Li paskʼop ta Israel xchiʼuk li lumetik ta spat xokone | ¿Kʼusi chal li Vivliae?

Epal krixchanoetike tsvul yoʼontonik ta skoj li paskʼop tspasik Estados Unidos, Israel xchiʼuk Irane. ¿Mi mas to van tstsatsaj batel? ¿Mi oy van kʼusi xuʼ spas li ajvaliletik sventa mu masuk kʼusi chopol xkʼot ta pasel xchiʼuk ti x˗ayan jun oʼontonal ta spʼejel balumile?

Ta skoj li paskʼop oy ta Oriente Proximoe (Israel xchiʼuk li lumetik ta spat xokone), xuʼ van snopik ti jaʼ xa te chlik li paskʼop ta Armajedon jech kʼuchaʼal chal li slivroal Apokalipsise. Taje jaʼ van jech tsnopik li buchʼutik snaʼojik jutuk li albil kʼopetik ta Vivliae.

¿Kʼusi chal li Vivliae?

¿Mi xuʼ van yuʼunik spajesik paskʼop ta Oriente Próximo li ajvaliletike?

Xi chal li Vivliae: «Mu xapat avoʼontonik ta stojolal li bankilaletike mi jaʼuk ta stojolal li xnichʼon krixchano ti mu xuʼ yuʼun xkoltavane» (Salmo 146:3).

Mu jnaʼtik mi xuʼ yuʼun ajvaliletik ti x˗ayan yuʼunik jun oʼontonal li ta lumetik taje. Pe li Vivliae chal ti mi junuk jnitvanej ta politika, mi jaʼuk junuk ajvalil o yan krixchanoetik xuʼ yuʼunik spajesik ta j˗echʼel li paskʼope xchiʼuk ti x˗ayan jun oʼontonal ta melele. Yuʼun jaʼ noʼox Dios xuʼ yuʼun «tslajesbe skʼoplal li paskʼopetik ta spʼejel balumile» (Salmo 46:9).

• Sventa xanabe mas skʼoplale, kʼelo li mantal ti te lokʼem li ta revista Li Jkʼel-osil ta toyol ti xi sbie: «¿Mi ta van xlaj skʼoplal li paskʼopetike?».

¿Mi jaʼ jun albil kʼop li kʼusi yakal chkʼot ta pasele?

Xi chal li Vivliae: «Chavaʼiik ti oy paskʼop liʼe xchiʼuk ti oy paskʼop ta nome. [...] Yuʼun chlik skontrain sbaik jujun mukʼta jteklum, chlik skontrain sbaik ajvaliletik» (Mateo 24:6, 7).

Li paskʼop oy ta Oriente Proximoe, li Vivlia chal ti jaʼ jun sprevail ti «poʼot xa xlaj skotol li kʼusitik oy ta balumile» o ti kuxulutik xa ta slajebal kʼakʼale (Mateo 24:3; 2 Timoteo 3:1). Taje chakʼ ta ilel ti jutuk xa skʼan slajesbe skʼoplal paskʼopetik li Diose xchiʼuk skotol li kʼusitik chakʼ vokolile.

• Mi chakʼan chanabe mas skʼoplale, kʼelo li mantal ti xi sbie: «¿Kʼuxi jnaʼojtik ti ta slajebal xa kʼakʼal kuxulutike?».

¿Mi jaʼ xa slikeb Armajedon li paskʼop oy ta Oriente Proximoe?

Xi chal li Vivliae: «Laj yichʼik tsobel ti bu Armajedon sbi ta ebreoe» (Apokalipsis 16:16).

Li Armajedone maʼuk skʼoplal kʼalal tstsak sbaik ta kʼop li ajvaliletike o ti te chlik ta Oriente Proximoe. Yuʼun jaʼ skʼoplal ti tstsak sbaik ta kʼop xchiʼuk Dios skotol li ajvaliletik ta balumile.

• Mi chakʼan chanabe mas skʼoplale, kʼelo li mantal ti xi sbie: «¿Kʼusi jaʼ li Armajedone?».

¿Kʼusi xuʼ jpastik sventa mu xijxiʼ yuʼune?

Xi chal li Vivliae: «Mu me kʼusi xavul˗o avoʼontonik jsetʼuk, jaʼ lek albeik Dios ta orasion li kʼusi chavul˗o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione» (Filipenses 4:6).

Li Jeovaea tskʼan ti jkʼopontike. Li Diose oyutik ta yoʼonton, chchikinta li j˗orasiontike xchiʼuk tskoltautik sventa mu jvul tajek koʼontontik (1 Pedro 5:7). ¿Kʼuxi tskoltautik? Jaʼo kʼalal chalbutik ti kʼu yuʼun oy li paskʼopetike, ti kʼuxi chlaj skʼoplale xchiʼuk kʼusi tspas sventa slajesbe skʼoplal li vokoliletik ta jnuptantike (Apokalipsis 21:3, 4).

• ¿Kʼuxi tskoltautik li Diose? Kʼelo li mantal ti xi sbie: «¿Mi xuʼ spatbun koʼonton li Vivliae?».