SVENTA GALATAS

1 Voʼon Pabloun, ti jaʼ jtakbolune maʼuk ta skoj krixchanoetik mi jaʼuk ta skoj jun vinik, yuʼun jaʼ ta skoj Jesukristo+ xchiʼuk li Jtotik Dios+ ti jaʼ la xchaʼkuxes li Kristoe. 2 Jech, voʼon Pablo xchiʼuk skotol li ermanoetik ti liʼ oy jchiʼuke xi ta jtsʼibaboxuk talel voʼoxuk ti te oyoxuk ta tsobobbailetik ta Galasiae:

3 Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe. 4 Ti jaʼ laj yakʼ sba stuk ta skoj jmultik+ sventa skoltautik lokʼel ta skotol li kʼusitik chopol oy ta balumil+ avi* jech kʼuchaʼal tskʼan yoʼonton Dios ti jaʼ Totile,+ 5 jaʼuk noʼox stuk akʼo yichʼ ichʼel-o ta mukʼ sbatel osil. Jechuk.

6 Chʼayal tajek koʼonton chkaʼi ti chachʼak abaik ta anil* ta stojolal li buchʼu la stakoxuk ta ikʼel ta slekil yutsil yoʼonton Kristoe, ti jaʼ xa chavakʼ abaik ta stojolal yan lekil aʼyejetike.+ 7 Pe mu yuʼunuk oy yan lekil aʼyejetik, ti kʼusie, oy jayvoʼuk ti yakal chakʼ avokolike+ xchiʼuk tskʼan tsokesik li lekil aʼyejetik ta sventa li Kristoe. 8 Akʼo mi jech, manchuk mi voʼonkutik o mi jaʼ junuk anjel ta vinajel ti yan xa-o lekil aʼyejetik ta jcholkutik ti mu xkoʼolaj kʼuchaʼal li lekil aʼyejetik ti laj xa onoʼox jcholbotkutik akotolike, akʼo yichʼ chopol kʼoptael. 9 Chkalboxuk yan velta li kʼusi laj xa onoʼox kalkutik avaʼiike: buchʼuuk noʼox ti chal yan-o lekil aʼyejetik ti jelel kʼuchaʼal la achʼamike akʼo yichʼ chopol kʼoptael.

10 ¿Mi ta melel jaʼ yakal ta jsaʼ ti lekuk xilun li krixchanoetike o mi jaʼ li Diose? ¿O mi jaʼ noʼox van ta jkʼan ti lekuk xilun li krixchanoetike? Ti yuʼun yakaluk to ta jkʼan lek chilun li krixchanoetike, maʼuk smosoun Kristo ti jechuke. 11 Yuʼun oy ta koʼonton ti akʼo xanaʼike, kermanotak, ti maʼuk yuʼun krixchanoetik li lekil aʼyejetik la jcholboxuke;+ 12 yuʼun maʼuk jun krixchano laj yakʼbun xchiʼuk muʼyuk bu laj kichʼ chanubtasel, yuʼun ta stojolal Jesukristo li-akʼbat jnaʼ.

13 Ta melel, li voʼoxuke avaʼiojik ti kʼu toʼox yelan jtalelal kʼalal oyun toʼox ta srelijion judaetike,+ ti tsots tajek* la jkontrain li stsobobbail Diose xchiʼuk ti oy toʼox ta koʼonton ta jlajese,+ 14 voʼon x-echʼ to jelavemun li ta srelijion judaetike ti jaʼ mu sta li buchʼutik ep jmoj jabilal jchiʼuk ti jmoj jtsʼunbalkutike, yuʼun mas oy tajek ta koʼonton li kʼusitik nopem xaʼi tspasik jmoltotake.+ 15 Pe kʼalal la xchʼakun lokʼel ta yalajeb jmeʼ li Diose xchiʼuk ti la stakun ta ikʼel ta slekil yutsil yoʼontone,+ lek laj yil ti 16 voʼon la stunesun yoʼ xakʼ ta ilel li Xnichʼone sventa voʼon chkalbe batel lekil aʼyejetik li jyanlumetike.+ Ti jech la stʼujun sventa jpas taje muʼyuk bu la jsabe smelolal ta ora ta stojolal junuk krixchano. 17 Jech xtok, muʼyuk limuy batel ta Jerusalen ta stojolal li buchʼutik baʼyel xa onoʼox kʼotemik ta jtakboletik kʼalal maʼuk toʼox jtakbolune, jaʼ noʼox libat ta Arabia, laje lisut batel ta Damasko.+

18 Kʼalal echʼem xa ox oxib jabile, limuy batel ta Jerusalen+ sventa chbat jvulaʼan li Sefase,*+ vaʼun 15 kʼakʼal te likom xchiʼuk. 19 Pe muʼyuk bu laj kil junuk li yantik jtakboletike, jaʼ noʼox laj kil li Santiago+ ti jaʼ yitsʼin li Kajvaltike. 20 Vaʼun chaʼa, ta sventa li kʼusitik ta jtsʼibaboxuk talele muʼyuk bu yakal ta jut kʼop,* jamal chkalboxuk ta stojolal Dios.

21 Kʼalal laj xa ox taje, li-och batel ta yosilal Siria xchiʼuk Silisia.+ 22 Li tsobobbailetik ta Judea ti jmoj oyik xchiʼuk Kristoe mi jsetʼuk* xojtikinikun. 23 Jaʼ noʼox nopem xaʼiik ti xi chaʼiike: «Li vinik ti tsnutsutik toʼoxe+ avie yakal xa chcholbe skʼoplal li lekil aʼyejetik ta sventa li xchʼunel oʼontonal ti tskʼan toʼox tslajese».+ 24 Jaʼ yuʼun, lik stoybeik skʼoplal Dios ta jkoj.

2 Vaʼun, limuy batel yan velta ta Jerusalen xchiʼuk Bernabe+ kʼalal echʼ xa ox 14 jabile, laj kikʼ batel ek li Titoe.+ 2 Limuy batel ta skoj ti oy kʼusi li-akʼbat kile xchiʼuk laj kakʼbe snaʼik li lekil aʼyejetik ti yakal ta jchol batel ta stojolal jyanlumetike. Taje ta jun bikʼit tsobajel laj yichʼ pasel xchiʼuk li buchʼutik tsots skʼoplalike sventa chkakʼ lek venta ti muʼyuk bu ta jecheʼ noʼox yakalun ta anil o ti ta jecheʼ noʼox li-anilaje. 3 Akʼo mi jech, mi jaʼuk bu laj yichʼ sujel sventa xichʼ sirkunsision*+ ek li Tito+ ti te jchiʼuke akʼo mi jaʼ jgresia vinik. 4 Pe taje jaʼ lik-o kʼop ta skoj li buchʼutik ermanoetik ta alel ti nakʼal* ochike,+ ti mu xvinaj kʼu yelan ochik sventa tspaʼiik* ti kʼu yelan ta jkʼupinkutik li jkolebalkutik+ ti jmoj oyunkutik xchiʼuk Kristo Jesuse, yuʼun tskʼan tsmosoinunkutik ta jyalel;+ 5 pe mi jutebuk* bu laj kakʼ jbakutik ta ventainel ta stojolalik+ sventa teuk-o ta atojolalik li kʼusi melel ta sventa li lekil aʼyejetike.

6 Pe li buchʼutik tsots skʼoplalik yilele+ —mu jventa-o kʼu toʼox yelan nopem xaʼi tspas sbaik, maʼuk tskʼel kʼu yelan spat xokon krixchanoetik li Diose—, li viniketik taje ti tsots tajek skʼoplalike muʼyuk kʼusi achʼ laj yakʼbeikun jchan. 7 Ti kʼusi noʼox la spasike jaʼ ti kʼalal laj yakʼik venta ti voʼon kʼubanbilun li lekil aʼyejetik ta sventa li buchʼutik muʼyuk yichʼojik sirkunsision+ jech kʼuchaʼal ti jaʼ kʼubanbil Pedro ek ta sventa li buchʼutik yichʼojik sirkunsisione 8 —yuʼun li buchʼu laj yakʼbe sjuʼel Pedro sventa xkʼot ta jtakbol ta stojolal li buchʼutik yichʼojik sirkunsisione jaʼ laj yakʼbun juʼel ek ta stojolal li jyanlumetike—+ 9 xchiʼuk ti kʼalal laj yilik li slekil yutsil oʼontonal akʼbilune,+ li Santiago,+ Sefas* xchiʼuk Juan ti jech ilbilik kʼuchaʼal yoyal tsobobbaile laj yakʼbunkutik sbatsʼikʼobik li voʼon xchiʼuk Bernabe+ ti jaʼ svinajeb ti jmoj kʼusi oy ta koʼontonkutike sventa voʼonkutik xbat jkʼelkutik li jyanlumetike, ti jaʼ xbat skʼelik buchʼutik yichʼoj sirkunsision li stukike. 10 Jaʼ noʼox laj yalbunkutik ti teuk ta jolkutik li povreetike, jech oxal kakʼojbe tajek yipal spasel taj eke.+

11 Pe ta sat laj kalbe mantal* Sefas*+ kʼalal tal ta Antiokiae,+ yuʼun lek jamal ta kʼelel ti mu jechuk li kʼusi tspase.* 12 Yuʼun nopem toʼox xaʼi jmoj chveʼ xchiʼuk jyanlumetik+ kʼalal skʼan toʼox xvulik li viniketik ti takbilik talel yuʼun Santiagoe;+ pe mu xa jechuk la spas kʼalal vulik li viniketike xchiʼuk la xchʼak sba lokʼel, yuʼun chiʼta li buchʼutik yichʼoj sirkunsisione.+ 13 Jaʼ jech loʼlavanik ek li yan judaetike, kʼalal ta Bernabe la xchan yuʼunik ek ti kʼu yelan loʼlavanike. 14 Jaʼ yuʼun, kʼalal laj kakʼ venta ti maʼuk jech tspasik jech kʼuchaʼal li kʼusi melel ta sventa li lekil aʼyejetike,+ xi laj kalbe Sefas* ta sat skotolike: «Akʼo mi judaot, jech akuxlejal jech kʼuchaʼal jyanlumetik, maʼuk jech akuxlejal jech kʼuchaʼal li judaetike, ¿kʼuxi ti chasuj jyanlumetik ti akʼo jechuk xkuxlejalik jech kʼuchaʼal nopem xaʼi tspas li judaetike?».+

15 Voʼotik ti judautik onoʼox lijvokʼe xchiʼuk ti maʼuk jpasmulilutik ta stojolal jyanlumetike 16 jnaʼojtik ti maʼuk tukʼ xa chichʼ albel skʼoplal li jun krixchano ta skoj ti tspas li kʼusi chal mantale, jaʼ noʼox ta sventa li xchʼunel yoʼonton+ ta stojolal Jesukristoe.+ Jaʼ yuʼun, kakʼoj xchʼunel koʼontontik ta stojolal Kristo Jesus ek sventa tukʼ chkichʼtik albel jkʼoplaltik ta sventa li xchʼunel koʼontontik ta stojolal Kristoe, maʼuk ti tukʼ chij-albat jkʼoplaltik ta skoj ti ta jpastik li kʼusi chal mantale, yuʼun mi junuk buchʼu ti tukʼ xa chichʼ albel skʼoplal ta skoj li buchʼu tspas li kʼusi chal mantale.+ 17 Pe mi lijtabat jmultik ek kʼalal jaʼo tukʼ chkichʼ albel jkʼoplaltik ta sventa Kristoe, ¿mi jaʼ van skʼan xal ti tstij koʼontontik Kristo ti akʼo jpas jmultike? ¡Moʼoj ta melel! 18 Mi ta jchaʼvaʼan li kʼusi la jines ta voʼnee, jaʼ skʼan xal ti jpasmulilune. 19 Chamemun ta stojolal li mantale.+ Pe ti jech kʼot ta pasele jaʼ sventa xikuxi yoʼ xitun ta stojolal Dios. 20 Bajalun ta jtel teʼ xchiʼuk Kristo li avie.+ Maʼuk xa voʼon ti kuxulune,+ maʼuk, jaʼ xa Kristo ti kuxul ta jtojolale. Ta melel, jech kuxulun avi jech kʼuchaʼal jun krixchano ti oy xchʼunel yoʼonton ta stojolal li Xnichʼon Dios+ ti jaʼ li buchʼu la skʼanun xchiʼuk ti laj yakʼ sba ta jtojolale.+ 21 Muʼyuk bu ta jpʼajbe li slekil yutsil yoʼonton Diose;+ ti jaʼuk te chichʼ tael tukʼilal ta skoj ti chichʼ chʼunel mantale, jecheʼ noʼox cham ta melel jechuk li Kristoe.+

3 ¡Muʼyuk apʼijilik, jgalasiaetik! Akʼo mi jamal laj avaʼibeik smelolal ti laj yichʼ bajel ta jtel teʼ li Jesukristoe,+ ¿buchʼu xa noʼox ti la sloʼlaoxuke?+ 2 Jaʼ noʼox oy ta koʼonton ta jakʼboxuk liʼe: ¿mi jaʼ ta skoj ti la apasik li kʼusi chal mantal ti laj avichʼik li chʼul espiritue o mi jaʼ ta skoj ti laj avakʼ xchʼunel avoʼontonik ta skoj li kʼusi laj avaʼiike?+ 3 ¿Mi yuʼun solel muʼyuk apʼijilik? Yuʼun mi yakal xa chapasik li kʼusi tskʼan xchʼul espiritu Diose, ¿kʼu yuʼun ti jaʼ xa chlik apasik li kʼusi tskʼan bekʼete?+ 4 ¿Mi ta jech noʼox ep laj avil avokolik? Jnaʼoj ta melel ti mu jecheʼuk laj avil avokolike. 5 Jaʼ yuʼun, li buchʼu chakʼboxuk chʼul espiritu xchiʼuk ti tspas tsatsal skʼelobil juʼelal+ ta atojolalike, ¿mi jaʼ ta skoj ti chapasik li kʼusi chal mantale o mi jaʼ ta skoj ti oy xchʼunel avoʼontonik ta skoj li kʼusi laj avaʼiike? 6 Jech kʼuchaʼal la spas li Abraane, laj «laj yakʼ xchʼunel yoʼonton ta stojolal Jeova,* jaʼ yuʼun laj yichʼ alel ti tukʼ skʼoplale».+

7 Anaʼojik ta melel ti jaʼ noʼox xnichʼnab Abraan+ li buchʼutik oy xchʼunel yoʼontonike. 8 Jaʼ yuʼun, li Tsʼibetike snaʼoj xa onoʼox ti ta xchʼunel oʼontonal tukʼ ch-albat skʼoplal yuʼun Dios li jyanlumetike, jech oxal baʼyel xa onoʼox albat lekil aʼyejetik li Abraane, xi albate: «Tstaik bendision skotol lumetik ta atojolal».+ 9 Jaʼ yuʼun, li buchʼutik oy xchʼunel yoʼontonike koʼol yakal chichʼik bendision xchiʼuk Abraan ti laj yakʼ xchʼunel yoʼontone.+

10 Skotol li buchʼu jaʼ noʼox tspasik li kʼusi chal mantale chopol kʼoptabil chkʼotik; yuʼun xi tsʼibabile: «Chopol kʼoptabil chkʼot skotol li buchʼu muʼyuk te oy-o ta stojolal Mantal ti tsʼibabil ta balbalvune xchiʼuk mi muʼyuk bu tspase».+ 11 Jech xtok, jamal xvinaj ti chʼabal buchʼu tukʼ ch-albat skʼoplal ta stojolal Dios+ ta skoj li mantale, yuʼun «li buchʼu tukʼe ta sventa xchʼunel yoʼonton chkuxi».+ 12 Jaʼ yuʼun, maʼuk ta xchʼunel oʼontonal likem tal li Mantale, moʼoj, yuʼun «li buchʼu chchʼun li kʼusi chal mantale jaʼ chkuxi-o».+ 13 La smanutik li Kristoe,+ la skoltautik lokʼel+ ta xchopolil li Mantale, jaʼ chopol kʼot skʼoplal ta jkojtik li Kristoe, yuʼun xi tsʼibabile: «Chopol kʼoptabil chkʼot skotol li buchʼu chichʼ jokʼanel ta jtel teʼe».+ 14 Ti jech kʼot ta pasele jaʼ sventa stabeik sbendision Abraan ta stojolal Kristo Jesus+ li jyanlumetike yoʼ ta skoj xchʼunel koʼontontik xuʼ jtatik li chʼul espiritu ti albil xa onoʼox skʼoplale.+

15 Kermanotak, ta jtunes jun lokʼolkʼop ti oy jech chkʼot ta jkuxlejaltike: akʼo mi ta jun noʼox krixchano oy sbalil chkʼot yuʼun li jun tratoe, muʼyuk buchʼu xuʼ chchʼaybe sbalil xchiʼuk muʼyuk buchʼu xuʼ chakʼbe xchiʼil li tratoe. 16 Jaʼ yuʼun, jaʼ laj yichʼ albel Abraan xchiʼuk snitilulal+ li kʼusi albil xa onoʼox skʼoplale. Mu xiuk chale: «Ta stojolal anitilulaltak», ti xkoʼolaj ep xa chalbe skʼoplal yaʼele. Moʼoj, xi chale: «Ta stojolal anitilulal», jaʼ noʼox jun chalbe skʼoplal ti jaʼ li Kristoe.+ 17 Xi chkal xtoke: echʼ 430 jabil,+ laje vul ta lokʼel li Mantale, pe muʼyuk bu tslajesbe skʼoplal li trato spasoj xa onoʼox Diose, jech xtok, muʼyuk tslajesbe sbalil li kʼusi albil xa onoʼox skʼoplale. 18 Yuʼun ti teuk likem tal ta mantal li jrextotike,* ti jechuke, li jrextotike maʼuk te likem tal ta sventa li kʼusi albil xa onoʼox skʼoplale; pe li Diose ta slekil yoʼonton laj yakʼbe xrexto Abraan ta sventa li kʼusi albil xa onoʼox skʼoplale.+

19 Jaʼ yuʼun, ¿kʼu yuʼun oy li Mantale chaʼa? Laj yichʼ akʼel sventa xakʼ ta ilel li muliletike+ jaʼ to mi vul ta lokʼel li nitilulal+ albil xa onoʼox skʼoplale; li mantal taje laj yal anjeletik+ ta stojolal jun jkʼopojel.+ 20 Jaʼ yuʼun, chʼabal jkʼopojel kʼalal jun noʼox krixchano te tsakal skʼoplale, jaʼ noʼox stuk Dios la spas. 21 Jaʼ yuʼun chaʼa, ¿mi skontrainoj kʼusitik yaloj Dios li Mantale? ¡Moʼoj ta melel! Yuʼun ti akʼbiluk junuk mantal ti xuʼ chakʼ kuxlejale, jechuke, ta stojolal mantal lokʼ talel li tukʼilale. 22 Pe li Tsʼibetike laj yakʼbe ta yok skʼob mulil skotol li kʼusitike, taje jaʼ sventa xichʼik li kʼusi albil onoʼox skʼoplal li buchʼutik oy xchʼunel yoʼontonike, yuʼun jaʼ noʼox xuʼ xichʼ tael ta skoj xchʼunel oʼontonal ta stojolal Jesukristo.

23 Pe kʼalal muʼyuk toʼox vulem li xchʼunel oʼontonale, smosoinojutik toʼox li mantale, akʼbilutik toʼox ta yok skʼob, yakal ta jmalatik li xchʼunel oʼontonal ti poʼot xa xtale.+ 24 Jech oxal, jaʼ kʼot ta jchabivanej* kuʼuntik li Mantal ti jaʼ la sbeiltasutik-o talel ta stojolal li Kristoe+ yoʼ tukʼ chkichʼ albel jkʼoplaltik ta skoj li xchʼunel koʼontontike.+ 25 Muʼyuk xa jchabivanej*+ kuʼuntik ta skoj ti vul xa ta lokʼel li xchʼunel oʼontonale.+

26 Ta melel, xnichʼnaboxuk Dios+ akotolik ta skoj li xchʼunel avoʼontonik ta stojolal li Kristo Jesuse.+ 27 Yuʼun akotolik ti buchʼu laj xa avichʼik voʼ ta stojolal li Kristoe jaʼ xa avichʼojbeik stalelal li Kristoe.+ 28 Chʼabal juda krixchano mi jaʼuk jgresia krixchano,+ chʼabal mosoil mi jaʼuk oy buchʼu kolem,+ chʼabal vinik mi jaʼuk ants;+ yuʼun jmoj oyoxuk akotolik jech kʼuchaʼal yajtsʼaklomoxuk Kristo Jesus.+ 29 Jech xtok, mi jaʼ yuʼunoxuk li Kristoe, jaʼ snitilulaloxuk ta melel li Abraane,+ chata arextoik*+ ta sventa li kʼusi albil xa onoʼox skʼoplale.+

4 Vaʼun chaʼa, chkalboxuk avaʼiik ti xkoʼolaj kʼuchaʼal mosoil kʼalal olol to li buchʼu chichʼ xrextoe* manchuk mi jaʼ yajval skotol li kʼusitike, 2 yuʼun ventainbil to yuʼun jchabivanejetik xchiʼuk ventainbil yuʼun li jchabinaetike, jaʼ to mi kʼot skʼakʼalil ti kʼusi ora yaloj li stote. 3 Jaʼ jechutik ek kʼalal ololutik toʼoxe, yuʼun mosoinbilutik toʼox yuʼun li snopben balumile.+ 4 Pe kʼalal tsuts skʼakʼalil ti kʼusi ora albile, li Diose la stak talel Xnichʼon ti vokʼ ta stojolal jun antse+ xchiʼuk ventainat yuʼun li mantale+ 5 sventa sman lokʼel li buchʼutik ventainbilik yuʼun mantale+ yoʼ xkichʼtik chʼamel kʼuchaʼal nichʼnabil.+

6 Vaʼun chaʼa, ta skoj ti nichʼnabiloxuke, li Diose la stak talel ta koʼontontik+ li xchʼul espiritu+ Xnichʼone, xi tsots chale: «¡Abba,* Tot!».+ 7 Jaʼ yuʼun, maʼuk xa mosoilot, nichʼonilot xa, vaʼun chata arexto* ek ta stojolal Dios mi nichʼonilot xae.+

8 Pe kʼalal mu toʼox xavojtikinik li Diose, mosoinbiloxuk toʼox yuʼun li buchʼutik maʼuk melel diosetike. 9 Pe avi ti laj xa avojtikinik li Diose o ti mas lek xkaltike, ti ojtikinbiloxuk xa yuʼun li Diose, ¿kʼuxi xa noʼox ti chasutik yan velta ta stojolal li kʼusitik kʼune+ xchiʼuk ta stojolal li snopben balumil ti toj chopole xchiʼuk ti chakʼan chakʼotik ta smoso yan veltae?+ 10 Yakal chachabiik ta jyalel li jujun kʼakʼale, li jujun ue,+ li yorailtake xchiʼuk li jujun jabile. 11 Chixiʼ mi jecheʼ noʼox laj kakʼ kipal ta atojolalike.

12 Ta jkʼanboxuk vokol, kermanotak: jech xapas abaik jech kʼuchaʼal voʼone, yuʼun jech toʼox la jpas jba jech kʼuchaʼal li voʼoxuke.+ Pe muʼyuk kʼusi chopol la apasbeikun. 13 Pe anaʼojik ti la jcholboxuk lekil aʼyejetik ta sba velta ta skoj ti ipun toʼoxe. 14 Akʼo mi kʼot kʼuchaʼal preva ta atojolalik ti li-ipaje, muʼyuk la alabanikun mi jaʼuk bu la apʼajikun;* ti kʼusi noʼoxe lek la achʼamikun jech kʼuchaʼal jun yaj-anjel Dios, jech kʼuchaʼal Kristo Jesus. 15 ¿Kʼu yuʼun ti muʼyuk xa bu xamuyubajike? Yuʼun laj kil jtuk ti oyuk kʼuxi xuʼ avuʼunike, chalokʼes sbekʼ asatik sventa xavakʼbeikun.+ 16 Jaʼ yuʼun, ¿mi lipas ta avajkontraik ti vaʼ yelan jamal chkalboxuke? 17 Oy tajek ta yoʼontonik ti akʼo lekuk xavilike —pe mu ta slekiluk yoʼontonik ti jech tspasike—, yuʼun oy ta yoʼontonik tsnamajesoxuk ta jtojolal sventa oyuk ta avoʼontonik ti jaʼuk xatsʼakliik batele. 18 Pe lek onoʼox tajek mi oy buchʼu chlokʼ ta yoʼonton tsaʼoxuk ta sventa alekilalike ti maʼuk noʼox tsaʼoxuk ti kʼalal te oyun ta atojolalike, 19 kuni nichʼnab,+ yakal chkaʼibe xkʼuxul alajel yan velta, jaʼ to mi vinaj li stalelal Kristo ta atojolalike. 20 Oy ta koʼonton ti teuk oyun ta atojolalik li avie sventa jeleluk kʼu yelan xuʼ jchiʼinoxuk ta loʼile, yuʼun chʼayal tajek koʼonton avuʼunik chkaʼi.

21 Albeikun kaʼi, voʼoxuk ti chakʼan tsventainoxuk li mantale, ¿mi yuʼun muʼyuk bu avaʼiojik li Mantale? 22 Jech kʼuchaʼal liʼe, tsʼibabil onoʼox ti oy chaʼvoʼ xnichʼon li Abraane, li june jaʼ yol kiara ants,+ li yane jaʼ yol kolemal ants;*+ 23 pe li yol kiara antse vokʼ kʼuchaʼal stalel onoʼox chvokʼ li ololetike;+ yan li yol kolemal antse* jaʼ ta sventa li kʼusi albil xa onoʼox skʼoplale.+ 24 Li kʼusitik taje xuʼ xichʼ tsakel kʼuchaʼal jun lokʼolkʼop; yuʼun jaʼ skʼan xal chaʼtos trato li antsetik taje. Li baʼyele, jaʼ li vits Sinai+ ti chil yalab sventa chkʼotik ta mosoile, taje jaʼ li Agare. 25 Vaʼun, li Agare jaʼ smelolal Sinai+ ti jaʼ jun vits ti te oy ta Arabiae, jaʼ skʼoplal li Jerusalen avie, yuʼun oyik ta mosoil xchiʼuk li yalabtake. 26 Pe kolem li Jerusalen ta akʼole xchiʼuk jaʼ jmeʼtik.

27 Yuʼun xi tsʼibabile: «Ants ti mu xanaʼ xa-alaje, kuxetuk avoʼonton; avanan ta muyubajel, ants ti mu xanaʼ kʼu yelan li xkʼuxul alajele; yuʼun jaʼ mas ep yalab li buchʼu iktabile, jaʼ mu sta li buchʼu oy smalale».+ 28 Jaʼ yuʼun, li voʼoxuke, kermanotak, xnichʼnaboxuk li kʼusi albile jech kʼuchaʼal li Isaake.+ 29 Jech kʼuchaʼal kʼot ta pasel ta voʼnee, li buchʼu vokʼem ta sventa noʼox bekʼet ti lik skontrain li buchʼu vokʼem ta sventa chʼul espiritue+ jaʼ jech chkʼot ta pasel li avi eke.+ 30 Pe ¿kʼusi chal li Tsʼibetike? «Nutso lokʼel xchiʼuk yol li kiarae, yuʼun li yol kiarae mu xuʼ xichʼ jutebuk xrexto* jech kʼuchaʼal chichʼ li yol kolemal antse».*+ 31 Jaʼ yuʼun, kermanotak, maʼuk yalabutik li kiarae, jaʼ yalabutik li kolemal antse.*

5 Ti jech lijkolutike jaʼ la skoltautik li Kristoe. Jech oxal, staojuk-o me yav avoʼontonik+ xchiʼuk mu me xatikʼ abaik ta mosoil yan velta.+

2 ¡Kʼelavilik! Voʼon Pabloun, chkalboxuk ti muʼyuk me stu chkʼot avuʼunik Kristo mi chavichʼik sirkunsisione.*+ 3 Jech xtok, chkal yan velta ti persa skʼan xchʼun skotol Mantal+ li buchʼu chichʼ sirkunsisione. 4 Voʼot ti chakʼan tukʼ xa akʼoplal ta stojolal li mantale+ chʼakalot xa ta stojolal li Kristoe, iktabilot xa yuʼun li slekil yutsil yoʼontone. 5 Yan li voʼotike ta sjunul koʼontontik yakal ta jmalatik ta sventa sjuʼel Dios ti tukʼ chijkʼot ta skoj li xchʼunel koʼontontike. 6 Yuʼun li buchʼutik jmoj xa oyik xchiʼuk li Kristoe muʼyuk xa sbalil mi yichʼojik sirkunsision o mi muʼyuk yichʼojik sirkunsision,+ yan li xchʼunel oʼontonale te chvinaj mi oy kʼanelale.

7 Lek toʼox yakal cha-anilajik.+ ¿Buchʼu la smakoxuk ta be ti mu xa xachʼunik li kʼusi melele? 8 Li chanubtasel taje maʼuk te likem tal ta stojolal li buchʼu la stakoxuk ta ikʼele. 9 Manchuk mi juteb noʼox li levadurae,* tspuk sba ta skotol li kʼusi votsʼbile.+ 10 Jpatoj koʼonton ti mu yanuk kʼusi chkʼot ta nopel avuʼunik li voʼoxuk ti jmoj oyoxuk xchiʼuk Kajvaltike;+ pe buchʼuuk noʼox ti yakal tsokes anopbenike+ jaʼ jech chichʼ chapanel ti kʼu yelan sta-oe. 11 Kermanotak, ti yakaluk to ta jcholbe skʼoplal li sirkunsisione, ¿mi chkichʼ to van kontrainel ti jechuke? Mi jaʼ jeche, li jtel teʼ sventa vokolil*+ ti chamak-o* avakanike lajem xa skʼoplal. 12 Ta jkʼan ti akʼo josbatikuk-o lokʼel skotol skʼunilik* jechuk li viniketik ti tsmakoxuk ta bee.

13 Laj avichʼik ikʼel sventa kolebal, kermanotak, pe mu me xatunesik ta sventa kʼusitik tskʼan abekʼtalik ti kolemoxuke,+ yuʼun ta skoj ti akʼanoj abaike, tunanik kʼuchaʼal amoso abaik.+ 14 Yuʼun xi kʼot ta pasel ta jun noʼox mantal skotol li Mantale: «Skʼan me xakʼan achiʼil jech kʼuchaʼal akʼanoj aba atuke».+ 15 Pe mi te noʼox xatiʼtiʼ abaik xchiʼuk mi te noʼox xatʼoltʼol abaike,+ kʼelo me abaik ti mu me xamil aba atukike.+

16 Pe chkalboxuk ti xanavanik-o ta stojolal li chʼul espiritue,+ vaʼun muʼyuk bu chapasik jtosuk li kʼusi tskʼan abekʼtalike.+ 17 Yuʼun li kʼusi tskʼan jbekʼtaltike skontrainoj li kʼusi tskʼan chʼul espiritue, li kʼusi tskʼan chʼul espiritue skontrainoj li kʼusi tskʼan jbekʼtaltike, skontrainoj sbaik; jaʼ yuʼun muʼyuk chapasik li kʼusitik oy ta avoʼontonike.+ 18 Jech xtok, mi yakal chavakʼ abaik ta beiltasel yuʼun li chʼul espiritue, muʼyuk bu oyoxuk ta stojolal li mantale.

19 Tana un, li yabtel jbekʼtaltike lek xvinaj xchiʼuk jaʼ liʼe: mulivajel,*+ kʼusitik ibal sba,* talelal toj kʼexlal sba,*+ 20 yichʼel ta mukʼ santoetik, espiritismo,*+ kontrainejbail, tsakbail ta kʼop, itʼixajel, skʼakʼal oʼontonal, mu jmojuk kʼusi chichʼ nopel, chʼakbail, xchʼunel kʼusi chakʼik ta chanel krixchanoetik, 21 xpichʼ oʼontael kʼusitik yuʼun yantik, yakubel,+ kʼinetik ti solel muʼyuk xa smelolale xchiʼuk yan kʼusitik kʼuchaʼal taje.+ Jaʼ jech ta jpʼijubtasoxuk ta sventa li kʼusitik taje jech kʼuchaʼal laj xa onoʼox jpʼijubtasoxuke, ti buchʼutik jech ta spasike muʼyuk me chuʼuninik li Ajvalilal* yuʼun Diose.+

22 Yan li talelaletik* chakʼ chʼul espiritue jaʼ liʼe: kʼanelal, kuxetel oʼontonal, jun oʼontonal, smalael, yutsil oʼontonal, slekil oʼontonal,+ xchʼunel oʼontonal, 23 manxoal xchiʼuk pajesejbail.+ Chʼabal mantal ti tskontrain li kʼusitik taje. 24 Jech xtok, li buchʼutik uʼuninbilik xa yuʼun Kristo Jesuse laj xa sbajik ta jtel teʼ li sbekʼtalike, ti te jokʼol cham ek li kʼusitik tskʼan tajek sbekʼtalik xchiʼuk yoʼontonike.+

25 Mi kuxulutik ta sventa li chʼul espiritue, tukʼ xanavkutik-o batel ek ta sventa li chʼul espiritue.+ 26 Mu me xbat ta koʼontontik ti chkalbe jba jkʼoplal jtuktike,+ mu me jlikesbetik skʼoplal tsalbail+ xchiʼuk mu me jpichʼ oʼontabetik kʼusitik oy yuʼun yantik.

6 Ermanoetik, mi muʼyuk to yakʼoj venta ti chʼay ta be li jun vinike, li voʼoxuk ti lek yijoxuk ta mantale ta slekil me avoʼontonik+ xatukʼibtasik li vinik taje. Pe kʼelo me aba lek atukik,+ yuʼun me yikʼaluk xavichʼik akʼel ta preva ek.+ 2 Jech-o me xakuchbe aba avikatsik ta jujuntal+ sventa jech chkʼot ta pasel avuʼunik li smantal Kristoe.+ 3 Yuʼun mi oy buchʼu tsnop ti tsots skʼoplal chaʼi sba akʼo mi muʼyuk bu tsots skʼoplale,+ yakal tsloʼla sba stuk. 4 Pe ta jujuntal kʼelo abaik ta skoj li kʼusi chapasike,+ vaʼun oy srasonal sventa xkuxet noʼox avoʼontonik atukik, maʼuk xamuyubajik ta skoj ti chakoʼoltas abaik xchiʼuk li yantike.+ 5 Yuʼun ta jujuntal chabainik li kʼusi chapas atukike.+

6 Jech xtok, buchʼuuk noʼox ti chichʼ chanubtasel ta skʼop Diose akʼo yakʼbe kʼusitik lek li buchʼu laj yakʼ li chanubtasel taje.+

7 Mu xaloʼla aba atukik: mu me stakʼ loʼlael li Diose. Yuʼun kʼusiuk noʼox ti yakal tstsʼun li jun krixchanoe jaʼ tstsobbe sat xtok;+ 8 yuʼun li buchʼu jaʼ noʼox yakal tstsʼun ta sventa sbekʼtale jaʼ tstsobbe sat ta sbekʼtal xtok li kʼusi snaʼ xkʼaʼe; pe li buchʼu jaʼ noʼox yakal tstsʼun ta sventa chʼul espiritue jaʼ tstsobbe sat li chʼul espiritue ti jaʼ li kuxlejal sbatel osile.+ 9 Jaʼ yuʼun, mu me xkikta jbatik ta spasel li kʼusitik toj leke, yuʼun mi muʼyuk lijlubtsaje, ta jtsobbetik sat mi sta skʼakʼalile.+ 10 Jech oxal, yoʼ to xuʼ kuʼuntike,* jaʼ jpasbe jba jkotoltik li kʼusi leke, pe jaʼ mas tsots skʼoplal ti jech jpasbetik li buchʼutik koʼol xchʼunel koʼontontik jchiʼuktike.

11 Kʼelavilik kʼu to smukʼtikil jletra la jtsʼibaboxuk tal ta jkʼob jtuk.

12 Skotol li buchʼutik lek skʼoplal tskʼan ch-ilatik ta sventa bekʼete* jaʼ li buchʼutik tsujoxuk ti akʼo xavichʼik sirkunsisione,* ti jech tspasike, jaʼ ta skoj ti mu skʼan xichʼik kontrainel ta sventa li jtel teʼ sventa vokolil* ti bu laj yichʼ jokʼanel li Kristoe. 13 Yuʼun mi jaʼuk bu tspasik kʼusi chal Mantal+ ek li buchʼutik chichʼik sirkunsisione, pe tskʼanik ti akʼo xavichʼik sirkunsision sventa oyuk srasonal ti xtoyetik xa chaʼi sbaik ta skoj li kʼusi chavichʼ pasbel ta abekʼtalike. 14 Pe li voʼone mi jaʼuk bu xitoyet xa chkaʼi jba, jaʼ noʼox xitoyet chkaʼi jba yuʼun li jtel teʼ sventa vokolil* ti bu laj yichʼ milel li Kajvaltik Jesukristoe,+ yuʼun jaʼ ta sventa Jesukristo ti laj yichʼik jokʼanel ta jtel teʼ chkil li krixchanoetike xchiʼuk ti laj kichʼ jokʼanel ta jtel teʼ chilikun ek li krixchanoetike. 15 Yuʼun muʼyuk sbalil li yichʼel sirkunsisione xchiʼuk muʼyuk sbalil mi muʼyuk ichʼbil sirkunsisione,+ pe jaʼ oy sbalil li kʼusi achʼ pasbile.+ 16 Jech xtok, skotol li buchʼutik lek tspas batel stalelalik jech kʼuchaʼal li mantal sventa talelale oyuk jun oʼontonal xchiʼuk oyuk kʼuxubinel ta stojolalik, jech, ta stojolal li Israel yuʼun Diose.+

17 Pe liʼ ta ora xchiʼuk ta jelavele, mu xa me buchʼu xakʼbun jvokol, yuʼun oy smarkail jbekʼtal ti chakʼ ta ilel ti smosoun Jesuse.+

18 Ermanoetik, teuk me oy ta atojolalik li slekil yutsil yoʼonton Kajvaltik Jesus ta skoj ti lek chavakʼ ta ilel atalelalike. Jechuk.