Slikeb loʼil ta xchanlajunvokʼal

Li baʼyel yajtsʼaklomtak Kristoe la xcholbeik skʼoplal li lekil aʼyejetik ta sventa li Ajvalilal yuʼun Dios kʼalal to ta namal lumetik. Laj yichʼik beiltasel yuʼun Jesus sventa snaʼik bu chbat xcholik mantal. Jech xtok, ta skʼelobil juʼelal la xchanubtasan li yajchankʼoptak sventa xcholbeik mantal li krixchanoetik ta jeltos kʼopetike. Akʼbat stsatsal yoʼontonik yuʼun Jeova sventa xkuch yuʼunik li tsatsal nutsel ta snuptanike.

Li jtakbol Juane akʼbat yil yuʼun Jesus li smukʼulal Jeovae. Ta yan velta xtoke, akʼbat yil li Ajvalilal yuʼun Diose ti tslajesbe skʼoplal li Satanas xchiʼuk li sbalumile. Jech xtok, li Juane laj yil ti ochem xa ta Ajvalil li Jesus xchiʼuk li 144 mil ti ch-ajvalilajik xchiʼuke. Laj yil xtok ti kʼu yelan tspas ta paraiso spʼejel li balumile xchiʼuk ti jun xa yoʼontonik chichʼik ta mukʼ Jeova stekel li krixchanoetike.