Yantik xtakij tajek li osile | ¿Kʼusi chal li Vivliae?

• «Li ta Chinae jaʼ li bu mas kʼixin tajeke xchiʼuk yoxkojal xa ti toj echʼ xa noʼox kʼixin chjelav li ta yorail kʼepelaltike» (The Guardian, 7 yuʼun septiembre ta 2022).

• «Laj yichʼ ilel ti jech˗o kʼixin tajek li ta lum Gran Cuerno de África li ta voʼob jabil chtale» (Noticias ONU, 26 yuʼun agosto ta 2022).

• «Mas ta j˗oʼlol li lumetik ta Europae albilik xa ti xuʼ xtakij li yaʼalik tee. Muʼyuk bu jech kʼotem ta pasel leʼ xa talel ta voʼob sien jabile» (BBC News, 23 yuʼun agosto ta 2022).

Ep li buchʼutik chchanbeik skʼoplal balumile chalik ti jech˗o ch˗ul batel li voʼe xchiʼuk ti mu xa xchʼi kʼusitike. ¿Mi xuʼ jpat koʼontontik ti chlekub ta tsʼakale? ¿Kʼusi chal li Vivliae?

Li kʼepelaltik xchiʼuk li albil kʼopetik ta Vivliae

Li Vivliae yaloj xa onoʼox ti xi chkʼot ta pasel ta jkʼakʼaliltike:

• «Chlik viʼnal [...] ta buyuk noʼox» (Lukas 21:11).

Ta skoj li kʼepelaltike, chkil˗o jvokoltik ta viʼnal xchiʼuk chijcham˗o yuʼun, jech onoʼox kʼuchaʼal yaloj li albil kʼopetik ta Vivliae (Apokalipsis 6:6, 8).

¿Kʼu yuʼun yantik tajek xkʼixnaj li osile?

Li Vivliae chalbe junantik srasonaltak ti kʼu yuʼun jech chkʼot ta pasele. Xi chal jtose:

• «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23).

Taje jaʼ skʼan xal ti muʼyuk lek chbat mi tsbeiltas sba stuk li krixchanoetike o ti tspas sba ta mantal stukike. Ta skoj li kʼusi tspasike, mas to tsok˗o batel yuʼunik li balumile, ch˗ul batel li voʼe xchiʼuk chtakij li osile.

• Epal sientifikoetike chalik ti jaʼ ta smul krixchanoetik ti mas chkʼixnaj li balumile. Ta skoj taje, mas xa chtakij li osil ta spʼejel balumile.

• Ta skoj li kʼusi tspas jpolitikoetike, xuʼ me x˗ul batel li kaʼaltik yuʼunike. Yuʼun ta skoj li xpichʼetel yoʼontonike, chlik slomesik teʼetik, chikʼubtasik li ikʼ chkichʼtike xchiʼuk muʼyuk xa noʼox smelolal ti kʼu yelan tstunesik li kʼusitik x˗ayan ta balumile.

Pe li Vivliae chakʼbutik spatobil koʼontontik.

¿Mi oy onoʼox van kʼusi lek chkʼot ta pasel ta tsʼakal?

Li Vivliae chal ti oy kʼusi tspas Dios sventa mu xa xkil jvokoltik ta skoj ti ch˗ul batel li voʼe. ¿Kʼu yelan tspas taje?

1. 1. Li Diose chakʼbe slajeb «li buchʼutik yakal tsokesik li balumile» (Apokalipsis 11:18). Chakʼbe slajeb li buchʼutik chakʼ uluk li voʼe, jaʼ xkaltik, li chopol krixchanoetik ti muʼyuk chkʼuxubinik li kʼusi x˗ayan ta sba balumile (2 Timoteo 3:1, 2).

2. 2. «Li balumil ti takin tajek ta kʼakʼale chkʼataj ta yavil ajtik» (Isaias 35:1, 6, 7). Li Diose chchaʼmeltsan li kʼusitik sokem ta skoj ti takijem tajek li osile xchiʼuk tskʼatajes ta jun Paraiso spʼejel balumil ti ta buyuk xa noʼox chlokʼ talel voʼe.

3. 3. «Oy ta avoʼonton li balumile, oy kʼusi lek xchʼi avuʼun te xchiʼuk ep kʼusitik x˗ayan» (Salmo 65:9). Chakʼ talel bendision li Diose, vaʼun ch˗ayan lekil veʼlil xchiʼuk lek xa sak li voʼ ta jtunes jkotoltike.