¿Kʼusi chkʼot ta pasel kʼalal chi jchamutike?

Li lajele jaʼ jelel kʼuchaʼal li kuxlejale. Jaʼ xkoʼolaj kʼuchaʼal jun natil vayel tajek (Juan 11:11-14). Li buchʼutik chamemike mu xuʼ kʼusi chaʼiik, tskʼelik, chalik, mi jaʼuk kʼusi tsnopik (Eclesiastés 9:5, 10). Li jecheʼ relijione chchanubtasvan, ti buchʼutik chchamike ta la xbatik ta slumal espirituetik sventa te chkuxiik xchiʼuk yutsʼ yalalik ti chamemik xae. Pe taje mu jechuk chchanubtasvan li Bibliae.

Li animaetike mu xuʼ xi skoltautik mi jaʼuk kʼusi xuʼ chopol spasbutik. Jaʼ jech nopem li krixchanoetik tspasbeik resal xchiʼuk chakʼbeik matanal buchʼutik chamemik, ti tskuyik lek ch-ilatik. Ta pasel liʼe muʼyuk lek chil ti Diose yuʼun te lokʼesbil ta jun sjutbil kʼop li Satanase. Mi jaʼuk lek chilik li krixchanoetik chamemik xae, yuʼun liʼike muʼyuk xkuxlejalik. Mu stakʼ jxiʼtik mi jaʼuk stakʼ jmuyubtatik li buchʼutik chamemik xae. Jaʼ noʼox stakʼ jmuyubtatik ti Diose (Mateo 4:10).

Li animaetike chchaʼ kuxiik talel. Ta bakʼin toe, Jeova tsjulaves likel li buchʼutik chamemik sventa xkuxiik ta jun paraiso li ta Balumile (Juan 5:28, 29; Hechos 24:15). Dios xuʼ tsjulaves likel buchʼutik chamemik xkoʼolaj kʼuchaʼal voʼotik ta julavestik likel jun krixchano vayale (Marcos 5:22, 23, 41, 42).

Li nopel ti mu xi jchamutike jaʼ jun loʼlael yuʼun Satanas li Yavlo, jaʼ spasoj ti akʼo xichʼ chʼunele. Satanas xchiʼuk spukujtake, tspasik ti akʼo snopik li krixchanoetik ti espiritu yuʼun animaetike, kuxulik to la xchiʼuk chakʼik la chamel xchiʼuk yantik kʼopetik. Satanas tsloʼla li krixchanoetike, chakʼbe skʼelik kʼusitik xchiʼuk chakʼbe yilik ta vaychil. Tsatsal mulil chil Jeova li buchʼutik tskʼan skʼoponik li animaetike (Deuteronomio 18:10-12).