¿Mi jech chavaʼi aba kʼuchaʼal chal sloʼilik ta akʼole? Xuʼ van chakʼan ox chachan li Vivliae, pe oy kʼusi la smakot. Oy krixchanoetik ti kʼalal tsnop ti skʼan skʼelik li Vivliae ta xchʼajubik-o. Pe ¿mi jech-o van chanop mi laj avaʼibe smelolal ti xuʼ xamuyubaj-o yuʼun li kʼusi te chale xchiʼuk ti chakʼbe sbalil li akuxlejale? ¿Ti jech xavaʼibe smelolal ti oy kʼusi stakʼ xapas sventa mas xakʼupin skʼelel li Avivliae? ¿Mi oy ta avoʼonton xakʼel jutuk li kʼusi chalbot li Vivliae?

Kʼelavil li kʼusi laj yalik junantik krixchanoetik ti lik skʼelik li Vivliae xchiʼuk ti laj yakʼik venta ti kʼuxi xuʼ stabeik sbalile.

Li Ezekiel ti mas xa jutuk ta 20 sjabilale xi chale: «Ta olon tal toʼoxe jechun toʼox kʼuchaʼal li krixchanoetik ti mu snaʼ kʼusi tspas ta xkuxlejalike, pe kʼalal la jchan li Vivliae la sjelbun-o li jkuxlejale. Epal tojobtasel yichʼoj ta sventa li kʼusi ta jnuptantik ta jujun kʼakʼale».

Li Frieda ti yichʼoj mas ta 20 sjabilale, xi chal eke: «Ta anil noʼox chikap, pe koliyal li kʼusi yakal ta jchan ta Vivliae, jaʼ skoltaojun sventa jnaʼuk jpajtsan jba. Mas xa lekubem li jtalelale xchiʼuk mas xa ep kamigotak».

Jun ants ti mas xa ta 50 sjabilal ti Eunice sbie, xi chale: «Yakal tskoltaun ti masuk lek jtalelale, ta sjelel li kʼusitik ta jpas ti mu toj lekuke».

Mi chachan li Vivliae, xuʼ me mas xakʼupin li akuxlejale, jech kʼuchaʼal li krixchanoetik ti laj xa kalbetik talel skʼoplale xchiʼuk li yan epal krixchanoetike (Isaías 48:17, 18). Li Vivliae xuʼ skoltaot ti lekuk kʼusi chkʼot ta nopel avuʼune, ti oyuk lek avamigotake, ti xanaʼuk kʼusi chapas kʼalal sujomot ta akuxlejale xchiʼuk ti xachanbe skʼoplal li Jpasvaneje, ti jaʼ li kʼusi mas tsots skʼoplale. Li tojobtaseletike jaʼ te likemik talel ta stojolal Dios, jaʼ yuʼun lek me chbat jkuxlejaltik yuʼun mi la jchʼuntike. Yuʼun mu snaʼ xakʼ chopol tojobtaseletik.

Li kʼusi skʼan jpastike jaʼ ti jlikesbetik skʼelele. Li ta yan mantaletik chtale, te chata lekil tojobtaseletik sventa xlik akʼel li Vivliae xchiʼuk ti xakʼupin skʼelele.

¿Kʼuxi xuʼ xakʼupin skʼelel li Avivliae xchiʼuk ti xatabe lek sbalile? Kʼelo batel voʼtos skʼoplal ti jaʼ koltabilik-o li buchʼutik tskʼelik li Vivliae.

Saʼo lek bu xuʼ xachan. Saʼo ti bu tsʼijil noʼoxe. Mi muʼyuk kʼusi chchʼay avoʼonton, mi lek sakjaman xchiʼuk ti bu lek noʼox sikete, mas me lek chavaʼibe smelolal li kʼusi chakʼele.

Lekuk li kʼusi chanope. Li Vivliae jaʼ jun matanal yakʼojbutik li Jtotik ta vinajele. Sventa xatabe lek sbalile, jechuk xapas kʼuchaʼal jun olol ti tskʼan chchanbe stalelal li stote. Mu me teuk xanopnun-o li kʼusi muʼyuk lek chanop ta stojolal li Vivliae xchiʼuk akʼo xchanubtasot li Diose (Salmo 25:4).

Paso orasion kʼalal skʼan toʼox xlik akʼele. Li kʼusi chal li Vivliae jaʼ snopben li Diose, jaʼ yuʼun chtun kuʼuntik ti jaʼuk akʼo skoltautik ta yaʼibel smelolale. Li stuke yaloj ta jamal ti chakʼbe xchʼul espiritu li buchʼu ta skʼane (Lukas 11:13). Li chʼul espiritu taje xuʼ jaʼ skoltaot ta snaʼel li kʼusi tsnop li Jpasvaneje. Ta mas tsʼakale xuʼ xavaʼibe smelolal «kʼalal to ta yut li spʼijil Diose» (1 Korintios 2:10).

Aʼibo lek smelolal li kʼusi chakʼele. Mu jecheʼuk noʼox xakʼel. Nopbo lek smelolal kʼalal chakʼele. Xi xa jakʼbe abae: «¿Kʼusi talelalil la yakʼ ta ilel li buchʼu te chalbe skʼoplal li ta loʼil liʼe? ¿Kʼuxi xuʼ xkakʼ ta jkuxlejal li kʼusi yakal ta jchane?».

Nopo lek li kʼusi chakʼan chatae. Sventa xakʼupin lek skʼelel li Avivliae, akʼo avipal ta xchanel li kʼusitik xuʼ xamuyubaj yuʼune. Xuʼ xavakʼ ta avoʼonton ta yojtikinel mas li Diose, ti jaʼukot jun lekil malalil o ajnilale o yan kʼusitik. Laje xuʼ xa saʼ junantik mantal ta Vivlia ti xuʼ skoltaot ta stael li kʼusi chakʼane.a

Li voʼtos laj xa kalbetik talel skʼoplale xuʼ me skoltaot ta slikesel skʼelel li Avivliae, pe ¿kʼusi stakʼ xapas sventa masuk to xakʼupin skʼelel li Avivliae? Li ta yan mantal chtale oy to me yan tojobtaseletik te.

¿Chakʼ van chʼaj skʼelel? ¿Kʼupil van sba? ¿Kʼu yelan chakʼan ti chakʼel li Avivliae? Taje jaʼ me ti kʼu yelan oy ta avoʼonton skʼelele. Kalbetik batel skʼoplal ti kʼuxi xuʼ xakʼupin skʼelel li Avivliae.

Saʼo jlikuk Vivlia ti bu xuʼ xapat avoʼonton yuʼune xchiʼuk ti kʼun noʼox ta aʼiele. Yuʼun mi toj ep kʼopetik chata ti mu xavaʼibe smelolal o jaʼ tstunes li voʼneal kʼopetike, xuʼ me mu xakʼupin skʼelel. Jaʼ yuʼun, saʼo jlikuk Vivlia ti lekuk kʼun ta aʼiel sventa xkʼot ta avoʼontone. Jech noxtok skʼan me stakʼuk xapat avoʼonton yuʼun xchiʼuk ti lekuk tukʼ jelubtasbile.a

Tuneso li kʼusitik achʼ chlokʼanuk tale. Li Vivliae maʼuk noʼox oy kʼuchaʼal ta livroetik, yuʼun xuʼ te xakʼel ta Internet o xuʼ xayales ta komputadora, ta tavleta o ta selular. Jlom Vivliaetike oy kʼusi yichʼoj talel ti chakʼ ti akʼo jkʼeltik yan Vivliaetik li ta jun noʼox versikuloe o ti xuʼ jkoʼoltastik ta yan versikuloetik li kʼusi chal li bu ta jkʼeltike. Pe mi jaʼ noʼox chakʼan chachikintae oy me pasbil gravar noxtok. Oy jlome jaʼo chchikintaik kʼalal chbat ta yabtelik ta karoe, kʼalal chchukʼomajike o kʼalal oy kʼusi yan tspasik ti mu toj persauk batem ta yoʼontonik li kʼusi tspasike. ¿Bu mas lek chavaʼi li voʼote? ¿Kʼu yuʼun mu xapas preva?

Sabo mas yaʼyejal. Oy livroetik o yan kʼusitik ti chalbe mas skʼoplal li Vivliae, taje jaʼ me tskoltaot sventa xatabe mas sbalil kʼalal chakʼele. Jech kʼuchaʼal liʼe, oy mapaetik ti bu chalbe skʼoplal li kʼusitik kʼotanuk ta pasel li ta skʼakʼalil Vivliae, taje jaʼ sventa xanopbe skʼoplal li loʼiletik te ta Vivliae. Jech noxtok, jlom mantaletik ti yichʼoj lokʼesel li ta revista liʼe xchiʼuk li ta jpajinakutik ta Internet jw.org xuʼ me te xata koltael sventa xavaʼibe batel mas smelolal li loʼiletik ta Vivliae.

Jelo ti kʼu yelan chakʼele. Mi chachʼajub yuʼun chavil ti kʼalal chalikes ta slikeb kʼalal to ta slajebe, jaʼ te xlik akʼel ti bu mas lek chavil sventa x-ayan ta avoʼonton skʼelele. Sventa xanabe mas skʼoplal junuk krixchano ti te chalbe skʼoplal li ta Vivliae, xuʼ xatʼuj li buchʼu chakʼan chanabe mas skʼoplale. Li ta rekuadro ti xi sbie: «Ojtikino mas li krixchanoetik ti te chalbe skʼoplal ta Vivliae», xuʼ me skoltaot sventa xavojtikin junuk krixchano ti te chal ta Vivliae. Jech noxtok xuʼ xakʼel li kʼusi chal ta jujuvokʼe o xuʼ xakʼel ti kʼu yelan cholbil talele. ¿Kʼu yuʼun mu xachanbe jtosuk skʼoplal?

Li Vivliae mu xkoʼolaj kʼuchaʼal ta yan livroetik. Yuʼun li Vivliae yichʼoj talel lekil tojobtaseletik ti jaʼ yaloj stuk li Jpasvaneje (2 Timoteo 3:16). Li kʼusi chale xuʼ me skoltaot. Yuʼun xi ta xal stuk li Vivliae: «Yuʼun kuxul li skʼop Diose, oy sjuʼel» (Evreos 4:12). Li livro taje xuʼ me skoltaot ta sventa liʼe: chakʼbot tojobtaseletik ta sventa li kʼusi chanuptan ta jujun kʼakʼale, ta yojtikinel li Diose xchiʼuk li kʼusi chakʼ talel ta mas tsʼakale (1 Timoteo 4:8; Santiago 4:8).

Chakʼ tojobtaseletik sventa li jkuxlejaltik avie. Li Vivliae tstojobtasutik sventa li jkuxlejaltike xchiʼuk ta yan kʼusitik.

• Ti kʼu yelan xkil jbatik xchiʼuk li yantike (Efesios 4:31, 32; 5:22, 25, 28, 33).

• Ta sventa li jkuxlejaltike xchiʼuk ti kʼu yelan chkaʼi jbatike (Salmo 37:8; Proverbios 17:22).

• Ta sventa li jtalelaltike (1 Korintios 6:9, 10).

• Ta sventa li takʼine (Proverbios 10:4; 28:19; Efesios 4:28).a

Jun nupultsʼakal ta Asia laj yakʼik venta ti toj jtunel li tojobtaseletik ta Vivliae. Jech kʼuchaʼal li buchʼu jaʼ to chnupunike, vokol laj yaʼiik ti lek xil sbaik li ta snupunelike xchiʼuk ti lekuk skʼopon sbaike. Pe jaʼ lik yakʼ ta xkuxlejalik li kʼusi tskʼelik ta Vivliae. ¿Kʼusi kʼot ta pasel un? Li malalil ti Vicent sbie, xi chale: «Li kʼusi la jchan ta Vivliae, jaʼ la skoltaun sventa ta kʼanelaluk jchapan li vokolil ta jnupunele. Kʼalal laj kakʼ ta jkuxlejalkutik li beiltaseletik taje, jaʼ laj yakʼ jmuyubajelkutik». Li ajnilal ti Annalou sbie, xi chale: «Kʼalal ta jchankutik li loʼiletik ta Vivliae jaʼ skoltaojunkutik talel. Li avie, jaʼun xa jun ajnilal ti ximuyubaj noʼoxe xchiʼuk ti jmoj li kʼusi ta jkʼan ta jta ta jkuxlejalkutike».

Chkoltavan ta yojtikinel li Diose. Ti kʼusi laj xa yal ta sventa snupunel li Vicent, xi to chal xtoke: «Koliyal ti ta jchanilan li Vivliae, mas xa nopol oyuk chkaʼi ta stojolal li Jeovae». Li kʼusi laj yichʼ alele, oy kʼusi tsots skʼoplal chakʼ ta chanel: li Vivliae xuʼ me skoltaot ta yojtikinel lek li Diose. Yuʼun maʼuk noʼox chatabe sbalil li tojobtaseletik chakʼe, yuʼun ta me xakʼot ta yamigo. Te chavil ti chalbe skʼoplal jun lekil kuxlejal li ta mas jelavele, ti jaʼ te xuʼ jkʼupintik ta melel li kuxlejale (1 Timoteo 6:19). Taje muʼyuk bu xuʼ xata ta yan livro.

Mi laj alikes skʼelel li Vivliae xchiʼuk mi laj anopes abae, ta me xlekub li akuxlejal avie xchiʼuk chavojtikin lek li Diose. Pe xuʼ van ep kʼusitik chajakʼbe aba kʼalal yakalot xchanele. Mi jech kʼot ta atojolale, teuk me ta ajol li jun slekil kʼelobil ta stojolal li jun j-abtel ta Etiopía ti kuxi oy xa ta sjayibaluk jabile. Li vinik taje, ep tajek li kʼusi tskʼan tsnaʼ ta sventa li Vivliae. Li yajchankʼop Jesus ti Felipe sbie, la sjakʼbe mi chaʼibe smelolal li kʼusi yakal tskʼele, vaʼun xi la stakʼe: «¿Kʼuxi xa noʼox chkaʼibe smelolal ta melel mi muʼyuk buchʼu tsbeiltasune?».b Vaʼun, laj yakʼ ti akʼo xkoltaat yuʼun li Felipe, ti jaʼ jun lekil jchanubtasvaneje (Echos 8:30, 31, 34). Mi chakʼan chavaʼibe lek smelolal li Vivlia eke, ta xkalbotkutik avaʼi ti xanojes li kʼusi chichʼ kʼanel ta jpajinakutik ta Internet ta jw.org o xuʼ xatsʼibaj batel ti bu mas nopol xkom avuʼun ti bu chal li revista liʼe. Jech noxtok xuʼ xajakʼbe junuk stestigo Jeova ti bu nakalote o xuʼ xabat li ta Salon sventa Tsobobbaile. Ta xkalbotkutik ti akʼo xasaʼ Avivlia li avie sventa xlekub li akuxlejale.