BAʼYEL SVENTA KORINTIOS

1 Voʼon Pabloun ti takbilun ta ikʼel sventa xitun ta jtakbol+ ta stojolal Kristo Jesus ti jech tskʼan yoʼonton Diose. Voʼon xchiʼuk li kermanotik Sostenese, 2 jaʼ sventa li stsobobbail Dios ti te oy ta Korintoe,+ voʼoxuk li yajtsʼaklomoxuk Kristo Jesus ti chʼultajesbiloxuke,+ ti takbiloxuk ta ikʼel sventa chʼul xakʼotike xchiʼuk ta sventa li buchʼutik ti buyuk noʼox oyik ti tskʼanbeik vokol Kajvaltik Jesukristo+ ti jaʼ Kajvaltik yuʼunike xchiʼuk ti jaʼ Kajvaltik eke:

3 Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.

4 Skotol ora ta jtojbe ta vokol Dios ta sventa li slekil yutsil yoʼonton Dios ti la-akʼbatik ta stojolal li Kristo Jesuse; 5 yuʼun jaʼ ta stojolal ti laj avichʼik skotol li kʼulejale, ti xatojobik lek ta kʼopojele xchiʼuk ti oy lek yojtikinobil avuʼunike,+ 6 jech kʼuchaʼal lek staoj-o yav ta atojolalik li kʼusi laj yichʼ albel skʼoplal ta sventa li Kristoe.+ 7 Jaʼ yuʼun, yoʼ to chamalaik ta sjunul avoʼontonik ti chichʼ akʼel ta ilel li Kajvaltik Jesukristoe,+ muʼyuk xa junuk matanal ti skʼan to avuʼunike. 8 Jaʼ tskoltaoxuk xtok sventa tukʼ oyoxuk kʼalal to ta slajeb sventa mu xavichʼ tikʼbel jtosuk amulik li ta skʼakʼalil Kajvaltik Jesukristoe.+ 9 Tukʼ li Dios+ ti jaʼ la stakoxuk ta ikʼel sventa xachiʼinbeik* li Xnichʼon ti jaʼ li Kajvaltik Jesukristoe.

10 Ermanoetik, ta sbi Kajvaltik Jesukristo ta jtojobtasoxuk ti jmojuk kʼusi chaval akotolike, ti mu xachʼak abaike,+ ti lekuk jmoj li anopbenike xchiʼuk ti jmojuk kʼu yelan chanopike.+ 11 Kuni ermanotak, yuʼun laj yalbeikun junantik li buchʼutik te oyik ta sna Kloe ti mu jmojuk li kʼusitik chanopike. 12 Li kʼusi ta jkʼan chkalboxuke jaʼ liʼe, yuʼun xi chavalik ta jujuntale: «Voʼone oyun ta stojolal Pablo». «Pe li voʼone ta stojolal Apolos».+ «Yan li voʼone ta stojolal Sefas».* «Jaʼuk li voʼone ta stojolal Kristo». 13 ¿Mi chʼakulanbil li Kristoe? Muʼyuk bu laj yichʼ milel ta jtel teʼ ta atojolalik li Pabloe, ¿mi mu jechuk? ¿O mi yuʼun laj avichʼik voʼ ta sbi li Pabloe? 14 Ta jtojbe ta vokol Dios ti mu junuk buchʼu laj kakʼbe yichʼ voʼ avuʼunike, kʼajomal noʼox Krispo+ xchiʼuk Gayo+ 15 sventa mu junuk buchʼu xal avuʼunik ti laj avichʼik voʼ ta jbie. 16 Laj kakʼbe yichʼ voʼ xtok li buchʼutik te oy ta sna Estefanase.+ Pe mu jnaʼ mi oy buchʼu yan laj kakʼbe yichʼ voʼ. 17 Yuʼun muʼyuk bu la stakun talel Kristo sventa xkakʼ ichʼvoʼ, yuʼun la stakun talel sventa jchol batel li lekil aʼyejetike,+ maʼuk ti yuʼun lek pʼij li jkʼopojele, ti jechuke, muʼyuk sbalil kʼot li jtel teʼ sventa vokolil* ti bu laj yichʼ jokʼanel li Kristoe.

18 Li buchʼutik chlajik batele mu kʼusi bal-o laj yaʼiik kʼalal chichʼ albel skʼoplal li jtel teʼ sventa vokolile,*+ pe li voʼotik ti yakal chijkole sjuʼel Dios+ laj kaʼitik. 19 Yuʼun xi tsʼibabile: «Chkakʼ lajuk spʼijil li buchʼu pʼijike xchiʼuk ta jpʼajbe kʼusi tsnop li buchʼutik xtojob snopele».+ 20 Ta skotol li kʼusitik oy ta balumile,* ¿bu oy li pʼijil krixchanoe? ¿Bu oy li jchanubtasvanej ta Mantale? ¿Bu oy li jsaʼkʼope? ¿Mi mu chʼabaluk xa sbalil kʼot yuʼun Dios li spʼijil balumile? 21 Ta skoj spʼijil li Diose, li krixchanoetike muʼyuk bu laj yojtikinik Dios+ ta spʼijil noʼox stukik,+ lek laj yaʼi Dios ti la skolta li buchʼutik oy xchʼunel yoʼontonike, jaʼ la skolta-o li kʼusi muʼyuk sbalil laj yaʼiik+ ti laj yichʼ cholbel skʼoplale.

22 Yuʼun li judaetike tskʼanbeik senyail,+ yan li jgresiaetike tsaʼik pʼijilal; 23 pe li voʼotike ta jcholbetik skʼoplal li Kristo ti cham ta jtel teʼe; li judaetike tsmak-o* yakanik, pe li jyanlumetike mu kʼusi bal-o chaʼiik;+ 24 jaʼuk li buchʼutik takbilik ta ikʼele manchuk mi judaetik o mi jgresiaetik jaʼ sjuʼel Dios xchiʼuk jaʼ spʼijil Dios+ laj yaʼiik li Kristoe. 25 Yuʼun li kʼusi muʼyuk sbalil ta stojolal Diose jaʼ mas pʼij, jaʼ mu sta li krixchanoetike, jech xtok, li kʼusi kʼun ta stojolal Diose jaʼ mas tsots, jaʼ mu sta li krixchanoetike.+

26 Yuʼun li voʼoxuke, ermanoetik, ti chavichʼik takel ta ikʼel yuʼune anaʼojik ti muʼyuk ep buchʼu pʼij avuʼunik ta sat li krixchanoetike,+ muʼyuk ep buchʼu ti oy sjuʼel avuʼunike xchiʼuk muʼyuk ep buchʼu avuʼunik ti te likik talel ta yutsʼ yalal ajvalile;+ 27 yuʼun jaʼ la stʼuj Dios li kʼusitik muʼyuk sbalil chil li balumile sventa chakʼ ta kʼexlal li buchʼutik pʼijike; jech xtok, jaʼ la stʼuj Dios li kʼusitik kʼun chil li balumile sventa chakʼ ta kʼexlal li kʼusitik tsotse;+ 28 jaʼ la stʼuj Dios li kʼusitik muʼyuk tsots skʼoplal ta stojolal krixchanoetike, li kʼusitik pʼajbile, li kʼusitik muʼyuk sbalil chil li krixchanoetike sventa muʼyuk stu chkʼot li kʼusitik tsots skʼoplal chil krixchanoetike,+ 29 sventa muʼyukuk buchʼu xtoyet xa chaʼi sba ta sat li Diose. 30 Pe jaʼ ta stojolal ti jech jmoj oyoxuk xchiʼuk li Kristo Jesuse, ti tal kʼuchaʼal pʼijilal ta jtojolaltik ti te lik talel ta stojolal Diose, tal kʼuchaʼal tukʼilal,+ chʼultajesel+ xchiʼuk kolebal ta skoj pojelal;+ 31 sventa jech xkʼot ta pasel kʼuchaʼal xi onoʼox tsʼibabile: «Akʼo mukʼuk skʼoplal ta stojolal Jeova* li buchʼu tskʼan mukʼ skʼoplale».+

2 Jaʼ yuʼun, kʼalal ay jkʼeloxuke, ermanoetik, muʼyuk ti yan xa sba kʼu yelan chikʼopoj+ o ti yan xa sba jpʼijil kʼalal laj kalboxuk li kʼusi chʼul ti mukul skʼoplal+ ti jaʼ yuʼun Diose. 2 Yuʼun la jnop lek ti muʼyuk kʼusi chkat-o koʼonton kʼalal te toʼox jchiʼukoxuke, ti jaʼ noʼox kakʼoj ta koʼonton li Jesukristo ti laj ta milel ta jtel teʼe.+ 3 Muʼyuk jtsatsal laj kaʼi jba kʼalal ay jkʼeloxuke, lixiʼ xchiʼuk xitʼeltʼun* tajek; 4 maʼuk ti chkʼot ta oʼontonal ta skoj pʼijilal li kʼusi laj kal xchiʼuk li kʼusi la jcholbe skʼoplale, moʼoj, yuʼun jaʼ svinajeb li chʼul espiritu xchiʼuk li sjuʼel Diose+ 5 sventa maʼukuk ta spʼijil krixchanoetik ti oy xchʼunel avoʼontonike, yuʼun jaʼ ta sjuʼel Dios.

6 Jaʼ noʼox pʼijilal ta jloʼiltatik xchiʼuk li buchʼutik yijik ta mantale,+ pe maʼuk ta jloʼiltatik li spʼijil kʼusitik oy ta balumile* mi jaʼuk li spʼijil ajvaliletik ta sventa li kʼusitik oy ta balumil ti chlaj-o skʼoplalike.+ 7 Moʼoj, jaʼ chkalbetik li spʼijil Dios ta sventa li kʼusi chʼul ti mukul skʼoplale,+ li pʼijilal ti nakʼale, ti yalojbe xa onoʼox skʼoplal Dios ta sventa jmukʼulaltik kʼalal muʼyuk toʼox skotol li kʼusitik oy ta balumile. 8 Li pʼijilal taje mi junuk ajvalil ta balumil laj yojtikin,+ yuʼun ti lajuk yojtikinike, muʼyuk bu la smilik jechuk* li Kajvaltik ti mukʼ skʼoplale. 9 Pe jech kʼuchaʼal xi tsʼibabile: «Muʼyuk bu yiloj ta satik, muʼyuk bu yaʼioj ta xchikinik mi jaʼuk bu talem ta snopbenik li kʼusi xchapanoj Dios ta sventa li buchʼu skʼanojik Diose».+ 10 Yuʼun voʼotik yakʼoj jnaʼtik Dios+ ta xchʼul espiritu, chchaj skotol li chʼul espiritue,+ yuʼun chchajbe kʼalal to ta yut li spʼijil Diose.+

11 ¿Buchʼu xojtikinbe li kʼusitik tsnop yan krixchanoe? ¿Mi mu jaʼuk noʼox xojtikin li kʼusi oy ta yut yoʼonton stuk li krixchanoe? Jaʼ jech muʼyuk buchʼu xojtikinbe ek li kʼusitik yuʼun Diose, jaʼ noʼox xojtikin li xchʼul espiritu Diose. 12 Yan li voʼotike maʼuk laj kichʼbetik li snopben krixchanoetike, moʼoj, jaʼ laj kichʼtik li chʼul espiritu ti likem tal ta stojolal Diose+ sventa xkojtikintik li kʼusitik yakʼojbutik ta slekil yoʼonton Diose. 13 Taje jaʼ chkalbetik skʼoplal ek, maʼuk chkaltik ti kʼu yelan yakʼoj ta chanel spʼijil krixchanoetike,+ jaʼ chkaltik kʼuchaʼal yakʼoj ta chanel li chʼul espiritue,+ taje jaʼ jech ta jpastik kʼalal ta jtunestik kʼopetik ti te likem tal ta stojolal chʼul espiritu kʼalal ta jchapbetik smelolal li kʼusitik sventa Diose.

14 Yan li krixchano ti jaʼ jech kuxul kʼuchaʼal tskʼan bekʼete mu xchʼam li kʼusitik yuʼun xchʼul espiritu Diose, yuʼun muʼyuk sbalil chil; jech xtok, muʼyuk bu tsta ta ojtikinel, yuʼun skʼan oyuk xchʼul espiritu Dios ta stojolal sventa skʼelbe li smelolale. 15 Pe li krixchano ti jaʼ jech kuxul kʼuchaʼal tskʼan xchʼul espiritu Diose tskʼelbe lek smelolal skotol,+ pe mu xuʼ xkʼelbat lek skʼoplal yuʼun jun krixchano ti jaʼ jech kuxul kʼuchaʼal tskʼan bekʼete. 16 Yuʼun «¿buchʼu xojtikinbe snopben Jeova* sventa xchanubtas?».+ Yan li voʼotike ta melel kichʼojbetik li snopben Kristoe.+

3 Jaʼ yuʼun, kermanotak, kʼalal la jkʼoponoxuke, xakoʼolajik jech kʼuchaʼal li buchʼu mu jechuk kuxul kʼuchaʼal tskʼan li xchʼul espiritu Diose,+ xakoʼolajik jech kʼuchaʼal li buchʼu kuxul kʼuchaʼal tskʼan bekʼete, kʼuchaʼal jun olol+ ta stojolal Kristo. 2 Yaʼlel chuʼil noʼox laj kakʼ avuchʼik, maʼuk tsatsal veʼlil laj kakʼboxuk, yuʼun muʼyuk to bu tsotsoxuk. Ta melel, muʼyuk bu tsotsoxuk-o kʼalal to tana,+ 3 yuʼun jech to kuxuloxuk jech kʼuchaʼal tskʼan li bekʼete.+ Ta skoj ti cha-itʼixajik xchiʼuk ti chatsak abaik ta kʼope, ¿mi mu jechuk kuxuloxuk jech kʼuchaʼal tskʼan li bekʼete+ chaʼa xchiʼuk mi mu jechuk chapasik jech kʼuchaʼal tspas li krixchanoetike? 4 Yuʼun kʼalal oy buchʼu xi chale: «Voʼone oyun ta stojolal Pablo», pe li yane xi chale: «Pe li voʼone ta stojolal Apolos»,+ ¿mi mu koʼoloxuk jech kʼuchaʼal li yantike?

5 ¿Buchʼu jaʼ li Apolose chaʼa? Jech, ¿buchʼu jaʼ li Pabloe? Jaʼik j-abteletik+ ti la skoltaoxuk sventa xakʼotik ta jchʼunolajel jech kʼuchaʼal laj yakʼbe ta jujuntal li Kajvaltike. 6 Voʼon la jtsʼun,+ Apolos laj yatʼes,*+ pe jaʼ chakʼ chʼiuk li Diose; 7 jaʼ yuʼun maʼuk tsots skʼoplal li buchʼu tstsʼune mi jaʼuk li buchʼu chatʼese,* jaʼ noʼox tsots skʼoplal li Dios ti jaʼ chakʼ chʼiuke.+ 8 Pe jmoj ch-abtejik* li buchʼu tstsʼun xchiʼuk li buchʼu chatʼese,* akʼo mi jech, ta jujuntal chichʼ smotonik ta sventa li yabtelike.+ 9 Yuʼun jchiʼil jbakutik ta abtel xchiʼuk li Diose. Jaʼoxuk yosil Dios ti yakal chichʼ abtelanele, jpʼej na ti jaʼ svaʼanoj li Diose.+

10 Jech kʼuchaʼal laj yakʼbun slekil yutsil yoʼonton li Diose, laj kakʼbe lek snakleb li na+ jech kʼuchaʼal tspas li buchʼu pʼij ti sbainoj li abtelale, pe yan xa-o buchʼu tsvaʼan te ta sba li snaklebe. Skʼan me ta jujuntal akʼo yichʼ sba ta mukʼ kʼu yelan yakal tsvaʼan. 11 Yuʼun mi junuk buchʼu xuʼ chakʼbe yan snakleb li nae, jaʼ xa noʼox li snakleb te oye, jaʼ li Jesukristoe.+ 12 Jaʼ yuʼun, mi oy buchʼu ta oro, plata, kʼupil sba ton, teʼ, jobel o mi ta kʼajben tsvaʼan batel ta sba li snakleb nae, 13 chvinaj ta jujuntal kʼu yelan li yabtelike, yuʼun jaʼ te chvinaj mi kʼot li skʼakʼalile, jaʼ tsvinajesvan li kʼokʼe;+ kʼokʼ chakʼ ta ilel kʼu yelan li abtelal la spasik ta jujuntale. 14 Mi te vaʼal kom li yabtel jun krixchano ti la svaʼan ta sba li snakleb nae, tsta smoton; 15 pe mi laj ta kʼokʼ skotol li yabtele, ep kʼusi chlaj yuʼun, pe chkol li stuke; mi jeche, xkoʼolaj kʼuchaʼal chjatav lokʼel ta kʼokʼ.

16 ¿Mi mu xanaʼik ti jaʼoxuk stemplo Dios+ xchiʼuk ti te oy ta atojolalik li xchʼul espiritu Diose?+ 17 Yuʼun mi oy buchʼu tsjinesbe li stemplo Diose, tslajesat yuʼun li Dios eke; yuʼun chʼul li stemplo Diose xchiʼuk voʼoxuk li templo taje.+

18 Mu me buchʼu sloʼla sba stuk, yuʼun mi oy buchʼu tsnop avuʼunik ti pʼij ta sventa li kʼusitik oy ta balumil liʼe,* bol me akʼo spas sba yoʼ jech pʼij chkʼot. 19 Yuʼun muʼyuk sbalil chil Dios li pʼijilal liʼ ta balumile; yuʼun xi tsʼibabile: «Jaʼ chakʼ ti xpʼaj stukik ta spetsʼik li buchʼutik pʼijike».+ 20 Xi to chal xtoke: «Snaʼoj Jeova* ti muʼyuk sbalil li kʼusitik tsnopik li buchʼu pʼijike».+ 21 Jaʼ yuʼun, muʼyukuk me buchʼu xtoyet xa chaʼi sba ta skoj li kʼusitik tspas yantike; yuʼun jaʼ avuʼunik skotol li krixchanoetike xchiʼuk li kʼusitike, 22 mi Pablo, mi Apolos, mi Sefas,*+ mi balumil, mi kuxlejal, mi lajelal, mi jaʼ li kʼusitik oy avie, mi jaʼ li kʼusitik chtale, jaʼ avuʼunik skotol li kʼusitike; 23 pe jech li voʼoxuk eke jaʼ yuʼunoxuk li Kristoe; jech li Kristo+ eke uʼuninbil yuʼun li Diose.

4 Akʼo yakʼik venta krixchanoetik ti jaʼ yajtunelunkutik* Kristoe xchiʼuk ti jaʼ ta jchabikutik li kʼusitik chʼul ti mukul skʼoplal ti jaʼ yuʼun li Diose.+ 2 Skʼan akʼo tukʼ xakʼ sbaik li jchabivanejetik taje. 3 Li voʼone mu masuk tsots skʼoplal chkaʼi mi voʼoxuk chakʼelbeikun jkʼoplale o mi jaʼ tskʼelbun jkʼoplal li nail chapanobbail yuʼun krixchanoe. Ta melel, mi jaʼuk bu ta jkʼel jkʼoplal jtuk ek. 4 Yuʼun muʼyuk kʼusi chopol chalbun li jol koʼontone. Pe taje maʼuk skʼan xal ti tukʼ xa jkʼoplale, yuʼun jaʼ tskʼelbun jkʼoplal li Jeovae.*+ 5 Jaʼ yuʼun, mu me xachapanvanik+ kʼalal maʼuk to yoraile, jaʼ to mi tal li Kajvaltike. Jaʼ tslokʼes stuk ta sakil osil li kʼusi oy ta ikʼal osile xchiʼuk jaʼ tsvinajes li kʼusi tskʼan tspas li oʼontonale, vaʼun ta jujuntal chichʼik kʼupil kʼoptael yuʼun li Diose.+

6 Jaʼ yuʼun, ermanoetik, li kʼusitik taje jaʼ jech kakʼoj ta jkuxlejalkutik xchiʼuk Apolos+ sventa alekilalik yoʼ xachanik ta jtojolalkutik li beiltasel liʼe: «Jaʼ noʼox me xapas li kʼusitik tsʼibabile» sventa mu xatoyetuk xapas abaik tajek+ ti jlom xa lek chavilik xchiʼuk ti junantik xa muʼyuk lek chavilike. 7 Yuʼun ¿kʼusi jelelot-o xchiʼuk li yantike? Ta melel, ¿kʼusi oy avuʼun ti muʼyuk bu la-akʼbate?+ Vaʼun chaʼa, mi la-akʼbate, ¿kʼu yuʼun xatoyet xa chavaʼi aba ti xkoʼolaj kʼuchaʼal muʼyuk buchʼu yakʼojbot yilele?

8 Oy xa avuʼunik skotol, ¿mi mu jechuk? Jkʼulejoxuk xa, ¿mi mu jechuk? Lalikik ta ajvalil+ kʼalal muʼyuk te oyunkutike, ¿mi mu jechuk? Ta melel, koʼontonuk ti likemukoxuk xa ta ajvalil sventa jmojuk xij-ajvalilaj kʼuchaʼal ajvaliletik ti jechuke.+ 9 Yuʼun li jtakbolunkutike ta slajeb to laj yakʼunkutik Dios sventa xkichʼkutik akʼel ta ilel, jechunkutik kʼuchaʼal viniketik ti akʼbilik sventa xchamike,+ yuʼun kʼotemunkutik kʼuchaʼal j-akʼ-elov ta teatro ta stojolal li balumile,+ li anjeletike xchiʼuk ta stojolal krixchanoetik. 10 Bolunkutik+ ta skoj li Kristoe, yan li voʼoxuke pʼijoxuk ta stojolal li Kristoe; kʼununkutik li voʼonkutike, yan li voʼoxuke tsotsoxuk; lek akʼoplalik li voʼoxuke, yan li voʼonkutike muʼyuk bu ichʼbilunkutik ta mukʼ. 11 Yakal-o chkaʼikutik viʼnal+ kʼalal to tana, chkaʼikutik takitiʼil,+ chʼabal lek jkʼuʼ jpokʼkutik,* chkichʼkutik ilbajinel,*+ muʼyuk jnakutik, 12 tsots chi-abtejkutik xchiʼuk ta jkʼob jtukutik chi-abtejkutik.+ Chkakʼkutik bendision kʼalal chchopol loʼilajik ta jtojolalkutike;+ tsʼikem kuchem kuʼunkutik kʼalal tskontrainunkutike;+ 13 ta slekil koʼonton chitakʼavkutik kʼalal chchopol kʼoptaunkutike;+ kʼalal to tana jech kʼotemunkutik kʼuchaʼal kʼaʼep ta balumil, jechunkutik kʼuchaʼal li kʼusi chichʼ chʼayel batele.

14 Maʼuk sventa chkakʼoxuk ta kʼexlal ti jech ta jtsʼibaboxuk tale, yuʼun jaʼ sventa jpʼijubtasoxuk jech kʼuchaʼal jnichʼnab ti lek jkʼanoje. 15 Yuʼun manchuk mi oy lajunmil jchabivanej* avuʼunik ta sventa li Kristoe, ta melel muʼyuk ep li atotike; yuʼun ta stojolal Kristo Jesus kʼotemun kʼuchaʼal atotik ta sventa li lekil aʼyejetike.+ 16 Jaʼ yuʼun, ta jkʼanboxuk vokol: chanik li kʼusi ta jpase.+ 17 Jaʼ yuʼun, ta jtakboxuk talel li Timoteo ti jaʼ jkʼanbil nichʼone xchiʼuk ti tukʼ yakʼoj sba ta stojolal li Kajvaltike; jaʼ tsvules ta ajolik ti kʼu yelan chichanubtasvan ta sventa li Kristo Jesus+ jech kʼuchaʼal chichanubtasvan ta buyuk noʼox tsobobbaile.

18 Xtoyetik tajek li yantike, yuʼun tsnopik ti muʼyuk bu chbat jkʼeloxuke. 19 Pe poʼot xa skʼan xbat jkʼeloxuk mi jech tskʼan Jeovae,* vaʼun te chkakʼ venta mi yichʼojbeik li sjuʼel Diose, maʼuk ta jkʼan ta jkʼel ti kʼu yelan xtoyet tajek chkʼopojike. 20 Yuʼun maʼuk te chvinaj ta skoj kʼusi chichʼ alel li Ajvalilal* yuʼun Diose, jaʼ te chvinaj ta skoj juʼelal. 21 ¿Kʼusi ti mas lek chavaʼiike? ¿Mi jaʼ ti chbat jkʼeloxuk xchiʼuk jvachʼe+ o mi ta kʼanelal xchiʼuk ta slekil koʼonton chibat?

5 Ta melel, chvinaj loʼil ti oy buchʼu chmulivaj*+ avuʼunike, taje mi jaʼuk jech tspasik li ta yan lumetike: ti oy jun vinik ti nakal xchiʼuk* yajnil stote.+ 2 ¿Mi xatoyetik ta skoj taje? ¿Mi mu masuk van lek ti xavat avoʼontonik+ sventa xichʼ lokʼesel ta atojolalik li vinik ti jech tspase?+ 3 Akʼo mi chʼabal te oyun xchiʼuk jbekʼtal, te oy li koʼontone, xkoʼolaj kʼuchaʼal te oyun ta atojolalik ta melel, yuʼun laj xa jchapan li vinik ti mulivaje. 4 Kʼalal tsoboloxuk ta sbi li Kajvaltik Jesuse, anaʼojik ti te oy koʼonton ta atojolalik xchiʼuk li sjuʼel Kajvaltik Jesuse. 5 Li kʼusi skʼan xapasike jaʼ ti xavakʼik ta skʼob Satanas+ li vinik taje sventa xlaj li mulil ti laj yichʼ ochel ta tsobobbaile yoʼ lekuk-o snopben li tsobobbail li ta skʼakʼalil Kajvaltike.+

6 Mu lekuk ti xtoyet xa chavaʼi abaike. ¿Mi yuʼun mu xanaʼik ti tspuk sba ta skotol votsʼbil arina akʼo mi jutuk noʼox li levadurae?*+ 7 Lokʼesik li mol levadurae sventa xakʼotik ta achʼ votsʼbil arina yoʼ muʼyuk kʼusi xasitʼesoxuk. Yuʼun ta melel kʼot xa ta milbil matanal+ sventa Kʼin Koltael+ kuʼuntik li Kristoe. 8 Jaʼ yuʼun, li ta kʼine+ mu jtunestik mol levadura xchiʼuk mu jtunestik levadura ti jaʼ chakʼ ta ilel mulil xchiʼuk li choplejale, jaʼ noʼox skʼan jlajestik pan ti muʼyuk slevadurail ti jaʼ chakʼ ta ilel li kʼusi lek xchiʼuk li kʼusi melele.

9 La jtsʼibaboxuk talel ta jkarta ti akʼo xavikta abaik ta xchiʼinel li jmulivajeletike,* 10 pe maʼuk ta jkʼan chkal ti mu xa xuʼ xachiʼinik jsetʼuk* li jmulivajeletik* liʼ ta balumile+ o li buchʼu mu x-echʼ yoʼontonik ta skʼanel li kʼusitike, li j-elekʼetike o li buchʼu chichʼik ta mukʼ santoetike. Ti jechuke, skʼan xalokʼik batel liʼ ta balumile.+ 11 Pe li avie, ta jtsʼibaboxuk tal ti mu xa me xachiʼinik+ ti buchʼu chal ti jaʼ ermanoe, pe ti jaʼ jmulivajele* o li buchʼu mu x-echʼ yoʼonton ta skʼanel kʼusitike,+ li buchʼu chichʼ ta mukʼ santoetike, li jchopol-loʼiltavaneje, li jyakubele+ o li j-elekʼe,+ li buchʼu jech taje mi jaʼuk xachiʼinik ta veʼel. 12 Yuʼun ¿kʼu yuʼun ta jtikʼ jba ta xchapanel li buchʼutik muʼyuk oyik ta tsobobbaile? ¿Mi mu voʼoxuk chachapanik li buchʼutik ta tsobobbaile 13 ti jaʼ chchapan Dios li buchʼutik muʼyuk oyik ta tsobobbaile?+ «Lokʼesik ta atojolalik li buchʼu toj chopole».+

6 Kʼalal oy junuk avuʼunik ti oy skʼop xchiʼuk yane,+ ¿mi chbat van ta snail chapanobbail ta stojolal viniketik ti muʼyuk tukʼike, ti maʼuk te chbat ta stojolal li buchʼutik chʼule? 2 O ¿mi yuʼun mu xanaʼik ti jaʼ chchapan krixchanoetik li buchʼutik chʼule?+ Yuʼun mi voʼoxuk chachapanik li krixchanoetike, ¿mi mu van xuʼ avuʼunik chachapanik li kʼusitik mu masuk tsotsik skʼoplale? 3 ¿Mi mu xanaʼik ti ta jchapantik li anjeletike?+ Vaʼun chaʼa, ¿kʼu yuʼun ti mu jaʼuk ta jchapantik li kʼusitik sventa kuxlejal liʼe? 4 Jaʼ yuʼun, mi oy kʼusitik skʼan chapanel ta sventa li kuxlejal liʼe,+ ¿mi jaʼ van chavaʼanik ta jchapanvanejetik li buchʼutik muʼyuk tsakbilik lek ta mukʼ ta tsobobbaile? 5 Jaʼ sventa chkakʼoxuk ta kʼexlal ti jech chkalboxuke. ¿Mi yuʼun muʼyuk buchʼu pʼij avuʼunik sventa xuʼ xchapan li ermanoetike? 6 Li kʼusi yakal chichʼ pasele ¡jaʼ ti chbatik ta snail chapanobbail ta stojolal li buchʼutik maʼuk jchʼunolajeletike!

7 Ta melel, tsalbiloxuk xa ti kʼalal chbat avakʼik ta chapanel li avermanoike. ¿Kʼu yuʼun mu xatsʼikik li kʼusitik muʼyuk tukʼ chapasbatike?+ ¿Kʼu yuʼun mu xatsʼikik kʼalal chapojbatik li kʼusitik oy avuʼunike? 8 Pe mu jechuk chapasik, ¡yuʼun muʼyuk tukʼ kʼusi chapasbeik li avermanotakike xchiʼuk chapojbeik li kʼusi oy yuʼunike!

9 ¿Mi yuʼun mu xanaʼik ti muʼyuk bu chuʼuninik Ajvalilal* yuʼun Dios li buchʼutik muʼyuk tukʼe?+ Mu xaloʼla aba atukik. Li jmulivajeletike,*+ li buchʼutik chichʼ ta mukʼ santoetike,+ li buchʼutik tsloʼla xchiʼil ta nupunele,+ li viniketik ti mu xa jechuk tspasik ta sventa li chiʼinejbail ta vayele,+ li viniketik ti chchiʼin ta vayel xchiʼilik ta vinikale,+ 10 li j-elekʼetike, li buchʼu mu x-echʼ yoʼontonik ta skʼanel kʼusitike,+ li jyakubeletike,+ li jchopol-loʼiltavanejetike xchiʼuk li buchʼutik tsloʼla krixchanoetik ti jaʼ noʼox tskʼan takʼine muʼyuk bu chuʼuninik li Ajvalilal yuʼun Diose.+ 11 Taje jaʼ toʼox jechoxuk jlom li ta voʼnee, pe sakubtasbiloxuk xa,+ chʼultajesbiloxuk xa+ xchiʼuk tukʼ xa albil akʼoplalik+ ta sventa sbi li Kajvaltik Jesukristoe xchiʼuk ta sventa li xchʼul espiritu Jdiostike.

12 Stakʼ pasel skotol chkaʼi, pe mu skotoluk oy sbalil.+ Stakʼ pasel skotol chkaʼi, pe muʼyuk kʼusi chkakʼ spasun ta mantal. 13 Li veʼlile jaʼ sventa chʼutil, li chʼutile jaʼ sventa veʼlil; pe xchaʼtosal chichʼ lajesel yuʼun Dios.+ Jech xtok, li bekʼtalile maʼuk sventa mulivajel,* jaʼ sventa Kajvaltik;+ xchiʼuk li Kajvaltike jaʼ sventa bekʼtalil. 14 Pe chaʼkuxesat yuʼun Dios li Kajvaltike+ xchiʼuk ta sjuʼel+ ta xchaʼkuxesutik ek.+

15 ¿Mi mu xanaʼik ti jaʼ stsʼakbenal sbekʼtal Kristo li abekʼtalike?+ Jaʼ yuʼun chaʼa, ¿mi ta van jtuchʼbe stsʼakbenaltak sbekʼtal Kristo sventa jnapʼanbe li jun jchonbail antse? ¡Moʼoj ta melel! 16 ¿Mi yuʼun mu xanaʼik ti buchʼu chchiʼin jchonbail ants ti tspas ta jun sbekʼtal xchiʼuke? Yuʼun xi chal li stuke: «Tspas ta jun sbekʼtalik li chaʼvoʼike».+ 17 Pe li buchʼu jmoj oy xchiʼuk Kajvaltike jun noʼox snopben chkʼot xchiʼuk.+ 18 ¡Jatavanik lokʼel ta stojolal li mulivajele!*+ Kʼalal tspas kʼusiuk noʼox yan mulil li krixchanoe, muʼyuk bu tsaʼ smul ta sbekʼtal, pe li buchʼu jaʼ tspasilan li mulivajele tsaʼ smul ta sbekʼtal stuk.+ 19 ¿Mi yuʼun mu xanaʼik ti voʼoxuk kʼotemoxuk ta stemplo+ chʼul espiritu ti jaʼ yakʼojboxuk Diose?+ Jech xtok, maʼuk avuʼun aba atukik,+ 20 yuʼun tojbil ti laj avichʼik manele.+ Jpʼeluk me skʼoplal xatoybeik skʼoplal Dios+ ti kʼu yelan oy li abekʼtalike.+

7 Vaʼun chaʼa, ta skoj li kʼusitik la atsʼibaik tale, jaʼ mas lek ti mu xchiʼin ta vayel ants li vinike; 2 pe ta skoj ti nopajtik noʼox chkʼot ta pasel li mulivajele,* jaʼ lek ti oyuk yajnil li jujun vinike+ xchiʼuk jaʼ lek ti oyuk smalal li jujun antse.+ 3 Akʼo yakʼbe yajnil li kʼusi oy ta sba* li malalile xchiʼuk akʼo jech spas li ajnilal eke.+ 4 Yuʼun maʼuk tspas ta mantal sbekʼtal stuk li ajnilale, jaʼ tspasvan ta mantal li smalale; jech xtok, maʼuk tspas ta mantal sbekʼtal stuk li malalile, jaʼ tspasvan ta mantal li yajnile. 5 Mu me xamakbe aba avoʼontonik ta jujuntal, jaʼ noʼox mi jmoj anopojik kʼuk sjalile sventa xachʼakbeik yorail spasel orasion, mi laje chiʼin abaik xtok sventa mu xakʼoxuk ta preva Satanas ta skoj ti mu xanaʼ xapajes abaike. 6 Akʼo mi jech, chkakʼboxuk permiso ti akʼo xapasik li kʼusi laj xa kalboxuke, pe maʼuk jun mantal ti persa skʼan xachʼunike. 7 Oy ta koʼonton ti jechuk skotol viniketik jech kʼuchaʼal voʼone. Pe ta jujuntal staojik ta stojolal Dios li smotonike,+ jelel ti kʼu yelan staojik li matanale.

8 Jaʼ yuʼun, xi chkalbe li buchʼutik muʼyuk nupunemike* xchiʼuk li antsetik ti chamem smalalike: jaʼ mas lek ti jechuk xkomik kʼuchaʼal voʼone.+ 9 Pe mi mu snaʼ spajes sbaike, jaʼ lek akʼo nupunikuk un bi, yuʼun jaʼ lek ti xnupunike, jaʼ chopol mi te noʼox tskʼan tajek chchiʼinvanik ta vayele.+

10 Xi chkalbe mantal li buchʼutik nupuneme —pe maʼuk voʼon chkal, jaʼ chal li Kajvaltike—: ti mu me xchʼak sba ta stojolal smalal li ajnilale;+ 11 pe mi la xchʼak sbae, mu me xnupun; mi moʼoje, akʼo slajesbe yoʼonton li smalale; jech xtok, mu me xikta yajnil ek li malalile.+

12 Pe xi chkalbe li yantike —jech, voʼon chkal, maʼuk chal li Kajvaltike—:+ mi oy junuk ermano ti maʼuk jchʼunolajel li yajnile, mu me xikta mi lek chaʼi ti te xchiʼuk ta naklej smalal li antse; 13 jech xtok, mi oy junuk ants ti maʼuk jchʼunolajel li smalale, mu me xikta mi lek chaʼi ti te xchiʼuk ta naklej yajnil li vinike. 14 Yuʼun li malalil ti maʼuk jchʼunolajele chʼultajesbil xa ta skoj li yajnile, jaʼ jech li ajnilal ti maʼuk jchʼunolajel eke chʼultajesbil xa ta skoj li ermanoe; ti yuʼun manchukuke, ibal sba* jechuk li yalab xnichʼnabike, pe li avie chʼul xa kʼotemik. 15 Pe mi tskʼan ch-iktavan* li buchʼu maʼuk jchʼunolajele, akʼo iktavanuk; mi jeche, muʼyuk xa sujbil li ermano o li ermana ta sventa taje; ti kʼusie, la stakoxuk ta ikʼel Dios ta sventa jun oʼontonal.+ 16 Ajnilal, ¿kʼuxi xanaʼ mi mu sta skolel avuʼun li amalale?+ Malalil, ¿kʼuxi xanaʼ mi mu sta skolel avuʼun li avajnile?

17 Akʼo mi jech, ti kʼu yelan ta jujuntal akʼbilik yuʼun Jeovae* jaʼuk me jech akʼo spasik ti kʼu yelan takbilik ta ikʼel yuʼun li Diose.+ Taje jaʼ jech chkalbe mantal skotol li tsobobbailetike. 18 ¿Mi oy laj yichʼ takel ta ikʼel junuk vinik ti yichʼoj xa ox sirkunsisione?*+ Mu me spas sba ti muʼyuk yichʼoj sirkunsision yilele. ¿Mi oy laj yichʼ takel ta ikʼel junuk vinik ti muʼyuk bu yichʼoj sirkunsisione? Mu me xichʼ sirkunsision.+ 19 Muʼyuk stu li yichʼel sirkunsisione, muʼyuk stu xtok ti muʼyuk chichʼ ichʼel sirkunsisione,+ pe jaʼ oy stu li xchʼunbel smantal Diose.+ 20 Jechuk-o me komanik ti kʼu yelan laj avichʼik takel ta ikʼel ta jujuntale.+ 21 ¿Mi mosoilot kʼalal latakat ta ikʼele? Mu xavul-o avoʼonton,+ pe mi stakʼ xakol chavile, paso me. 22 Yuʼun buchʼuuk noʼox ti laj yichʼ takel ta ikʼel ta sventa Kajvaltik ti kʼalal mosoil toʼoxe chkol+ xchiʼuk jaʼ yuʼun Kajvaltik chkʼot; jech xtok, chkʼot ta smoso Kristo li buchʼu kolem laj yichʼ takel ta ikʼele. 23 Yuʼun tojbil ti laj avichʼik manele;+ mu xa jaʼuk xavakʼ abaik ta mosoinel yuʼun li krixchanoetike. 24 Ermanoetik, jechuk-o me komanik ta stojolal Dios ti kʼu yelan laj avichʼik takel ta ikʼel ta jujuntale.

25 Pe muʼyuk yakʼojbun mantal Kajvaltik ta sventa li tojol tsebetike,* pe koliyal ti xkʼuxubinojun Kajvaltik sventa tukʼuk oyune, ta xkal li kʼusi ta jnope.+ 26 Jaʼ yuʼun, ta jnop ti jaʼ mas lek ti jechuk-o komuk li vinik ti kʼu onoʼox yelan oy ta skoj li kʼusitik yakal chkʼot ta pasel avie. 27 ¿Mi oy avajnil? Mu me xakolta aba lokʼel.+ ¿Mi chʼabal avajnil? Mu xasaʼ avajnil. 28 Pe muʼyuk chasaʼ amul mi chanupune xchiʼuk muʼyuk bu tsaʼ smul mi chnupun li tojol kerem tsebetike. Akʼo mi jech, chil tsots svokol stukik li buchʼu chnupunike. Pe li voʼone muʼyuk ta koʼonton ti xavil avokolike.

29 Xi to chkalboxuke, ermanoetik: toj komkom xa li yoraile.+ Liʼ ta ora xchiʼuk ta jelavele, xkoʼolajuk me kʼuchaʼal chʼabal yajnil li buchʼutik oy yajnile, 30 li buchʼutik ch-okʼe akʼo me jechikuk jech kʼuchaʼal li buchʼutik muʼyuk ch-okʼe, li buchʼutik xkuxet yoʼontonike akʼo me jechikuk jech kʼuchaʼal li buchʼutik muʼyuk xkuxet yoʼontonike xchiʼuk li buchʼutik chmanolajike akʼo me jechikuk jech kʼuchaʼal li buchʼutik muʼyuk kʼusi oy yuʼunike, 31 li buchʼutik tstunes li balumile akʼo me jechikuk jech kʼuchaʼal li buchʼu muʼyuk lek tsʼakal tstunese; yuʼun yantik xjel batel li kʼusitik yakal chkʼot ta pasel liʼ ta balumile. 32 Ta melel, ta jkʼan ti muʼyukuk kʼusi xavul-o avoʼontonike. Yuʼun jaʼ tsvul-o yoʼonton kʼusitik sventa Kajvaltik li vinik ti muʼyuk nupuneme, ti kʼuxi xuʼ lek x-ilat yuʼun li Kajvaltike. 33 Pe li vinik ti nupuneme jaʼ tsvul-o yoʼonton li kʼusitik sventa balumile,+ ti kʼuxi xuʼ lek x-ilat yuʼun li yajnile 34 xchiʼuk chʼakal li yoʼontone. Jech xtok, li ants ti muʼyuk malijeme —xchiʼuk li tojol tsebe— jaʼ tsvul-o yoʼonton li kʼusitik sventa Kajvaltike+ sventa lekuk chʼul oy ta sbekʼtal xchiʼuk ta snopben. Pe jaʼuk li ants ti nupuneme jaʼ tsvul-o yoʼonton li kʼusitik sventa balumile, ti kʼuxi xuʼ lek x-ilat yuʼun li smalale. 35 Jaʼ sventa alekilal atukik ti jech chkalboxuke, maʼuk sventa jmak avoʼontonik,* jaʼ noʼox ta jkʼan ti akʼo xapasik li kʼusi leke xchiʼuk ti jechuk-o ta sjunul avoʼonton xatunik ta stojolal Kajvaltik ti muʼyukuk kʼusi tsmakoxuke.

36 Pe mi oy buchʼu tsnop ti muʼyuk lek kʼusi yakal tspas ta skoj ti muʼyuk nupuneme* xchiʼuk mi echʼem xa li xnichimal skerem stsebale, jaʼ lek ti akʼo spas liʼe: akʼo spas li kʼusi tskʼan yoʼontone, muʼyuk tsta smul. Akʼo nupunikuk.+ 37 Pe mi oy buchʼu jpʼel ta yoʼonton xchiʼuk ti muʼyuk kʼusi chtun yuʼun chaʼie, mi spas ta mantal yuʼun li kʼusi oy ta yoʼonton xchiʼuk mi snopoj lek ta yoʼonton stuk ti muʼyuk bu chnupune,* lek ti jech tspase.+ 38 Jaʼ yuʼun chaʼa, li buchʼu chnupune lek ti jech tspase, pe li buchʼu muʼyuk chnupune mas to lek ti jech tspase.+

39 Chukul li ajnilal ti kʼu sjalil kuxul li smalale, pe mi vay ta lajelal li smalale,+ kolem xa sventa xnupun xchiʼuk ti buchʼu tskʼane, pe jaʼ noʼox ta sventa Kajvaltik.+ 40 Pe ti kʼusi ta jnop voʼone jaʼ mas xmuyubaj mi jech chkom-oe, yuʼun ta melel ta jnop ti kichʼoj ek li xchʼul espiritu Diose.

8 Jech xtok, ta sventa li veʼlil akʼbil ta smoton santoetike,+ xkojtikinbetik smelolal jkotoltik.+ Li yojtikinobile xuʼ xijtoyet xa chkaʼi jbatik yuʼun, yan li kʼanelale jaʼ tstsatsubtasvan.+ 2 Mi oy buchʼu tsnop ti oy kʼusi snaʼe, mu to me xojtikin skotol. 3 Pe mi oy buchʼu skʼanoj li Diose, ojtikinbil me yuʼun li Diose.

4 Pe ta sventa li slajesel veʼlil akʼbil ta smoton santoetike, jnaʼojtik ti muʼyuk sbalil ta balumil li santoetike+ xchiʼuk ti kʼajomal noʼox oy jun Diose.+ 5 Akʼo mi oy buchʼutik ti diosetik chichʼik albel ta alele, mi ta vinajel o mi ta sba balumil,+ jech kʼuchaʼal ep diosetik xchiʼuk ajvaliletik ta alele, 6 ta melel, jun noʼox Dios+ oy kuʼuntik, jaʼ li Totile,+ jaʼ li buchʼu yakʼoj skotol li kʼusitik oye xchiʼuk ti jaʼ yuʼunutike;+ jun noʼox Kajvaltik oy xtok, jaʼ li Jesukristoe, jaʼ ta sventa ti meltsaj skotol li kʼusitik oye+ xchiʼuk jaʼ ta sventa ti oyutike.

7 Pe mu skotoluk xojtikinik taje.+ Ta skoj ti chichʼik toʼox ta mukʼ santoe, oy junantik ti xkoʼolaj kʼuchaʼal akʼbil ta smoton santo chaʼiik li kʼusi tslajesike,+ vaʼun ikʼ chkom sjol yoʼontonik ta skoj ti kʼunike.+ 8 Pe muʼyuk bu tsnopajesutik mas ta stojolal Dios li kʼusi ta jlajestike;+ mi muʼyuk ta jlajestike, muʼyuk kʼusi skʼan kuʼuntik, mi ta jlajestik xtoke, muʼyuk kʼusi ta jtatik-o.+ 9 Pe kʼelo-o me abaik lek ti mu me smak-o* yakan avuʼunik li buchʼutik kʼunik ta skoj ti oy aderechoik stʼujele.+ 10 Yuʼun mi laj yiloxuk ti te yakal chaveʼik ta stemplo santoetik voʼoxuk ti oy lek yojtikinobil avuʼunike, ¿mi mu van sok sjol yoʼonton avuʼunik li buchʼu kʼun ti lek xa chaʼi tslajes ek li veʼlil akʼbil ta smoton santoetike? 11 Jaʼ yuʼun, ta skoj ti oy yojtikinobil avuʼune, ta sok li jun krixchano ti kʼune, jaʼ li avermano ti cham Kristo ta stojolale.+ 12 Kʼalal jech chasaʼ amulik ta stojolal li avermanotakike xchiʼuk ti chayayijesbeik li sjol yoʼontonik ti kʼune,+ yakal chasaʼ amulik ta stojolal li Kristoe. 13 Jech oxal, mi chmak-o* yakan kermano li kʼusi ta jlajese, mu xa bu ta jtiʼo bekʼet sventa mu xmak yakan li kermanoe.+

9 ¿Mi mu kolemukun? ¿Mi mu jtakbolukun? ¿Mi mu lajuk kil li Jesus ti jaʼ Kajvaltike?+ ¿Mi mu jaʼuk kabteloxuk ta stojolal li Kajvaltike? 2 Akʼo mi maʼuk jtakbolun ta stojolal li yantike, jtakbolun ta melel ta atojolalik, yuʼun voʼoxuk kʼotemoxuk ta seyo ti jtakbolun ta stojolal li Kajvaltike.

3 Xi ta jpak jkʼoplal ta stojolal li buchʼutik tskʼelbeikun jkʼoplale: 4 oy jderechotik sventa xijveʼ xchiʼuk sventa oy kʼusi xkuchʼtik, ¿mi mu jechuk? 5 Oy jderechotik sventa oyuk kajniltik ti jchʼunolajeluk*+ jech kʼuchaʼal li yan jtakboletike, li yermanotak Kajvaltike+ xchiʼuk li Sefase,*+ ¿mi mu jechuk? 6 ¿Mi voʼon noʼox van xchiʼuk Bernabe+ ti chʼabal jderechokutik sventa xkiktakutik spasel li abtelal ti jaʼ kuxulunkutik-o yuʼune? 7 ¿Mi oy van junuk soltaro ti tsbain stuk li kʼusi chtun yuʼune? ¿Mi oy van buchʼu muʼyuk tslobe sat li uva tstsʼune?+ ¿Mi oy van buchʼu muʼyuk chuchʼbe yaʼlel xchuʼ chij kʼalal jaʼ chchabi li chijetike?

8 Maʼuk yakal chkal li kʼusitik tsnop krixchanoetike, ¿mi mu jechuk? ¿Mi mu jechuk chal Mantal ek li kʼusitik taje? 9 Yuʼun xi tsʼibabil ta Smantal Moisese: «Mu xavakʼbe svosal li tot vakax kʼalal yakal chpechʼilan ta tekʼel li trigoe».+ ¿Mi jaʼ van oy ta yoʼonton tot vakax li Diose? 10 ¿O mi jaʼ van jkʼoplaltik li kʼusi laj yale? Jaʼ jkʼoplaltik ta melel li kʼusi laj yichʼ tsʼibaele, yuʼun li buchʼu tslok osil xchiʼuk li buchʼu chikʼa trigoe skʼan spat yoʼonton ti tslajesbe sat li kʼusi stsʼunoje.

11 Mi jaʼ jtsʼunojkutik ta atojolalik li kʼusitik sventa mantale, ¿mi toj tsots van chavaʼiik ti xavakʼbunkutik li kʼusitik chtun kuʼunkutike?+ 12 Mi jech oy sderecho sventa xakoltaik li yan viniketike, ¿mi mu masuk van oy jderechokutik ta atojolalik li voʼonkutike? Akʼo mi jech, muʼyuk bu jtunesoj li jderechokutike,+ jaʼ noʼox oy kʼusitik tsʼikem kuʼunkutik sventa mu jmakutik jsetʼuk* li lekil aʼyejetik sventa li Kristoe.+ 13 ¿Mi mu xanaʼik ti tslajesik kʼusitik oy ta templo li buchʼutik sbainojik li chʼul abtelale xchiʼuk ti chichʼik kʼuk yepal li kʼusitik oy ta skajleb matanal li buchʼutik tspasik li kʼusitik sbainojik ta skajleb matanale?+ 14 Ti kʼu yelan taje, jaʼ jech laj yal mantal xtok li Kajvaltik ta stojolal li buchʼutik chchol lekil aʼyejetike, ti jaʼ akʼo veʼikuk-o li lekil aʼyejetike.+

15 Pe li voʼone muʼyuk bu jtunesoj mi jutebuk li kʼusitik taje.+ Ta melel, maʼuk sventa ta jkʼan ti jechuk kʼotuk ta jtojolal li kʼusitik la jtsʼibae, ¡ti jechuke, jaʼ mas lek ti xichame, jaʼ altik mi oy buchʼu tsmak ta be li kʼusitik chimuyubaj-o yuʼune!+ 16 Jaʼ yuʼun, mi ta jchol batel li lekil aʼyejetike, maʼuk sventa jtoy-o jba, yuʼun jaʼ li kʼusi jbainoje. Ta melel, ¡abol jba mi muʼyuk bu ta jchol batel li lekil aʼyejetike!+ 17 Oy jmoton mi ta sjunul koʼonton ta jpase; akʼo mi maʼuk ta sjunul koʼonton ta jpas, oy onoʼox kʼusi kʼubanbilun.+ 18 Jaʼ yuʼun, ¿kʼusi jaʼ li jmotone? Jaʼ ti ta matanaluk chkakʼ li lekil aʼyejetik kʼalal ta jchol batel li lekil aʼyejetike sventa mu xi-ilbajinvan ta skoj ti kichʼoj kabtel* ta sventa li lekil aʼyejetike.

19 Yuʼun akʼo mi muʼyuk buchʼu smosoinojun, kakʼoj jba ta mosoinel yuʼun skotolik sventa jpas ta kanal epal krixchanoetik ti bu kʼalal xuʼ kuʼune. 20 Ta skoj taje, la jpas jba kʼuchaʼal juda ta stojolal li judaetike sventa jpas ta kanal li judaetike;+ la jpas jba kʼuchaʼal ventainbilun yuʼun mantal ta stojolal li buchʼutik ventainbilik yuʼun mantale akʼo mi muʼyuk bu sventainojun li mantale sventa jpas ta kanal li buchʼutik ventainbilik yuʼun mantale.+ 21 La jpas jba kʼuchaʼal muʼyuk ventainbilun yuʼun mantal ta stojolal li buchʼutik muʼyuk ventainbilik yuʼun mantale akʼo mi ventainbilun yuʼun mantal li ta sat Diose xchiʼuk sventainojun li smantal Kristoe+ sventa jpas ta kanal li buchʼutik muʼyuk ventainbil yuʼun mantale. 22 Kʼun la jpas jba ta stojolal li buchʼutik kʼunike sventa jpas ta kanal li buchʼutik kʼune.+ La jpas jba ta kʼusiuk noʼox ta stojolal skotol li krixchanoetike sventa xuʼ jech xkolik jayvoʼuk ta sventa li kʼusitik la jpase. 23 Ta jpas skotol ta skoj li lekil aʼyejetike sventa xuʼ chkalbe batel li yantike.+

24 ¿Mi mu xanaʼik ti ch-anilaj skotol li j-anilajeletik kʼalal oy anile, pe ti kʼajomal noʼox jun ti buchʼu tsta smotone? Anilajanik sventa xuʼ xapasik kanal li amotonike.+ 25 Jech xtok, skʼan snaʼ spajesel sba ta skotol kʼusitik li buchʼu ch-och ta tsalbaile.* Ti jech tspasike jaʼ sventa staik jun korona ti snaʼ xlaje,+ pe li voʼotike jaʼ ta jtatik jun korona ti mu snaʼ xlaje.+ 26 Jaʼ yuʼun, mu altikuk noʼox ti kʼu yelan chi-anilaje;+ mu ikʼuk noʼox ta jmaj ti kʼu yelan chkakʼ majele; 27 ti kʼusi ta jpase jaʼ ti jpas ta mantal* li jbekʼtale+ xchiʼuk jech chkʼot kuʼun kʼuchaʼal mosoil sventa mu chopoluk xkʼot jkʼoplal ta stojolal Dios mi laj xa ox jcholbe mantal li yantike.

10 Jaʼ yuʼun, oy ta koʼonton ti akʼo xanaʼike, ermanoetik, ti te xanavik ta yolon tok+ xchiʼuk ti te echʼik ta nab skotol li jmoltotaktike,+ 2 jech xtok, laj yichʼ voʼ skotolik ta sventa Moises ta stojolal li tok xchiʼuk li nabe; 3 jtos noʼox veʼlil ta mantal la slajes skotolik+ 4 xchiʼuk jtos noʼox uchʼbolajel ta mantal laj yuchʼ skotolik.+ Yuʼun jaʼ te laj yuchʼik li ta ton sventa mantal ti jaʼ chiʼinatik batele, jaʼ skʼoplal Kristo li ton taje.+ 5 Akʼo mi jech, jaʼ ep ti buchʼutik muʼyuk bu lek ilatik yuʼun li Diose, vaʼun te telajtik komik ta takixokol balumil.+

6 Jaʼ yuʼun, jaʼ jchanubtasobiltik li kʼusitik kʼot ta pasele sventa mu jkʼantik li kʼusitik xuʼ tsokesutik jech kʼuchaʼal la skʼanike.+ 7 Xchiʼuk mu me xkichʼtik ta mukʼ santoetik jech kʼuchaʼal la spasik junantike; jech onoʼox kʼuchaʼal xi tsʼibabile: «Chotiik ta veʼel, ta uchʼbolajel, jech lik xchʼay yoʼontonik».+ 8 Mu me xijmulivaj* jech kʼuchaʼal mulivajik junantike, yuʼun chamik 23 mil ta jun noʼox kʼakʼal.+ 9 Mu me xkakʼtik ta preva Jeova*+ jech kʼuchaʼal laj yakʼik ta preva junantike, jaʼ yuʼun lajik ta tiʼel ta chon.+ 10 Mu me xijbikʼtal kʼopoj jech kʼuchaʼal bikʼtal kʼopojik+ junantik ti jaʼ noʼox milatik-o yuʼun li jmilvaneje.+ 11 Jaʼ yuʼun, jaʼ sventa jchanubtasobiltik li kʼusitik kʼot ta pasel ta stojolalike xchiʼuk laj yichʼ tsʼibael sventa jpʼijubtasobiltik+ li voʼotik ti vul xa ta jtojolaltik li slajeb skotol li kʼusitik oy ta balumile.

12 Jaʼ yuʼun, li buchʼu tsnop ti lek vaʼale akʼo me skʼel sba ti mu xyal ta lume.+ 13 Muʼyuk yan akʼel ta preva chavilik, jaʼ noʼox jech chavilik jech kʼuchaʼal chil li yantike.+ Pe tukʼ li Diose, muʼyuk chakʼ ti akʼo xavichʼik akʼel ta preva mi mu stsʼik avuʼunike,+ akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xkuch avuʼunik.+

14 Jaʼ yuʼun, li voʼoxuk ti jkʼanojoxuke, mu me xavichʼik ta mukʼ jsetʼuk* li santoetike.+ 15 Jaʼ jech ta jkʼoponoxuk talel jech kʼuchaʼal viniketik ti xtojobik ta yaʼibel smelolale; nopo avaʼi atukik li kʼusi chkalboxuke. 16 Li skopail bendision ti ta jkʼoponbetik Dios ta stojolale, ¿mi mu jaʼuk skʼan xal ti ta jtabetik sbalil li xchʼichʼel Kristoe?+ Li pan ta jvokʼtike, ¿mi mu jaʼuk skʼan xal ti ta jtabetik sbalil li sbekʼtal Kristoe?+ 17 Yuʼun jun noʼox pan oy, manchuk mi eputik, jun noʼox jbekʼtal jkotoltik,+ yuʼun jkotoltik ta jtabetik sbalil li pan taje.

18 Nopbeik skʼoplal avaʼiik li batsʼi j-israeletike: ¿mi mu tauk stabeik sbalil kʼusi oy ta skajleb matanal li buchʼutik tslajes li matanaletike?+ 19 Vaʼun chaʼa, ¿kʼusi ti yakal chkale? ¿Mi yuʼun jaʼ chkal ti oy stu li milbil matanal ti akʼbil ta stojolal santoe o ti oy stu li santoetike? 20 Mu jechuk; li voʼone chkal ti pukuj chakʼbeik li milbil matanal chakʼik jyanlumetike, maʼuk chakʼbeik li Diose;+ pe mu jkʼan ti teuk akʼoplalik xchiʼuk li pukujetike.+ 21 Yuʼun mu me lekuk ti te chavuchʼbeik sbel skopa Jeova* mi yakal chavuchʼbeik li sbel skopa pukujetike; xchiʼuk mu me stakʼ ti te jech-o chalajesbeik li kʼusi oy ‹ta xmexa Jeova›*+ mi yakal chalajesbeik li kʼusi oy ta xmexa pukujetike. 22 ¿O mi yuʼun ta jkʼan ta ‹jtijbetik yoʼonton Jeova* sventa x-itʼixaj›?+ Maʼuk ti mas tsotsutik kʼuchaʼal stuke, ¿mi mu jechuk?

23 Stakʼ pasel skotol, pe mu skotoluk oy sbalil. Stakʼ pasel skotol, pe mu skotoluk tstsatsubtasvan.+ 24 Ta jujuntal akʼo saʼik li kʼusi lek chaʼi yan krixchanoe, maʼuk li kʼusi lek chaʼi stukike.+

25 Xuʼ xatiʼo kʼusiuk ti chichʼ chonel ta chonob bekʼete, pe mu me kʼusi xajakʼ jsetʼuk* ta skoj li ajol avoʼontone; 26 yuʼun «jaʼ yuʼun balumil li Jeovae* xchiʼuk skotol li kʼusitik oye».+ 27 Mi oy laj yikʼoxuk ta veʼel li buchʼutik maʼuk jchʼunolajele xchiʼuk mi chakʼan chabatike, lajesik li kʼusi cha-akʼbatike, pe mu me kʼusi xajakʼik jsetʼuk* ta skoj li ajol avoʼontonike. 28 Pe mi oy buchʼu xi chalboxuke: «Liʼe akʼbil me ta milbil matanal» mi xie, mu xalajesik ta skoj li buchʼu laj yalboxuke xchiʼuk ta skoj li jol oʼontonale.+ 29 Maʼuk ta jkʼan chkalbe skʼoplal li ajol avoʼontone, jaʼ ta jkʼan chkalbe skʼoplal li sjol yoʼonton yan krixchanoe. ¿Kʼu yuʼun jaʼ chchapanun li sjol yoʼonton yan krixchano+ ti kolemun xae? 30 Mi ta jtojbe ta vokol Dios+ ti ta jtiʼe, ¿mi lek van ti chchopol kʼopojik ta jtojolal ta skoj ti ta jtiʼe?

31 Jaʼ yuʼun, mi chaveʼik, mi cha-uchʼbolajik o kʼusiuk noʼox ti chapasike, jaʼuk me sventa xichʼ mukʼibtasbel skʼoplal Dios skotol li kʼusitik chapasike.+ 32 Mu me xamakbeik* yakan li judaetike, li jgresiaetike xchiʼuk li tsobobbail yuʼun Diose,+ 33 jaʼ jech kʼuchaʼal ti jaʼ ta jpas li kʼusi lek chaʼi skotol krixchanoetik ta skotol li kʼusitike, maʼuk ta jsaʼ li kʼusi lek chkaʼi jtuke,+ jaʼ ta jsaʼ li kʼusi lek chaʼi epal krixchanoetik sventa xuʼ xkolike.+

11 Chanik li kʼusi ta jpase jech kʼuchaʼal ta jchanbe li Kristoe.+

2 Ta jkʼupil kʼoptaoxuk, yuʼun te oyun ta ajolik ta skotol li kʼusitike xchiʼuk staoj-o yav ti jech tajek chapasik li kʼusitik laj kakʼ achanike. 3 Pe ta jkʼan akʼo xanaʼik liʼe: li sjol viniketike jaʼ li Kristoe;+ jaʼ noʼox jech ek, li sjol antse jaʼ li vinike;+ jaʼ noʼox jech ek, li sjol Kristoe jaʼ li Diose.+ 4 Chakʼ ta kʼexlal sjol kʼalal smakoj sjol tspas orasion o kʼalal chal albil kʼop li vinike; 5 pe jaʼ chakʼ ta kʼexlal sjol kʼalal muʼyuk bu smakoj sjol tspas orasion o kʼalal chal albil kʼop+ li antse, yuʼun jaʼ jech tajek chkʼot kʼuchaʼal li ants ti juxbil sjole. 6 Yuʼun mi muʼyuk bu tsmak sjol li antse, jaʼ lek ti akʼo slokʼe; pe mi kʼexlal sba chaʼi ti lokʼbil o juxbil sjol li antse, jaʼ lek ti akʼo smake.

7 Yuʼun mu stakʼ makal sjol li vinike, yuʼun jaʼ slokʼol+ xchiʼuk jaʼ smukʼulal Dios; yan li antse jaʼ smukʼulal li vinike. 8 Yuʼun maʼuk ta stojolal ants vul ta lokʼel li vinike, jaʼ ta stojolal vinik ti vul ta lokʼel li antse;+ 9 pe maʼuk noʼox taje, yuʼun maʼuk ta skoj ants ti laj yichʼ pasel li vinike, yuʼun jaʼ ta skoj vinik ti laj yichʼ pasel li antse.+ 10 Jech oxal, skʼan oyuk svinajeb ta sjol ti ventainbil li antse, taje jaʼ sventa li anjeletike.+

11 Pe ta stojolal li Kajvaltike muʼyuk bu chʼakal ta stojolal vinik li antse xchiʼuk muʼyuk bu chʼakal ta stojolal ants li vinike. 12 Jech kʼuchaʼal vul ta lokʼel ta stojolal vinik li antse,+ jech vul ta lokʼel ta stojolal ants li vinik eke; pe te lik talel ta stojolal Dios skotol li kʼusitike.+ 13 Nopo avaʼi atukik: ¿mi lek van ti muʼyuk tsmak sjol li ants kʼalal tspas orasione? 14 ¿Mi mu xanaʼik ti stalel onoʼox ti kʼexlal sba kʼalal nat sjol li vinike, 15 pe ti jaʼ sventa yichʼobil ta mukʼ li ants kʼalal nat sjole? Yuʼun jaʼ smak sjol kʼotem li stsotsil sjol akʼbile. 16 Pe yikʼaluk van oy junuk vinik ti chal ti mu persauk smak sjol li antse, akʼo mi jech, taje mu jechuk li kʼusi nopem xkaʼitik spasele xchiʼuk mu jechuk nopem xaʼiik spasel ek li stsobobbailtak Diose.

17 Pe maʼuk sventa ta jkʼupil kʼoptaoxuk kʼalal jech chkalboxuk mantale; yuʼun maʼuk sventa kʼusi lek ti jech chatsob abaike, moʼoj, jaʼ sventa li kʼusi chopole. 18 Yuʼun kaʼioj ti mu parejouk kʼusi chanopik kʼalal chatsob abaike; yuʼun jech onoʼox chapasik jnaʼ. 19 Yuʼun oy onoʼox buchʼutik chchʼak sbaik ta atojolalik+ sventa xvinaj avuʼunik li buchʼutik lek ilbil yuʼun Diose.

20 Jech oxal, maʼuk me jech smelolal li veʼel chapasik ta sventa li Veʼlil ta bat kʼakʼal yuʼun Kajvaltik kʼalal oy bu chatsob abaike.+ 21 Yuʼun baʼyel xa onoʼox chatsakik ta jujuntal li aveʼelik ta bat kʼakʼal kʼalal chaveʼike; jaʼ yuʼun chviʼnaj li jlome xchiʼuk chyakub li jlome. 22 Oy anaik sventa te chaveʼik xchiʼuk sventa te cha-uchʼbolajik, ¿mi mu jechuk? ¿O mi yuʼun chapʼajbeik li stsobobbail Diose xchiʼuk chavakʼik ta kʼexlal li buchʼutik muʼyuk kʼusi x-ayan yuʼunike? ¿Kʼusi chkalboxuk chaʼa? ¿Mi skʼan van jkʼupil kʼoptaoxuk? Muʼyuk bu ta jkʼupil kʼoptaoxuk ta skoj taje.

23 Jaʼ laj yalbun Kajvaltik li kʼusi laj kalboxuk eke, yuʼun li ta akʼobaltik+ kʼalal chichʼ xa akʼel ta kʼabal li Kajvaltik Jesuse, la stsak jun pan, 24 vaʼun kʼalal laj xa ox stoj ta vokole, la xut* xchiʼuk xi laj yale: «Liʼe jaʼ skʼelobil* jbekʼtal+ ti chichʼ akʼel ta aventaike. Jech xapasik-o sventa jnaʼobil».+ 25 Jaʼ jech la spas xtok ta sventa li kopa+ kʼalal laj xa ox yoʼontonik ta veʼele, xi laj yale: «Li kopa liʼe jaʼ skʼelobil* li achʼ trato+ ta sventa li jchʼichʼele.+ Jech xapasilanik-o sventa jnaʼobil kʼalal chavuchʼik jujun veltae».+ 26 Yuʼun kʼalal chaveʼik jujun velta li pan taje xchiʼuk kʼalal chavuchʼik jujun velta li vino ta kopa taje, yakal chavalbeik-o skʼoplal li slajel Kajvaltik jaʼ to mi vule.

27 Jech oxal, li buchʼu tsveʼ li pan xchiʼuk ti chuchʼ li vino ta skopa Kajvaltike, pe ti mu sta-o jech tspase, ta me sta smul ta sventa li sbekʼtal Kajvaltik xchiʼuk ta sventa li xchʼichʼele. 28 Akʼo yaʼi sba baʼyel li krixchano kʼalal mi laj xa ox skʼel lek skʼoplal stuke,+ vaʼun jaʼ noʼox jech xuʼ sveʼ li pane xchiʼuk xuʼ xuchʼ li vino ta kopae. 29 Yuʼun li buchʼu tsveʼ xchiʼuk chuchʼe jaʼ tsveʼ xchiʼuk chuchʼ xchapanel stuk mi muʼyuk bu xakʼ venta ti toj tsots skʼoplal kʼusi skʼan xal li bekʼtalile. 30 Jaʼ ta skoj ti ep buchʼutik kʼun xchiʼuk ip avuʼunike xchiʼuk ep buchʼutik yakal chvay ta lajelal avuʼunik.*+ 31 Pe muʼyuk bu chkichʼtik chapanel jechuk ti xijtojobuk lek ta skʼelel jbatik ti kʼu kelantike. 32 Tstukʼibtasutik Jeova*+ kʼalal chkichʼtik chapanele sventa mu xkichʼ stojol jmultik xchiʼuk li krixchanoetike.+ 33 Jaʼ yuʼun, kuni ermanotak, malao me abaik ta jujuntal kʼalal chatsob abaik ta slajesel li Veʼlil ta bat kʼakʼal yuʼun Kajvaltike. 34 Akʼo veʼuk ta sna mi oy buchʼu chviʼnaje sventa mu xavichʼik chapanel+ kʼalal chatsob abaike. Pe jaʼ to chkʼot jchapan li yan kʼusitik kʼalal mi likʼot tee.

12 Li avi une, kermanotak, oy ta koʼonton ti xanabeik skʼoplal li matanaletik yakʼoj Diose.+ 2 Anaʼojik ti ta toʼox xavakʼ abaik ta loʼlael yuʼun umaʼ santoetik+ kʼalal jyanlumoxuk* toʼoxe, ti jaʼ te labatik ti bu laj yikʼoxuk batele. 3 Jaʼ yuʼun, oy ta koʼonton ti akʼo xanaʼik ti buchʼu chkʼopoj ta skoj li xchʼul espiritu Diose mi junuk buchʼu xi chale: «¡Chopol kʼoptabiluk li Jesuse!»; jech xtok, jaʼ noʼox xuʼ xi chal li buchʼu yichʼoj chʼul espiritue: «¡Jaʼ Kajvaltik li Jesuse!».+

4 Jaʼ yuʼun, oy jeltos matanaletik, pe jun noʼox chʼul espiritu oy;+ 5 xchiʼuk oy jeltos abtelaletik,+ pe jun noʼox Kajvaltik oy; 6 xchiʼuk oy jeltos kʼu yelan ta pasel li kʼusitike, pe kʼajomal noʼox jun Dios ti tskolta skotol krixchanoetik sventa spas yuʼunik skotole.+ 7 Pe ti kʼu yelan chakʼ ta ilel ta jujun krixchano li chʼul espiritue jaʼ sventa chichʼ tabel sbalil.+ 8 Ta stojolal li chʼul espiritue lek chanubtasbilutik jlom sventa pʼij chijkʼopojutik, ta stojolal li chʼul espiritue lek chanubtasbilutik ti kʼu yelan oy yojtikinobil kuʼuntik kʼalal chijkʼopoje, 9 ta stojolal onoʼox li chʼul espiritu taje xuʼ oy xchʼunel koʼontontik,+ li junantik xtoke xuʼ yuʼun chpoxta jchameletik,+ 10 li june tspas skʼelobiltak juʼelal,+ li june chal albil kʼop, li june xtojob ta skʼelbel skʼoplal mi te likem tal ta stojolal Dios li jpʼel kʼope,+ li june chkʼopoj ta yan kʼopetik+ xchiʼuk li june tsjelubtas ta yan kʼopetik.+ 11 Pe jun noʼox chʼul espiritu tspas skotol taje, jaʼ jech chakʼbe ta jujuntal jech kʼuchaʼal tskʼane.

12 Akʼo mi jun noʼox li jbekʼtaltike, oy ep stsʼakbenaltak, akʼo mi ep stsʼakbenaltak li jbekʼtaltike, jun noʼox kʼotem,+ taje jaʼ jech li Kristo eke. 13 Yuʼun ta jun noʼox chʼul espiritu laj kichʼtik voʼ jkotoltik sventa jun noʼox jbekʼtaltik xijkʼot akʼo mi judautik o jgresiautik, akʼo mi mosoilutik o kolemutik, jun noʼox chʼul espiritu laj kichʼtik akʼbel kuchʼ jkotoltik.

14 Yuʼun ta melel ep stsʼakbenal li jbekʼtaltike, maʼuk noʼox jun.+ 15 Ti xiuk chal li kakantike: «Muʼyuk bu te tsakal jkʼoplal ta bekʼtalil ta skoj ti maʼuk kʼobilune», taje maʼuk skʼan xal ti mu xa bu te tsakal li ta jbekʼtaltike. 16 Xchiʼuk ti xiuk chal li jchikintike: «Muʼyuk bu te tsakal jkʼoplal ta bekʼtalil ta skoj ti maʼuk satilune», taje maʼuk skʼan xal ti mu xa bu te tsakal li ta jbekʼtaltike. 17 Ti naka satiluk skotol li jbekʼtaltike, ¿bu van oy jechuk li jchikintik sventa xkaʼitike? Ti naka chikiniluk skotole, ¿bu van oy jechuk li jniʼtik sventa xkaʼibetik yikʼ li kʼusitike? 18 Pe ta jujuntal laj yakʼbe yavil stsʼakbenaltak jbekʼtaltik li Diose jech kʼuchaʼal tskʼupine.

19 ¿Bu oy jechuk li jbekʼtaltik ti jtosuk noʼox li stsʼakbenaltak jbekʼtaltike? 20 Manchuk mi jun noʼox li jbekʼtaltike, ep ta tos li stsʼakbenal jbekʼtaltike. 21 Mu stakʼ ti xi chalbe jkʼobtik li jsatike: «Mu kʼu xatun-o kuʼun»; jech xtok, mu stakʼ ti xi chalbe kakantik li joltike: «Mu kʼu xatun-o kuʼun». 22 Taje mu jechuk, yuʼun li stsʼakbenaltak jbekʼtaltik ti mas kʼunik xvinaje jtunelik ek, 23 jech xtok, li stsʼakbenaltak jbekʼtaltik ti ta jnoptik ti jutuk ichʼbilik ta mukʼe mas ta jkʼuxubintik,+ jaʼ yuʼun mas lek chichʼ tukʼulanel li stsʼakbenaltak jbekʼtaltik ti mu stakʼ kʼelele, 24 pe muʼyuk kʼusi chtun yuʼun li stsʼakbenaltak jbekʼtaltik ti kʼupil sba ta kʼelele. Akʼo mi jech, ti kʼu yelan la spas jbekʼtaltik li Diose jaʼ sventa mas chichʼ ichʼel ta mukʼ li stsʼakbenal jbekʼtaltik ti bu muʼyuk ichʼbil ta mukʼe 25 sventa mu xchʼakilan sba li jbekʼtaltike, jaʼuk noʼox akʼo xchabi sbaik ta jujutos li stsʼakbenaltak jbekʼtaltike.+ 26 Mi chil svokol jtosuk stsʼakbenal jbekʼtaltike, chil svokol li yantik eke;+ mi chichʼ ichʼel ta mukʼ jtosuk stsʼakbenal jbekʼtaltike, xmuyubaj li yantik eke.+

27 Jaʼ yuʼun, jaʼ sbekʼtaloxuk Kristo+ li voʼoxuke xchiʼuk jaʼ stsʼakbenaloxuk bekʼtalil ta jujuntal.+ 28 Ta jujuntal vaʼanbilik yuʼun Dios li ta tsobobbaile: baʼyele, jtakboletik;+ xchibale, j-alkʼopetik;+ yoxibale, jchanubtasvanejetik;+ yane tspasik skʼelobil juʼelal;+ yane staoj smotonik sventa xpoxtavanik;+ yane tskoltaik yantik; yane pʼij kʼu yelan chbeiltasvanik;+ yane chkʼopojik ta yan kʼopetik.+ 29 Maʼuk jtakboloxuk akotolik, ¿mi mu jechuk? Maʼuk j-alkʼopoxuk akotolik, ¿mi mu jechuk? Maʼuk jchanubtasvanejoxuk akotolik, ¿mi mu jechuk? Muʼyuk chapasik skʼelobiltak juʼelal akotolik, ¿mi mu jechuk? 30 Mu akotolikuk ataojik matanal sventa chapoxtavanik, ¿mi mu jechuk? Mu akotolikuk chakʼopojik ta yan kʼopetik, ¿mi mu jechuk?+ Mu akotolikuk jelubtasej kʼopoxuk, ¿mi mu jechuk?+ 31 Pe jaʼ saʼilanik li mukʼtik matanale.+ Jech xtok, ta to xkakʼ avilik jun be ti mu kʼusi xkoʼolaj-oe.+

13 Mi jech chikʼopoj jech kʼuchaʼal skʼopojel krixchanoetik xchiʼuk mi jech chikʼopoj jech kʼuchaʼal skʼopojel anjeletike, pe mi mu jnaʼ xikʼanvane, xikoʼolaj kʼuchaʼal jset bronse ti jecheʼ noʼox stsʼintsʼune o jun simbalo* ti jecheʼ noʼox toj tsots chnike. 2 Mi jtaoj jmoton ta yalel albil kʼopetik, mi xkaʼibe skʼoplal skotol li kʼusitik chʼul ti mukul skʼoplale, mi jnaʼojbe skʼoplal skotol li yojtikinobile+ xchiʼuk mi oy xchʼunel koʼonton sventa jlokʼes batel ta yavil li vitse, pe mi mu jnaʼ xikʼanvane, muʼyuk kʼusi jtu un bi.+ 3 Mi chkakʼ skotol kʼusitik oy kuʼun sventa jmakʼlin li yantike+ xchiʼuk mi chkakʼ jkuxlejal ti ximuyubaj xa yuʼune, pe mi mu jnaʼ xikʼanvane,+ mi jsetʼuk* kʼusi ta jtabe sbalil un bi.

4 Li kʼanelale+ xmalaj yuʼun+ xchiʼuk lek yoʼonton.+ Li kʼanelale mu snaʼ x-itʼixaj,+ muʼyuk chakʼ sba ta ichʼel ta mukʼ xchiʼuk muʼyuk xtoyet xa chaʼi sba,+ 5 maʼuk ti mu xichʼ smelolal ti kʼu yelan tspas sbae,*+ maʼuk tsaʼ li kʼusi lek chaʼi stuke+ xchiʼuk muʼyuk ch-ilin ta anil.+ Muʼyuk chchap batel li kʼusi chopol tspasbate.+ 6 Maʼuk xkuxet-o yoʼonton li kʼusi muʼyuk tukʼe,+ jaʼ xkuxet-o yoʼonton li kʼusi melele. 7 Stsʼik yuʼun skotol li kʼusitike,+ xchʼun yuʼun skotol,+ spatoj yoʼonton ta skotol+ xchiʼuk xkuch yuʼun skotol.+

8 Li kʼanelale mu xlaj-o skʼoplal. Pe ta xlaj skʼoplal mi jtaoj jmotontik ta yalel albil kʼopetike; ta xpaj skʼoplal mi chijkʼopoj ta yan kʼopetike;* ta xlaj skʼoplal mi oy yojtikinobil kuʼuntike. 9 Yuʼun muʼyuk lek tsʼakal li yojtikinobil kuʼuntike+ xchiʼuk muʼyuk tsʼakal chkaltik batel li albil kʼope; 10 pe mi vul ta lokʼel li kʼusi lek tsʼakale, jaʼ chlaj skʼoplal li kʼusi muʼyuk lek tsʼakale. 11 Jech toʼox chikʼopoj kʼuchaʼal olol kʼalal ololun toʼoxe, jech toʼox ta jnop kʼuchaʼal olol, jech toʼox chirasonaj kʼuchaʼal olol; pe avi ti vinikun xae laj xa kikta li stalelal olole. 12 Yuʼun li avie, mu xkiltik lek jech kʼuchaʼal ti mu xkiltik lek li kʼusi ta jkʼeltik ta nen ti pasbil ta takʼine, pe ta jelavele, chkiltik xa lek. Li avie, mu to xkojtikin lek, pe ta jelavele, chkojtikin xa lek jech kʼuchaʼal xiyojtikinun lek li Diose. 13 Pe oy oxtos ti te chkom-oe: jaʼ li xchʼunel oʼontonale, li spatobil oʼontonale xchiʼuk li kʼanelale; pe li kʼusi mas tsots skʼoplale jaʼ li kʼanelale.+

14 Kʼano-o me abaik ta jujuntal; akʼbeik-o me yipal saʼel li matanaletik ta mantale, pe jaʼ mas tsots skʼoplal ti xavalik batel li albil kʼope.+ 2 Yuʼun maʼuk krixchanoetik tskʼopon li buchʼu chkʼopoj ta yan kʼope, Dios tskʼopon, yuʼun muʼyuk buchʼu ch-aʼibat+ akʼo mi ta chʼul espiritu chalbe skʼoplal li kʼusitik chʼul ti mukul skʼoplale.+ 3 Pe tstsatsubtasvan xchiʼuk tspat oʼontonal li buchʼu chal albil kʼope xchiʼuk tstsatsubtasbe yoʼonton krixchanoetik ta skʼopojel. 4 Tstsatsubtas sba stuk li buchʼu chkʼopoj ta yan kʼope, pe jaʼ tstsatsubtas tsobobbail li buchʼu chal albil kʼope. 5 Ta jkʼan yaʼel ti xanaʼuk xakʼopojik ta yan kʼopetik akotolike,+ pe jaʼ ta jkʼan ti akʼo xavalik batel albil kʼopetike.+ Ta melel, jaʼ mas jtunel li buchʼu chal albil kʼopetike, jaʼ mu sta li buchʼu chkʼopoj ta yan kʼopetike, pe tsots onoʼox skʼoplal mi tsjelubtas ta yan kʼope sventa stsatsub yoʼonton li buchʼutik te oy ta tsobobbaile. 6 Ermanoetik, ti ta yan kʼopuk chikʼopoj kʼalal chbat jkʼeloxuk ta orae, ¿mi tskoltaoxuk van ti jechuke? Mi yuʼun ta jkʼan ta jkoltaoxuke, skʼan jaʼ chkalboxuk li kʼusi laj yakʼbun jnaʼ li Diose,+ li yojtikinobile,+ li albil kʼope xchiʼuk li chanubtasele.

7 Xkoʼolaj kʼuchaʼal li kʼusitik muʼyuk kuxajtik ti oy yechʼomale, mi ama* o mi arpa. ¿Kʼuxi van chichʼ naʼel kʼusi yakal chichʼ jupanel ta ama o kʼusi yakal chichʼ tijel ta arpa mi muʼyuk bu jelajtik snukʼilale? 8 ¿Buchʼu van chchapan sba sventa paskʼop mi muʼyuk smelolal chichʼ jupanel li okʼese? 9 Jaʼ jechoxuk ek, ¿buchʼu van chaʼibe smelolal kʼusi yakal chavalik mi muʼyuk bu kʼun ta aʼiel li kʼusi chavalike? Ta melel, ikʼ noʼox chakʼoponik ti jechuke. 10 Yikʼaluk van oy jeltos kʼopetik li ta balumile, pe oy sbalil skotol li jeltos kʼopetike. 11 Mi mu xkaʼibe smelolal li kʼope, xikoʼolaj kʼuchaʼal jyanlum krixchano chikʼot ta stojolal li buchʼu tskʼoponune xchiʼuk xkoʼolaj kʼuchaʼal jyanlum krixchano chkʼot ta jtojolal ek li buchʼu tskʼoponune. 12 Jaʼ jechoxuk ek, yuʼun oy tajek ta avoʼontonik stael li matanaletik yuʼun chʼul espiritue, jaʼ yuʼun jaʼ saʼik mas li matanaletik ti tstsatsubtas li tsobobbaile.+

13 Jaʼ yuʼun, li buchʼu chkʼopoj ta yan kʼope akʼo spas orasion yoʼ sjelubtas ta yan kʼop.+ 14 Yuʼun mi ta jpas orasion ta yan kʼope, jaʼ tspas orasion li matanal yakʼojbun chʼul espiritue, pe mu xaʼibe smelolal li jnopbene. 15 ¿Kʼusi skʼan pasel un chaʼa? Ta jpas orasion ta skoj li matanal yuʼun chʼul espiritue, pe ta jpas orasion ta jnopben xtok. Ta jkʼejinta kʼejojetik ta sventa li matanal yuʼun chʼul espiritue, pe ta jkʼejinta kʼejojetik ta jnopben xtok. 16 Jaʼ yuʼun, mi chakʼupil kʼopta Dios ta sventa li matanal yuʼun chʼul espiritue, ¿kʼuxi van «Jechuk» xi li jun krixchano ti muʼyuk yojtikinobil yuʼun ti te xchiʼukot mi mu xaʼibe smelolal li kʼusi yakal chatoj ta vokole? 17 Melel ti toj lek ti kʼu yelan yakal chatoj ta vokole, pe muʼyuk bu yakal tstsatsub yoʼonton li jun krixchanoe. 18 Ta jtojbe ta vokol Dios ti mas jnaʼ xikʼopoj ta yan kʼopetik kʼuchaʼal voʼoxuke. 19 Akʼo mi jech, ta jkʼan ti voʼpʼeluk noʼox kʼop xikʼopoj sventa xaʼibeik smelolal li ta tsobobbail yoʼ jchanubtas li yantike, jaʼ altik mi lajunmil ta pʼel kʼop xikʼopoj ta yan kʼope.+

20 Ermanoetik, mu me snopbenuk olol ti kʼu yelan chanopike;+ moʼoj, jaʼ skʼan ololuk xavaʼi abaik ta sventa li choplejale;+ pe skʼan me yijubemuk xa lek anopbenik ta yaʼibel smelolal.+ 21 Xi tsʼibabil li ta Mantale: «‹Ta skʼop jyanlumetik xchiʼuk ta skʼop yan krixchanoetik ta jkʼopon li jteklum liʼe, akʼo mi jech, mu skʼan xaʼiik li kʼusi chkale›, xi li Jeovae».*+ 22 Jech oxal, maʼuk senyail sventa jchʼunolajeletik li jeltos kʼopetike, moʼoj, jaʼ sventa li buchʼutik maʼuk jchʼunolajeletike,+ jaʼ yuʼun maʼuk sventa buchʼutik maʼuk jchʼunolajel li albil kʼope, jaʼ sventa li jchʼunolajeletike. 23 Jaʼ yuʼun, mi jmoj tstsob sba skotolik li buchʼutik te ta tsobobbaile xchiʼuk mi snaʼ xkʼopojik ta yan kʼopetik skotolike, pe ti te ch-och batel buchʼuuk noʼox krixchanoal o ti ch-och batel li buchʼutik maʼuk jchʼunolajeletike, ¿mi mu tauk van xalik ti likem achuvajike? 24 Pe mi akotolik yakal chavalik albil kʼop kʼalal jaʼo ch-och batel li buchʼu maʼuk jchʼunolajele o buchʼuuk noʼox krixchanoale, yakal chichʼ tukʼibtasel chaʼi sba xchiʼuk chkʼelbat lek skʼoplal chaʼi sba avuʼunik. 25 Vaʼun, chvinaj skʼoplal li kʼusi mukul ta yoʼontone, jaʼ yuʼun tspatan sba xchiʼuk chichʼ ta mukʼ Dios, xi chale: «Te oy ta atojolalik ta melel li Diose».+

26 ¿Kʼusi skʼan pasel un, ermanoetik? Kʼalal chatsob abaike, li june tskʼejinta salmo, li june chchanubtasvan, li june oy kʼusi ch-akʼbat snaʼ, li june chkʼopoj ta yan kʼop, li june oy kʼusi ch-akʼbat sjelubtas.+ Pasik skotol sventa stsatsub-o yoʼonton li yantike. 27 Mi oy buchʼu chkʼopoj ta yan kʼope, chaʼvoʼ o oxvoʼuk noʼox akʼo kʼopojikuk xchiʼuk akʼo sjelilan sbaik; jech xtok, oyuk buchʼu sjelubtas ta yan kʼop.+ 28 Pe mi muʼyuk jelubtasej kʼope, mu me kʼusi xal li ta tsobobbaile, ta yoʼontonuk noʼox akʼo skʼopon Dios. 29 Akʼo kʼopojuk chaʼvoʼ o oxvoʼ noʼox j-alkʼopetik,+ li yantike akʼo tojobuk ta yaʼibel smelolal. 30 Pe mi oy buchʼu oy kʼusi ch-akʼbat snaʼ kʼalal jaʼo te chotole, akʼo tsʼijiuk li buchʼu baʼyel kʼopoje. 31 Yuʼun ta jujuntal xuʼ xavalik albil kʼop akotolik sventa xuʼ xachan akotolik xchiʼuk xuʼ xata spatobil avoʼonton akotolik.+ 32 Li matanaletik yuʼun chʼul espiritu akʼbil j-alkʼopetike skʼan me lekuk stunesik li j-alkʼopetike. 33 Li Diose jaʼ jun Dios ti chakʼ jun oʼontonale xchiʼuk xchapet lek tspas skotol li kʼusitike.+

Jech kʼuchaʼal skotol li tsobobbailetik yuʼun li buchʼutik chʼule, 34 akʼo tsʼijiikuk ta tsobobbail li antsetike, yuʼun mu stakʼ xkʼopojik.+ Ti kʼusie, skʼan xakʼ sbaik ta ventainel+ jech kʼuchaʼal chal li Mantal eke. 35 Mi tskʼan oy kʼusi chchanike, akʼo sjakʼbe smalalik ta snaik, yuʼun kʼexlal sba kʼalal chkʼopoj ta tsobobbail li antse.

36 ¿Mi jaʼ te lik talel ta atojolalik li skʼop Diose o mi jaʼ noʼox te kʼot ta atojolalik?

37 Mi oy buchʼu tsnop ti jaʼ jun j-alkʼope o ti tsnop ti staoj chʼul espiritue, skʼan me xakʼ venta ti jaʼ smantal Kajvaltik li kʼusi ta jtsʼibaboxuk tale. 38 Li buchʼu mu stsak ta venta taje, muʼyuk chichʼ tsakel ta venta ek.* 39 Jech oxal, kuni ermanotak, akʼik-o me batel persa sventa xavalik batel li albil kʼope,+ pe mu me xapajesik li buchʼu chkʼopoj ta yan kʼope.+ 40 Pe oyuk me smelolal skotol li kʼusitik chapasike xchiʼuk lekuk me xchapet avuʼunik skotol.+

15 Jaʼ yuʼun, kermanotak, ta jvules ta ajolik li lekil aʼyejetik la jcholboxuke,+ ti la achʼamike xchiʼuk ti jaʼ lek tukʼ-o oyoxuke. 2 Yakal chata akolebalik ek mi staoj-o yav chachʼunik li lekil aʼyejetik la jcholboxuke, pe muʼyuk me sbalil mi jecheʼ noʼox lakʼotik ta jchʼunolajele.

3 Yuʼun jaʼ baʼyel laj kalboxuk li kʼusi laj kichʼ albele, ti cham ta skoj jmultik li Kristo jech kʼuchaʼal chal li Tsʼibetike,+ 4 ti laj yichʼ mukele,+ jech, ti laj yichʼ chaʼkuxesel+ ta yoxibal kʼakʼal+ jech kʼuchaʼal chal li Tsʼibetike,+ 5 ti laj yakʼ sba ta ilel ta stojolal Sefase,*+ laje laj yakʼ sba ta ilel ta stojolal li 12 ta voʼe.+ 6 Jun velta xtoke, laj yakʼ sba ta ilel ta stojolal mas ta voʼob sien ermanoetik;+ akʼo mi oy xa buchʼutik vayemik ta lajelal, ep to li buchʼutik liʼ jchiʼinojtike. 7 Laje, laj yakʼ sba ta ilel ta stojolal Santiago,+ laje ta skotol jtakboletik;+ 8 pe ta slajebale, laj yakʼ sba ta ilel ta jtojolal ek,+ ta skoj taje, xikoʼolaj kʼuchaʼal li buchʼu muʼyuk staoj yual vokʼe.

9 Voʼon li buchʼu mas bikʼit ta skotol li jtakboletike xchiʼuk mu jta-o ti jtakbol chkichʼ albele, yuʼun la jkontrainbe li stsobobbail Diose.+ 10 Ti kʼusi jtaoje jaʼ koliyal li slekil yutsil yoʼonton Diose. Pe mu jecheʼuk noʼox li slekil yutsil yoʼonton jtaoje, yuʼun voʼon mas li-abtej kʼuchaʼal li yantike, pe maʼuk voʼon, jaʼ li slekil yutsil yoʼonton Dios oy ta jtojolale. 11 Akʼo mi voʼon o mi jaʼ stukik ti kʼu yelan la jcholkutike, jaʼ jech la achʼunik.

12 Jaʼ yuʼun, mi yakal chichʼ cholbel skʼoplal ti laj yichʼ chaʼkuxesel li Kristoe,+ ¿kʼu yuʼun oy buchʼu chal avuʼunik ti muʼyuk chichʼ chaʼkuxesel li animaetike? 13 Ta melel, ti chʼabaluk bu chichʼ chaʼkuxesel li animaetike, xkoʼolaj kʼuchaʼal muʼyuk yichʼoj chaʼkuxesel li Kristo eke. 14 Pe mi muʼyuk bu yichʼoj chaʼkuxesel li Kristoe, muʼyuk sbalil ta melel ti ta jcholtik mantale xchiʼuk muʼyuk sbalil xtok li xchʼunel avoʼontonike. 15 Jech xtok, mi muʼyuk bu chichʼik chaʼkuxesel ta melel li animaetike, muʼyuk bu la xchaʼkuxes Kristo li Diose, mi jeche xkoʼolaj kʼuchaʼal yakal ta jutik kʼop* ta sventa Dios+ kʼalal chkaltik ti la xchaʼkuxes li Kristoe.+ 16 Yuʼun mi muʼyuk chichʼ chaʼkuxesel li animaetike, muʼyuk bu yichʼoj chaʼkuxesel li Kristo eke. 17 Jech xtok, mi muʼyuk bu yichʼoj chaʼkuxesel li Kristoe, muʼyuk sbalil li xchʼunel avoʼontonike; oy-o amulik.+ 18 Lajem xa-o skʼoplalik ek li buchʼutik vayemik xa ta lajelal ti jmoj oyik xchiʼuk Kristoe.+ 19 Mi jaʼ noʼox jmalaojtik Kristo li ta jkuxlejaltik liʼe, voʼotik mas abol jbatik kʼuchaʼal li yantike.

20 Pe laj xa yichʼ chaʼkuxesel li Kristoe, jaʼ sba sat tsʼunobil kʼotem ta sventa li buchʼutik vayemik xa ta lajelale.+ 21 Ta skoj ti ta jun noʼox vinik och talel li lajelale,+ jaʼ jech ta stojolal jun noʼox vinik tstaik chaʼkuxesel li animaetike.+ 22 Jech kʼuchaʼal ta skoj Adan yakal chcham skotol li krixchanoetike,+ jaʼ jech ta skoj Kristo tsta xkuxlejal skotolik yan velta.+ 23 Pe xkechet chchaʼkuxiik talel: jaʼ sba sat tsʼunobil li Kristoe,+ laje jaʼ li buchʼutik yuʼun Kristo kʼalal mi liʼ xa oye.+ 24 Vaʼun, chtal li slajebe, jaʼo kʼalal chakʼbe li Ajvalilal* ta skʼob Sdios xchiʼuk ti jaʼ Stote xchiʼuk kʼalal mi slajesoj xa ox skotol li ajvaliletike, li buchʼutik oy yabtelike xchiʼuk li buchʼutik oy sjuʼelike.+ 25 Yuʼun ch-ajvalilaj to batel kʼuchaʼal ajvalil jaʼ to mi akʼbat xa ox xpechʼ ta tekʼel yuʼun Dios skotol li yajkontratake.+ 26 Li slajeb jkontrainvanej ti chichʼ lajesele jaʼ li lajelale.+ 27 Yuʼun li Diose «laj yakʼbe ta yok skʼob skotol li kʼusitike».+ Pe kʼalal ‹akʼbil ta yok skʼob skotol li kʼusitik›+ xie, jamal xvinaj ti muʼyuk te tsakal skʼoplal li buchʼu akʼbat ta yok skʼob skotole.+ 28 Pe mi akʼbat xa ox ta yok skʼob skotol li kʼusitike, li Nichʼonil eke chakʼ sba ta ventainel ta stojolal li buchʼu akʼbat ta yok skʼob skotol li kʼusitike+ sventa stuk xa noʼox chkʼot ta Ajvalil ta skotol kʼusitik li Diose.+

29 Jaʼ yuʼun, ¿kʼusi stu mi jaʼ noʼox sventa chchamik li buchʼutik chichʼik voʼe?+ Yuʼun mi muʼyuk chichʼik chaʼkuxesel li buchʼutik chamemik xae, ¿kʼu yuʼun chichʼik voʼ ek sventa teuk tsakal skʼoplalik xchiʼuk li buchʼutik muʼyuk tstaik chaʼkuxesele? 30 Jaʼ yuʼun, ¿kʼu yuʼun ti chkakʼ ta vokol jkuxlejaltik skotol orae chaʼa?+ 31 Jutuk xa mu chicham jujun kʼakʼal. Ermanoetik, melel xkal jech kʼuchaʼal ti melel ti ximuyubaj ta atojolalik ti jaʼoxuk yajtsʼaklom Kristo Jesus ti jaʼ Kajvaltike. 32 Mi jpasoj kʼop xchiʼuk jtiʼvanej chonbolometik ta Efeso+ jech kʼuchaʼal tspas li yantike,* ¿mi oy van sbalil ti jech la jpase? Mi muʼyuk chichʼik chaʼkuxesel li animaetike, «veʼkutik, uchʼbolajkutik, yuʼun chijcham okʼom».+ 33 Mu me xavakʼ abaik ta loʼlael. Tsokes jlekil talelaltik li xchiʼinel chopol krixchanoetike.+ 34 Taluk xa achʼulelik sventa xapasik li kʼusi tukʼe xchiʼuk mu xa xapasik li mulile, yuʼun mu xojtikinik Dios li yantike. Jaʼ sventa chkakʼoxuk ta kʼexlal ti jech chkalboxuke.

35 Jaʼ yuʼun, oy van buchʼu xuʼ xi chale: «¿Kʼu yelan chichʼ chaʼkuxesel li animaetike? Jech, ¿kʼu van yelan sbekʼtal chtalik?».+ 36 ¡Bol vinik! Mi muʼyuk baʼyel chcham li kʼusi chatsʼune, mu stakʼ xkuxi yan velta; 37 li voʼote maʼuk chatsʼun li kʼusi chʼiem xae, jaʼ chatsʼun li sbekʼ tsʼunobile manchuk mi sbekʼ trigo o yantik sbekʼ tsʼunobil. 38 Pe laj yakʼ chʼiuk Dios jech kʼuchaʼal lek laj yile, vaʼun chchʼi li jujupʼej sbekʼ tsʼunobile, pe jelel xa li kʼusi chchʼi tale, maʼuk xa li sbekʼ tsʼunobile. 39 Maʼuk noʼox jtos bekʼtalil oy, yuʼun jtos-o li sbekʼtal krixchanoetike, jtos-o li sbekʼtal vakaxe, jtos-o li sbekʼtal mutetike xchiʼuk jtos-o li sbekʼtal choyetike. 40 Oy kʼusitik ta vinajel+ xchiʼuk oy kʼusitik ta balumil;+ jtos-o slekilal li kʼusitik ta vinajele xchiʼuk jtos-o slekilal li kʼusitik ta balumile. 41 Jtos-o slekilal li kʼakʼale, jtos-o slekilal li lunae,*+ jtos-o slekilal li kʼanaletike; jech xtok, jelel slekilalik ta jujupʼej ek li kʼanaletike.

42 Jaʼ jech ta sventa li chaʼkuxesel eke. Li bekʼtalil ti chchame chkʼaʼ, pe mu snaʼ xkʼaʼ li bekʼtalil ti chichʼ chaʼkuxesele.+ 43 Muʼyuk ichʼbil ta mukʼ kʼalal chichʼ mukele, pe oy xa smukʼulal kʼalal chchaʼkuxie.+ Kʼun kʼalal chichʼ mukele, pe oy xa sjuʼel kʼalal chchaʼkuxie.+ 44 Bekʼtalil kʼalal chichʼ mukele, kʼalal chchaʼkuxi tale, jaʼ xa kuxlejal ta vinajel. Mi oy bekʼtalile, oy xtok li kuxlejal ta vinajele. 45 Jaʼ yuʼun, xi tsʼibabile: «Li baʼyel vinik Adane jech lik kuxiuk».+ Pe li slajeb Adane kʼot ta jun j-akʼkuxlejal ta vinajel.+ 46 Jaʼ yuʼun, maʼuk baʼyel li kuxlejal ta vinajele. Jaʼ baʼyel li bekʼtalile, jaʼ tsʼakal li kuxlejal ta vinajele. 47 Li baʼyel vinike liʼ likem ta balumile, pasbil ta pukuk;*+ li xchaʼvoʼal vinike likem tal ta vinajel.+ 48 Li krixchanoetik ta balumile jaʼ jechik kʼuchaʼal li buchʼu pasat ta pukuk* yuʼun li Diose. Li kuxlejaletik ta vinajele jaʼ jechik kʼuchaʼal li buchʼu lik talel ta vinajele.+ 49 Jech kʼuchaʼal kichʼojbetik slokʼol li buchʼu pasbil ta pukuke,*+ jaʼ jech chkichʼbetik slokʼol ek li buchʼu talem ta vinajele.+

50 Pe xi chkalboxuke, kermanotak: mu xuʼ xuʼunin Ajvalilal yuʼun Dios li bekʼtalile xchiʼuk li chʼichʼe, jech xtok, mu xuʼ xuʼunin kʼusi mu snaʼ xkʼaʼ li kʼusi snaʼ xkʼaʼe. 51 ¡Kʼelavilik! Chkalboxuk li kʼusi chʼul ti mukul skʼoplale: mu jkotoltikuk chijvay ta lajelal, pe jkotoltik chkichʼtik jelel+ 52 ta anil, ta jvikʼel ta jmutsʼel noʼox jsatik, jaʼo kʼalal chichʼ jupanel li slajeb okʼese. Yuʼun chichʼ jupanel li okʼese,+ vaʼun chchaʼkuxiik tal li buchʼutik muʼyuk xa bu chkʼaʼike xchiʼuk chkichʼtik jelel li voʼotike. 53 Yuʼun li kʼusi snaʼ xkʼaʼe chkʼot jech kʼuchaʼal li kʼusi mu snaʼ xkʼaʼe,+ li kʼusi snaʼ xchame chkʼot jech kʼuchaʼal li kʼusi mu snaʼ xchame.+ 54 Kʼalal mi mu xa ox snaʼ xkʼaʼ li kʼusi snaʼ xkʼaʼe xchiʼuk kʼalal mi mu xa ox snaʼ xcham li kʼusi snaʼ xchame, chkʼot ta pasel li kʼusi xi tsʼibabile: «Chichʼ bikʼel-o sbatel osil li lajelale».+ 55 «¿Bu oy li atsatsale, lajelal? ¿Bu oy li avenenoale, lajelal?».+ 56 Li veneno ti chakʼ lajelale jaʼ li mulile,+ li juʼelal sventa mulile jaʼ li Mantale.+ 57 ¡Pe koliyal Dios, yuʼun jaʼ chakʼ jtsatsaltik ta stojolal li Kajvaltik Jesukristoe!+

58 Jaʼ yuʼun, kuni kʼanbil ermanotak, junuk-o me avavilik,+ te me oyanik-o, oyuk-o me ep kʼusi chapasik ta sventa li yabtel Kajvaltike,+ yuʼun xanaʼik ti mu jecheʼuk li avabtelik+ ta stojolal Kajvaltike.

16 Jaʼ yuʼun, li stsobel takʼin sventa li buchʼutik chʼule+ xuʼ jech xapasik jech kʼuchaʼal laj kalbe li tsobobbailetik ta Galasiae. 2 Li ta sba kʼakʼal ta jujun xemanae, ta jujuntal parte xavakʼik ti kʼu yepal xuʼ avuʼunike sventa mu jaʼuk to xatsobik takʼin mi likʼote. 3 Pe mi te xa ox oyun ti bu oyoxuke, ta jtak batel ta Jerusalen jayvoʼuk viniketik ti lek laj avalbeik skʼoplal li ta akartaike+ sventa xichʼik batel li matanaletik laj avakʼik ta slekil avoʼontonike. 4 Pe mi persa skʼan xibat eke, chchiʼinikun batel.

5 Jaʼo chbat jkʼeloxuk mi li-echʼ xa ox ta Masedoniae, yuʼun chi-echʼ ta Masedonia;+ 6 yikʼaluk te chikom o xuʼ van te jmoj x-echʼ kuʼuntik invierno* sventa xachiʼinikun batel jtuchʼuk be ti bu chibate. 7 Yuʼun mu jkʼan ti j-echʼelbe noʼox ch-echʼ jkʼeloxuke, yuʼun oy ta koʼonton te chikom jayibuk kʼakʼal+ mi jech tskʼan Jeovae.* 8 Pe te to chikom ta Efeso+ kʼalal to ta Skʼinal Pentekostes; 9 yuʼun laj kichʼ jambel jun mukʼta tiʼ na ti ch-ikʼvan batel ta spasel abtelaletike,+ pe oy ep buchʼutik chkontrainvanik.

10 Vaʼun, mi kʼot li Timoteoe,+ kʼelik me lek ti mu me kʼusi xiʼo kʼalal te achiʼukike, yuʼun yakal tspasbe yabtel Jeova*+ jech kʼuchaʼal voʼone. 11 Jaʼ yuʼun, mu me buchʼu spʼaj avuʼunik. Junuk avoʼontonik xatakik talel sventa xtal ti bu oyune, yuʼun liʼ yakal ta jmalakutik xchiʼuk yan ermanoetike.

12 Li kermanotik Apolose+ la jtijbe tajek yoʼonton ti akʼo batuk ek mi bat skʼeloxuk li ermanoetike. Muʼyuk to ta yoʼonton chbat skʼeloxuk; pe chbat onoʼox kʼalal mi xuʼ xa ox yuʼune.

13 Vikʼiluk-o me asatik,+ tsotsuk-o me xchʼunel avoʼontonik,+ vinik me xapas abaik+ xchiʼuk tsotsuk me xapas abaik.*+ 14 Ta kʼanelaluk me xapasik skotol li kʼusitike.+

15 Jaʼ yuʼun, chkalboxuk avaʼiik, kermanotak: xanaʼik lek ti jaʼ kʼotemik ta sba sat tsʼunobil ta Akaya li buchʼutik te oy ta sna Estefanase xchiʼuk laj yakʼ ta yoʼonton chtunik ta stojolal li buchʼutik chʼule. 16 Jechuk-o me xachʼunbeik smantal ek li buchʼutik jechik kʼuchaʼal li buchʼutik te oy ta sna Estefanase xchiʼuk li buchʼutik jmoj chkoltavanik xchiʼuk ti tsots ch-abtejike.+ 17 Pe ximuyubaj ti liʼ oy li Estefanase,+ li Fortunatoe xchiʼuk li Akaikoe, yuʼun jaʼ kʼotem ta akʼexolik ti muʼyuk bu liʼ oyoxuke. 18 Yuʼun siket noʼox koʼonton yuʼunik xchiʼuk jech siket noʼox avoʼontonik yuʼunik ek. Jaʼ yuʼun, tsakik me ta venta li viniketik taje.

19 Chabanukoxuk la chal li tsobobbailetik ta Asiae. Li Akila, li Priska* xchiʼuk li tsobobbail te oy ta snaike+ ta sjunul yoʼontonik ta sventa Kajvaltik chabanukoxuk la chalik ek. 20 Chabanukoxuk la chalboxuk ek skotol li ermanoetike. Ta chʼul tsʼutsʼeluk* me xakʼopon abaik ta jujuntal.

21 Voʼon Pabloun, chabanukoxuk, voʼon la jtsʼiba ta jkʼob jtuk ti jech chkalboxuke.

22 Akʼo yichʼ chopol kʼoptael li buchʼu mu skʼan Kajvaltike. ¡Kajvalkutik, laʼ me! 23 Teuk oy ta atojolalik li slekil yutsil yoʼonton Kajvaltik Jesuse. 24 Teuk oy ta atojolalik li kʼanelal kuʼune xchiʼuk li kʼanelal yuʼun Kristo Jesuse.