Kʼalal echʼ xaʼox kʼuk sjalile, oy jun vinik ti lik yichʼ ojtikinel lek li ta snail pasobmantale, ti Hamán sbie. Li Asueroe la sbiiltas ta mukʼta yajkoltaobba —laj yakʼbe tsots yabtel xchiʼuk bankilal jtojobtasvanej— xchiʼuk laj yal mantal ti akʼo snijan sbaik ta stojolale (Ester 3:1-4). Manchuk mi tukʼ chakʼ sba ta stojolal ajvalil li Mardoqueoe, pe mi la snijan sbae, tsnop ti xkoʼolaj kʼuchaʼal muʼyuk chichʼ ta mukʼ Dios mi jech la spase. Snaʼoj ti jaʼ jun agaguita li Hamane, ti jaʼ skʼan xal ti jaʼ snitilul li Agage, ti jaʼ ajvalil ta Amaleq ti laj yichʼ milel ta stojolal li tukʼil j-alkʼop Samuele (1 Samuel 15:33). Pe maʼuk noʼox taje, yuʼun li slumal Amaleque toj chopol li kʼusi la spase, jaʼ yuʼun li Jeovae toj chopol laj yil li kʼusi la spasik ta stojolale xchiʼuk li slumale (Deuteronomio 25:19).b ¿Mi ta van skejan sba ta stojolal jun yaj-abtel ajvalil Amaleq li Mardoqueoe? ¡Mi jsetʼuk jech ta spas! Li stalelal li tukʼil judío taje, jaʼ chakʼ jnoptik ta stojolalik li tukʼil yajtuneltak Jeova ti oy xa sjayibal siglo echʼem tale. Manchuk mi oy ta vokol li xkuxlejalike, ta sjunul yoʼonton xi chalike: «Jaʼ tsots scʼoplal baʼyuc ta jchʼunbecutic smantal Dios; mu jaʼuc tscʼan baʼyuc ta jchʼunbecutic smantal cristiano» (Hechos 5:29).