MANTAL TA SLIKEBALTIK PAJINA: LI SATANASE ¿MI OY TA MELEL?

¿Mi oy li Satanase?

«Kʼalal jaʼo yakal chichʼi te ta El Salvadore, xi chalbun jmeʼ kʼalal muʼyuk ta jchʼun mantale: ‹¡Chtal me yikʼot li Diabloe!›. Vaʼun xi ta jtakʼbee: ‹¡Akʼo taluk!›. Jchʼunoj ta stojolal Dios, pe muʼyuk jchʼunoj ta stojolal li Satanase.» (ROGELIO)

¿Mi jech van chanop kʼuchaʼal tsnop li Rogelioe? ¿Bu jtosukal oy srasonal chavaʼi li kʼusi chalik liʼe?:

• Li Satanase muʼyuk kuxul, jaʼ noʼox jun skʼelobil ta sventa kʼusitik chopol.

• Oy ta melel li Satanase, pe muʼyuk tstikʼ sba ta xkuxlejal li krixchanoetike.

• Li Satanase jaʼ jun tsatsal juʼelal ti mu xvinaj ta kʼelel ti tsloʼla li krixchanoetike.

Jeltos tajek kʼusi tsnopik li krixchanoetike. Pe, ¿buchʼu van oy srason? Mi muʼyuk li Satanase, jaʼ skʼan xal ti lajemik ta loʼlael li buchʼutik xchʼunojik ti kuxule. Mi oy ta melel, pe mi mu stikʼ sba ta jkuxlejaltike, jecheʼ noʼox sibtasbilik li epal krixchanoetike. Tana un, mi kuxul xchiʼuk jaʼ jun jloʼlavanej li Satanase, xuʼ van toj xibal sba.

Jkʼeltik kʼuxi tstakʼ Vivlia li sjakʼobiltak liʼe: ¿Kʼusi jaʼ o buchʼu li Satanase? ¿Mi jaʼ noʼox jun skʼelobil ta sventa kʼusitik chopol o mi jaʼ jun kuxlejal ti mu xvinaj ta kʼelele? Mi kuxul ta melele, ¿mi oy van kʼusi xuʼ spasbot? Mi jeche, ¿kʼuxi xuʼ xachabi aba?

[Lokʼol ta pajina 3]

Jun lokʼol ti chakʼ ta ilel jun anjel ti jipbil yalel tal ti jaʼ skʼoplal li Satanase (Madrid, España)

MANTAL TA SLIKEBALTIK PAJINA: LI SATANASE ¿MI OY TA MELEL?

¿Mi jaʼ noʼox jun skʼelobil ta sventa kʼusitik chopol li Satanase?

Epal krixchanoetike tsnopik ti jaʼ noʼox la jun skʼelobil ta sventa kʼusitik chopol li Satanás o Diablo ti chalbe skʼoplal Vivliae. Pe mi melel taje, ¿kʼu yuʼun chal Vivlia ti loʼilaj xchiʼuk Jesús xchiʼuk Dios li Diabloe? Jchanbetik batel lek skʼoplal.

KʼALAL LOʼILAJ XCHIʼUK JESUSE

Kʼalal jaʼtik toʼox laj yichʼ voʼ li Jesuse, oxib to velta akʼat ta preva yuʼun li Diabloe. Li baʼyele, li Satanase la suj Jesús yoʼ stunes li sjuʼel akʼbil yuʼun Dios sventa stabe sbalil stuk, yuʼun albat ti akʼo skʼatajes ta pan li tone. Ta tsʼakale, albat ti akʼo yakʼ ta xiʼel xkuxlejal sventa labal sba x-ilat yuʼun li krixchanoetike. Ta slajebe, albat ti ch-akʼbat sventain skotol li ajvaliletik ta balumil mi la skejan sba xchiʼuk mi laj yichʼ ta mukʼe. Li Jesuse tsal yuʼun li prevaetike xchiʼuk ta Skʼop Dios la spak skʼoplal yoxibal velta (Mateo 4:1-11; Lucas 4:1-13).

¿Buchʼu van yakal chloʼilaj xchiʼuk li Jesuse? ¿Mi jaʼ van li kʼusi chopol oy ta yoʼontone? Ta melel maʼuk. Li Vivliae chal «ti laj yichʼ pasbel preva scotol jech chac cʼu chaʼal vuʼutique, pero li stuque muʼyuc smul» (Hebreos 4:15). Jech ta melel, «li Cristoe me jutuc muʼyuc smul, me jutuc muʼyuc xʼepalcʼopoj» (1 Pedro 2:22). Li Jesuse maʼuk chloʼilaj xchiʼuk li kʼusi chopol oy ta yoʼontone yuʼun chʼabal kʼusi chopol oy ta stojolal, lek tukʼ li stuke xchiʼuk skotol ora la xchʼunbe smantal Dios, taje chakʼ kaʼitik ti kuxul li buchʼu loʼilaj xchiʼuke.

Pe oy to yan loʼil ti chakʼ ta ilel ti oy ta melel li Diabloe.

• Vuleso ta ajol ti albat yuʼun Diablo ti ch-akʼbat sventain skotol ajvaliletik ta balumil mi la skejan sba xchiʼuk mi laj yichʼ ta mukʼe (Mateo 4:8, 9). Ti muʼyukuk ta melel li Diabloe muʼyuk srasonal li kʼusi albat yuʼun Jesús ti jechuke. Jech xtok, li Jesuse snaʼoj ti oy ep sjuʼel li Satanase.

• Kʼalal laj xaʼox xchiʼin ta loʼil Jesús li Diabloe, bat, vaʼun «la smala cʼusi ora xuʼ ta sqʼuelbe yoʼnton yan velta» (Lucas 4:13). Ti jaʼuk noʼox jun skʼelobil ta sventa kʼusitik chopol li Satanase, mu spas yuʼun li kʼusitik taje, jaʼ noʼox spas yuʼun li buchʼu kuxule.

• Li ta Mateo 4:11 chal ti «ta ora ital jʼalmantaletic» sventa tal spatbeik yoʼonton xchiʼuk skoltaik li Jesuse. Li j-almantaletik taje kuxulik ta melel. Mi jeche, ¿mi oy srasonal ti jnoptik ti muʼyuk kuxul li Diabloe?

KʼALAL LOʼILAJ XCHIʼUK DIOSE

Li xchibal loʼil ta jkʼeltik batele jaʼ ta sventa jun yajtunel Dios ti Job sbie. Te chichʼ albel skʼoplal ti loʼilaj chib velta xchiʼuk Dios li Diabloe. Li ta loʼil taje, li Diose laj yal ti tukʼ yakʼoj sba li yajtunele. Ti kʼu yelan takʼav li Diabloe laj yakʼ ta aʼiel ti jaʼ mas xojtikin li Jobe. Laj yal ti jaʼ noʼox la chtun ta stojolal Dios ta skoj ti oy kʼusi ch-akʼbate xchiʼuk ti Dios eke chakʼbe la skotol sventa tukʼ xakʼ sba ta stojolal. Vaʼun li Jeovae laj yakʼbe permiso sventa spojbe skotol li kʼusitik oy yuʼun li Jobe: li skʼulejale, li xnichʼnabtake xchiʼuk ti akʼo yil svokol ta chamele.a Ta slajebale te vinaj ti jaʼ jun jutkʼop li Diabloe. Yan li Diose laj yakʼbe smoton ta skoj ti kuch yuʼun li yajtunele (Job 1:6-12; 2:1-7).

¿Mi yakal van chloʼilaj xchiʼuk li kʼusi chopol oy ta stojolal li Jeovae? Moʼoj, yuʼun li Vivliae chal ta jamal ti «Diose lec tucʼ ti be yuʼune» (2 Samuel 22:31). Xi to chal xtoke: «Chʼul Dios, Chʼul Dios, jaʼ Chʼul Dios stuc li Cajvaltic ti echʼem svuʼele» (Apocalipsis 4:8). Ti chʼul xie jaʼ skʼan xal ti sake, ti muʼyuk xchopolil ta skoj li mulile. Jaʼ yuʼun, mi chʼul li Jeovae mi jsetʼuk kʼusi chopol oy ta stojolal.

Pe oy jlome chalik ti muʼyuk la bu xkuxi li Jobe xchiʼuk ti nopbil noʼox la li loʼil taje. ¿Mi melel van? Mu meleluk. Oy yantik tekstoetik ta Vivlia ti chal ti kuxi ta melel li Jobe. Li ta Santiago 5:7-11 te chal ti jaʼ jun skʼelobil ta sventa yajtsʼaklomtak Cristo yoʼ tukʼ xakʼ sbaik kʼalal mi la snuptanik vokoliletik xchiʼuk ti jaʼ sventa xpatbat yoʼontonik ti ch-akʼbat smotonik yuʼun Jeova mi kuch yuʼunike. Ti nopbiluk noʼox li sloʼilal Job xchiʼuk li prevaetik laj yakʼ Diabloe muʼyuk chichʼ tabel sbalil jechuk li versikuloetik taje. Jech xtok, li ta Ezequiel 14:14 xchiʼuk 20 te chichʼ albel skʼoplal oxvoʼ viniketik ti tukʼ laj yakʼ sbaike. Li chaʼvoʼike jaʼik li Daniel xchiʼuk Noee, ti kuxiik ta melele. Li yoxvoʼale jaʼ li Jobe, jaʼ yuʼun oy srasonal ti jnoptik ti kuxi ta melel eke. Mi jech kʼot ta pasel ta melele, jaʼ chakʼ kaʼitik ti kuxul ta melel ek li buchʼu laj yakʼ vokolile.

Ta skoj li sprevailtak chal Vivliae, muʼyuk xijnaʼet mi kuxul ta melel li Diabloe. Jaʼ yuʼun, stalel onoʼox ti xi ta jakʼbe jbatike: «¿Mi oy van kʼusi chopol xuʼ spasbun xchiʼuk li kutsʼ kalale?».

¿KʼUSI YAKAL TSPAS LI DIABLOE?

Nopo avaʼi ti chkʼot jtsop j-ilbajinvanejetik ti bu nakalote. ¿Kʼusi van chkʼot ta pasel? Mas xa van xibal sba xchiʼuk chchʼay li slekil talelaltak krixchanoetike. Jaʼ jech ek, nopo avaʼi ti liʼuk nakal li Diablo xchiʼuk spukujtake, ti jaʼik anjeletik ti la stoy sbaik ta stojolal Diose xchiʼuk ti la stsʼakliik li Diabloe. ¿Kʼusi van chkʼot ta pasel? Sventa jtakʼtike, nopo noʼox avaʼi li kʼusitik chlokʼ ta notisia ta spʼejel Balumile.

• ¿Mi mu meleluk ti yakal x-epaj batel majbail, akʼo mi chakʼik persa spajtsanel?

• ¿Mi avakʼoj venta ti yakal x-epaj chʼayob oʼontonal ti yichʼoj espiritismo, akʼo mi oy epal totil meʼiletik ti tsvul yoʼontonik ta skoje?

• ¿Mi avakʼoj venta ti yantik sok batel osil balumil, akʼo mi chakʼik tajek persa sventa mu soke?

• ¿Mi mu jechuk chavil ti oy jtos juʼelal ti tukʼ chikʼ batel ta lajelal li krixchanoetike?

Li Vivliae chakʼ ta ilel ti oy buchʼu chakʼ li vokoliletik taje, xi chale: «Jech ijipat o yalel tal li dragone, jaʼ li chon ta voʼonee, jaʼ li banquilal pucuje, jaʼ li Satanase. Jaʼ li bochʼo tsloʼla scotol cristianoetic ta sbejel banamile. Jʼechʼel ijipatic o yalel tal ta banamil xchiʼuc li jʼalmantaletic yuʼune. [...] Toj abul abaic voʼoxuc ti te to nacaloxuc ta banamil xchiʼuc ta nabe, yuʼun iyal o tal ta atojolic li banquilal pucuje. Ilinem ta ora, yuʼun snaʼ ti mu xa jaluc ch-abteje» (Apocalipsis 12:9, 12). Kʼalal chichʼ kʼelbel li sprevailtake, ep buchʼutik chkʼot ta nopel yuʼunik ti jaʼ sventainoj balumil li Diabloe, ti jaʼ jun kuxlejal ti toj xibal sbae.

Stalel onoʼox ti skʼan ta jchabi jbatik ta stojolal li buchʼu jech tspas taje. Pe, ¿kʼusi xuʼ jpastik? Li ta yan mantale jaʼ tstakʼbutik.

[Tsʼib ta yok vun]

[Lokʼol ta pajina 4]

Li svokol Jobe xchiʼuk ti loʼilaj xchiʼuk Dios li Diabloe maʼuk noʼox nopbil

MANTAL TA SLIKEBALTIK PAJINA: LI SATANASE ¿MI OY TA MELEL?

¿Mi sta-o jxiʼtatik li Satanase?

Mu xvinaj, chʼabal skoloral, mi jaʼuk xkaʼibetik yikʼ xchiʼuk xuʼ mu xkakʼtik venta kʼu yelan chijlaj yuʼun. Taje jaʼ li chʼail (monóxido de carbono) ti chlokʼ ta akʼal o sibake. Ta skotolal li buchʼutik chchamik ta skoj veneno ta spʼejel Balumile, ilbil ti jaʼ chchamik-o li chʼail taje. Pe muʼyuk srasonal sventa xijxiʼutik yuʼun. Oy kʼusitik pasbil sventa xuʼ jnaʼtik xchiʼuk sventa mu kʼusi xibal sba xkʼot ta pasel yuʼun li chʼail taje. Epal krixchanoetike tstunesik jtos alarma sventa tsnaʼik mi oy chʼail, vaʼun oy kʼusi tspasik ta anil mi bakʼe.

Li Satanase xkoʼolaj kʼuchaʼal li chʼail taje: mu xvinaj, toj echʼ xa noʼox xibal sba xchiʼuk vokol chkakʼtik venta li kʼusitik tsokesvan-oe. Pe muʼyuk srasonal sventa xijxiʼutik-o, yuʼun li Diose ep kʼusitik tstunes sventa tskoltautik. Jkʼeltik batel jlomuk.

Tsots skʼoplal ti jtʼuj jtuktike. Xi chal li Santiago 4:7: «Contrainic li pucuje, jech chjatov loqʼuel ta atojolic». Akʼo mi toj tsots sjuʼel li Satanase mu xuʼ yuʼun tsujutik ta spasel li kʼusi mu jkʼantike. Ta jnop jtuktik li kʼusi ta jkʼan ta jpastike. Mi lek tsots li xchʼunel koʼontontike ta me xiktautik li Satanase (1 Pedro 5:9). Li Jesuse jpʼel yoʼonton la spʼaj ti oxib velta pasat ta preva yuʼun li Satanase, jaʼ to ti kʼuxi iktaate (Mateo 4:11). Xuʼ jech jpastik ek.

Ti lek chilutike. Xi chalbutik li Santiago 4:8: «Nopajanic ta stojol li Diose». Taje jamal xvinaj ti oy ta yoʼonton Jeova ti akʼo lek xkil jbatik xchiʼuke. ¿Kʼuxi xuʼ lek xkil jbatik xchiʼuk? Jaʼ ti jchanbetik lek skʼoplal ta Vivliae (Juan 17:3). Kʼalal mas ta jchantik ta stojolal Diose, mas chlik jkʼantik, xchiʼuk kʼalal mas xa jkʼanojtike, mas to me ch-ayan ta koʼontontik chijtun ta stojolal (1 Juan 5:3). ¿Kʼu van yelan chil Jtotik ta vinajel ti jech chkakʼtik persa spasele? Ta slajebale xi chal li Santiagoe: «Jech chnopaj ta atojolic».

Yaloj ti chchabiutike. Li Proverbios 18:10 ta Traducción del Nuevo Mundo xi chale: «Li sbi Jeovae jaʼ jun tayal kʼelob osil ti tsotse. Jaʼ te chbat ta anil li buchʼu tukʼe, xchiʼuk ta xichʼ chabiel». Li buchʼutik chichʼbeik ta mukʼ sbi li sbi Diose xuʼ xnopajik ta stojolal kʼalal tskʼanik chabiele, pe taje maʼuk skʼan xal ti xuʼ jtunestik sventa suertee.

Jun skʼelobil ti lek ta chanele. Li loʼil chal ta Hechos 19:19 ep kʼusi xuʼ jchantik yuʼun. Li ta teksto taje te chalbe skʼoplal li kʼusi la spasik jlom jnaklejetik ta Éfeso ti jaʼ toʼox ochik ta yajtsʼaklom Cristoe. Xi chale: «Ep bochʼotic xchanojic mágia laj yichʼbeic batel li svunal yuʼunique; te la xchiqʼuic ta stojol scotol cristianoetic. Lic yichʼic ta venta cʼu yepal lajem staqʼuinic ta sventa li vune. Jaʼ ilocʼ echʼem ta lajuneb yoxvinic ta mil (50,000) ta sep saquil taqʼuin».a Li yajtsʼaklomtak Cristo taje la xchʼayik skotol li kʼusitik oy yuʼunik ti te tsakal skʼoplal xchiʼuk majiae, akʼo mi toj toyol stojol. ¡Toj lek ta chanel li kʼusi la spasik taje! Yuʼun li avie, mas xa pʼolem li kʼusitik sventa espiritismoe. Bateltike muʼyuk xchopolal yilel li kʼusitik chichʼ pasele o li kʼusitik oye, pe te tsakal skʼoplal xchiʼuk li espiritismoe xchiʼuk jaʼ chnopajik-o li pukujetike. Jaʼ yuʼun, tsots me skʼoplal ti xkiktatik skotol li kʼusitik taje, akʼo mi vokol chkaʼitik (Deuteronomio 18:10-12).

Kʼalal 50 xaʼox sjabilal li Rogelio ti laj kalbetik skʼoplal li ta baʼyel mantale, jaʼ to la xchʼun ti oy ta melel li Satanase. ¿Kʼu yuʼun ti jech xa tsnope? Xi tstakʼe: «Kʼalal la jchan ta sba velta li Vivliae jaʼ to te la jchʼun ti oy ta melel li Satanase. Li kʼusi te la jchane jaʼ skoltaojun sventa jkʼel jba li ta kʼusitik tsokesvan-oe».

¿Mi chakʼupin van ti xakuxi ta jun balumil ti bu muʼyuk xa tsokesvan li Satanase? Maʼuk noʼox jun jecheʼ loʼil. Li Vivliae chal ta melel ti poʼot xa ta xichʼ jipel «ochel ta mucʼta cʼocʼ tsanbil ta azufre» li Satanás ti solel ep sloʼlaoj krixchanoetike (Apocalipsis 20:10). Li kʼokʼ xchiʼuk asufre ti laj yichʼ alel taje jaʼ ta lokʼolkʼop, yuʼun li melel kʼokʼ xchiʼuk asufree mu kʼusi chopol xuʼ spasbe li kuxlejal ti mu xvinaj ta kʼelele, jech oxal jaʼ jun senyail li lajelal ta sbatel osile. Jech ta melel, li Satanase chlaj-o ta sbatel osil. ¡Muʼyuk xa me bu chil svokolik li yajtuneltak Diose!

Yoʼ to muʼyuk chkʼot yorail taje, chano-o batel ta stojolal Jeova xchiʼuk ta sventa li kʼusitik tsnope.b Mi jech chapas-o batele ta me xavil chkʼot yorail ti xi chkaltik ta sjunul koʼontontike: «¡Muʼyuk xa li Satanase!».

[Tsʼibetik ta yok vun]

[Ts’ib ti muk’tik sletraile ta pajina 7]

«[Li kʼusi] la jchan ta [...] Vivliae jaʼ to te la jchʼun ti oy ta melel li Satanase. Li kʼusi te la jchane jaʼ skoltaojun sventa jkʼel jba li ta kʼusitik tsokesvan-oe»

[Lokʼol ta pajina 6]

Li Satanase xkoʼolaj kʼuchaʼal li chʼaile: mu xvinaj xchiʼuk toj echʼ xa noʼox xibal sba

[Lokʼol ta pajina 7]

Li Jeovae chal ti chchabiutike