: «Israel, te noʼox oy ta atojolalik li kʼusi albil skʼoplal chichʼ lajesel ta j-echʼele. Mi muʼyuk chalokʼes ta atojolalik li kʼusi albil skʼoplal chichʼ lajesel ta j-echʼele, muʼyuk tstsal avuʼunik li avajkontraike. 14 Sob xatalik li okʼome, te xavaʼan abaik ta jujuchop anitilulalik, li nitilulal tstʼuj Jeovae+ jaʼ chnopaj talel. Li nitilulal chichʼ tʼujele ta jujuchop utsʼ alalil chakʼ sbaik, li utsʼ alalil tstʼuj Jeovae jaʼ chnopaj talel. Li utsʼ alalil chichʼ tʼujele ta jujun sna smoltotik chakʼ sbaik, li sna smoltotik tstʼuj Jeovae jaʼ chnopaj talel, ta jujun vinik chnopaj talel. 15 Li buchʼu chtabat li kʼusi albil skʼoplal chichʼ lajesel ta j-echʼele chichʼ chikʼel ta kʼokʼ+ xchiʼuk skotol li kʼusitik te oy ta snae, yuʼun muʼyuk la stsak ta venta li strato+ Jeovae xchiʼuk toj kʼexlal sba xvinaj ta Israel li kʼusi la spase»›».

16 Li Josuee sob xa lik ta yokʼomal, ta jujuchop snitilulalik laj yikʼan talel li Israele, vaʼun jaʼ laj yichʼ tʼujel li snitilulal Judae. 17 Laj yakʼ nopajuk talel li jujuchop yutsʼ yalal Judae, vaʼun laj yichʼ tʼujel li yutsʼ yalal jseraetike.+ Laje, laj yakʼ nopajuk talel li yutsʼ yalal jseraetike, ta jujun vinik nopajik talel, vaʼun jaʼ laj yichʼ tʼujel li Sabdie. 18 Ta tsʼakal une nopaj talel li yutsʼ yalal Sabdie, ta jujun vinik nopaj tal. Vaʼun, jaʼ laj yichʼ tʼujel+ li Akan xnichʼon Karmi ti jaʼ smom Sabdi li ta yutsʼ yalal Sera ta snitilulal Judae. 19 Li Josuee xi laj yalbe li Akane: «Kuni nichʼon, avokoluk, ichʼo ta mukʼ li Jeova ti jaʼ Dios yuʼun Israele, jamal xavalbe li amule. Avokoluk, albun li kʼusi la apase. Mu xamukbun».

20 Li Akane xi la stakʼbe li Josuee: «Voʼon ti oy jmul ta stojolal li Jeova ti jaʼ Dios yuʼun Israele. Xi kʼot ta pasel kuʼune: 21 ta skotol li kʼusi laj yichʼ pojele te laj kil jlik kʼuʼil pokʼil ti toyol stojol ti kʼupil sba ti likem ta Sinare+ xchiʼuk chib sien siklo* plata xchiʼuk jtel oro ti 50 siklo yalale, kʼupij koʼonton yuʼun, jech oxal la jtsak. Te mukul kuʼun ta lum ta yut jkarpana, jaʼ ta olon oy li takʼine».

22 Li Josuee ta ora noʼox la stak batel j-almantaletik ti anil xa batik li ta skarpana Akane. Te nakʼal* la staik ta yut skarpana li kʼuʼil pokʼile, jaʼ ta olon oy li takʼine. 23 Li j-almantaletike la slokʼesik li kʼusitik te mukul ta yut karpanae, laj yichʼik talel ta stojolal Josue xchiʼuk ta stojolal skotol li j-israeletike. Te laj yakʼik ta yeloval Jeova. 24 Li Josue xchiʼuk skotol j-israeletike laj yikʼik batel li Akane,+ li xnichʼon Serae. Laj yichʼik batel xtok li platae, li kʼuʼil pokʼil ti toyol stojole xchiʼuk li jtel oroe,+ laj yikʼbeik batel li skeremtake, li stsebetake, li stot xvakaxtake, li svurotake, li xchijtake, li skarpanae xchiʼuk skotol li kʼusi oy yuʼune. Laj yikʼik muyel ta stenlejaltik Akor.+ 25 Li Josuee xi laj yalbee: «¿Kʼu yuʼun ti laj avakʼbun jvokolkutike?+ Li avie, chakʼbot avokol li Jeovae». Skotol li j-israeletike jech lik yakʼbeik ton.+ Ta tsʼakale la xchikʼik ta kʼokʼ.+ Jaʼ jech la smilik ta ton skotolik. 26 Kʼalal chamem xa oxe, la slatsbeik epal ton ta sba ti te oy-o kʼalal to avie. Jaʼ jech yoch skʼakʼal yoʼonton li Jeovae.+ Jaʼ yuʼun, li osil taje stenlejaltik Akor* sbi kʼalal to avie.

8 Li Jeovae xi laj yalbe li Josuee: «Mu xaxiʼ xchiʼuk mu xnik avoʼonton.+ Ikʼo muyel skotol li soltaroetike, bat tsakik ta kʼop li Aie. Yuʼun kakʼojbot xa ta akʼob li ajvalil ta Aie, li steklumale, li jnaklejetik yuʼune xchiʼuk li yosile.+ 2 Li Ai xchiʼuk li ajvalil yuʼune jech xapasbe jech kʼuchaʼal la apasbe li Jeriko xchiʼuk li ajvalil yuʼune,+ pe xuʼ xavichʼbeik li kʼusitik oy yuʼunike xchiʼuk li xchonbolomike. Jech xtok, albo soltaroetik ti akʼo bat snakʼ* sbaik ta spat li jteklume».

3 Jaʼ yuʼun, li Josue xchiʼuk skotol li soltaroetike muy stsakik ta kʼop li Aie. Li Josuee la stʼuj 30 mil soltaroetik ti lek xuʼ yuʼunik paskʼope, vaʼun ta akʼobaltik la stak batel. 4 Xi laj yalanbe mantale: «Li voʼoxuke te chanakʼ* abaik ta spat li jteklume. Mu toj nomuk xavakʼ abaik li ta jteklume xchiʼuk lekuk me xachapan aba akotolik. 5 Li voʼon xchiʼuk skotol li soltaroetik te jchiʼuke chinopajkutik batel li ta jteklume. Mi lokʼ stsakunkutik ta kʼop jech kʼuchaʼal la spasik ta sba veltae,+ chijatavkutik talel. 6 Mi la snutsunkutike, jech chnamaj kuʼunkutik li ta steklumalike, vaʼun xi chalike: ‹Chjatavik xa batel jech kʼuchaʼal ta sba veltae›.+ Vaʼun, jech chijatavkutik talel. 7 Li voʼoxuk une skʼan xalokʼik talel ti bu anakʼoj* abaike sventa xa-ochik li ta jteklume; li Jeova Dios avuʼunike chakʼboxuk ta akʼobik. 8 Mi och xa ox ta akʼobik li jteklume, ta ora noʼox xatsanbeik skʼakʼal.+ Jech xapasik jech kʼuchaʼal yaloj li Jeovae. Jaʼ jech chkalboxuk mantal».

9 Li Josue une la stakan batel, te batik ti bu albil tsnakʼ* sbaike, vaʼun te la snakʼ sbaik ta smaleb kʼakʼal ta Ai ti te xkom ta oʼlol yuʼunik li Betel xchiʼuk Aie. Yan li Josuee te echʼ yuʼun akʼobal xchiʼuk li jteklume.

10 Laje, li Josuee sob xa tajek lik ta yokʼomal xchiʼuk la stsob li soltaroetike. Li Josue xchiʼuk li moletik ta Israele jaʼ la sbeiltasik batel ta Ai li soltaroetike. 11 Skotol li soltaroetik+ te xchiʼuke muyik batel, kʼotik kʼalal to ta yeloval jteklum. Te komik ta snorteal Ai. Jaʼ kakal ta oʼlol kom yuʼunik li stenlejaltike. 12 Li Josuee stʼujoj xa onoʼox voʼmil viniketik xchiʼuk te snakʼoj* sbaik+ yuʼun ta smaleb kʼakʼal ta Ai. Li smaleb kʼakʼal ta Aie te xkom ta oʼlol yuʼunik li Betel+ xchiʼuk Aie. 13 Jaʼ yuʼun, li soltaroetik ti mas epike te la spas skarpanaik ta snorteal li jteklume.+ Li soltaroetik ti snakʼoj* sbaike te komik ta stukʼil smaleb kʼakʼal yuʼun li jteklume.+ Li Josuee och batel ta akʼobaltik, oʼlol stenlejaltik la sta batel.

14 Kʼalal naka noʼox laj yil li ajvalil ta Ai ti te xa xtal li j-israeletike, sob xalokʼ batel xchiʼuk li viniketik ta jteklum sventa xbat stsakik ta kʼop li Israele, te bat stsakik ta kʼop ta stukʼil stenlejaltik ta takixokol balumil. Pe mu snaʼ mi oy buchʼutik te nakʼal* ta spat li jteklume. 15 Kʼalal lik tsakvanikuk ta kʼop li viniketik ta Aie, li Josue xchiʼuk skotol li Israele jatavik batel ta takixokol balumil.+ 16 Li krixchanoetik ta jteklume laj yichʼik tsobel skotolik sventa xbat snutsik li j-israeletike; kʼalal snutsojik batel li Josuee, namajik batel li ta steklumalike. 17 Mi junuk vinik kom li ta Ai xchiʼuk ta Betele, skotolik bat snutsik li Israele. Jamal kom yuʼunik li stiʼ jteklume, jech la snutsik batel li Israele.

18 Li Jeovae xi laj yalbe li Josuee: «Yeʼo batel ta stukʼil Ai li javalina* te atsakoje,+ yuʼun chkakʼ ta akʼob li jteklume».+ Li Josuee la syeʼ batel ta stukʼil jteklum li sjavalina stsakoje. 19 Kʼalal naka noʼox la syeʼ li skʼobe, lokʼik talel ta anil li buchʼutik te snakʼoj* sbaike, ta ora ochik batel ta jteklum, jech och ta skʼobik. Ta anil noʼox la stsanbeik skʼakʼal li jteklume.+

20 Kʼalal la skʼel sutel spatik li viniketik ta Aie, laj yilik ti xtomet muyel xchʼailal* kʼalal to ta vinajel li jteklume, jech oxal mu xa snaʼ bu jotukal chbatik ta skoj ti muʼyuk xa yipike. Vaʼun, li krixchanoetik ti yakal chjatavik batel ta takixokol balumile te noʼox joyijik sventa stsakik ta kʼop li buchʼutik tsnutsvanike. 21 Kʼalal laj yakʼ venta Josue xchiʼuk skotol Israel ti och xa ta skʼobik jteklum li buchʼutik snakʼoj* toʼox sbaike xchiʼuk ti laj yilik ti xtomet muyel xchʼailal* li jteklume, joyijik, vaʼun lik stsakik ta kʼop li viniketik ta Aie. 22 Li buchʼutik ochik ta jteklume lokʼ nupvanikuk ek, jaʼ xa te komik ta oʼlol li viniketik ta Aie, yuʼun te xa oyik ta jujujot li j-israeletike. Muʼyuk xa buchʼu kuxul laj yiktaik mi jaʼuk buchʼu jatav batel yuʼunik.+ 23 Pe jaʼ kuxul la stsakik li ajvalil ta Aie,+ vaʼun laj yikʼik batel ta stojolal li Josuee.

24 Kʼalal laj xa ox smilik ta takixokol balumil skotol li jnaklejetik ta Aie ti jaʼ te la smilik ti bu toʼox nutsatik batele xchiʼuk kʼalal laj xa ox smilik skotol ta espadae, sut batel ta Ai skotol li Israele, bat smilik ta espada li buchʼutik te to komemike. 25 Ti kʼu yepal chamik li vaʼ kʼakʼal ti kapal ta vinik ta antse jaʼ 12 mil ta voʼ, chamik skotol li jnaklejetik ta Aie. 26 Li Josuee muʼyuk la syales li skʼob ti jaʼ stsakoj-o li javalinae*+ jaʼ to ti kʼalal la slajesbe skʼoplal ta j-echʼel skotol li jnaklejetik ta Aie.+ 27 Li j-israeletike laj yikʼik batel li chonbolometike xchiʼuk la spojik batel li kʼusitik oy ta jteklume jech kʼuchaʼal albat mantal yuʼun Jeova li Josuee.+

28 Vaʼun, li Josuee la xchikʼ li Aie, jech xa noʼox jinesbil kom+ yuʼun kʼalal to avie. 29 Jech xtok, la sjokʼan ta jtel teʼ* li ajvalil ta Aie, te jokʼol-o kʼalal chchʼay xa ox batel kʼakʼale. Pe kʼalal mu to chchʼay batel kʼakʼale, li Josuee laj yal mantal ti akʼo syalesbeik li sbekʼtale.+ Te bat sjipik ta yochebal stiʼ jteklum xchiʼuk la slatsbeik epal ton ta sba ti te oy-o kʼalal to avie.

30 Li vaʼ kʼakʼale, li Josuee la spasbe skajleb smoton li Jeova Dios yuʼun Israele, te la spas ta vits Ebal,+ 31 jech la spas jech kʼuchaʼal laj yalbe mantal j-israeletik li Moises ti jaʼ yajtunel Jeovae xchiʼuk jech kʼuchaʼal xi tsʼibabil li ta Smantal+ Moisese: «Jun skajleb matanal ti pasbil ta spʼejekil tonetik ti muʼyuk yichʼoj vokʼel ta abtejebal pasbil ta takʼine».+ Jaʼ te laj yakʼbeik chikʼbil matanal li Jeovae xchiʼuk jaʼ te laj yakʼik li milbil matanal sventa jun oʼontonale.+

32 Te la stsʼiba ta tonetik li skopiail Mantal+ ti te skʼeloj j-israeletik kʼalal la stsʼiba li Moisese.+ 33 Skotol li Israele, li moletik yuʼunike, li j-abteletike xchiʼuk li jchapanvanejetik yuʼunike te vaʼalik ta jujujot xokon li Kaxa ta stukʼil li paleetik ti jaʼ jlevietik ti xkuchojik li xkaxail strato Jeovae. Te oyik li jyanlumetike xchiʼuk li buchʼutik te vokʼemik ta Israele.+ Sventa xakʼbeik bendision li jteklum Israele, li j-oʼlole te la svaʼan sbaik ta stukʼil vits Guerisim, li j-oʼlol xtoke te la svaʼan sbaik ta stukʼil vits Ebal+ (jech onoʼox kʼuchaʼal yaloj mantal li Moises ti jaʼ yajtunel Jeovae).+ 34 Laj une, li Josuee tsots laj yapta skotol li kʼusitik chal Mantal+ ti te tsakal skʼoplal li bendision+ xchiʼuk li chopol kʼoptaele,+ jech laj yapta jech kʼuchaʼal tsʼibabil li ta slivroal Mantale. 35 Skotol li mantal yaloj Moisese ta jujupʼel tsots laj yapta skotol li Josuee, laj yaptabe sjunul li tsobobbail yuʼun Israele,+ laj yaʼiik kʼalal ta antsetik, ololetik xchiʼuk li jyanlumetik+ ti te xchiʼukik ta nakleje.*+

9 Skotol li ajvaliletik ti te oyik ta jot Jordane+ laj yaʼiik li kʼusi kʼot ta pasele, jaʼ li buchʼutik te oyik ta vitstikaltike, li ta Sefelae, li ta sjunul stiʼil Mukʼta nabe*+ xchiʼuk li ta yeloval Libanoe. Taje jaʼ li ajvaliletik yuʼun j-etetike, li j-amorreoetike, li jkanaanetike, li jperisitaetike, li j-eveoetike xchiʼuk li jebusetike.+ 2 Skotol li ajvaliletik taje la spas ta jmoj sjolik sventa xbat stsakik ta kʼop li Josue xchiʼuk Israele.+

3 Li jnaklejetik ta Gabaone+ laj yaʼiik ek li kʼusi la spasbe Jeriko+ xchiʼuk Ai+ li Josuee. 4 Toj pʼij kʼusi la spasik; la stikʼik batel kʼusitik x-ayan yuʼunik ta mol koxtaletik, la skajan batel ta svuroik, laj yichʼ batel yav svinoik* ti molik xa tajeke, ti jatemik xa xchiʼuk ti tsʼisbilik xae. 5 Lajemik tajek li xonob slapojik batele xchiʼuk tsʼisbilik xa yuʼunik. Li skʼuʼ spokʼ slapojik xtoke lajemik xa tajek. Takin xa skotol li pan yichʼojik batele xchiʼuk solel vochʼemik xa. 6 Bat skʼelik Josue ta Guilgal ti bu spasoj skarpanaike.+ Xi kʼot yalbeik li Josue xchiʼuk li viniketik ta Israele: «Toj nom to bu likemunkutik talel. Jaʼ yuʼun, jpastik jun trato». 7 Pe li viniketik ta Israele xi la stakʼbeik li j-eveoetike:+ «Xuʼ van te noʼox bu nopol nakaloxuk. ¿Kʼuxi xa noʼox ti ta jpastik jun tratoe?».+ 8 Xi la stakʼbeik li Josuee: «Avajtunelunkutik».*

Xi la sjakʼ li Josuee: «¿Buchʼuoxuk chaʼa, bu likemoxuk talel?». 9 Xi la stakʼike: «Li avajtunelunkutike nom to tajek bu likemunkutik talel+ ta skoj li sbi Jeova Dios avuʼune, yuʼun kaʼiojkutik ti pukem tajek skʼoplale xchiʼuk kaʼiojkutik skotol li kʼusitik la spas ta Ejiptoe.+ 10 Pe jaʼ mas kaʼiojbekutik skʼoplal li kʼusi la spasbe li chaʼvoʼ ajvaliletik yuʼun j-amorreoetik ti te toʼox nakalik ta jot* Jordane, jaʼ li ajvalil Seon+ ta Esbone xchiʼuk li ajvalil Og+ ta Basan ti te toʼox oy ta Astarote. 11 Jaʼ yuʼun, xi laj yalbunkutik li moletik xchiʼuk li jnaklejetik ta jlumalkutike: ‹Batanik, ichʼik batel kʼusitik oy kuʼuntik sventa xatunesik ta be. Batanik ti bu oyike, xi xkʼot avalbeik yaʼiike: «Chi-ochkutik ta amosoik,+ jaʼ yuʼun jpastik jun trato»›.+ 12 Kʼalal lilokʼkutik talel ta jnakutik sventa xitalkutik liʼe, lek toʼox kʼixin li jpankutik laj kichʼkutik tale. Pe kʼelavilik, takinik xa xchiʼuk vochʼemik xa.+ 13 Li yav jvinokutik* liʼe achʼik toʼox kʼalal la jnojeskutik tale, pe li avie jatemik xa.+ Li jkʼuʼ jpokʼ jlapojkutik xchiʼuk li jxonobkutike lajemik xa tajek ta skoj ti lixanavkutik tale, yuʼun toj nom to bu lilikutik tal».

14 Kʼalal jech laj yaʼiike, li viniketik ta Israele la stsakbeik* jlomuk li kʼusitik yichʼojik tale, pe muʼyuk kʼusi la sjakʼbeik li Jeovae.+ 15 Li Josuee jun yoʼonton kom xchiʼukik,+ jech xtok, la spas jun trato sventa kuxul xiktaan, jech laj yakʼ yeik ek+ li bankilaletik te ta tsobobbaile.

16 Kʼalal echʼ xa ox oxib kʼakʼal ti la spasik tratoe, kʼot ta xchikinik ti te noʼox nopol nakalike. 17 Li j-israeletike totsik batel, vaʼun kʼalal echʼ xa ox oxib kʼakʼale, kʼotik ta steklumal li viniketike. Li jteklumetik taje jaʼ Gabaon,+ Kefira, Beerot xchiʼuk Kiryat-Jearim.+ 18 Pe li j-israeletike muʼyuk la stsakik ta kʼop, yuʼun jech laj yakʼ yeik ta stojolal Jeova+ Dios yuʼun Israel li bankilaletik ta tsobobbaile. Jaʼ yuʼun, sjunul li tsobobbaile lik bikʼtal kʼopojikuk ta stojolal li bankilaletike. 19 Ta skoj taje, li bankilaletike xi laj yalbeik sjunul li tsobobbaile: «Ta skoj ti jech laj kakʼ kekutik ta stojolal li Jeova Dios yuʼun Israele, mu kʼusi xuʼ jpasbetik. 20 Xi jpastike: kuxul xkiktatik sventa mu chopoluk xkom jkʼoplaltik ta skoj ti laj kakʼ kekutik yuʼunike».+ 21 Xi to laj yalik li bankilaletike: «Te akʼo kuxiikuk, jaʼ noʼoxe jaʼ tstsobbe tal siʼ xchiʼuk jaʼ tslupbe tal yaʼal sjunul li jteklume». Jaʼ jech laj yakʼ yeik li bankilaletike.

22 Vaʼun, li Josuee la stakan ta ikʼel xchiʼuk xi laj yalbe yaʼiike: «¿Kʼu yuʼun ti la aloʼlaunkutike? Xi laj avalike: ‹Nom to likemunkutik talel›, pe liʼ noʼox nopol nakaloxuke.+ 23 Chopol kʼoptabil chakomik-o+ xchiʼuk mosoil chakomik-o. Jaʼ avabtelik-o ti chatsobik tal siʼ xchiʼuk chalupik tal voʼ ti chtun ta sna li Jdiose». 24 Xi la stakʼbeik li Josuee: «Li Jeova Dios avuʼune laj yalbe yajtunel ti jaʼ li Moises ti chakʼboxuk skotol li osil liʼe xchiʼuk ti skʼan xalajesbeik skʼoplal ta j-echʼel li buchʼutik liʼ nakalike.+ Li avajtunelunkutike kʼot ta jchikinkutik taje, jaʼ yuʼun jech la jpaskutik+ ta skoj ti lixiʼkutik avuʼunik+ ti xuʼ xamilunkutike. 25 Li avie, liʼ oyunkutik ta akʼobe. Pasbunkutik li kʼusi lek chavile xchiʼuk li kʼusi tukʼ chavile». 26 Taje jech la spas li Josuee. La skolta lokʼel ta yok skʼob li j-israeletike, jech muʼyuk xa xmilatik. 27 Pe li vaʼ kʼakʼale, li Josuee laj yakʼ ti jaʼuk stsobik siʼ xchiʼuk slupik voʼ sventa sjunul li tsobobbaile+ xchiʼuk sventa li skajleb smoton Jeovae. Jech-o tspasik kʼalal to avi+ ti bu tstʼuj+ stuk Dios chakʼ li skajleb smotone.

10 Li ajvalil Adoni-Sedek ta Jerusalene laj yaʼi ti och xa ta skʼob Josue li Ai xchiʼuk ti la slajesbe skʼoplal ta j-echʼele. Kʼot ta xchikin ti jech la spasbe li jteklum Ai xchiʼuk li ajvalil yuʼun+ jech kʼuchaʼal la spasbe li Jeriko xchiʼuk li ajvalil yuʼune.+ Maʼuk noʼox taje, yuʼun laj yaʼi ti la spas ta koʼol yoʼontonik+ xchiʼuk li jnaklejetik ta Gabaone xchiʼuk ti te xa xchiʼinojik ta nakleje. Kʼalal naka noʼox laj yaʼi taje, 2 lik svul tajek yoʼonton+ ta skoj ti jaʼ jun mukʼta jteklum li Gabaone ti xkoʼolaj kʼuchaʼal jun mukʼta jteklum ti oy ajvalil yuʼune. Mas to mukʼ ti jaʼ mu sta li Aie,+ jech xtok, chanemik ta paskʼop skotol li viniketik yuʼune. 3 Jaʼ yuʼun, li Adoni-Sedek ti jaʼ ajvalil ta Jerusalene xi la stakbe batel aʼyej li Oam ti jaʼ ajvalil ta Ebrone,+ li Piram ti jaʼ ajvalil ta Jarmute, li Jafia ti jaʼ ajvalil ta Lakise xchiʼuk li Debir ti jaʼ ajvalil ta Eglone:+ 4 «Muyanik tal sventa xakoltaikun, bat jtsaktik ta kʼop li Gabaone, yuʼun laj xa spas ta jmoj yoʼontonik xchiʼuk Josue xchiʼuk li j-israeletike».+ 5 Jaʼ yuʼun, li voʼob ajvalil yuʼun j-amorreoetike,+ jaʼ xkaltik, li ajvalil ta Jerusalen, li ajvalil ta Ebron, li ajvalil ta Jarmut, li ajvalil ta Lakis xchiʼuk li ajvalil ta Eglone la stsob sba skotolik xchiʼuk yajsoltaroik, vaʼun batik xchiʼuk te kʼot sjoyibtaik li Gabaon sventa stsakik ta kʼope.

6 Li viniketik ta Gabaone, xi laj yalbeik batel mantal li Josue ti te oy ti bu yakʼoj skarpanaik ta Guilgale:+ «Mu me xavikta li amosotake.+ ¡Laʼ ta anil! ¡Laʼ koltaunkutik! Yuʼun skotol li ajvaliletik yuʼun j-amorreoetik ta vitstikaltike tal xa stsakunkutik ta kʼop». 7 Jaʼ yuʼun, li Josuee lokʼ batel ta Guilgal, muy batel xchiʼuk skotol li yajsoltarotake xchiʼuk li soltaroetik ti lek xuʼ yuʼunik paskʼope.+

8 Li Jeovae xi laj yalbe li Josuee: «Mu xaxiʼ yuʼun,+ yuʼun kakʼojbot xa ta akʼob skotolik.+ Mi junuk buchʼu xuʼ yuʼun tstsalot».+ 9 Lokʼ batel ta Guilgal li Josuee, xanav batel sjunul akʼobal, vaʼun chʼayal yoʼontonik kʼot sta. 10 Li Jeovae la xchʼaybe yoʼonton skotolik, jaʼ yuʼun mu xa snaʼ kʼusi tspasik.+ Vaʼun, li Israele ep la smilik komel li ta Gabaone, snutsojik to muyel ta sbelel Bet-Oron, jech la smilik batel jaʼ to ti kʼalal kʼotik ta Aseka xchiʼuk ta Makedae. 11 Kʼalal yakal chjatavik ta stojolal li Israele, kʼalal makik xa yalel ta Bet-Orone, li Jeovae laj yakʼ talel mukʼtik bot ta vinajel ti xkoʼolaj ta tone, te to kʼot kʼalal ta Aseka, ep chamik. Mas ep chamik li ta mukʼtik bote, jaʼ mu sta ti kʼu yepal milatik ta espada yuʼun li j-israeletike.

12 Li vaʼ kʼakʼale, kʼalal akʼbat xa ox ta skʼobik yuʼun Jeova j-amorreoetik li j-israeletike, li Josuee xi laj yalbe Jeova ta yeloval li Israele:

13 Paj li kʼakʼale xchiʼuk paj li lunae* jaʼ to ti kʼuxi la spak skʼoplalik ta stojolal yajkontratak li jteklume. ¿Mi mu teuk tsʼibabil ta slivroal Jasar?+ Li kʼakʼale te noʼox kom ta oʼlol vinajel, muʼyuk mak batel jutuk mu junuk kʼakʼal. 14 Taje mi jaʼuk jech oy bu kʼotem ta pasel ta voʼne, mi jaʼuk ta to xkʼot ta pasel yan velta ti la xchʼunbe kʼusi chal jun vinik+ li Jeovae, yuʼun jaʼ stuk Jeova ti yakal tspas kʼop sventa skolta li Israele.+

15 Kʼalal jech xa ox kʼot ta pasele, li Josuee jmoj sutik batel ta Guilgal xchiʼuk li Israele, sutik batel ti bu yakʼoj skarpanaike.+

16 Pe li voʼob ajvalile jatavik batel, te bat snakʼ* sbaik ta yut chʼen ta Makeda.+ 17 Xi kʼot ta xchikin li Josuee: «Li voʼob ajvalile te snakʼoj* sbaik ta yut chʼen ta Makeda».+ 18 Xi laj yal li Josuee: «Akʼbeik mukʼtik ton ta stiʼ li chʼene xchiʼuk akʼo xchabiik jayvoʼuk viniketik. 19 Pe li voʼoxuke mu teuk noʼox xapajik, nutsik batel li avajkontraike, milik komel.+ Mu xavakʼ ochikuk ta steklumalik, yuʼun laj xa yakʼboxuk ta akʼobik li Jeova Dios avuʼunike».

20 Li Josue xchiʼuk j-israeletike toj ep la smilik komel li yajkontraike, jayvoʼ xa noʼox buchʼu jatav batel yuʼunik ta skoj ti ochik batel ta jteklumetik ti joyajtik ta muroe. 21 Kʼalal jech xa ox kʼot ta pasele, li jteklume sutik batel ta stojolal Josue ta Makeda ti bu spasoj skarpanaike, lek kʼotik. Mi junuk buchʼu oy kʼusi chopol laj yalbe li j-israeletike. 22 Laj une, xi laj yal li Josuee: «Jambeik stiʼ li chʼene, lokʼesbeikun talel li voʼob ajvalile». 23 Jaʼ yuʼun, la slokʼesik talel li voʼob ajvalil te tikʼajtik ta chʼene, jaʼ li ajvalil ta Jerusalene, li ajvalil ta Ebrone, li ajvalil ta Jarmute, li ajvalil ta Lakise xchiʼuk li ajvalil ta Eglone.+ 24 Kʼalal laj yikʼbeik talel Josue li ajvaliletike, li Josuee la stak ta ikʼel skotol li viniketik ta Israele xchiʼuk xi laj yalbe li komandanteetik yuʼun soltaroetik ti ay chiʼinatuk ta paskʼope: «Nopajanik talel. Pechʼbeik ta tekʼel spat snukʼ li ajvaliletik liʼe». Jaʼ yuʼun, nopajik talel xchiʼuk la xpechʼbeik ta tekʼel spat snukʼ li ajvaliletike.+ 25 Vaʼun, li Josuee xi laj yalbe yaʼiike: «Mu xaxiʼik xchiʼuk mu xnik avoʼontonik.+ Tsotsuk avoʼontonik xchiʼuk mu me xachibajik, yuʼun li kʼusi yakal chapasik avie jaʼ jech tspasbe Jeova skotol li avajkontraik ti butik chatsakik batel ta kʼope».+

26 Li Josuee la syayijes li ajvaliletike xchiʼuk la smilanan, vaʼun jujutel steʼel* la sjokʼan jujun, te jokʼol-o kom yuʼun kʼalal chʼayem xa ox batel kʼakʼale. 27 Kʼalal chʼayem xa ox batel kʼakʼale, li Josuee laj yal mantal ti akʼo syalesbeik li sbekʼtalike+ xchiʼuk ti akʼo sjipik ochel li ta chʼen ti bu toʼox la snakʼ* sbaike. Laje, laj yakʼbeik mukʼtik tonetik ta stiʼ li chʼene, te oy-o kʼalal to avie.

28 Li vaʼ kʼakʼale, li Josuee och ta skʼob li Makedae+ xchiʼuk la slajesbe skʼoplal ta espada. La slajesbe skʼoplal ta j-echʼel li ajvalil yuʼune xchiʼuk skotol li buchʼutik* te oyike, mi junuk kuxul laj yikta.+ Jaʼ jech la spasbe li ajvalil ta Makeda+ jech kʼuchaʼal la spasbe li ajvalil ta Jerikoe.

29 Li Josuee lokʼ batel ta Makeda xchiʼuk skotol li Israele, bat ta Libna+ sventa xbat stsak ta kʼop. 30 Li Jeovae laj yakʼbe ta skʼob Israel xtok li Libna xchiʼuk li ajvalil yuʼune.+ Vaʼun, la slajesbeik skʼoplal ta j-echʼel ta espada li Libna xchiʼuk skotol li buchʼutik te oyike, mi junuk kuxul laj yiktaik. Jaʼ jech la spasbeik li ajvalil jech kʼuchaʼal la spasbeik li ajvalil ta Jerikoe.+

31 Laje, li Josuee lokʼ batel ta Libna xchiʼuk skotol li Israele, te la spas skarpanaik ta Lakis+ sventa stsakik ta kʼop. 32 Li Jeovae laj yakʼbe ta skʼob Israel li Lakise, ta xchibal noʼox kʼakʼal och ta skʼobik. La slajesbeik skʼoplal ta espada li Lakis xchiʼuk skotol li buchʼutik te oyike+ jech kʼuchaʼal la spasbeik li Libnae.

33 Li ajvalil Oram ta Guesere+ muy batel sventa xbat skolta li Lakise, pe li Josuee la smil xchiʼuk la slajesbe skʼoplal xchiʼuk li steklumale, mi junuk kuxul laj yikta.

34 Laje, li Josuee lokʼ batel ta Lakis xchiʼuk skotol li Israele, te la spas skarpanaik ta Eglon+ sventa stsakik ta kʼop. 35 Ta jun noʼox skʼakʼalil och ta skʼobik xchiʼuk la slajesbeik skʼoplal ta espada. Ta jun noʼox skʼakʼalil la slajesbeik skʼoplal ta j-echʼel skotol li buchʼutik te oyike jech kʼuchaʼal la spasbeik li Lakise.+

36 Laje, li Josuee lokʼ batel ta Eglon xchiʼuk skotol li Israele, bat ta Ebron+ sventa xbat stsak ta kʼop. 37 Och ta skʼobik xchiʼuk la slajesbeik skʼoplal ta espada xchiʼuk li ajvalil yuʼune, li jteklumetike xchiʼuk skotol li buchʼutik te oyike, mi junuk kuxul laj yiktaik. La slajesbeik skʼoplal ta j-echʼel jech kʼuchaʼal la spasbeik li Eglon xchiʼuk skotol li buchʼutik te oyike.

38 Ta slajeb xae, li Josue xchiʼuk skotol li Israele batik ta Debir+ sventa xbat stsakik ta kʼop. 39 Och ta skʼob li Debire, li ajvalil yuʼune xchiʼuk li jteklumetik yuʼune, la slajesbeik skʼoplal ta espada. La slajesbeik skʼoplal ta j-echʼel li buchʼutik te oyike,+ mi junuk kuxul laj yiktaik.+ Li kʼusi la spasbe Ebron, Libna xchiʼuk li ajvalil yuʼune jaʼ jech la spasbe ek li Debir xchiʼuk li ajvalil yuʼune.

40 Li Josuee och ta skʼob skotol li osil ta vitstikaltike, li Neguebe, li Sefelae+ xchiʼuk li stselejtike, och ta skʼob skotol li ajvaliletik yuʼunike, mi junuk kuxul laj yikta; la slajesbe skʼoplal ta j-echʼel skotol li kʼusi chichʼ ikʼe+ jech kʼuchaʼal yaloj mantal li Jeova Dios yuʼun Israele.+ 41 Och ta skʼob Josue li osil chlik ta Kades-Barnea+ kʼalal to ta Gasae+ xchiʼuk skotol li yosilal Gosen+ kʼalal to ta Gabaone.+ 42 Li Josuee jaʼ to laj yoʼonton kʼalal och ta skʼob skotol li ajvaliletik taje xchiʼuk li yosilike, yuʼun li Jeova Dios yuʼun Israele jaʼ yakal tspas kʼop stuk sventa skolta li Israele.+ 43 Vaʼun, li Josue xchiʼuk skotol li Israele sutik talel ta Guilgal ti bu spasoj skarpanaike.+

11 Li ajvalil Jabin ta Asore laj yaʼi skotol li kʼusitik kʼot ta pasele, vaʼun ta anil noʼox la stakbe batel mantal li ajvalil Jobab ta Madone,+ li ajvalil ta Simrone, li ajvalil ta Aksafe,+ 2 li ajvaliletik te oyik ta vitstikaltik ta nortee, li buchʼutik te oyik ta stenlejaltik* ta sural Kinerete, li ta Sefelae, li ta stselejal Dor+ ta stukʼil smaleb kʼakʼale, 3 li jkanaanetik+ ta slokʼeb kʼakʼal xchiʼuk ta smaleb kʼakʼale, li j-amorreoetike,+ li j-etetike, li jperisitaetike, li jebusetik ta vitstikaltike xchiʼuk li j-eveoetik+ ta yok vits Ermon+ ti te xkom ta yosilal Mispae. 4 Bat skotolik xchiʼuk yajsoltaroik, solel epik xa noʼox ta jyalel jech kʼuchaʼal li jiʼ* oy ta tiʼ nabe. Solel ep tajek laj yikʼ batel skaʼik xchiʼuk skaretaik sventa paskʼop. 5 Skotol li ajvaliletik taje la stsob sbaik xchiʼuk jmoj te bat spas skarpanaik ta stsʼel ukʼum ta Merom sventa stsakik ta kʼop li Israele.

6 Xi albat yuʼun Jeova li Josuee: «Mu xaxiʼ yuʼun,+ okʼom jech ora kʼuchaʼal liʼe chkakʼboxuk ta akʼobik skotolik sventa xamilik. Chayayijesbeik spat yoʼ li skaʼike+ xchiʼuk chachikʼbeik ta kʼokʼ li skaretaike». 7 Li Josue xchiʼuk skotol li soltaroetike bat stsakik ta kʼop li yajkontraik ti te oyik ta stsʼel ukʼum ta Merome, chʼayal yoʼonton kʼot staik. 8 Li Jeovae laj yakʼbe ta skʼob Israel,+ jaʼ yuʼun li Israele la smil li yajkontraike xchiʼuk snutsojik to batel kʼalal to ta Mukʼta Sidon,+ Misrefot-Maim+ xchiʼuk kʼalal to ta stenlejaltik Mispe ta stukʼil slokʼeb kʼakʼal. La smilik skotol, mi junuk kuxul laj yiktaik.+ 9 Li Josuee jech la spas kʼuchaʼal albat yuʼun li Jeovae; la syayijesbe spat yoʼ skotol li skaʼtak yajkontraike xchiʼuk la xchikʼbe ta kʼokʼ li skaretaike.+

10 Jech xtok, li Josuee sut tal xchiʼuk och ta skʼob li jteklum Asore xchiʼuk la smil ta espada li ajvalile,+ yuʼun li Asore jaʼ toʼox mukʼta jteklum yuʼunik skotol li ajvaliletik taje. 11 La smilik komel ta espada skotol li buchʼutik te oye xchiʼuk la slajesbeik skʼoplal ta j-echʼel.+ Cham skotol li kʼusitik chichʼ ikʼe.+ Vaʼun, li Josuee la xchikʼ ta kʼokʼ li Asore. 12 Och ta skʼob Josue skotol li jteklumetik yuʼun li ajvaliletike xchiʼuk la smil ta espada skotol li ajvaliletike.+ La slajesbe skʼoplal ta j-echʼel+ jech kʼuchaʼal yaloj mantal Moises ti jaʼ yajtunel Jeovae. 13 Pe li Israele muʼyuk la xchikʼik junuk jteklum ti te oy ta stsʼel yosilike, jaʼ noʼox la xchikʼik li Asore; li Josuee jaʼ noʼox la xchikʼ li Asore. 14 Skotol li kʼusitik x-ayan te ta jteklume xchiʼuk li xchonbolomike jaʼ laj yichʼik li j-israeletike.+ Pe ta jujuntal la smilik ta espada skotol li krixchanoetike,+ la smilik skotol li kʼusitik chichʼ ikʼe.+ 15 Ti kʼu yelan albat yuʼun Jeova li Moisese, li yajtunel Diose, li Josue eke jaʼ jech la spas jech kʼuchaʼal albat yuʼun li Moisese.+ Li Josuee muʼyuk laj yikta sba spasel skotol jech kʼuchaʼal albil mantal yuʼun Jeova li Moisese.+

16 Li Josuee laj yuʼunin skotol li osil liʼe: li vitstikaltike, sjunul li yosilal Neguebe,+ li yosilal Gosene, li Sefelae,+ li Arabae,+ li vitstikaltik yuʼun Israele xchiʼuk li stselejaltik yuʼune, 17 chlik ta vits Alak ti chmuy batel kʼalal to Seire xchiʼuk chkʼot kʼalal to ta Baal-Gad+ ta stenlejaltik Libano ti te xkom ta yok vits Ermone.+ La stsak skotol li ajvaliletike xchiʼuk la smil skotol. 18 Li Josuee ep kʼakʼal laj yichʼ yuʼun sventa stsal skotol li ajvaliletik taje. 19 Mi junuk jteklum la spas ta jun yoʼontonik xchiʼuk li Israele, jaʼ noʼox li j-eveoetik ti te nakajtik ta Gabaone.+ Pe li yantik jteklume la stsakik ta kʼop, la stsalik skotol.+ 20 Ti jech jpʼel tajek xalik+ tstsakik ta kʼop li j-israeletike, yalel jech la spas Jeova sventa slajesbe-o skʼoplal ta j-echʼel li yajkontratak Israele, muʼyuk xichʼik kʼuxubinel.+ Skʼan xichʼik lajesbel skʼoplalik jech kʼuchaʼal albil yuʼun Jeova li Moisese.+

21 Li vaʼ kʼakʼale, li Josuee la stupʼbe skʼoplal li j-anaketik+ ta vitstikaltike, li ta Ebrone, li ta Debire, li ta Anabe xchiʼuk ta skotol li vitstikaltik yuʼun Juda xchiʼuk ta skotol li vitstikaltik yuʼun Israele. Li Josuee la slajesbe-o skʼoplal ta j-echʼel xchiʼuk skotol li steklumalike.+ 22 Mu xa junuk j-anak kom li ta yosil j-israeletike, jaʼ xa noʼox te komik+ ta jteklum Gasa,+ ta Gat+ xchiʼuk ta Asdod.+ 23 Li Josuee och ta skʼob skotol li osil jech onoʼox kʼuchaʼal albat ta jamal yuʼun Jeova li Moisese.+ Laje, li Josuee laj yakʼbe ta xrexto* j-israeletik ti kʼu yepal albil onoʼox skʼan xichʼike sventa xchʼakbe sbaik ta jujuchop snitilulalik.+ Vaʼun, muʼyuk xa echʼ paskʼop li ta yosilike.+

12 Liʼe jaʼ li ajvaliletik lajik ta tsalel xchiʼuk ti ichʼbat yosilik yuʼun li j-israeletike, jaʼ li osil ta jot Jordan ta stukʼil slokʼeb kʼakʼal ti chlik ta stenlejaltik Arnon*+ kʼalal to ta vits Ermone+ xchiʼuk sjunul li Araba ta slokʼeb kʼakʼale:+ 2 June jaʼ li Seon+ ti jaʼ ajvalil yuʼun j-amorreoetike, li ajvalil Seone te toʼox nakal ta Esbon, jaʼ toʼox sventainoj sjunul li osil chlik ta Aroer+ ti stsʼakinoj sba xchiʼuk li stenlejaltik Arnone,*+ te chlik ta oʼlol stenlejaltik xchiʼuk smakoj to j-oʼlol li yosilal Galaad ti chkʼot kʼalal to ta stenlejaltik* Jabok ti stsʼakinoj li yosil j-ammonetike. 3 Jech xtok, jaʼ toʼox sventainoj li Araba kʼalal to ta nab Kineret*+ ta stukʼil slokʼeb kʼakʼale, chkʼot kʼalal to ta nab Araba, jaʼ xkaltik, ta nab Muerto,* kʼalal to ta stukʼil slokʼeb kʼakʼal ta stukʼil Bet-Jesimot xchiʼuk chkʼot kʼalal to ta stukʼil sur ta yolon stselejaltik Pisga.+

4 Yan xtoke jaʼ li osil ti kʼu yepal smakoj li ajvalil Og+ ta Basane. Li Ogue te toʼox nakal ta Astarot xchiʼuk ta Edrei, ti jaʼ xa jun ta slajeb li snitilulal jrefaetik+ ti kuxulik toe. 5 Jaʼ sventainoj li yosilal vits Ermon ta Salekae xchiʼuk sjunul li yosilal Basan+ ti te to chkʼot ta stsʼak jguesuretik xchiʼuk ta stsʼak jmaakatetike,+ smakoj to j-oʼlol li yosilal Galaad ti chkʼot kʼalal to ta stsʼak li osil ti jaʼ sventainoj li ajvalil Seon ta Esbone.+

6 Li Moises ti jaʼ yajtunel Jeova xchiʼuk li j-israeletike la stsalik+ li chaʼvoʼ ajvalil taje, vaʼun li Moises ti jaʼ yajtunel Jeovae laj yakʼbe ta xrexto* Ruben li yosilike, jaʼ laj yichʼ ta xrextoik ek li Gad xchiʼuk li j-oʼlol snitilulal Manasese.+

7 Liʼe jaʼ li ajvaliletik yuʼun jteklumetik ti tsalatik yuʼun li Josue xchiʼuk li j-israeletike, ti te tsalatik li ta jot Jordan ta stukʼil smaleb kʼakʼale, ti te lik ta yosilal Baal-Gad+ ta stenlejaltik Libano+ kʼalal to ta vits Alak+ ti chmuy batel ta Seire.+ Laje, li Josuee laj yakʼbe ta xrexto* snitilulal Israel li yosilike, jaʼ ti kʼu yepal skʼan xichʼik+ ta jujuchop snitilulalike. 8 Te la stsalik li ta vitstikaltike, li ta Sefelae, li ta Arabae, li ta stselejtike, li ta takixokol balumile xchiʼuk li ta Neguebe,+ taje jaʼ li yosil j-etetik, j-amorreoetik,+ jkanaanetik, jperisitaetik, j-eveoetik xchiʼuk li jebusetike.+ Li ajvaliletik taje jaʼik liʼe:

13 Li Josuee mol xa xchiʼuk ep xa tajek sjabilal,+ jaʼ yuʼun xi albat yuʼun li Jeovae: «Molot xa xchiʼuk ep xa tajek ajabilal; pe ep to tajek osil skʼan x-och ta akʼobik.* 2 Li osil ti skʼan to x-och ta akʼobike jaʼ liʼe:+ skotol li yosil jfilisteaetike xchiʼuk skotol li yosil jguesuretike+ 3 (te chlik ta skʼob ukʼum Nilo* ti te xkom ta slokʼeb kʼakʼal ta* Ejipto kʼalal to ta stsʼak Ekron ta norte, skotol taje nabil ti jaʼ toʼox yosil li jkanaanetike).+ Jech xtok, skʼan to x-och ta akʼobik li yosil voʼob bankilaletik yuʼun jfilisteaetike,+ jaʼ xkaltik, li jgasaetik, j-asdodetik,+ j-askelonetik,+ jgatetik+ xchiʼuk li j-ekronetike;+ li yosil j-avimetik+ 4 ta sure; skotol li yosil jkanaanetike; li yosilal Meara ti jaʼ yuʼun jsidonetik+ ti chkʼot kʼalal to ta Afek xchiʼuk kʼalal to ta stsʼak yosil li j-amorreoetike; 5 li yosil jguebaletik+ xchiʼuk skotol li Libano ta stukʼil slokʼeb kʼakʼal ti chlik ta Baal-Gad ta yok vits Ermon kʼalal to ta Lebo-amate;*+ 6 skotol li jnaklejetik ta vitstikaltik ti chlik ta Libano+ kʼalal to ta Misrefot-Maime+ xchiʼuk skotol li jsidonetike.+ Voʼon ta jnutsik lokʼel ta yeloval li j-israeletike.+ Jaʼ noʼoxe skʼan xachʼakbe ta xrexto* j-israeletik li osil jech kʼuchaʼal laj kalbot mantale.+ 7 Skʼan xachʼakbe ta xrextoik* li balunchop nitilulal xchiʼuk li j-oʼlol snitilulal Manasese».+

8 Li j-oʼlol snitilulal Manases, li jrubenetik xchiʼuk li jgadetike jaʼ laj yichʼ ta xrextoik* li osil ti te akʼbatik yuʼun Moises li ta jot Jordan ta stukʼil slokʼeb kʼakʼale, yuʼun akʼbatik xa onoʼox yuʼun li Moises ti jaʼ yajtunel Jeovae:+ 9 jaʼ li osil ti chlik ta Aroer+ ti stsʼakinoj li stenlejaltik Arnone,*+ li jteklum te oy ta j-oʼlol stenlejaltike xchiʼuk skotol li stenlejaltik Medeba kʼalal to ta Dibone; 10 skotol li jteklumetik ti jaʼ sventainoj li Seon ti jaʼ ajvalil yuʼun li j-amorreoetik ti te toʼox la spas mantal ta Esbone kʼalal to ta stsʼak yosil j-ammonetik;+ 11 li yosilal Galaad xchiʼuk li yosil jguesuretik xchiʼuk jmaakatetike,+ sjunul li vits Ermone xchiʼuk sjunul li yosilal Basan+ kʼalal to ta Salekae;+ 12 skotol li osil ti sventainoj li Og ta Basan ti te ajvalilaj ta Astarot xchiʼuk ta Edreie. (Li Ogue jaʼ jun ta slajeb li snitilulal jrefaetik ti kuxulik toe).+ Li Moisese la stsal xchiʼuk la snutsan lokʼel.+ 13 Pe li j-israeletike muʼyuk la snutsik lokʼel+ li jguesuretike mi jaʼuk li jmaakatetike, yuʼun li Guesur xchiʼuk li Maakate te xchiʼukik-o ta naklej kʼalal to avi li Israele.

14 Jaʼ xa noʼox muʼyuk laj yakʼbe xrexto*+ li snitilulal Levie. Jech kʼuchaʼal albatik onoʼox ta jamale,+ li xrextoike+ jaʼ li matanal chichʼ chikʼel ta kʼokʼ sventa li Jeova ti jaʼ Dios yuʼun Israele.

15 Li Moisese laj yakʼbe xrexto* osil li snitilulal jrubenetik ta jujuchop yutsʼ yalalike. 16 Li yosilike te chlik ta Aroer ti stsʼakinoj li stenlejaltik Arnone* xchiʼuk li jteklum te oy ta j-oʼlol stenlejaltike xchiʼuk skotol li stenlejaltik ta stsʼel Medebae; 17 Esbon xchiʼuk skotol li jteklumetik+ ta stenlejaltike, Dibon, Bamot-Baal, Bet-Baal-Meon,+ 18 Jaas,+ Kedemot,+ Mefaat,+ 19 Kiryataim, Sibma+ xchiʼuk Seret-Saar ta vits ta stenlejaltik, 20 Bet-Peor, stselejaltik Pisga,+ Bet-Jesimot,+ 21 skotol li jteklumetik ta stenlejaltike xchiʼuk skotol li osil ti jaʼ toʼox sventainoj li Seon ti jaʼ ajvalil yuʼun li j-amorreoetik ti te toʼox la spas mantal ta Esbone.+ Li Moisese la stsal li ajvalile+ xchiʼuk li bankilaletik yuʼun jmadianetike, jaʼ li Evi, Rekem, Sur, Ur xchiʼuk Reba,+ taje jaʼ li ajvaliletik ti chchʼunbeik smantal Seon ti te nakalik ta lume. 22 Jun ti buchʼu laj yichʼ milel ta espada yuʼun li j-israeletike jaʼ li Balaam+ ti snaʼ tʼunol*+ xchiʼuk ti jaʼ xnichʼon Beore, jmoj laj yichʼ milel xchiʼuk li yantike. 23 Li stsʼak yosil jrubenetike jaʼ li Jordane; li osil taje jaʼ laj yichʼ ta xrextoik* li jujuchop yutsʼ yalal jrubenetike, akʼbatik li jteklumetike xchiʼuk li bikʼtal lumetik ta sjoylejale.

24 Li Moises xtoke laj yakʼbe xrexto* li snitilulal Gade, jaʼ li jgadetik ta jujuchop yutsʼ yalalike. 25 Li yosilike te smakoj Jaser,+ skotol li jteklumetik ta Galaade xchiʼuk li j-oʼlol yosilal j-ammonetik+ kʼalal to ta Aroer ta yeloval Rabae;+ 26 chlik ta Esbon+ kʼalal to ta Ramat-Mispe xchiʼuk li Betonime, xchiʼuk te chlik ta Maanaim+ kʼalal to ta stsʼak Debir; 27 laj yichʼik xtok li stenlejaltik ti bu oy Bet-Aram, Bet-Nimra,+ Sukot+ xchiʼuk Safon, ti jaʼ toʼox la sventain xtok li ajvalil Seon ta Esbone.+ Li jteklumetik taje te oy ta jot Jordan ta stukʼil slokʼeb kʼakʼal ti chkʼot kʼalal to ta nab Kinerete.*+ 28 Taje jaʼ li osil ti laj yichʼ ta xrextoik* li jujuchop yutsʼ yalal jgadetike, akʼbatik li jteklumetike xchiʼuk li bikʼtal lumetik ta sjoylejale.

29 Li Moises xtoke laj yakʼbe xrexto* li j-oʼlol snitilulal Manasese, jaʼ li j-oʼlol snitilulal Manases ta jujuchop yutsʼ yalalike.+ 30 Li yosilike te chlik ta Maanaim+ ti smakoj sjunul li Basane, skotol li osil ti sventainoj li ajvalil Og ta Basane xchiʼuk skotol li bikʼtal jteklumetik yuʼun Jair+ ta Basane, jaʼ 60 jteklumetik. 31 Laj yichʼik xtok li j-oʼlol Galaade, li Astarote xchiʼuk li Edreie,+ jaʼ li jteklumetik sventainoj li ajvalil Og ta Basane, jaʼ laj yichʼik akʼbel li xnichʼnabtak Makir+ ti jaʼ xnichʼon Manasese, jaʼ li j-oʼlol xnichʼnabtak Makir ta jujuchop yutsʼ yalalike.

32 Taje jaʼ li xrexto* akʼbatik yuʼun Moises ta takixokol balumil ta stenlejaltik yuʼun Moab ti nom to yiloj li Jordan ta stukʼil slokʼeb kʼakʼal ta Jerikoe.+

33 Pe li snitilulal jlevietike muʼyuk akʼbat xrextoik*+ yuʼun li Moisese. Jech kʼuchaʼal albatik onoʼox ta jamale, jaʼ xrextoik li Jeova ti jaʼ Dios yuʼun Israele.+

14 Liʼe jaʼ skʼoplal li yosilal Kanaan ti laj yichʼ ta xrextoik* li j-israeletike, jaʼ akʼbatik yuʼun li pale Eleasare, li Josue xnichʼon li Nune xchiʼuk li joliletik ta jujuchop yutsʼ yalalik ta snitilulal Israele.+ 2 Ta suerte+ laj yichʼ chʼakbel xrextoik* li balunchop nitilulal xchiʼuk li j-oʼlol nitilulale,+ jech la spasik kʼuchaʼal albat mantal yuʼun Jeova li Moisese. 3 Li chaʼchop nitilulal xchiʼuk li j-oʼlol nitilulale te akʼbat xrextoik* ta jot* Jordan+ yuʼun li Moisese. Pe li jlevietike muʼyuk akʼbat xrexto osilik.+ 4 Li snitilulal Josee ta chaʼchop nitilulal laj yichʼik tsakel ta venta,+ jaʼ li Manases xchiʼuk Efraine;+ pe li jlevietike muʼyuk akʼbat xrexto* osilik, jaʼ noʼox laj yichʼik akʼbel jteklumetik+ ti bu xuʼ xnakiike xchiʼuk li yaxaltik ta sjoylejal sventa li xchonbolomike xchiʼuk sventa li yan kʼusitik oy yuʼunike.+ 5 Jaʼ yuʼun, li j-israeletike la xchʼakbe sbaik li osil jech kʼuchaʼal albat mantal yuʼun Jeova li Moisese.

6 Li viniketik ta Judae te bat skʼelik ta Guilgal+ li Josuee, vaʼun li Kaleb+ ti jaʼ xnichʼon Jefune, li jkenis vinike, xi laj yalbe li Josuee: «Anaʼoj lek kʼusi albat+ yuʼun Jeova ta sventa jchaʼvoʼaltik ta Kades-Barnea+ li Moisese, li yajtunel melel Diose.+ 7 40 toʼox jabil kichʼoj kʼalal te toʼox oyun ta Kades-Barnea kʼalal la stakun batel Moises ti jaʼ yajtunel Jeova sventa xbat jpaʼi* li osile,+ kʼalal lisut tale jamal laj kal* skotol.+ 8 Manchuk mi la xchibajesbeik yoʼonton jteklum li kermanotak ti jmoj limuykutik batele, li voʼone ta sjunul koʼonton*+ la jtsʼakli-o li Jeova Dios kuʼune. 9 Li Moisese xi laj yakʼ ye li vaʼ kʼakʼale: ‹Li balumil butik ay axane jaʼ chkʼot ta arexto* xchiʼuk anichʼnabtak sbatel osil, yuʼun ta sjunul avoʼonton+ atsʼaklioj tal li Jeova Dios kuʼune›. 10 Jech onoʼox kʼuchaʼal laj yakʼ ye li Jeovae,+ kuxulun to yuʼun li avie,+ 45 xa jabil jelav ti kʼuxi jamal albat yuʼun Jeova li Moises kʼalal te toʼox oy ta takixokol balumil+ li Israele. Kuxulun to li avie, kichʼoj xa 85 jabil. 11 Li avie, jech to tsotsun jech kʼuchaʼal kʼalal la stakun batel li Moisese. Oy to yipal kuʼun, lek to xuʼ kuʼun paskʼop xchiʼuk sventa jpas yan kʼusitik. 12 Jaʼ yuʼun, akʼbun li vitstikaltik ti jech laj yal ta jamal Jeova li vaʼ kʼakʼale. Manchuk mi laj avaʼi atuk ti te oy snitilulal Anak+ li vaʼ kʼakʼale xchiʼuk manchuk mi joyajtik ta muro li mukʼtik lumetik yuʼunike,+ jpatoj koʼonton ti te chchiʼinun+ li Jeova sventa jnutsik lokʼel jech kʼuchaʼal yaloj ta jamal li Jeovae».+

13 Vaʼun, li Josuee laj yakʼbe bendision li Kaleb ti jaʼ xnichʼon Jefunee xchiʼuk laj yakʼbe ta xrexto* li yosilal Ebrone.+ 14 Jaʼ yuʼun, li Kaleb ti jaʼ xnichʼon Jefune, li jkenis vinike, jaʼ xrexto-o* kom kʼalal to avi li yosilal Ebrone, yuʼun ta sjunul yoʼonton+ la stsʼakli-o li Jeova Dios yuʼun Israele. 15 Kiryat-Arba+ toʼox sbi li Ebrone. (Li Arbae jaʼ toʼox jun vinik ti tsots tajek skʼoplal yuʼun li j-anaketike). Vaʼun, muʼyuk xa echʼ paskʼop li ta osile.+

15 Li yosil snitilulal Juda ta jujuchop yutsʼ yalalik ti laj yichʼik chʼakbel ta suertee+ chkʼot kʼalal to ta stsʼak Edom,+ ta takixokol balumil ta Sin, te to chpaj ta Negueb ta sur. 2 Li spajeb ta sure chlik ta stiʼil nab Muerto,*+ jaʼ xkaltik, ta stiʼil nab ti skʼeloj batel sure. 3 Li ta sure chkʼot kʼalal to ta muyebaltik ta Akrabim,+ te ch-echʼ ta Sin. Laje, chlik batel ta sur ti chmuy batel ta Kades-Barneae,+ ta Esron, chkʼot kʼalal to ta Addar, vaʼun chjoyij batel ta Karka. 4 Ch-echʼ ta Asmon,+ chkʼot kʼalal to ta beoʼtik ta stenlejaltik* Ejipto+ ti te to chkʼot ta tsutsel li ta Mukʼta nabe.* Jaʼ jech stsʼak li ta sure.

5 Li stsʼak ta slokʼeb kʼakʼale jaʼ li nab Muertoe,* chkʼot kʼalal to ta stiʼil Jordan.+ Li stsʼak ta norte ti ta stiʼil xa tajeke te chpaj li ta stiʼil nabe, jaʼ li ta stiʼil Jordane. 6 Li stsʼake chmuy batel ta Bet-Ogla+ xchiʼuk te ch-echʼ ta snorteal Bet-Araba,+ li spajebe chmuy batel li ta ton ti bu yakʼoj Boan+ xnichʼon li Rubene. 7 Chlik ta stenlejaltik Akor+ ti chmuy batel ta Debire, vaʼun chjoyij batel ta norte ta Guilgal.+ Li Guilgale te xkom ta stukʼil muyebaltik ta Adumim ti te xkom ta sur ta stenlejaltike. Te to ch-echʼ batel ta sat voʼ* ta En-Semes,+ te to chpaj ta En-Roguel.+ 8 Li stsʼake chmuy batel kʼalal to ta stenlejaltik Inon,+ ch-echʼ ta stselej yuʼun li jebusetik+ ta sure, jaʼ xkaltik, li ta Jerusalene.+ Ta tsʼakale, chmuy to batel ta jol vits ti bu skʼeloj batel li stenlejaltik Inon ta smaleb kʼakʼale, ti te xkom ta stiʼil to li stenlejaltik Refaim ta nortee. 9 Li stsʼake te chlik ta jol vits, chyal batel kʼalal to ta nioʼ Neftoa,+ te to smakoj batel li jteklumetik ta vits Efrone; chkʼot kʼalal to ta Baala, jaʼ xkaltik, Kiryat-Jearim.+ 10 Li stsʼake te chlik joyijuk batel ta Baala ta stukʼil smaleb kʼakʼal ta vits Seir, te ch-echʼ batel ta stselejal vits Jearim ta norte, jaʼ xkaltik, Kesalon. Laje, chyal batel ta Bet-Semes+ xchiʼuk te ch-echʼ ta Timna.+ 11 Chbat ta stselejtik Ekron+ ta norte, chkʼot kʼalal to ta Sikeron xchiʼuk te ch-echʼ batel ta vits Baala, smakoj to batel Jabneel, te to chpaj ta nab.

12 Li stsʼak ta smaleb kʼakʼale te xkom ta Mukʼta nab*+ xchiʼuk li ta tiʼtiʼ nabe. Liʼe jaʼ stsʼak yosilik li snitilulal Juda ta jujuchop yutsʼ yalalike.

13 Li Josuee te laj yakʼbe xrexto* li Kaleb+ xnichʼon Jefune ti bu laj yichʼ yosilik li snitilulal Juda jech kʼuchaʼal albat yuʼun li Jeovae, jaʼ laj yakʼbe li Kiryat-Arbae, jaʼ xkaltik, li Ebrone.+ (Li Arbae jaʼ li stot Anake). 14 Jaʼ yuʼun, li Kalebe la snuts lokʼel li oxvoʼ xnichʼnabtak Anake:+ Sesai, Aiman xchiʼuk Talmai.+ Jaʼ li snitilulal Anake. 15 Te muy stsak ta kʼop li jnaklejetik ta Debire.+ (Kiryat-Sefer toʼox sbi li Debire). 16 Xi laj yal li Kalebe: «Li buchʼu chbat stsal li Kiryat-Sefere xchiʼuk mi och ta skʼobe, ta xkakʼbe yikʼ li jtseb Aksae». 17 Jaʼ och ta skʼob jteklum li Otniel+ ti jaʼ xnichʼon Kenase,+ li yitsʼin Kalebe. Jaʼ yuʼun, li Kalebe jaʼ laj yakʼbe yikʼ li stsebe, li Aksae.+ 18 Kʼalal yorail xa ox chbat ta snae, laj yalilanbe smalal ti akʼo skʼanbe jsepuk yosil li stote. Li Aksae yal li ta svuroe,* vaʼun xi la sjakʼ li Kalebe: «¿Kʼusi chakʼan?».+ 19 Xi laj yale: «Avokoluk, akʼbun abendision. Avakʼojbun xa li jsep osil ta sure,* pe akʼbun xtok li Gulot-Maime».* Jech oxal, li Kalebe laj yakʼbe li Gulot ta akʼol xchiʼuk li Gulot ta olone.

20 Taje jaʼ li xrexto* snitilulal Juda ta jujuchop yutsʼ yalalike.

21 Li jteklumetik ta sur ti laj yichʼ snitilulal Juda ti bu stsʼakil li Edome+ jaʼik liʼe: Kabseel, Eder, Jagur, 22 Kina, Dimona, Adada, 23 Kedes, Asor, Itnan, 24 Sif, Telem, Bealot, 25 Asor-Adata xchiʼuk Keriyot-Esron, jaʼ xkaltik, Asor, 26 Amam, Sema, Molada,+ 27 Asar-Gada, Esmon, Bet-Pelet,+ 28 Asar-Sual, Beer-Seba,+ Bisiotias, 29 Baala, Iyim, Esem, 30 Eltolad, Kesil, Orma,+ 31 Siklag,+ Madmana, Sansana, 32 Lebaot, Silim, Ain xchiʼuk Rimon.+ 29 jteklumetik ta skotol xchiʼuk li bikʼtal lumetik ta sjoylejale.

33 Li ta Sefelae+ te xkom Estaol, Sora,+ Asna, 34 Sanoa, En-Ganim, Tapua, Enam, 35 Jarmut, Adulam,+ Soko, Aseka,+ 36 Saaraim,+ Aditaim xchiʼuk Guedera xchiʼuk Guederotaim.* 14 jteklumetik xchiʼuk li bikʼtal lumetik ta sjoylejale.

37 Senan, Adasa, Migdal-Gad, 38 Dilean, Mispe, Jokteel, 39 Lakis,+ Boskat, Eglon, 40 Kabon, Lamam, Kitlis, 41 Guederot, Bet-Dagon, Naama xchiʼuk Makeda.+ 16 jteklumetik xchiʼuk li bikʼtal lumetik ta sjoylejale.

42 Libna,+ Eter, Asan,+ 43 Ifta, Asna, Nesib, 44 Keila, Aksib xchiʼuk Maresa. Baluneb jteklumetik xchiʼuk li bikʼtal lumetik ta sjoylejale.

45 Ekron xchiʼuk li bikʼtal lumetik ti te noʼox nopajtike* xchiʼuk li parajeetik yuʼune; 46 chlik ta Ekron ta stukʼil smaleb kʼakʼal, skotol li lumetik ta Asdod xchiʼuk li bikʼtal lumetik ta sjoylejale.

47 Asdod+ xchiʼuk li bikʼtal lumetik ti te noʼox nopajtike* xchiʼuk li parajeetik yuʼune; Gasa+ xchiʼuk li bikʼtal lumetik ti te noʼox nopajtike xchiʼuk li parajeetik yuʼune kʼalal to ta beoʼtik ta stenlejaltik Ejipto, ta Mukʼta nab* xchiʼuk li ta stiʼil nabe.+

48 Li ta vitstikaltike te xkom Samir, Jatir,+ Soko, 49 Dana, Kiryat-Sana, jaʼ xkaltik, Debir, 50 Anab, Estemo,+ Anim, 51 Gosen,+ Olon xchiʼuk Guilo.+ 11 jteklumetik xchiʼuk li bikʼtal lumetik ta sjoylejale.

52 Arab, Duma, Esan, 53 Janim, Bet-Tapua, Afeka, 54 Umta, Kiryat-Arba, jaʼ xkaltik, Ebron+ xchiʼuk Sior. Baluneb jteklumetik xchiʼuk li bikʼtal lumetik ta sjoylejale.

55 Maon,+ Karmelo, Sif,+ Juta, 56 Jesreel, Jokdeam, Sanoa, 57 Kayin, Guibea xchiʼuk Timna.+ Lajuneb jteklumetik xchiʼuk li bikʼtal lumetik ta sjoylejale.

58 Alul, Bet-Sur, Guedor, 59 Maarat, Bet-Anot xchiʼuk Eltekon. Vakib jteklumetik xchiʼuk li bikʼtal lumetik ta sjoylejale.

60 Kiryat-Baal, jaʼ xkaltik, Kiryat-Jearim+ xchiʼuk Raba. Chib jteklumetik xchiʼuk li bikʼtal lumetik ta sjoylejale.

61 Li ta takixokol balumile te xkom Bet-Araba,+ Midin, Sekaka, 62 Nibsan, Jteklum Atsʼam xchiʼuk En-Guedi.+ Vakib jteklumetik xchiʼuk li bikʼtal lumetik ta sjoylejale.

63 Li viniketik ta Judae muʼyuk xuʼ yuʼunik snutsel lokʼel+ li jebusetik ti te nakalik ta Jerusalene,+ jaʼ yuʼun li jebusetike+ te to kom nakiikuk xchiʼuk li krixchanoetik ta Juda te ta Jerusalen kʼalal to avie.

16 Li yosilik ti laj yichʼik akʼbel ta suerte+ li snitilulal Josee+ te chlik ta Jordan ta stsʼel Jeriko kʼalal to ta nioʼ ta stukʼil slokʼeb kʼakʼal ta Jeriko, te ch-echʼ batel ta takixokol balumil ti chlik batel ta Jeriko kʼalal to ta vitstikaltik ta Betele.+ 2 Te chlik batel ta Betel ti te xkom ta Luse, chkʼot kʼalal to ta Atarot ta stsʼak j-arkitaetik, 3 laje chyal batel ta stsʼak yosil jafletetik ta stukʼil smaleb kʼakʼal kʼalal to ta stsʼakil Bet-Oron+ ta olon xchiʼuk Gueser,+ te to chpaj ta nab.

4 Jaʼ yuʼun, laj yichʼ yosilik+ li snitilulal Josee,+ jaʼ xkaltik, li snitilulal Manases xchiʼuk li snitilulal Efraine. 5 Ti bu to kʼalal chpaj stsʼak yosil li snitilulal Efrain ta jujuchop yutsʼ yalalike jaʼ liʼe: li ta slokʼeb kʼakʼale te chlik ta Atarot-Addar+ kʼalal to ta Bet-Oron ta akʼol,+ 6 te to chkʼot ta nab. Te xkom ta norte li Mikmetate,+ li stsʼakile chbat sjoy talel ta stukʼil slokʼeb kʼakʼal ta Taanat-Silo, te ch-echʼ batel ta stukʼil slokʼeb kʼakʼal ti te to chkʼot ta Janoae. 7 Li stsʼak chlik ta Janoae chyal batel kʼalal to ta Atarot xchiʼuk ta Naara, ch-echʼ batel ta Jeriko+ xchiʼuk chkʼot kʼalal to ta Jordan. 8 Li stsʼake ch-echʼ to batel ta Tapua+ ti chkʼot kʼalal to ta beoʼtik ta stenlejaltik Kana ta smaleb kʼakʼale, te to chkʼot pajuk ta nab.+ Taje jaʼ li xrexto* snitilulal Efrain ta jujuchop yutsʼ yalalike; 9 jech xtok, li snitilulal Efraine laj yichʼik jteklumetik ti te xkom ti bu laj yichʼ xrexto* li Manasese,+ jaʼ li jteklumetik xchiʼuk li bikʼtal lumetik ta sjoylejale.

10 Pe muʼyuk la snutsik lokʼel li jkanaanetik ti te nakalik ta Guesere.+ Li jkanaanetike te to xchiʼukik-o ta naklej Efrain kʼalal to avie,+ jaʼ ch-akʼbat spasik li tsatsal abtelale.+

17 Li suertee+ jaʼ kʼot ta stojolal snitilulal Manases,+ li Manasese jaʼ sba xnichʼon li Josee.+ Ta skoj ti chanem ta paskʼop li Makir+ ti jaʼ sba xnichʼon Manasese xchiʼuk ti jaʼ stot li Galaade, laj yichʼ akʼbel li Galaad xchiʼuk Basane.+ 2 Li suertee kʼot ta stojolal li yan snitilulal Manases ta jujuchop yutsʼ yalalike, jaʼ la sta li xnichʼnabtak Abi-Eser,+ xnichʼnabtak Elek, xnichʼnabtak Asriel, xnichʼnabtak Sikem, xnichʼnabtak Efer xchiʼuk li xnichʼnabtak Semidae. Taje jaʼik snitilulal Manases, li xnichʼon Josee, li viniketik ta jujuchop yutsʼ yalalike.+ 3 Li Selofeade+ muʼyuk skerem, jaʼ noʼox oy stsebetak. Li Selofeade jaʼ xnichʼon Efer, xnichʼon Galaad, xnichʼon Makir xnichʼon Manases. Li sbi stsebetake jaʼ Mala, Noa, Ogla, Milka xchiʼuk Tirsa. 4 Li tsebetike nopajik batel ta stojolal li pale Eleasare,+ ta stojolal Josue xnichʼon li Nune xchiʼuk ta stojolal li bankilaletike, xi laj yalike: «Li Moisese albat mantal yuʼun Jeova ti akʼo yakʼbun jrextokutik* ti bu chichʼ akʼbel xrexto li kutsʼ kalalkutike».+ Jaʼ yuʼun, akʼbat xrextoik ti bu laj yichʼ akʼbel xrexto li xchiʼiltak ta vokʼel stotik+ jech kʼuchaʼal yaloj mantal li Jeovae.

5 Li Manasese akʼbat to lajunsep yosil xtok, maʼuk noʼox li osil ta Galaad xchiʼuk Basan ti te xkom ta jot* Jordane,+ 6 yuʼun li stsebetak xchiʼuk li skeremtak Manasese jmoj laj yichʼ xrextoik.* Li yan snitilulal Manasese jaʼ laj yichʼik li yosilal Galaade.

7 Li stsʼak Manasese chlik ta Aser kʼalal to ta Mikmetat+ ti te xkom ta yeloval Sikeme,+ ch-echʼ to batel ta sur* yoʼ bu xkom yosil li jnaklejetik ta En-Tapuae. 8 Li yosilal Tapuae+ jaʼ laj yichʼ li Manasese, pe li jteklum Tapua ti bu stsʼakinoj Manasese jaʼ yuʼunik li snitilulal Efraine. 9 Li stsʼake chyal batel ta beoʼtik ta stenlejaltik Kana ta sural li beoʼtik ta stenlejaltike. Li jteklumetik ti bu laj yichʼ li Manasese+ oy te jteklumetik ti jaʼ yuʼun Efraine. Li stsʼak Manasese te xkom ta snorteal li beoʼtik ta stenlejaltike, te to chkʼot pajuk ta nab.+ 10 Li ta sure jaʼ yuʼun Efrain, li ta nortee jaʼ yuʼun Manases, te chpaj yosilik ta nab.+ Li stsʼak osil ta nortee chkʼot* kʼalal to ta Aser, li ta slokʼeb kʼakʼale chkʼot kʼalal to ta Isakar.

11 Li Manasese te akʼbat yosil ti bu laj yichʼ yosil li Isakar xchiʼuk Asere, jaʼ akʼbat li Bet-Sean xchiʼuk li bikʼtal lumetik ti te noʼox nopajtike,* li Ibleam+ xchiʼuk li bikʼtal lumetik ti te noʼox nopajtike, li jnaklejetik ta Dor+ xchiʼuk li bikʼtal lumetik ti te noʼox nopajtike, li jnaklejetik ta En-Dor+ xchiʼuk li bikʼtal lumetik ti te noʼox nopajtike, li jnaklejetik ta Taanak+ xchiʼuk li bikʼtal lumetik ti te noʼox nopajtike xchiʼuk li jnaklejetik ta Meguido xchiʼuk li bikʼtal lumetik ti te noʼox nopajtike, oy oxsep osil ti vitstikaltike.

12 Pe li snitilulal Manasese muʼyuk xuʼ yuʼunik yuʼuninel li jteklumetik taje, yuʼun li jkanaanetike la spakʼalin sbaik sventa te xkom nakiikuk li ta osile.+ 13 Kʼalal lik stsak yipik li j-israeletike, lik yakʼbeik spas tsatsal abtelal+ li jkanaanetike, pe muʼyuk la snutsik lokʼel skotolik.+

14 Li snitilulal Josee xi tal yalbeik li Josuee: «¿Kʼu yuʼun ti jsep noʼox osil laj avakʼ jrextokutik* ta suertee?+ Epunkutik li ta jlumalkutike, yuʼun lek yakʼojbunkutik bendision Jeova kʼalal to avie».+ 15 Xi la stakʼ li Josuee: «Mi yuʼun toj epoxuke chaʼa, muyanik batel li ta teʼtikaltike, te xbat naklanik li ta yosil jperisitaetik+ xchiʼuk jrefaetike,+ yuʼun noj xa avuʼunik li vitstikaltik Efraine».+ 16 Li snitilulal Josee xi laj yalike: «Mu xi-ochkutik-o li ta vitstikaltike, jech xtok, li jkanaanetik te nakalik ta vitstikaltike oy skaretaik sventa paskʼop+ ti stsakanojbeik espada li ta syantailtake,* jechik ek li buchʼutik te nakalik ta Bet-Sean+ xchiʼuk li bikʼtal lumetik ti te noʼox nopajtike* xchiʼuk li buchʼutik te nakalik ta stenlejaltik Jesreele».+ 17 Jaʼ yuʼun, li Josuee xi laj yalbe li xnichʼnabtak Josee, jaʼ xkaltik, li Efrain xchiʼuk Manasese: «Epoxuk li ta ateklumalike xchiʼuk lek xuʼ avuʼunik. Mu jsepuk noʼox osil chavichʼik,+ 18 jaʼ chavichʼik xtok li vitstikaltike.+ Manchuk mi teʼtikaltik, xuʼ xajamik batel, vaʼun jaʼ te chpaj stsʼakil li avosilike. Akʼo mi xuʼ yuʼunik li jkanaanetike xchiʼuk mi oy skaretaik sventa paskʼop ti stsakanojbeik espada li ta syantailtake,* tsnuts avuʼunik lokʼel».+

18 Sjunul li tsobobbail yuʼun j-israeletike te la stsob sbaik ta Silo+ xchiʼuk te la spasik li karpana sventa tsobobbaile,+ yuʼun ochem xa ox ta skʼobik li balumile.+ 2 Pe oy to vukchop nitilulal ta Israel ti muʼyuk to chʼakbil ta suerte li xrextoike.* 3 Jaʼ yuʼun, li Josuee xi laj yalbe li j-israeletike: «¿Kʼu to sjalil ti muʼyuk ch-och avuʼuninik li balumil ti laj xa yakʼboxuk li Jeova, li Sdios amoltotakike?+ 4 Tʼujik oxvoʼ viniketik ta jujuchop anitilulalik sventa jtakik batel yoʼ xbat xanik xchiʼuk spasbeik tal jun smapail li osil ti bu chichʼ ta xrextoik* li jujuchop nitilulale. Mi laje, tsutik talel ta jtojolal. 5 Skʼan xachʼakbe abaik ta vuksep li osile.+ Li Judae te chkom ta yosil li ta sure,+ li xnichʼnabtak Josee te chkomik ta yosilik li ta nortee.+ 6 Li voʼoxuke pasbeik jun smapail li osile, ta vuksep xachʼakik, mi laje liʼ xavichʼbeikun tale, vaʼun liʼ chkakʼ suerte+ ta atojolalik ta yeloval li Jeova Dios kuʼuntike. 7 Pe li jlevietike muʼyuk kʼusi chichʼik,+ yuʼun jaʼ xrextoik* ti chtunik ta paleal ta sventa li Jeovae;+ yan li Gad, Ruben xchiʼuk li j-oʼlol snitilulal Manasese+ laj xa yichʼ xrextoik li ta jot Jordan ta stukʼil slokʼeb kʼakʼale, jaʼ akʼbatik yuʼun Moises, li yajtunel Jeovae».

8 La xchapan sbaik li viniketik ti chbatike. Xi albatik batel yuʼun Josue li buchʼutik chbat spasbeik smapail li osile: «Batanik, bat xanik li balumile xchiʼuk pasbeik talel smapail, mi laje sutanik talel ta jtojolal, vaʼun liʼ ta Silo+ chkakʼ suerte ta atojolalik ta yeloval li Jeovae». 9 Li viniketike batik kʼalal jech albatike, bat xanik li balumile xchiʼuk la spasbeik smapail li osile, ta vuksep la spʼisik. Jech xtok, la stsakbeik sbi li jujun jteklum ta jujusep osile, te la stsʼibaik ta jlik livro. Ta tsʼakale, sutik talel ti bu spasoj skarpanaik ta Siloe, te kʼotik ti bu oy li Josuee. 10 Li Josue une lik yakʼ suerte ta Silo ta stojolalik ta yeloval li Jeovae.+ Li Josuee te la xchʼakbe j-israeletik li osile, jech yepal laj yakʼbe ti kʼu onoʼox yepal tstaik ta jujuchope.+

11 Li suertee kʼot ta stojolal li jujuchop yutsʼ yalal snitilulal Benjamine, li osil la staik ta suertee te oy ta oʼlol yuʼunik li steklumal Juda+ xchiʼuk li steklumal Josee.+ 12 Li stsʼak ta nortee te chlik ta Jordan,+ chmuy batel kʼalal to ta stselejal Jeriko ta norte, chmuy to batel xtok ta vitstikaltik ta stukʼil smaleb kʼakʼal, chkʼot kʼalal to ta takixokol balumil ta Bet-Aven.+ 13 Li stsʼake te chlik ta Bet-Aven xtok, chkʼot kʼalal to ta Lus, ta stselejal Lus ta sur, jaʼ xkaltik, ta Betel;+ laje chyal batel ta Atarot-Addar,+ te ch-echʼ ta sba li vits ti te xkom ta sural Bet-Oron+ ta olone. 14 Laje, te chlik ta smaleb kʼakʼal, te to tsjoy batel ta sur ti te chlik li ta vits ti skʼeloj batel Bet-Oron ta sure; te to chpaj ta Kiryat-Baal, jaʼ xkaltik, Kiryat-Jearim+ ti jaʼ jun jteklum yuʼun li Judae. Taje jaʼ li stsʼakik ta stukʼil smaleb kʼakʼale.

15 Li stsʼakik ta sure chlik ta stiʼil Kiryat-Jearim, chkʼot kʼalal to ta smaleb kʼakʼal. Te chkʼot lokʼuk ta nioʼ ta Neftoa.+ 16 Laje, te chyal batel li ta yok vits ti skʼeloj batel li stenlejaltik Inon+ ti te oy ta norte ta stenlejaltik Refaime,+ te chyal batel ta stenlejaltik Inon, ta stselej yuʼun li jebusetik+ ta sure xchiʼuk chyal batel ta En-Roguel.+ 17 Li stsʼake te chbat ta norte xchiʼuk te ch-echʼ batel ta En-Semes, vaʼun te chkʼot ta lokʼel ta Guelilot ti te xkom ta yeloval li muyebaltik ta Adumime,+ laje chyal batel li ta ton+ ti bu yakʼoj Boan+ xnichʼon Rubene. 18 Te to ch-echʼ batel ta stselej ta norte ta yeloval Araba, vaʼun chyal batel ta Araba. 19 Li stsʼake te to ch-echʼ batel ta stselej ta snorteal Bet-Ogla,+ te to chpaj ta stiʼil li snorteal nab Muertoe,*+ ta stiʼil to tajek Jordan ta sur. Taje jaʼ li stsʼak yosilik ta stukʼil sure. 20 Li Jordane jaʼ kʼotem ta stsʼak yosilik li ta slokʼeb kʼakʼale. Taje jaʼ stsʼak yosilik ti laj yichʼ ta xrextoik* li snitilulal Benjamin ta jujuchop yutsʼ yalalike.

21 Li jteklumetik ti laj yichʼik akʼbel li snitilulal Benjamin ta jujuchop yutsʼ yalalike jaʼ liʼe: Jeriko, Bet-Ogla, Emek-Kesis, 22 Bet-Araba,+ Semaraim, Betel,+ 23 Avim, Para, Ofra, 24 Kefar-Amoni, Ofni xchiʼuk Gueba.+ 12 jteklumetik xchiʼuk li bikʼtal lumetik ta sjoylejale.

25 Gabaon,+ Rama, Beerot, 26 Mispe, Kefira, Mosa, 27 Rekem, Irpeel, Tarala, 28 Sela,+ A-Elef, Jebusi, jaʼ xkaltik, Jerusalen,+ Guibea+ xchiʼuk Kiryat. 14 jteklumetik xchiʼuk li bikʼtal lumetik ta sjoylejale.

Taje jaʼ xrexto* osilik li snitilulal Benjamin ta jujuchop yutsʼ yalalike.

19 Vaʼun, li xchibal suertee+ jaʼ kʼot ta stojolal li snitilulal Simeon+ ta jujuchop yutsʼ yalalike. Li xrexto* laj yichʼike te xkom ti bu yichʼoj xrexto osilik li snitilulal Judae.+ 2 Li xrextoike* jaʼ Beer-Seba+ xchiʼuk Seba, Molada,+ 3 Asar-Sual,+ Bala, Esem,+ 4 Eltolad,+ Betul, Orma, 5 Siklag,+ Bet-Markabot, Asar-Susa, 6 Bet-Lebaot+ xchiʼuk Saruen. 13 jteklumetik xchiʼuk li bikʼtal lumetik ta sjoylejale; 7 Ain, Rimon, Eter xchiʼuk Asan.+ Chanib jteklumetik xchiʼuk li bikʼtal lumetik ta sjoylejale; 8 jaʼ kʼot ta xrextoik* xtok skotol li bikʼtal lumetik oy ta sjoylejal li jteklumetik taje kʼalal to ta Baalat-Beer, ta Rama ti te xkom ta sure. Taje jaʼ xrextoik li snitilulal Simeon ta jujuchop yutsʼ yalalike. 9 Li xrexto* osilik snitilulal Simeone te xkom ti bu laj yichʼ xrextoik li snitilulal Judae, yuʼun toj mukʼ staoj yosilik li snitilulal Judae. Jaʼ yuʼun, li snitilulal Simeone te laj yichʼ xrextoik ti bu yichʼoj xrexto osilik li snitilulal Judae.+

10 Li yoxibal suertee+ jaʼ kʼot ta stojolal li snitilulal Sabulon+ ta jujuchop yutsʼ yalalike. Li stsʼak xrexto* osilike chkʼot kʼalal to ta Sarid. 11 Chmuy batel ta stukʼil smaleb kʼakʼal ta Mareal, chkʼot ta Dabeset, laje chbat to ta stenlejaltik* ta yeloval Jokneam. 12 Li stsʼak ta Saride chbat ta stukʼil slokʼeb kʼakʼal, chkʼot kʼalal to ta stsʼak Kislot-Tabor xchiʼuk ta Daberat,+ laje chmuy batel ta Jafia. 13 Te une, chbat kʼalal ta slokʼeb kʼakʼal ta Gat-Efer,+ ta Et-Kasin xchiʼuk ta Rimon, chkʼot kʼalal to ta Nea. 14 Li stsʼakike chbat tsjoy talel ta norte ti chkʼot ta Anatone, te to chpaj ta stenlejaltik Ifta-El, 15 ta Katat, ta Naalal, ta Simron,+ ta Idala xchiʼuk ta Belen.+ 12 jteklumetik xchiʼuk li bikʼtal lumetik ta sjoylejale. 16 Taje jaʼ xrextoik* li snitilulal Sabulon ta jujuchop yutsʼ yalalike.+ Jaʼ li jteklumetik xchiʼuk li bikʼtal lumetik ta sjoylejale.

17 Li xchanibal suertee+ jaʼ kʼot ta stojolal li snitilulal Isakar+ ta jujuchop yutsʼ yalalike. 18 Li stsʼakike chkʼot kʼalal to ta Jesreel,+ Kesulot, Sunem,+ 19 Afaraim, Xion, Anaarat, 20 Rabit, Kision, Ebes, 21 Remet, En-Ganim,+ En-Ada xchiʼuk Bet-Pases. 22 Li stsʼakike chkʼot kʼalal to ta Tabor,+ ta Saasuma xchiʼuk ta Bet-Semes, te to chpaj ta Jordan. 16 jteklumetik xchiʼuk li bikʼtal lumetik ta sjoylejale. 23 Taje jaʼ xrextoik* li snitilulal Isakar ta jujuchop yutsʼ yalalike.+ Jaʼ li jteklumetik xchiʼuk li bikʼtal lumetik ta sjoylejale.

24 Li svoʼobal suertee+ jaʼ kʼot ta stojolal li snitilulal Aser+ ta jujuchop yutsʼ yalalike. 25 Li stsʼakike chkʼot kʼalal to ta Elkat,+ Ali, Beten, Aksaf, 26 Alamelek, Amad xchiʼuk Misal. Chkʼot kʼalal to ta smaleb kʼakʼal ta Karmelo+ xchiʼuk ta Sior-Libnat, 27 chbat sjoy talel ta slokʼeb kʼakʼal ta Bet-Dagon, vaʼun chkʼot ta Sabulon xchiʼuk ta stenlejaltik Ifta-El ta norte, chkʼot ta Bet-Emek xchiʼuk ta Neiel xchiʼuk ch-echʼ to batel ta Kabul li ta tsʼetkʼobe,* 28 ta Ebron, ta Reob, ta Amon xchiʼuk ta Kana, chkʼot kʼalal to ta Mukʼta Sidon.+ 29 Li stsʼakike chbat sjoy talel ta Rama, vaʼun chkʼot ta jteklum Tiro+ ti lek joyol ta muroe. Laje, tsjoy batel ta Osa, te to chpaj ta nab ta yosilal Aksib, 30 ta Uma, ta Afek+ xchiʼuk ta Reob.+ 22 jteklumetik xchiʼuk li bikʼtal lumetik ta sjoylejale. 31 Taje jaʼ xrextoik* li snitilulal Aser ta jujuchop yutsʼ yalalike.+ Jaʼ li jteklumetik xchiʼuk li bikʼtal lumetik ta sjoylejale.

32 Li svakibal suertee+ jaʼ kʼot ta stojolal li snitilulal Neftali ta jujuchop yutsʼ yalalike. 33 Li stsʼakike te chlik ta Elef yoʼ bu oy li mukʼta teʼ ta Saananime,+ ch-echʼ ta Adami-Nekeb, ta Jabneel, chkʼot kʼalal to ta Lakum; laje te to chpaj ta Jordan. 34 Li stsʼakike chbat sjoy talel ta smaleb kʼakʼal ta Asnot-Tabor, te une chbat ta Ukok xchiʼuk chkʼot kʼalal to ta Sabulon ta sur, kʼalal to ta Aser ta stukʼil smaleb kʼakʼal xchiʼuk ta Juda ta Jordan ta stukʼil slokʼeb kʼakʼal. 35 Li jteklumetik ti lek joyajtik ta muroe jaʼ Sidim, Ser, Ammat,+ Rakat, Kineret, 36 Adama, Rama, Asor,+ 37 Kedes,+ Edrei, En-Asor, 38 Yiron, Migdal-El, Orem, Bet-Anat xchiʼuk Bet-Semes.+ 19 jteklumetik xchiʼuk li bikʼtal lumetik ta sjoylejale. 39 Taje jaʼ xrextoik* li snitilulal Neftali ta jujuchop yutsʼ yalalike.+ Jaʼ li jteklumetik xchiʼuk li bikʼtal lumetik ta sjoylejale.

40 Li svukubal suertee+ jaʼ kʼot ta stojolal li snitilulal Dan+ ta jujuchop yutsʼ yalalike. 41 Li stsʼak xrexto* osilike jaʼ Sora,+ Estaol, Ir-Semes, 42 Saalabin,+ Ayalon,+ Itla, 43 Elon, Timna,+ Ekron,+ 44 Elteke, Guibeton,+ Baalat, 45 Jeud, Bene-Berak, Gat-Rimon,+ 46 Me-Jarkon xchiʼuk Rakon. Li stsʼak yosilike te ch-echʼ ta yeloval Jope.+ 47 Pe toj bikʼit+ li yosil Dane, jaʼ yuʼun bat stsakik ta kʼop li Leseme,+ och ta skʼobik xchiʼuk la slajesbeik skʼoplal ta espada. Jech laj yuʼuninik xchiʼuk te lik nakiikuk. Li Leseme, Dan laj yakʼbeik sbi, yuʼun Dan toʼox sbi li smoltotike.+ 48 Taje jaʼ xrextoik* li snitilulal Dan ta jujuchop yutsʼ yalalike. Jaʼ li jteklumetik xchiʼuk li bikʼtal lumetik ta sjoylejale.

49 Jaʼ jech laj yuʼunik ta xchʼakel li osil sventa xkʼot ta xrextoike.* Vaʼun, li j-israeletike te laj yakʼbeik xrexto Josue xnichʼon li Nun ti bu la sta xrextoike. 50 Ta skoj ti jech laj yal mantal Jeovae, jaʼ laj yakʼbeik li Timnat-Serae,+ yuʼun jaʼ la skʼan li Josuee. Li Timnat-Serae te oy ta vitstikaltik yuʼun Efrain, te la svaʼan li jteklume xchiʼuk te kom nakiuk.

51 Taje jaʼ li xrexto* osilik ti chʼakbatik yuʼun li pale Eleasar, li Josue xnichʼon li Nune xchiʼuk li joliletik ta jujuchop utsʼ alaliletik ta snitilulal Israele, te chʼakbatik+ ta suerte ta yeloval Jeova ta Silo+ ta yochebal karpana sventa tsobobbail.+ Jaʼ jech laj yoʼontonik ta xchʼakel li osile.

20 Li Jeovae xi laj yalbe li Josuee: 2 «Xi xavalbe yaʼiik li j-israeletike: ‹Tʼujik li jteklumetik sventa nakʼobbail+ ti jech laj kalbe Moises ti akʼo yalboxuke, 3 sventa te xjatav batel li buchʼu mu yolbajuk chmilvane. Jaʼ sventa te xbat anakʼ* abaik sventa mu smiloxuk yutsʼ yalal li buchʼu cham ti jaʼ xa chmilvane.*+ 4 Li buchʼu mu yolbajuk milvane skʼan te xjatav batel ta junuk li jteklum taje,+ te chvaʼi ta yochebal li jteklume+ xchiʼuk chalbe moletik ta jteklum li kʼusi kʼot ta pasele. Vaʼun, li moletike chakʼik ochuk li ta jteklume xchiʼuk chakʼbeik bu xuʼ xnaki, jech te chchiʼinik ta naklej. 5 Mi te tijil kʼot yutsʼ yalal li buchʼu cham ti jaʼ xa chmilvane,* mu me xavakʼbeik ta skʼob, yuʼun mu yolbajuk la smil li xchiʼile xchiʼuk muʼyuk onoʼox xtiʼet sjol ta stojolal.+ 6 Te chkom nakiuk li ta jteklume jaʼ to ti kʼuxi xichʼ chapanel ta tsobobbaile,+ vaʼun te chnaki-o jaʼ to mi cham li mero bankilal pale+ ti stsakoj yabtel li vaʼ orae. Li jmilvaneje jaʼ to xuʼ sut batel li ta jteklum ti bu jatav lokʼele, xuʼ x-och li ta steklumale xchiʼuk li ta snae›».+

7 Jaʼ yuʼun, la xchʼultajesik* li Kedes+ ti te xkom ta Galilea ta vitstikaltik yuʼun Neftalie, li Sikem+ ti te xkom ta vitstikaltik yuʼun Efraine xchiʼuk li Kiryat-Arbae,+ jaʼ xkaltik, li Ebron ti te xkom ta vitstikaltik yuʼun Judae. 8 Li ta yosilal Jordan ta stukʼil slokʼeb kʼakʼal ta Jerikoe, la stʼujik Beser+ ta takixokol balumil ti te xkom ta stenlejaltik yosil snitilulal Rubene. La stʼujik xtok Ramot+ ta Galaad ta yosil snitilulal Gad xchiʼuk Golan+ ta Basan ta yosil snitilulal Manases.+

9 Taje jaʼ li jteklumetik chkom sventa skotol li j-israeletik xchiʼuk li jyanlumetik ti te xchiʼukik ta nakleje. Li ta jteklumetik taje jaʼ te chjatav batel li buchʼu mu yolbajuk la smil xchiʼile+ sventa mu xmilat yuʼun yutsʼ yalal li buchʼu cham* ti kʼalal muʼyuk to chapanbil ta tsobobbaile.+

21 Li joliletik ta jujuchop yutsʼ yalal jlevietike bat skʼoponik li pale Eleasare,+ li Josue xnichʼon li Nune xchiʼuk li joliletik ta jujuchop yutsʼ yalal snitilulal Israele. 2 Te bat xchiʼinik ta loʼil ta Silo+ ta yosilal Kanaan, xi laj yalbeike: «Li Jeovae laj yalbe Moises ti akʼo yakʼbunkutik jteklumetik sventa xuʼ te xinakikutike xchiʼuk li yaxaltik ta sjoylejal sventa li jchonbolomkutike».+ 3 Ta smantal Jeova, li j-israeletike laj yakʼbeik jlevietik jteklumetik+ xchiʼuk li yaxaltik ta sjoylejale, te laj yakʼbeik ti bu yichʼoj xrextoike.*+

4 Li suertee kʼot ta stojolal li yutsʼ yalal jkoatetike.+ Li jlevietik ti jaʼ snitilulal li pale Aarone chʼakbatik ta suerte 13 jteklumetik ti jaʼ yuʼun li snitilulal Judae,+ li snitilulal Simeone+ xchiʼuk li snitilulal Benjamine.+

5 Li yan jkoatetike laj yichʼik chʼakbel ta suerte lajuneb jteklumetik ti jaʼ yuʼunik li yutsʼ yalal snitilulal Efraine,+ li snitilulal Dane xchiʼuk li j-oʼlol snitilulal Manasese.+

6 Li jguersonetike+ laj yichʼik chʼakbel ta suerte 13 jteklumetik ti jaʼ yuʼunik li yutsʼ yalal snitilulal Isakar, li snitilulal Aser, li snitilulal Neftali xchiʼuk li j-oʼlol snitilulal Manases ta Basane.+

7 Li jujuchop yutsʼ yalal jmerarietike+ laj yichʼik akʼbel 12 jteklumetik ti jaʼ yuʼunik li snitilulal Ruben, li snitilulal Gad xchiʼuk li snitilulal Sabulone.+

8 Li jlevietike jaʼ jech akʼbatik yuʼun j-israeletik ta suerte li jteklumetik xchiʼuk li yaxaltik ta sjoylejale, jech la spasik kʼuchaʼal albat mantal yuʼun Jeova li Moisese.+

9 Jaʼ jech laj yakʼik li jteklumetik ti liʼ chichʼ albel batel sbi ti jaʼ yuʼunik li snitilulal Juda xchiʼuk li snitilulal Simeone.+ 10 Jaʼ laj yichʼik akʼbel li xnichʼnabtak Aaron ti jaʼ yutsʼ yalal jkoatetik ti likemik ta snitilulal jlevietike, yuʼun jaʼ baʼyel kʼot ta stojolalik li suertee. 11 Laj yakʼbeik li Kiryat-Arbae,+ jaʼ xkaltik, li Ebron+ ta vitstikaltik yuʼun Judae xchiʼuk laj yakʼbeik li yaxaltik ta sjoylejale. (Li Arbae jaʼ li stot Anake). 12 Pe li yosilal jteklum xchiʼuk li bikʼtal lumetik yuʼune jaʼ laj yakʼbeik ta xrexto*+ li Kaleb xnichʼon Jefunee.

13 Li xnichʼnabtak pale Aarone jaʼ akʼbatik li jteklum ti bu chbat snakʼ* sba li jmilvaneje,+ jaʼ xkaltik, li jteklum Ebron+ xchiʼuk li yaxaltik ta sjoylejale. Jech xtok, akʼbatik Libna+ xchiʼuk li yaxaltik ta sjoylejale, 14 Jatir+ xchiʼuk li yaxaltik ta sjoylejale, Estemoa+ xchiʼuk li yaxaltik ta sjoylejale, 15 Olon+ xchiʼuk li yaxaltik ta sjoylejale, Debir+ xchiʼuk li yaxaltik ta sjoylejale, 16 Ain+ xchiʼuk li yaxaltik ta sjoylejale, Juta+ xchiʼuk li yaxaltik ta sjoylejale xchiʼuk Bet-Semes xchiʼuk li yaxaltik ta sjoylejale. Baluneb jteklumetik ti jaʼ yuʼunik li chaʼchop nitilulale.

17 Ta snitilulal Benjamin: Gabaon+ xchiʼuk li yaxaltik ta sjoylejale, Gueba xchiʼuk li yaxaltik ta sjoylejale,+ 18 Anatot+ xchiʼuk li yaxaltik ta sjoylejale xchiʼuk Almon xchiʼuk li yaxaltik ta sjoylejale. Chanib jteklumetik.

19 Skotol li jteklumetik laj yichʼik akʼbel li snitilulal Aaron ti jaʼik paleetike, jaʼ 13 jteklumetik xchiʼuk li yaxaltik ta sjoylejale.+

20 Li yan yutsʼ yalal jkoatetik ti jaʼ jlevietike akʼbatik li jteklumetik ti la staik ta suerte ti jaʼ yuʼunik li snitilulal Efraine. 21 Akʼbatik li jteklum ti bu tsnakʼ* sba li jmilvaneje,+ jaʼ xkaltik, li jteklum Sikem+ xchiʼuk li yaxaltik ta sjoylejal ti te xkom ta vitstikaltik yuʼun Efraine, akʼbatik xtok li Gueser+ xchiʼuk li yaxaltik ta sjoylejale, 22 Kibsaim xchiʼuk li yaxaltik ta sjoylejale xchiʼuk Bet-Oron+ xchiʼuk li yaxaltik ta sjoylejale. Chanib jteklumetik.

23 Ta snitilulal Dan: Elteke xchiʼuk li yaxaltik ta sjoylejale, Guibeton xchiʼuk li yaxaltik ta sjoylejale, 24 Ayalon+ xchiʼuk li yaxaltik ta sjoylejale xchiʼuk Gat-Rimon xchiʼuk li yaxaltik ta sjoylejale. Chanib jteklumetik.

25 Ta j-oʼlol snitilulal Manases: Taanak+ xchiʼuk li yaxaltik ta sjoylejale xchiʼuk Gat-Rimon xchiʼuk li yaxaltik ta sjoylejale. Chib jteklumetik.

26 Skotol li jteklumetik laj yichʼik akʼbel li yan yutsʼ yalal jkoatetike, jaʼ lajuneb jteklumetik xchiʼuk li yaxaltik ta sjoylejale.

27 Li jguersonetik+ ti te likemik tal ta jujuchop yutsʼ yalal jlevietike akʼbatik li jteklum ti bu tsnakʼ* sba li jmilvaneje, jaʼ xkaltik, li jteklum Golan+ ta Basan xchiʼuk li yaxaltik ta sjoylejale xchiʼuk Beestera xchiʼuk li yaxaltik ta sjoylejale. Chib jteklumetik ti jaʼ yuʼunik li j-oʼlol snitilulal Manasese.

28 Ta snitilulal Isakar:+ Kision xchiʼuk li yaxaltik ta sjoylejale, Daberat+ xchiʼuk li yaxaltik ta sjoylejale, 29 Jarmut xchiʼuk li yaxaltik ta sjoylejale xchiʼuk En-Ganim xchiʼuk li yaxaltik ta sjoylejale. Chanib jteklumetik.

30 Ta snitilulal Aser:+ Misal xchiʼuk li yaxaltik ta sjoylejale, Abdon xchiʼuk li yaxaltik ta sjoylejale, 31 Elkat+ xchiʼuk li yaxaltik ta sjoylejale xchiʼuk Reob+ xchiʼuk li yaxaltik ta sjoylejale. Chanib jteklumetik.

32 Ta snitilulal Neftali: li jteklum ti bu chbat snakʼ* sba+ li jmilvaneje, jaʼ xkaltik, li jteklum Kedes+ ta Galilea xchiʼuk li yaxaltik ta sjoylejale, Amot-Dor xchiʼuk li yaxaltik ta sjoylejale xchiʼuk Kartan xchiʼuk li yaxaltik ta sjoylejale. Oxib jteklumetik.

33 Skotol li jteklumetik laj yichʼik akʼbel li jujuchop yutsʼ yalal jguersonetike, jaʼ 13 jteklumetik xchiʼuk li yaxaltik ta sjoylejale.

34 Li yutsʼ yalal jmerarietik+ ti jaʼ li yan snitilulal jlevietike laj yichʼik li jteklumetik ti jaʼ yuʼunik snitilulal Sabulone:+ Jokneam+ xchiʼuk li yaxaltik ta sjoylejale, Karta xchiʼuk li yaxaltik ta sjoylejale, 35 Dimna xchiʼuk li yaxaltik ta sjoylejale xchiʼuk Naalal+ xchiʼuk li yaxaltik ta sjoylejale. Chanib jteklumetik.

36 Ta snitilulal Ruben: Beser+ xchiʼuk li yaxaltik ta sjoylejale, Jaas xchiʼuk li yaxaltik ta sjoylejale,+ 37 Kedemot xchiʼuk li yaxaltik ta sjoylejale xchiʼuk Mefaat xchiʼuk li yaxaltik ta sjoylejale. Chanib jteklumetik.

38 Ta snitilulal Gad:+ li jteklum ti bu chbat snakʼ* sba li jmilvaneje, jaʼ xkaltik, li jteklum Ramot ta Galaad+ xchiʼuk li yaxaltik ta sjoylejale, Maanaim+ xchiʼuk li yaxaltik ta sjoylejale, 39 Esbon+ xchiʼuk li yaxaltik ta sjoylejale xchiʼuk Jaser+ xchiʼuk li yaxaltik ta sjoylejale. Chanib jteklumetik ta skotol.

40 Skotol li jteklumetik laj yichʼik akʼbel li jujuchop yutsʼ yalal jmerarietike, li yan yutsʼ yalal jlevietike, jaʼ 12 jteklumetik.

41 Skotol li jteklumetik ti laj yichʼik li jlevietik ti jaʼ yuʼun li j-israeletike, jaʼ 48 jteklumetik xchiʼuk li yaxaltik ta sjoylejale.+ 42 Oy yaxaltik ta sjoylejal li jujun jteklume. Jaʼ jech oy yaxaltik ta sjoylejal skotol li jteklumetik taje.

43 Li Jeovae jaʼ jech laj yakʼbe Israel skotol li osil ti jech onoʼox yalojbe ta jamal chakʼbe li smoltotakike.+ Vaʼun, jech och ta skʼobik li osile xchiʼuk te lik nakiikuk.+ 44 Jech xtok, li Jeovae laj yakʼbe xkux yoʼontonik ta melel jech onoʼox kʼuchaʼal albatik ta jamal li smoltotakike.+ Mi junuk yajkontraik tsalatik yuʼun.+ Li Jeovae laj yakʼbe ta skʼob j-israeletik skotol li yajkontraike.+ 45 Mi jpʼeluk chʼay ta be skotol li kʼusitik lekik laj yal ta jamal Jeova ti chkʼot ta pasel ta stojolal li j-israeletike. Kʼot ta pasel skotol.+

22 Vaʼun, li Josuee la stak ta ikʼel li jrubenetike, li jgadetike xchiʼuk li j-oʼlol snitilulal Manasese, 2 xi laj yalanbee: «La apasik skotol li kʼusi yalojboxuk Moises+ ti jaʼ yajtunel Jeovae xchiʼuk la achʼunik skotol li kʼusi laj kalboxuke.+ 3 Muʼyuk xaviktaik komel stuk li avermanotakik ti kʼu xa sjalil echʼ talel kʼalal to avie;+ jech xtok, laj avakʼ ta akuxlejalik li smantal Jeova Dios avuʼunike.+ 4 Avie, li Jeova Dios avuʼunike laj xa yakʼbe xkux yoʼonton avermanotakik jech kʼuchaʼal albatik ta jamale.+ Jaʼ yuʼun, xuʼ xa xasutik batel ta akarpanaik li ta jot* Jordan ti bu laj yakʼ avosilik+ li Moises ti jaʼ yajtunel Jeovae. 5 Jaʼ noʼox pʼijanik me ti xavakʼ ta akuxlejalik li mantaletike xchiʼuk li Mantal laj yakʼboxuk+ Moises ti jaʼ yajtunel Jeovae, ti xakʼanik li Jeova Dios avuʼunike,+ ti xaxanavik ta skotol li beetik yuʼune,+ ti xachʼunbeik li smantaltake,+ ti xanapʼan abaik ta stojolale+ xchiʼuk ti ta sjunuluk avoʼontonik xchiʼuk ta sjunuluk akuxlejalik+ xatunik ta stojolale».+

6 Li Josuee laj yakʼanbe bendision xchiʼuk la stakan batel, jech te sutik batel ta skarpanaik. 7 Li j-oʼlol snitilulal Manasese te xa onoʼox akʼbil xrextoik* yuʼun Moises ta Basan,+ li yan j-oʼlol snitilulale te akʼbat xrextoik yuʼun Josue ta jot Jordan+ ta stukʼil smaleb kʼakʼal te yoʼ bu oy li yermanotakike. Jech xtok, kʼalal takatik batel yuʼun Josue ta skarpanaike, akʼbatik batel bendision 8 xchiʼuk xi albatik batele: «Sutanik batel ta akarpanaik, oy akʼulejal chabatik. Ichʼik batel epal chonbolometik, epal plata, oro, kovre, takʼin xchiʼuk epal kʼuʼil pokʼiletik.+ Tsakik batel ti kʼu onoʼox yepal chavichʼik ta skotol li kʼusitik la jpojbetik+ kajkontratike, koʼol xachʼakbe abaik xchiʼuk avermanotakik».

9 Laje, li jrubenetik, li jgadetik xchiʼuk li j-oʼlol snitilulal Manasese laj yiktaik komel li Silo ta yosilal Kanaan ti bu oyik li yan j-israeletike, sutik batel ta yosilal Galaad,+ jaʼ li yosilik ti bu akʼbatik yuʼun Moises ti jech albat mantal yuʼun Jeovae.+ 10 Kʼalal kʼotik ta stsʼel Jordan ta yosilal Kanaan li jrubenetik, li jgadetik xchiʼuk li j-oʼlol snitilulal Manasese, te la svaʼanik jun skajleb matanal ta stsʼel Jordan, yan to sba smukʼul. 11 Ta mas tsʼakale, xi kʼot ta xchikinik li yan j-israeletike:+ «Li jrubenetik, li jgadetik xchiʼuk li j-oʼlol snitilulal Manasese la svaʼanik jun skajleb matanal li ta stsʼakil yosilal Kanaane, te ta stsʼel Jordan ti jaʼ to yuʼun li j-israeletike». 12 Kʼalal jech kʼot ta xchikin li j-israeletike, sjunul li tsobobbaile la stsob sbaik ta Silo+ sventa xbat stsakik ta kʼop.

13 Vaʼun, li j-israeletike la stakik batel li pale Fineas+ ti jaʼ xnichʼon Eleasar sventa xbat skʼel li jrubenetik, li jgadetik xchiʼuk li j-oʼlol snitilulal Manases ti te oyik ta yosilal Galaade, 14 te xchiʼuk batel lajunvoʼ viniketik. Li jujun vinike te lokʼemik ta jujuchop snitilulal Israel. Jaʼ joliletik ta jujuchop utsʼ alalil li ta smilal noʼox j-israeletike.+ 15 Kʼalal kʼotik yoʼ bu oy li jrubenetik, li jgadetik xchiʼuk li j-oʼlol snitilulal Manases ta yosilal Galaade, xi kʼot yalike:

16 «Xi chal sjunul li tsobobbail yuʼun Jeovae: ‹¿Kʼuxi xa noʼox ti jech chapasik ti muʼyuk xa tukʼ+ chavakʼ abaik ta stojolal li Dios yuʼun Israele? Laj xa avalopatinik komel Jeova xchiʼuk laj xa atoy abaik ta stojolal Jeova ta skoj ti la apasik jun skajleb matanale.+ 17 ¿Mi avalojik ti muʼyuk tsots la jta jmultik li ta Peore? Muʼyuk to lekubemutik ta skoj kʼalal to avie akʼo mi akʼbat xa stoj yuʼun Jeova sjunul li tsobobbaile.+ 18 ¡Li avi xtoke chakʼan chaviktaik stsʼakliel li Jeovae! Mi chatoy abaik ta stojolal Jeova li avie, li okʼome ta x-ilin ta stojolal sjunul li tsobobbail yuʼun Israele.+ 19 Mi jech chapasik ta skoj ti yuʼun ibal sba* li avosil avichʼojike, jelavanik tal li ta osil ti jaʼ yuʼun Jeova+ ti bu oy li axibalna yuʼun Jeovae,+ liʼ xtal achiʼinunkutik ta nakleje. Jaʼ noʼoxe mu xatoy abaik ta stojolal Jeova xchiʼuk mu xavakʼ jkuchinkutik atoyobbailik ta skoj ti chapasik jun skajleb matanale, yuʼun oy xa jun skajleb smoton li Jeova Dios kuʼuntike.+ 20 ¿Mi mu ilinuk ta stojolal sjunul li tsobobbail yuʼun Israel+ kʼalal muʼyuk tukʼ kʼusi la spas li Akan+ xnichʼon Sera ta skoj li kʼusitik albil chichʼ lajesbel skʼoplale? Jech xtok, mu stukuk noʼox cham ta skoj li smule›».+

21 Li jrubenetik, li jgadetik xchiʼuk li j-oʼlol snitilulal Manasese xi la stakʼbeik li joliletik ta smilal noʼox j-israeletike:+ 22 «¡Li Jeovae jaʼ noʼox stuk mukʼul Dios ti mu jechuk li yan diosetike!+ ¡Li Jeovae jaʼ noʼox stuk mukʼul Dios ti mu jechuk li yan diosetike! Snaʼoj lek xchiʼuk ta to snaʼ ek li Israele. Jeova, mi la jtoy jbakutik xchiʼuk mi muʼyuk tukʼ kakʼoj jbakutik ta atojolale, mu me kuxuluk xaviktaunkutik li avie. 23 Mi chkikta jbakutik ta stsʼakliel Jeova xchiʼuk mi jaʼ ta skoj ti chkakʼkutik chikʼbil matanal, matanal sat tsʼunobiletik xchiʼuk matanal sventa jun oʼontonal ti la jpaskutik li skajleb matanale, jaʼ chakʼbunkutik kastigo li Jeovae.+ 24 Pe mu jechuk, yuʼun yan-o ti kʼusi ta jvul-o koʼontonkutik ti jech la jpaskutike. La jnopkutik ti xi chlik yalbe jnichʼnabkutik ta tsʼakal li anichʼnabike: ‹¿Kʼu yuʼun liʼ chtal atikʼ abaik ta stojolal li Jeova Dios yuʼun Israele? 25 Voʼoxuk li jrubenoxuk xchiʼuk li jgadoxuke jaʼ jtsʼaktik kʼotem yuʼun Jeova li Jordane. Jecheʼ chtal atikʼ abaik ta stojolal li Jeovae›. Jaʼ jech tsmakik ta be jnichʼnabkutik li anichʼnabik sventa mu xichʼik ta mukʼ* li Jeovae.

26 »Jaʼ yuʼun, laj kalkutik ti jaʼ lek ta jvaʼankutik jun skajleb matanale, pe maʼuk sventa chikʼbil matanal mi jaʼuk sventa milbil matanal, 27 yuʼun jaʼ noʼox chkʼot ta testigo kuʼuntik+ xchiʼuk chkʼot ta testigo yuʼun li jnitilulaltik* chtal ta tsʼakal ti liʼ chtal jpasbekutik yabtel Jeova xchiʼuk ti chkichʼkutik tal chikʼbil matanal, milbil matanal xchiʼuk li milbil matanal sventa jun oʼontonale.+ Ti jech ta jpaskutike jaʼ sventa mu xiuk xalbe jnichʼnabkutik ta tsʼakal li anichʼnabike: ‹Jecheʼ chtal atikʼ abaik ta stojolal li Jeovae›. 28 Jech oxal, xi laj kalkutike: ‹Ti jech xalbutik xchiʼuk ti jech xalbeik li jnitilulaltik* ta tsʼakale, xi ta jtakʼbetike: «Kʼelavilik li slokʼol skajleb matanal yuʼun Jeova ti la spas li jmoltotkutike, maʼuk sventa chikʼbil matanal mi jaʼuk sventa milbil matanal, jaʼ noʼox kʼotem ta testigo kuʼuntik»›. 29 Mu xkʼot-o ti jpaskutik jun skajleb matanal sventa chikʼbil matanal, sventa matanal sat tsʼunobiletik xchiʼuk sventa milbil matanale, yuʼun oy xa jun skajleb smoton li Jeova Dios kuʼuntik ti te oy ta yeloval li axibalna yuʼune,+ ¡mu sta-o ti jtoy jbakutik ta stojolal li Jeovae xchiʼuk ti xkiktakutik stsʼakliel avi li Jeovae!».+

30 Li pale Fineas xchiʼuk li bankilaletik ta tsobobbail ti jaʼ joliletik ta smilal noʼox j-israeletik ti te xchiʼukane jun yoʼonton komik+ kʼalal laj yaʼiik li kʼusi laj yalik li snitilulal Ruben, Gad xchiʼuk li Manasese. 31 Li pale Fineas ti jaʼ xnichʼon Eleasare xi laj yalbe li snitilulal Ruben, Gad xchiʼuk li Manasese: «Li avie, laj xa jnaʼkutik ti liʼ xchiʼinojutik li Jeovae, yuʼun muʼyuk la apasik li kʼusi muʼyuk tukʼ ta stojolal Jeovae. Li avi une muʼyuk chakʼbutik kastigo li Jeovae».

32 Vaʼun, li pale Fineas ti jaʼ xnichʼon Eleasare xchiʼuk li bankilaletike te laj yiktaik komel ta yosilal Galaad li jrubenetik xchiʼuk li jgadetike, sutik batel ta Kanaan, kʼot yalbeik li yan j-israeletik ti kʼusi kʼot ta pasele. 33 Li j-israeletike jun yoʼonton komik ta sventa li kʼusi albatike. Vaʼun, lik skʼupil kʼoptaik li Diose xchiʼuk muʼyuk xa laj yalik mi chbat stsakik ta kʼop li jrubenetik xchiʼuk li jgadetik sventa sokesbeik li yosilik ti bu nakalike.

34 Jech oxal, li jrubenetik xchiʼuk li jgadetike laj yakʼbeik sbi li skajleb matanale, yuʼun xi laj yalike: «Li skajleb matanal liʼe jaʼ testigo kuʼuntik ti jaʼ melel Dios li Jeovae».

23 Kʼalal jelav xa ox ep kʼakʼal ti akʼbat xkux yoʼontonik+ yuʼun Jeova li Israele, ti muʼyuk xa xtal tsakatikuk ta kʼop yuʼun li yajkontratakik te ta spat xokonike, kʼalal oy xa ox sjabilal xchiʼuk mol xa ox li Josuee,+ 2 li Josuee la stsob skotol li Israele,+ li moletik yuʼunike, li joliletike, li jchapanvanejetike xchiʼuk li j-abteletik yuʼunike,+ xi laj yalanbee: «Oy xa jabilal xchiʼuk molun xa. 3 Aviloj atukik skotol li kʼusi la spasbe Jeova Dios avuʼunik skotol li mukʼtik lumetik sventa alekilalike, yuʼun li Jeova Dios avuʼunike jaʼ la spas kʼop stuk sventa tspak akʼoplalik.+ 4 La jnuts lokʼel+ li krixchanoetik ti te nakalik ta stukʼil smaleb kʼakʼal ta Jordan kʼalal to ta Mukʼta nabe* xchiʼuk laj avichʼik chʼakbel+ ta suerte+ li osil taje. Oy to jnaklejetik li ta jteklumetik tee, pe jaʼ xa avuʼunik li yosilike. 5 Li Jeova Dios avuʼunike jaʼ li buchʼu la snetʼan lokʼel xchiʼuk la snutsan lokʼel ta atojolalike,+ vaʼun laj avichʼbeik li yosilik jech kʼuchaʼal yalojboxuk onoʼox ta jamal li Jeova Dios avuʼunike.+

6 »Skʼan tsotsuk avoʼontonik sventa xavakʼ ta akuxlejalik xchiʼuk sventa xachʼunik skotol li kʼusi tsʼibabil ta slivroal Smantal+ Moisese: ti muʼyuk chakʼejpʼujik* batel ta batsʼikʼob mi jaʼuk ta tsʼetkʼobe,*+ 7 ti muʼyuk chakap abaik xchiʼuk li jyanlumetik+ ti liʼ to oy ta atojolalike. Mu me jutebuk xavalbeik sbi li sdiosike+ mi jaʼuk xavakʼ aveik ta stojolalik. Mu me xatunik ta stojolal li sdiosike mi jaʼuk xanijan abaik ta stojolalik.+ 8 Li kʼusi skʼan xapasike jaʼ ti xanapʼan abaik ta stojolal li Jeova Dios avuʼunik+ jech kʼuchaʼal apasojik onoʼox tale. 9 Li Jeovae tsnuts lokʼel ta atojolalik mukʼtik lumetik ti xuʼ yuʼunike,+ yuʼun mi junuk onoʼox vinik stsalojoxuk kʼalal to avie.+ 10 Li jun noʼox vinik avuʼunike tsnuts batel jmil ta voʼ,+ yuʼun li Jeova Dios avuʼunike jaʼ yakal tspas kʼop stuk sventa tspak akʼoplalik+ jech onoʼox kʼuchaʼal yaloj ta jamale.+ 11 Kʼelik me lek ti jechuk-o+ xakʼanik li Jeova Dios avuʼunike.+

12 »Pe mi chavalopatinik komel ti jaʼ xa chlik anapʼan abaik ta stojolal li krixchanoetik ti liʼ to oy+ ta atojolalike, ti chlik avutsʼ avalalin aba xchiʼukike,*+ ti chbat achiʼinik xchiʼuk ti chtal xchiʼinoxuke, 13 naʼik me ti Jeova Dios avuʼunike muʼyuk xa tsnuts lokʼel ta atojolalik li mukʼtik lumetike.+ Kʼajomal chkʼotik jech kʼuchaʼal petsʼ, kʼuchaʼal chʼojon ti chyakvane xchiʼuk kʼuchaʼal nukul ti sjisluj ta axokonike.+ Chkʼot kʼuchaʼal chʼix ta sbekʼ asatik jaʼ to ti kʼuxi xchʼay akʼoplalik li ta lekil balumil ti laj yakʼboxuk li Jeova Dios avuʼunike.

14 »Avi une, poʼot xa xicham.* Anaʼojik lek ta sjunul avoʼontonik xchiʼuk ta sjunul akuxlejalik ti mu jpʼeluk chʼay ta be skotol li kʼusitik lekik laj yalboxuk li Jeova Dios avuʼunike. Kʼot ta pasel skotol ta atojolalik. Mi jpʼeluk chʼay ta be.+ 15 Pe jech kʼuchaʼal laj yakʼ kʼotuk ta pasel ta atojolalik Jeova Dios avuʼunik skotol li kʼusitik lekik laj yalboxuke,+ jaʼ jech chakʼ kʼotuk ta pasel Jeova ta atojolalik xtok skotol li kʼusitik chopol ti yaloj xa onoʼoxe xchiʼuk tslajes akʼoplalik li ta lekil balumil ti yakʼojboxuk li Jeova Dios avuʼunike.+ 16 Mi chasokesbeik skʼoplal li strato Jeova Dios avuʼunik ti laj yakʼboxuk sventa xatsakik ta mukʼe, mi chabatik xchiʼuk mi chlik tunanik ta stojolal yan diosetik xchiʼuk mi chlik anijan abaik ta stojolale, tstsan skʼakʼal yoʼonton ta atojolalik li Jeovae+ xchiʼuk ta anil noʼox chlaj akʼoplalik li ta balumil yakʼojboxuke».+

24 Li Josuee te la stsob ta Sikem li jujuchop snitilulal Israele, la stak ta ikʼel li moletik ta Israele, li joliletik yuʼunike, li jchapanvanejetike xchiʼuk li bankilaletik yuʼunike,+ te kʼotik ta yeloval li melel Diose. 2 Li Josuee xi laj yalbe li jteklume: «Xi yaloj li Jeova Dios yuʼun Israele: ‹Voʼne xa ti te nakiik+ ta jot Ukʼum* li amoltotakik+ ti te skʼoplal ek li Tare ti jaʼ li stot Abraan xchiʼuk Nakore, nopem xaʼiik chtunik ta stojolal li yan diosetike.+

3 »›Ta mas tsʼakale, laj kikʼ tal li amoltotik Abraan+ ti te toʼox oy ta jot Ukʼume* xchiʼuk laj kakʼbe xan skotol li yosilal Kanaane. Jech xtok, ep bat kuʼun li snitilulale,+ yuʼun laj kakʼbe li Isaake;+ 4 li Isaake laj kakʼbe li Jakob xchiʼuk Esaue.+ Ta mas tsʼakale laj kakʼbe yuʼunin Esau li vits Seire;+ laje li Jakob xchiʼuk xnichʼnabtake yalik batel ta Ejipto.+ 5 Ta tsʼakale, la jtak batel Moises xchiʼuk Aaron.+ Laj kakʼbe svokol Ejipto ta skoj li kʼusi la jpasbee,+ laj une la jlokʼesoxuk talel. 6 Kʼalal la jlokʼesik ta Ejipto li amoltotakike+ xchiʼuk kʼalal te xa ox oyoxuk ta tiʼ nabe, nutsatik talel yuʼun li j-ejiptoetike, tal xchiʼuk skaretaik sventa paskʼop xchiʼuk tal soltaroetik ti kajajtik ta kaʼe, te to kʼotik ta Tsajal nab.+ 7 Vaʼun, li amoltotakike lik skʼanbeikun vokol, voʼon li Jeovaune,+ jaʼ yuʼun laj kakʼ ikʼal osil ta oʼlol avuʼunik xchiʼuk li j-ejiptoetike, ta tsʼakale tal ta sbaik li nabe,+ vaʼun te chamik. Laj avil ta asat atukik li kʼusi la jpas ta Ejiptoe.+ Laje, ep jabil* te lanakiik ta takixokol balumil.+

8 »›Ta mas tsʼakale laj kikʼoxuk tal li ta yosil j-amorreoetik ti te toʼox nakalik ta jot* Jordane, lik stsakoxuk ta kʼop,+ pe laj kakʼboxuk ta akʼobik sventa xavichʼbeik li yosilike, la jlajesbeik skʼoplal ta atojolalik.+ 9 Ta tsʼakal li Balak ti jaʼ xnichʼon Sipore, li ajvalil ta Moabe, lik stsak ta kʼop li Israele. Jaʼ yuʼun, la stak ta ikʼel li Balaam ti jaʼ xnichʼon Beore sventa xchopol kʼoptaoxuk.+ 10 Pe muʼyuk jchikintabe li Balaame,+ jaʼ noʼox ep ta velta laj yakʼboxuk bendision,+ vaʼun la jpojoxuk lokʼel ta skʼob.+

11 »›Laje, la atuchʼik jelavel Jordan+ sventa xakʼotik ta Jeriko.+ Vaʼun, li jnitvanejetik* ta Jerikoe, li jnitvanejetik yuʼun j-amorreoetik, jperisitaetik, jkanaanetik, j-etetik, jguirgaseoetik, j-eveoetik xchiʼuk jebusetike lik stsakoxuk ta kʼop, pe laj kakʼboxuk ta akʼobik.+ 12 Jaʼ yuʼun, chibaj yoʼontonik* kuʼun, jech oxal jatavik lokʼel ta atojolalik, jaʼ li chaʼvoʼ ajvalil yuʼun j-amorreoetike.+ Ti jech kʼot ta pasele maʼuk ta skoj a-espadaik o ta skoj a-arkoik.+ 13 Jech laj kakʼboxuk avosilik ti mu voʼoxuk laj avakʼ avokolike xchiʼuk laj kakʼboxuk ateklumalik ti bu xuʼ xanakiik ti mu voʼoxuk la avaʼanike.+ Xalajesik noʼox uva xchiʼuk oliva ti mu voʼoxuk la atsʼunike›.+

14 »Jaʼ yuʼun, xiʼtaik* li Jeovae xchiʼuk tukʼuk avoʼonton* xatunik ta stojolal xchiʼuk tukʼuk xavakʼ abaik* ta stojolal.+ Jipik lokʼel li diosetik ti laj yichʼik ta mukʼ li amoltotakik li ta jot Ukʼum* xchiʼuk li ta Ejiptoe,+ jaʼ tunanik ta stojolal li Jeovae. 15 Yan mi chopol chavaʼiik ti chatunik ta stojolal Jeovae, tʼujik buchʼu chakʼan chatunik ta stojolal.+ Tʼujik mi jaʼ chatunik ta stojolal li diosetik ti laj yichʼik ta mukʼ li amoltotakik li ta jot Ukʼume*+ o mi jaʼ li sdios j-amorreoetik ti jaʼ toʼox yuʼunik li osil bu nakaloxuke.+ Pe li voʼon xchiʼuk kutsʼ kalale jaʼ chitunkutik ta stojolal li Jeovae».

16 Pe xi takʼav li jteklume: «Mu sta-o chkaʼikutik ti chkiktakutik li Jeova ti jaʼ chbat tunkunkutik ta stojolal li yan diosetike. 17 Yuʼun jaʼ la slokʼesutik xchiʼuk jmoltotaktik ta yosilal Ejipto+ li Jeova Dios kuʼuntike, jaʼ ti bu toʼox tikʼilutik ta mosoile.+ Jech xtok, te jkʼelojtik ti jaʼ la spas li mukʼtik senyaile+ xchiʼuk jaʼ la sbeiltasutik tal ti bu lijxanav tale xchiʼuk li ta jteklumetik ti butik lij-echʼ tale.+ 18 Li Jeovae la snuts lokʼel skotol li jteklumetike, te tsakal skʼoplal li j-amorreoetik ti liʼ toʼox nakalik ti bu oyutike. Jaʼ yuʼun, jaʼ chitunkutik ta stojolal ek li Jeovae, yuʼun jaʼ Jdioskutik».

19 Vaʼun, li Josuee xi laj yalbe li jteklume: «Mu xuʼ xatunik ta stojolal li Jeovae, yuʼun jaʼ jun chʼul Dios;+ jaʼ jun Dios ti stuk noʼox tskʼan ichʼel ta mukʼe.+ Muʼyuk chakʼ ta perton li atoyobbailike xchiʼuk li amulike.+ 20 Mi chaviktaik li Jeovae xchiʼuk mi jaʼ chatunik ta stojolal li sdios jyanlumetike, tskontrainoxuk ek xchiʼuk tslajesboxuk akʼoplalik akʼo mi lek kʼusitik spasoj ta atojolalik».+

21 Pe li jteklume xi la stakʼbeik li Josuee: «¡Mu jechuk ta jpaskutik, jaʼ chitunkutik ta stojolal li Jeovae!».+ 22 Xi takʼbatik yuʼun li Josuee: «Voʼoxuk testigooxuk atukik ti chlokʼ ta avoʼontonik ti chakʼan chatunik ta stojolal li Jeovae».+ Xi takʼav li jteklume: «Lek, testigounkutik».

23 «Mi jeche, jipik lokʼel li sdios jyanlumetik te avichʼojike, ta sjunul avoʼonton xasutik tal ta stojolal li Jeova Dios yuʼun Israele». 24 Li jteklume xi laj yalbeik li Josuee: «¡Jaʼ chitunkutik ta stojolal li Jeova Dios kuʼuntike xchiʼuk ta jchʼunbekutik li kʼusi chale!».

25 Jaʼ yuʼun, li Josuee la spas jun trato xchiʼuk li jteklum te ta Sikem li vaʼ kʼakʼale, laj yakʼbe mantaletik xchiʼuk oy kʼusi la xchapan ta stojolalik. 26 Li Josuee te la stsʼiba komel ta slivroal Smantal Dios.+ Jech xtok, la stsak jpʼej mukʼta ton+ xchiʼuk te la svaʼan ta yolon li mukʼta teʼ ti te xkom ta stsʼel ti bu chʼul yuʼun Jeovae.

27 Li Josuee xi laj yalbe sjunul li jteklume: «Aʼio avaʼiik, li ton liʼe jaʼ testigo kuʼuntik,+ yuʼun laj xa yaʼi skotol li kʼusi laj yalbutik Jeovae. Jech xtok, jaʼ testigo avuʼunik ti muʼyuk chamuk ta avoʼontonik li Dios avuʼunike». 28 Laje, li Josuee la stak batel li jteklume, te batik ti bu staoj xrextoik* ta jujuntale.+

29 Kʼalal kʼot xa ox ta pasel skotol taje, cham li Josue ti jaʼ yajtunel Jeovae, li xnichʼon li Nune. Yichʼoj xa ox 110 jabil kʼalal chame.+ 30 Te la smukik ti bu la sta xrexto* osile, ta Timnat-Sera+ ti te xkom ta vitstikaltik yuʼun Efrain ta snorteal li vits Gaase. 31 Li Israele jech-o tun ta stojolal Jeova ti kʼu sjalil kuxi li Josuee xchiʼuk ti kʼu sjalil kuxiik li moletik ti mas to jal kuxiik ti jaʼ mu sta li Josuee, ti jaʼ laj yilik li kʼusitik la spas Jeova ta stojolal li Israele.+

32 Li sbakil Jose+ ti yichʼojik lokʼel ta Ejipto li j-israeletike te bat smukik ta Sikem, jaʼ li ta osil la sman Jakob ti jaʼ la smanbe li xnichʼnabtak Amore,+ li stot Sikeme. Sien ta sep takʼin+ la stoj li osile xchiʼuk jaʼ xa kʼot ta xrexto* li xnichʼnabtak Josee.+

33 Cham ek li Eleasar ti jaʼ xnichʼon Aarone.+ Te la smukik ta bikʼit vits yuʼun Fineas,+ li xnichʼon Eleasare. Li stselejal taje jaʼ yosil li Fineas ti te xkom ta vitstikaltik yuʼun Efraine.