¿Kʼusi chal Vivlia ta sventa li viʼnal oy ta spʼejel balumile?
Li bankilal j˗abteletik ta spʼejel balumile oy ta yoʼontonik tslajesbeik skʼoplal li viʼnale, tskʼanik ti oyuk noʼox kʼusi stun slajesik skotol li krixchanoetike.a Pe ¿mi chkʼot skʼakʼalil ti muʼyuk xa viʼnale? ¿Kʼusi chal li Vivliae?
Li Vivliae laj xa onoʼox yal ti chtal viʼnale
Li Vivliae yaloj xa onoʼox ti ta «slajebal xa kʼakʼale» ta xjutukaj li veʼlile (2 Timoteo 3:1). Akʼo mi yaloj xa onoʼox Dios ti jech chkʼot ta pasele, maʼuk ta smul (Santiago 1:13). Jkʼeltik batel chib albil kʼopetik ti jaʼ chalbe skʼoplale.
«Chtal viʼnal [...] ta buyuk noʼox» (Mateo 24:7). Jech kʼuchaʼal chal li albil kʼope, ta x-ayan viʼnal ta jujot. Labal sba li kʼusi laj yalik li organisasionetik ti tskʼelbeik skʼoplal veʼlile, xi laj yalike: «Yantik stsatsaj li viʼnale, muʼyuk xa toj lekik li veʼlile xchiʼuk jutuk xa ta tael».b Ta epal lumetike ta smiyonal xa noʼox krixchanoetik muʼyuk kʼusi stam slajesik, jaʼ yuʼun, ep buchʼutik chchamik ta viʼnal.
«Laj kil jkot ikʼal kaʼ; li buchʼu te kajal batele stsakoj jun kilo» (Apokalipsis 6:5). Li ta albil kʼop liʼe, li kaʼ xchiʼuk li buchʼu te kajale jaʼ skʼoplal li viʼnal ta slajebal kʼakʼale.c Li jkajlej ta kaʼe stsakoj batel jun kilo sventa spʼis li veʼlile. Jech xtok, li ta albil kʼope chal ti kʼalal jaʼo yakal chanav batel li jkajlej ta kaʼe, yichʼ aʼiel jun yechʼomal eil ti chal ti chtoy stojol li veʼlile xchiʼuk chalbe li krixchanoetik ti akʼo mu xixtolanike (Apokalipsis 6:6). Jamal xvinaj ti jaʼ jech yakal chkʼot ta pasel avi kʼakʼale, yuʼun ta smiyonal noʼox krixchanoetik vokol chaʼiik stael sveʼelik o mu xman yuʼunik.
Chlaj skʼoplal li viʼnale
Li buchʼutik xchanojbeik skʼoplale chalik ti chchʼi epal veʼlil ta balumil sventa skotol li krixchanoetike. Vaʼun chaʼa, ¿kʼu yuʼun oy viʼnal? Xchiʼuk jech kʼuchaʼal chal li Vivliae, ¿kʼusi tspas Jeovad sventa xchʼaybe skʼoplal li viʼnale?
Li vokolile: Li ajvaliletike mu xuʼ yuʼunik xchʼaybel skʼoplal li povreale, jaʼ yuʼun ep buchʼutik chilik viʼnal.
Li xchapanobile: Chlaj skʼoplal li ajvaliletik ta balumile, jaʼ ch˗och ta xkʼexol li Ajvalilal yuʼun Diose ti jaʼ ch˗ajvalilaj Jesukristo ti tukʼ snaʼ spas mantale (Daniel 2:44; Mateo 6:10). Li avie, epal krixchanoetik ti abol sbaike vokol tstaik li kʼusi stun slajesike, pe ta xjel mi lik ventainvanuk li Ajvalilal yuʼun Diose. Xi chal Vivlia ta stojolal li Jesuse: «Tspoj li povreetik ti x˗avet tskʼanik koltaele, tspoj xtok li buchʼu bikʼit yakʼoj sbae xchiʼuk li buchʼu muʼyuk jkoltavanej yuʼune. [...] Ch˗ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele» (Salmo 72:12, 16).
Li vokolile: Ta skoj li paskʼopetike, ep kʼusitik chlaj xchiʼuk chtoy stojol li kʼusitike, jaʼ yuʼun, vokol xa ta tael li veʼlile.
Li xchapanobile: «[Li Jeovae] tslajesbe skʼoplal li paskʼopetik ta spʼejel balumile. Tskʼas li arkoe xchiʼuk tslilin li lansae; ta xchikʼbe ta kʼokʼ li skareta soltaroetike» (Salmo 46:9). Li Diose tslajesbe skʼoplal li buchʼutik lek chaʼiik paskʼope xchiʼuk tslajesbe skʼoplal li yabtejebike. Mi jech kʼot ta pasel taje, muʼyuk xa vokol ta tael li veʼlile. Li Vivliae xi chale: «Xnichinajik noʼox li buchʼutik tukʼike, ta x-epaj li jun oʼontonale» (Salmo 72:7).
Li vokolile: Ta skoj ti chjel li sikil xkʼixnal balumile xchiʼuk ta skoj li nikeletik, nojelal ta voʼ xchiʼuk yan kʼusitike, chlaj˗o li tsʼunobiletike xchiʼuk chcham˗o li chombolometike.
Li xchapanobile: Li Diose xuʼ yuʼun tslajesbe skʼoplal li nikel, nojelal ta voʼ o yan kʼusitike, vaʼun chchʼi kʼusiuk noʼox ti xichʼ tsʼunele. Xi chal li Vivliae: «[Li Jeovae] jaʼ tspajtsan li tsatsal ikʼe; chpaj li nab ti xvaʼi xkoti noʼoxe. […] Li takixokol balumile spas yuʼun ta yavil voʼ ti noj ta ajtike xchiʼuk spas yuʼun ta nioʼetik li takin lumtike. Jaʼ te chakʼ nakiuk li buchʼutik chviʼnajike […]. Oy kʼusitik tstsʼun ta yosilik xchiʼuk tstsʼunik uva ti tsatin leke» (Salmo 107:29, 35-37).
Li vokolile: Oy krixchanoetik ti chchʼamik michʼob kʼabal xchiʼuk ti batem tajek ta yoʼontonik takʼine tspasik veʼliletik ti xuʼ xij˗ipaj˗o yuʼune o muʼyuk tspukbeik sveʼel li buchʼu mas chtun yuʼunike.
Li xchapanobile: Li Ajvalilal yuʼun Diose tslajesbe skʼoplal li buchʼu mu meleluk snaʼ xkʼopoje xchiʼuk li buchʼutik chchʼamik michʼob kʼabale (Salmo 37:10, 11; Isaias 61:8). Li Vivliae chal ti Jeovae «tukʼ chchapan li buchʼutik lajemik ta loʼlaele [xchiʼuk] chakʼbe sveʼel li buchʼutik chviʼnajike» (Salmo 146:7).
Li vokolile: Jujun jabil jutuk mu j˗oʼloluk li veʼlil chchʼi o chichʼ meltsanel ta spʼejel balumile jeche’ chchʼay batel o ch˗ixtolaj.
Li xchapanobile: Li Ajvalilal yuʼun Diose muʼyuk chixtolan li veʼlile. Kʼalal ay ta balumil li Jesuse, muʼyuk laj yixtolan li veʼlil eke. Jech kʼuchaʼal liʼe, kʼalal la smakʼlin ta skʼelobil juʼelal mas ta voʼmil krixchanoetike, xi laj yalbe li yajtakboltake: «Tsobbeik li skomenal sventa mu kʼusi xichʼ ixtolanele» (Juan 6:5-13).
Li Ajvalilal yuʼun Diose tslajesbe skʼoplal li viʼnale, vaʼun oy xa noʼox epal veʼlil sventa skotol li krixchanoetike (Isaias 25:6). ¿Kʼusi ora chkʼot ta pasel taje? Sventa xanaʼe, kʼelo li mantal: «¿Bakʼin chlik spas mantal liʼ ta balumile?».
a Li Agenda 2030 sobre el Desarrollo Sostenible ti la spasik ta 2015 skotol li lumetik ti te skʼoplalik ta Estados Miembros de las Naciones Unidas.
b Jaʼ laj yalik li Organización de las Naciones Unidas para la Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas xchiʼuk li Organización Mundial de la Salud.
c Sventa xanabe mas skʼoplal li chanvoʼ jkajlejetik ta kaʼ chalbe skʼoplal ta Apokalipsise, kʼelo li mantal: «¿Kʼusi skʼoplal li jkajlejetik ta kaʼ chal Apokalipsise?».
d Jaʼ Jeova sbi li Diose (Salmo 83:18). Kʼelo li mantal: «¿Buchʼu jaʼ li Jeovae?».