Orasionetik ta jpets tulan

Xi chal sloʼil Rachel, ti te nakal ta República Dominicana: «Li jtot jmeʼe jaʼik xa onoʼox stestigo Jeova kʼalal livokʼe. Pe kʼalal vukub xa ox jabilale li jtote laj yikta komel li stestigotak Jeovae; lik skontrain li slumal Jeovae xchiʼuk lik pasuk ta simaron. Mu xa toj kʼunuk laj kaʼi yichʼel ta mukʼ li Jeovae. Bateltike, oy kʼusitik ta syebun sventa xkikta komel spasel yabtel li Jeovae. Oy bateltik ta xalbun ti ta xakʼbun jselular, chikʼun batel ta yojtikinel Disneylandiae o moʼoje chakʼbun la jun tarjeta de crédito. Bateltik xtoke, ta smajun sventa jlokʼes ta koʼonton li Jeovae. Yuʼun ta xal ti mi mu xa xikʼopoj o mu xa xixanav chiktaune, mu xa xikʼot li ta tsobajeletike. Pe muʼyuk bu jech kʼot ta pasel, yuʼun jpʼel ta koʼonton ti chibat li ta tsobajeletike.

»Li jtote mu xakʼbe yil jmeʼ ti tsmajune xchiʼuk laj yalbun xtok ti ta la smaj meʼ mi yuʼun laj kalbe li kʼusi tspasbune. Li jtote ta xalbe ti bu yoxik xa jbekʼtale jaʼ la ta skoj ti solel tskʼan chchanubtasun ta karatee.

»Kʼoxun toʼox tajek xchiʼuk ta skoj ti kʼu yelan sibtasojun li jtote, chixiʼ chkalbe jmeʼ li kʼusi yakal chkʼot ta pasele, jaʼ yuʼun jaʼ chbat kalbe li Jeovae. Li ta spat jnakutik te ta Maryland (Estados Unidos) oy teʼtikaltik te, jal chbat xanavkun tal tey. Li tee oy jpets mukʼta tulan, te chimuy jaʼ to mi la jtabe skʼob ti bu lek xuʼ xichoti xchiʼuk xuʼ xlik jchiʼin ta loʼil li Jeovae. Chkalbe ti kʼu yelan chkaʼi jbae xchiʼuk li kʼusi ta jkʼan ta jpas ta yabtel kʼalal mi lichʼie, pe jaʼ noʼox mi la skoltaune. Chkalbe xtok li kʼusi oy ta koʼonton ta jpas li ta paraisoe, ti kʼu yelan ta jkʼan li kutsʼ kalale xchiʼuk ti muʼyuk xa bu chixiʼ xchiʼuk muʼyuk xa kʼusi kʼux chkaʼie. Ti jaʼ xa noʼox jun koʼonton xchiʼuk ti ximuyubaje.

»Kʼalal ep ta velta la skʼan la sloʼlaun jtot xchiʼuk ep ta velta la smajune, li Jeovae jaʼ la skoltaun xchiʼuk laj yakʼbun jun oʼontonal. Jaʼ la skoltaun sventa tsotsuk li koʼontone xchiʼuk ti tukʼ xkakʼ jba ta stojolale.

»Kʼalal lajuneb xa ox jabilale, laj kichʼ voʼ, chib jabil ta tsʼakale lik tunkun ta prekursora. Mu toʼox kʼusi snaʼ ta slikebal li jtote, pe kʼalal laj yaʼie tsots la smajun xchiʼuk lokʼ yuʼun ta yavil li sbakil kee.

»Jlome laj yalbeikun ti toj kʼoxun to la ti jaʼ lek mu xi˗och ta prekursorae. Yuʼun tsnopik la ti mu xkaʼibe smelolal ti toj tsots skʼoplal li kʼusi yakal ta jnop ta jpase. Ta tsʼakale, laj kil ti oy kerem tsebetik ti te noʼox nakalike ti mu masuk xakʼ ta yoʼonton xtunik ta stojolal Jeovae, jaʼ mas batem ta yoʼontonik li kʼinetike xchiʼuk li chʼayob oʼontonaletike. Jech xa ta jkʼan ta jpas laj kaʼi ek. Oy bateltik ti tsots tajek laj kaʼie, lik jnop yuʼunik mi jaʼ lek ti jyoch li cholmantale, ti jaʼ lek jech chlik jpas kʼu chaʼal li kerem tsebetike. Pe kʼalal jech ta xkaʼi jbae ta jloʼiltabe li Jeovae.

»Kʼalal 15 xa ox jabilale la skʼoponikun talel krixchanoetik ti lek tajek ojtikinbilik sventa xi˗abtej kʼuchaʼal modelo. Laj yalbeikun ti ep takʼin ta jpas kanal mi bat abtejkun xchiʼukik te ta Milán, ta Italia. Ti jamal xkaltike, toj lek laj kaʼi ti la skʼoponikun talel sventa xi˗abtej ta modeloe, ti xuʼ xilokʼ ta revistaetike xchiʼuk ti jlap kʼuʼiletik ti toyolik tajek stojole. Jutuk xa ox mu oxibuk jabil tunemun talel ta prekursora, jaʼ yuʼun la jnop: ‹Li abtelal liʼe xiveʼo xa yuʼun xchiʼuk xuʼ jal-o jech xitun yuʼun ta prekursora›. Li jtot xtoke yiktaojunkutik xa ox, jaʼ yuʼun la jnop ti xuʼ jaʼ jkolta-o li jmeʼe.

»La jnop ta xkalbe Jeova ta sventa taje, la jchiʼin ta loʼil jmeʼ ti mas xa ox jal tunem talel ta prekursorae xchiʼuk jun mol ta tsobobbail ti jkʼanoj tajek xchiʼuk ti kichʼoj lek ta mukʼe. Jech xtok, jech kʼuchaʼal nopem onoʼox xkaʼie bat jpas orasion li ta jtekʼ tulane. Li Jeovae jaʼ te la stakʼbun j˗orasion kʼalal la xchanbun Eklesiastes 5:4 li mol ta tsobobbaile, ti te chakʼ ta aʼiel ti akʼo jpastik li kʼusi chkalbetik Jeova ti ta jpastike, xi chal li tekstoe: ‹Li kʼusi chavakʼ ave chapase paso me›. Kalojbe xa noʼox Jeova ti chitun ta stojolale, vaʼun laj kakʼ venta ti xuʼ sokes ti kʼu yelan xkil jba xchiʼuk Jeova li abtelal taje, jech oxal, muʼyuk la jchʼam.

»Muʼyuk xicham, li avie ximuyubaj tajek. Li jmalale jaʼ mol ta tsobobbail, Jaser sbi. Oy jun jkeremkutik, Connor sbi, baluneb to sjabilal, pe jaʼ xa jcholmantal ti muʼyuk to yichʼoj voʼe. Jutuk mu 27 jabil ti chitun talel ta tsʼakal orae.

»Ep ta velta chtal ta jol ti kʼu yelan jal chiloʼilaj xchiʼuk Jeova li ta jpets tulan te ta spat jnakutike. La jkʼanilanbe ti akʼo skoltaun li Jeovae. Toj labal sba ti kʼu yelan la spase. Laj yakʼbun kipal, spatobil koʼonton xchiʼuk li beiltasel chtun kuʼune. Ep ta velta yakʼoj kil ti jaʼ jun jkʼanvanej Totil ti snaʼ xkʼuxubinvane. Ximuyubaj tajek ti ta sjunul koʼonton tunemun talel ta stojolale. Stuk xa noʼox jech toj lek li kʼusi kʼot ta nopel kuʼune».