¿Mi oy jech ajakʼojbe aba taje? Mi oye, mu me atukuk. Oy epal krixchanoetik ta spʼejel Balumil ti jech tsjakʼbe sbaike. ¿Mi xuʼ van jtabetik stakʼobil?

Ta smiyonal noʼox krixchanoetik chalik ti xuʼ jtabetike. ¿Kʼu yuʼun? Yuʼun staojbeik xa stakʼobil ta Vivlia ti stakʼ chʼunele. ¿Mi chakʼan chanaʼ li kʼusi chal Vivliae? Mi jeche, xuʼ van oy ta avoʼonton chachʼam junuk matanal chanubtasel ta Vivlia ti chakʼ li stestigotak Jeovae.a

Oy epal krixchanoetik ti chiʼik jutuk ta xchanel li Vivliae. Oy junantike chalik ti muʼyuk la xokolike, ti toj tsots la ta aʼibel smelolale o mu skʼan xakʼ yeik ta xchanel. Pe oy jlom ti xchʼamojik li chanubtasel ta Vivliae. Jkʼeltik batel li kʼusitik yalojike:

• «Li-ay toʼox ta relijion katoliko xchiʼuk ta protestante, ta jun relijion ti sij sbie, ta jun konvento sventa budista xchiʼuk la jchan Teología li ta universidade. Akʼo mi jech, jlom noʼox la jtabe stakʼobil li kʼusi ta jkʼan ta jnaʼe. Vaʼun kʼot svulaʼanun ta jna jun stestigo Jeova. Toj labal sba laj kil ti ta Vivlia tstakʼbun li kʼusi ta jkʼan ta jnaʼe, jaʼ yuʼun kʼalal laj yalbun mi ta jkʼan chanubtasel ta Vivliae, laj kalbe ti tanae.» (Gill, likem ta Inglaterra.)

• «Solel ep toʼox kʼusitik ta jakʼbe jba ta jkuxlejal, pe li kʼusitik chalbun li jpastor ta jrelijione muʼyuk bu la skoltaun. Pe oy jun stestigo Jeova ti ta Vivlia la stakʼbun li kʼusitik ta jakʼbe jbae. Kʼalal laj yalbun mi ta jkʼan ta jchanbe mas skʼoplale, laj kalbe ti tanae.» (Koffi, likem ta Benín.)

• «Ta jkʼan toʼox ta jnaʼ kʼusi chkʼot ta pasel ta stojolal li animaetike. Jchʼunoj toʼox ti xuʼ oy kʼusi chopol tspasbune, jech xtok ta jakʼbe jba kʼusi chal Vivlia ta sventa taje. Jaʼ yuʼun lik jchan Vivlia xchiʼuk jun kamigo ti jaʼ stestigo Jeovae.» (José, likem ta Brasil.)

• «Lik jkʼel li Vivliae, pe mu xkaʼibe jsetʼuk smelolal. Jun kʼakʼal li stestigotak Jeovae ay svulaʼanikun ta jna xchiʼuk laj yalbeikun lek smelolal jayibuk tekstoetik. Taje jaʼ la stijbun koʼonton sventa jchan batel mas.» (Dennize, likem ta México.)

• «Ta jakʼbe toʼox jba mi oyun ta yoʼonton ta melel li Diose. La jpas orasion ta stojolal li Buchʼu yakʼoj li Vivliae. Li ta yokʼomale, li stestigotak Jeovae ay svulaʼanikun ta jna xchiʼuk laj yalbeikun mi ta jkʼan chanubtasel ta Vivlia, vaʼun la jchʼam.» (Anju, likem ta Nepal.)

Li kʼusitik laj yalik taje jaʼ tsvules ta joltik li kʼusi laj yal Jesuse: «Xmuyubajik noʼox li buchʼutik oy ta sjol yoʼontonik ti chtun yuʼunik mantale» (Mateo 5:3). Jkotoltik oy ta koʼontontik ti xijmuyubajuk noʼoxe, pe jaʼ noʼox Dios xuʼ xakʼ muyubajkutik xchiʼuk xi sbeiltasutik. ¿Kʼuxi tspas? Jaʼ li ta Skʼope, li Vivliae.

¿Kʼuxi xuʼ xanaʼ li kʼusi chal Vivliae? ¿Kʼuxi tskoltaot ta akuxlejal mi laj avojtikin li kʼusi chale? Jkʼeltik batel.

Li stestigounkutik Jeovae jaʼ ojtikinbilunkutik-o ta skoj ti ta jcholkutik mantale. Pe ¿mi anaʼoj ti ta jkoltakutik krixchanoetik ta xchanel Vivlia ta spʼejel Balumile?

Li ta 2014, li stestigotak Jeova ti oyik mas ta vaxakib miyon ta 240 lumetike, laj yakʼik chanubtasel ta Vivlia mas ta baluneb miyon ta jujun u.a Solel toj ep li buchʼutik chichʼik akʼbel chanubtasel ta Vivliae, yuʼun oy junantik lumetik ti mu sta baluneb miyon jnaklejetike.

Sventa xkakʼkutik li chanubtasele, ta jpaskutik jutuk mu 1,500 miyon vunetik jujun jabil ti te van ta vukubuk sien kʼopetike, taje te skʼoplal Vivliaetik, livroetik, revistaetik xchiʼuk foyetoetik. Koliyal li abtelal taje xuʼ xichʼik chanubtasel ta kʼusiuk kʼopal tskʼanik li buchʼutik oy ta yoʼontonike.

LI KʼUSITIK TSJAKʼILANIK TA SVENTA LI CHANUBTASEL TA VIVLIAE

Kʼu yelan li chanubtasele?

Li ta chanune chichʼ albel skʼoplal jeltos mantaletik ta Vivlia. Jech kʼuchaʼal liʼe, li Vivliae chal buchʼu jaʼ li Diose, kʼu yelan stalelal, kʼusi sbi, bu oy xchiʼuk mi xuʼ xijkʼot ta yamigo. Skotol taje chichʼik akʼbel yilik ta Vivlia li jchanunetike xchiʼuk li yan kʼusitik tskʼan tsnaʼike.

Kʼalal chkakʼkutik li chanubtasele jaʼtik onoʼox ta jtuneskutik li livro ¿Kʼusi chchanubtasvan ta melel li Vivliae?b Li livro liʼe laj yichʼ pasel sventa xichʼ koltael krixchanoetik ta yaʼibel smelolal li kʼusi chal ta melel li Vivliae. Oy kapituloetik ti chalbe skʼoplal ta sventa Dios, sventa Jesucristo, ti kʼu yuʼun chkil jvokoltike, ta sventa lajelal, ta sventa orasion xchiʼuk yan kʼusitik.

¿Kʼusi ora xchiʼuk bu chichʼ akʼel li chanubtasele?

Voʼot chaval atuk bu chakʼan xchiʼuk kʼusi ora.

¿Kʼu sjalil jujukoj li chanubtasele?

Jaʼ ti kʼu sjalil xuʼ avuʼune. Oy epal krixchanoetike juntik noʼox ora tskʼanik chanubtasel jujun xemana. Pe oy jlom xtoke jaʼ noʼox lajuneb o voʼlajuneb minuto chchanunajik.

¿Mi chichʼ tojel?

Muʼyuk tojbil li chanubtasele xchiʼuk li vunetik chichʼ tunesele. Yuʼun xi onoʼox laj yalbe yajtsʼaklomtak li Jesuse: «Ta moton la-akʼbatik, jaʼ jech ta moton xavakʼik ek» (Mateo 10:8).

¿Kʼu sjalil chjalij li chanubtasele?

Jaʼ ti kʼu sjalil oy ta avoʼonton chachane. Li livro ¿Kʼusi chchanubtasvan ta melel li Vivliae? yichʼoj 19 kapitulo. Jaʼ yuʼun xuʼ ta kʼunkʼun xachan batel xchiʼuk jaʼ ti kʼusi kapituloal chakʼane.

¿Mi persa skʼan xijkʼot ta stestigo Jeova?

Mu persauk. Li voʼonkutike jnaʼojkutik ti xuʼ stʼuj stuk kʼusi tskʼan chchʼun li jun krixchanoe. Pe kʼalal mi laj avojtikin li kʼusi chal Vivliae xuʼ lek kʼusi chkʼot ta nopel avuʼun.

¿Bu ta tabel mas skʼoplal?

Chatabe mas yaʼyejal ta jpajinakutik ta Internet jw.org/tzo ta sventa li kʼusi ta jpaskutik xchiʼuk li kʼusi jchʼunojkutik ta melele.

¿Bu xuʼ jtsak jbi?

• 

  Xuʼ xakʼan ti oyuk buchʼu svulaʼanote, jaʼ noʼox skʼan xanojes li kʼusi chichʼ kʼanel ta jpajinakutik ta Internet ta jw.org/tzo.

• Xuʼ xatsʼibaj batel xtok xchiʼuk xatak batel ti bu chal ta pajina 2.

• Li yan kʼusi stak xapase jaʼ ti xasabe snumeroal stelefonoik li stestigotak Jeova ti bu nakalote, vaʼun kʼopono batel.