1-3. ¿Kʼusi la spas Jesus kʼalal laj yil ti yakal chikʼubtasik li temploe?

TOJ tsots skʼoplal chil templo ta Jerusalen li Jesuse, yuʼun snaʼoj kʼusi stu ti laj yichʼ vaʼanele. Voʼne xa onoʼox ti jaʼ yichʼobil ta mukʼ Jeova li temploe. Pe li yichʼel ta mukʼ chʼul Dios Jeovae, skʼan ti sakuk xchiʼuk lekuke. Nopo xa noʼox avaʼi kʼu yelan laj yaʼi sba Jesus kʼalal bat ta templo ta 10 yuʼun nisán ta sjabilal 33 ta jkʼakʼaliltik xchiʼuk ti laj yil ti yichʼoj ikʼubtasele. ¿Kʼusi yakal chkʼot ta pasel? (Kʼelo Mateo 21:12, 13.)

² Li ta amakʼ sventa jyanlumetike, li jchonolajeletik xchiʼuk jeltakʼinetik ti xpichʼet noʼox yoʼontonike toj echʼ xa noʼox chilbajinik li buchʼutik chtal yakʼbeik smoton Jeovae.a Li Jesuse «la snuts lokʼel skotol li buchʼutik te chchonolajik xchiʼuk chmanolajik ta temploe, la svalkʼunbe xmexaik li jeltakʼinetike» (koʼoltaso xchiʼuk Nehemías 13:7-9). Li Jesuse tsots laj yalbe mantal li viniketik ti jaʼ noʼox batem ta yoʼonton kʼusi tskʼan stukike, yuʼun la spasik «ta xchʼen j-elekʼetik» li sna Stote. Jech laj yakʼ ta ilel Jesus ti yichʼoj ta mukʼ li temploe xchiʼuk ti kʼusi sventa vaʼanbil-oe. Skʼan jechuk-o sak li yichʼel ta mukʼ Stote.