Chamik vakib miyon ta skoj li COVID-19 | ¿Kʼusi chal li Vivliae?

Li Organización Mundial de la Salud (OMS) chal ti oy xa ox 6,27 miyon krixchanoetik chamik ta COVID-19 li ta 23 yuʼun mayo ta 2022. Pe li ta 5 yuʼun mayo ta 2022, li OMS laj yal ti xuʼ x˗epaj li buchʼutik chchamike. Laj yal xtok ti ta sjabilal 2020 xchiʼuk 2021 chamik te van 14,9 miyon krixchanoetik ta skoj ti ipajik ta coronaviruse o li yantike jaʼ ta skoj ti muʼyuk xichʼik chʼamel li ta ospitaletike, yuʼun noj ta krixchanoetik ti ipik ta COVID-19. ¿Kʼusi chal Vivlia ta sventa taje?

Li Vivliae yaloj xa onoʼox ti chtal tsatsal chameletike

•  Yaloj xa onoʼox Jesus ti chtal jeltos tsatsal chameletik «li ta slajebal xa kʼakʼale» (2 Timoteo 3:1; Lukas 21:11, Traducción en lenguaje actual).

Yakal chkʼot ta pasel avi li kʼusi laj xa onoʼox yal Jesuse. Mi chakʼan chanabe mas skʼoplale, kʼelo li mantal ti xi sbie: «¿Kʼuxi jnaʼojtik ti ta slajebal xa kʼakʼal kuxulutike?».

Tspat koʼontontik li kʼusi chal Vivliae

•  «Li Dios ti tspat koʼontontik ta skotole [...] tspat koʼontontik ta skotol prevaetik ta jnuptantike» (2 Korintios 1:3, 4).

Epal krixchanoetik ti chamem yutsʼ yalalike te staoj spatobil yoʼontonik ta Vivlia. Kʼelo li mantaletik ti xi sbie: «Sventa xkuch avuʼun li at˗oʼontone: Li kʼusitik xuʼ xapase» xchiʼuk «¿Kʼusi xuʼ xkoltaatik-o li buchʼutik chat yoʼontonike?».

Li Vivliae chal li kʼusitik lek chkʼot ta pasele

•  «Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele» (Mateo 6:10).

«Li Ajvalilal yuʼun Diose» jutuk xa skʼan xkʼot ta pasel yuʼun li kʼusitik chal liʼe: «Mi junuk jnaklej ta balumil xi chale: «Toj ipun» (Markos 1:14, 15; Isaias 33:24). Mi chakʼan chanaʼ mas ta sventa li Ajvalilal ta vinajel taje xchiʼuk li kʼusi tspase, kʼelo li video ¿Kʼusi jaʼ li Ajvalilal yuʼun Diose?

Ta jtijkutik avoʼonton ti xachan mas li Vivliae. Vaʼun, xuʼ xatabe sbalil li lekil tojobtaseletik te chale xchiʼuk li kʼusitik kʼupil sba chkʼot ta pasel ta jelavele.