«Li bochʼo bije ta xvinaj ta sventa yabtel»
1. ¿Kʼu yelan chil kabteltik li jlom krixchanoetike?
1 Li avie xuʼ jtatik ep yajval naetik ti mu xchʼamvanike. Xuʼ van muʼyuk lek chilik li kʼusitik ta jpastike o ti muʼyuk lek skʼoplal yaʼyojbeik li yajrextikotak Jeova ta skoj li kʼusitik chalik bakʼintik ta radio, ta television o ta yan kʼusitike. Maʼuk noʼox taje, ta yantik lume oy chalik xtok ti jaʼutik la jun bikʼit relijion ti xchʼakoj sba lokʼel ta yan relijion ti xibal sbae. ¿Kʼusi van xuʼ jpastik kʼalal jech chkichʼtik labanele?
2. ¿Kʼusi tskoltautik sventa mu xi jchibaj kʼalal chkichʼtik labanele?
2 Junuk me koʼontontik. Li ta baʼyel sigloe muʼyuk lek skʼoplal xchiʼuk labanatik yuʼun krixchanoetik li Jesuse xchiʼuk li yan yajtuneltak Diose (Hech. 28:22). Manchuk mi jech, muʼyuk laj yakʼ ta yoʼontonik li labanele, muʼyuk xkʼexavik ta skoj li chol mantale. Li Jesuse xi laj yale: «Li bochʼo bije ta xvinaj ta sventa yabtel», xi (Mat. 11:18, 19). Li stuke xmuyubaj noʼox la spas-o batel li kʼusi tskʼan yoʼonton sTote, lek xchʼunoj ti buchʼutik tsaʼik li kʼusi melele tstabeik sbalil li lekil aʼyeje. Mi ta jvules ta joltik ti jech la snup li xNichʼon Diose tskoltautik sventa mu xchibaj koʼontontik ek.
3. ¿Kʼu yuʼun mu labaluk chkaʼitik ti chopol chkʼopojik ta jtojolaltik xchiʼuk ti tskontrainutik li krixchanoetike?
3 Li Jesuse laj yal ti jech kʼuchaʼal chopol ilat li stuke jaʼ jech chopol ch-ilatik ek li yajtsʼaklomtake (Juan 15:18-20). Ta melel, mu labaluk chkaʼitik ti chopol chkʼopojik ta jtojolaltike xchiʼuk ti tskontrainutik li krixchanoetik avie. Skʼan jmalatik onoʼox ti jech mas xa nopolik chkʼot ta pasel kʼalal chlaj xa batel li slajebal kʼakʼale xchiʼuk ti tstsatsaj mas li skapemal sjol Satanase (Apo. 12:12). Xi jmuyubajutik ti jaʼ senyailtak ti poʼot xa xlaj li steklumal Satanase.
4. ¿Kʼu yelan xuʼ jtakʼtik mi oy buchʼu mu lekuk chchʼamvane?
4 Oyuk lek smuil ti kʼuyelan ta jtakʼtike. Kʼalal muʼyuk lek chkichʼtik takʼbel ta jpʼejuk nae skʼan me oyuk lek smuil xchiʼuk kʼun xi jtakʼav li voʼotike (Pro. 15:1; Col. 4:5, 6). Mi oy ta yoʼonton mantal li yajval nae xchiʼuk mi xuʼ chkiltike, jambetik smelolal li kʼusi chopol yabinoj ta sventa li yajrextikotak Jeovae o jakʼbetik kʼu yuʼun ti jech tsnope. Mi oy lek smuil ta jtakʼtike xuʼ van jech chlik snopilan li kʼusi yabinoj ta sventa yajrextikotak Jeovae xchiʼuk xuʼ van xchʼam yan velta junuk jcholmantal kʼalal mi vulaʼanate. Pe mi sokem tajek sjol li yajval nae jaʼ lek ti ta lekilal noʼox xi jlokʼ batele. Xuʼ jchʼuntik ti ep tajek sbalil chil Jeova li chol mantal ta jpastike manchuk mi mu jechuk chil li krixchanoetike (Isa. 52:7).