2 Xchanobil

¿Buchʼu jaʼ ti Diose?

¿Buchʼu jaʼ li melel Diose xchiʼuk kʼusi sbi? (1, 2)

¿Kʼux-elan li sbekʼtale? (3)

¿Kʼusitik jaʼ li yelaniltak ti lek xvinaje? (4)

¿Mi stakʼ van jtunestik lokʼoletik xchiʼuk santoetik sventa ta jmuyubtatik? (5)

¿Kʼuxi chib smelolal xuʼ jchantik ta sventa ti Diose? (6)

1. Ep kʼusitik tsmuyubtaik li krixchanoetike. Pe, li Vivliae chal ti jaʼ noʼox oy jun MELEL Dios. Jaʼ la spas skotol li kʼusi oy ta vinajel xchiʼuk ta Balumil xchiʼuk la jyakʼbutik jkuxlejaltik, jaʼ yuʼun skʼan stuk noʼox ta jmuyubtatik (1 Corintios 8:5, 6; Apocalipsis 4:11).

2. Akʼo mi ep ta tos chichʼ biiltasel ti Diose, jun noʼox li sbie: JEOVA. Ta epal Vivliaetik stupʼojbeik sbi li Diose xchiʼuk sjelojbeik ta Kajval o Dios. Pe kʼalal la jyichʼ tsʼibael li Vivliae, yichʼoj toʼox jutuk mu vuk mil ta velta li biil Jeova (Éxodo 3:14 Ch. Kʼelo li tsʼib ta yok vune).

3. Jeova oy sbekʼtal, akʼo mi mu xkoʼolaj kʼuchaʼal kuʼuntike. Li Vivliae chal: «Diose mu xvinaj ta kʼelel» (Juan 4:24, Ch). Jun kuxlejal ta espiritu jaʼ jun mukʼul kuxlejal, li kuʼuntike moʼoj. Mi junuk krixchano yiloj ti Diose. Akʼo mi kuxul ta vinajel ti Jeovae, xuʼ chil skotol (Salmo 11:4, 5; Juan 1:18). Xchiʼuk, ¿kʼusi jaʼ li chʼul espiritue? Maʼuk jun dios, moʼoj, jaʼ li yip ch-abtej yuʼun Diose (Salmo 104:30).

4. Li Vivliae ta xalbutik kʼux-elan ti Jeovae. Ta xalbutik ti yelaniltak lek xvinaje jaʼ: kʼanelal, tukʼilal, pʼijilal xchiʼuk juʼelal (Deuteronomio 32:4; Job 12:13; Isaías 40:26; 1 Juan 4:8). Jech xtok, chi yalbutik ti jaʼ jkʼuxubinvanej, lek yoʼonton, jpasvanej ta perton, tskʼupin yakʼel kʼusitik lek xchiʼuk snaʼ smalael. Kʼuchaʼal jchʼun mantal nichʼnabiletik, skʼan chkakʼbetik yipal ta spasel kʼuyelan tspas ti Diose (Efesios 5:1, 2).

5. ¿Mi stakʼ van jnijan jbatik xchiʼuk jpastik orasion ta yelov santoetik xchiʼuk lokʼoletike? Moʼoj (Éxodo 20:4, 5). Jeova ta xalbutik ti jaʼ noʼox stuk xuʼ jmuyubtatik. Mu xakʼ ta yan mi jaʼuk ta kʼusitik li smukʼulale. Jech xtok, li lokʼoletike mu xuʼ xi skoltautik yuʼun chʼabal sjuʼelik (Salmo 115:4-8; Isaías 42:8).

6. ¿Kʼuxi xuʼ xkojtikintik lek ti Diose? Jun smelolale jaʼ mi ta jkʼeltik li kʼusitik spasoje xchiʼuk ta jnoptik lek li kʼusitik chi yalbutik ta sventa stuk li spasbentake. Li spasbentake chakʼ kiltik ti toj ep sjuʼelal xchiʼuk spʼijilal ti Diose. Ta xkilbetik skʼanelal ta skotol li kʼusitik spasoje (Salmo 19:1-6; Romanos 1:20). Yan smelolal ta ojtikinel ti Diose, jaʼ ti xchanel li Vivliae. Tee jaʼ toj ep chalbutik kʼusi Diosal li stuke. Jech xtok, chalbutik li kʼusi ta spase xchiʼuk li kʼusi tskʼan ta jpastike (Amós 3:7; 2 Timoteo 3:16, 17).

[Lokʼol ta pajina 5]

Ta sventa li spasbentak xchiʼuk li ta Vivliae ta jchantik ta sventa Dios