Vaʼun chaʼa, ¿mi lek chil paskʼopetik li Diose? Mi leke, ¿bu van jotukal chakʼ sba li ta paskʼopetik avie? Ti xanabe stakʼobil taje tskoltaot yoʼ xjel li kʼusi chanop ta sventa li paskʼope. Jech kʼuchaʼal liʼe, ¿kʼusi chanop ti jech lek chil Dios li paskʼope xchiʼuk ti tskoltaot spasele? ¿Mi mu jechuk ti jun avoʼonton chavaʼi aba ta skoj ti anaʼoj ti chkuch avuʼune? Pe, ¿kʼu van yelan chavaʼi aba ti jaʼ koltabilik yuʼun Dios li avajkontratake? ¿Mi jech-o van li kʼusi chanop ta sventa li paskʼope?

Pe oy to kʼusi mas tsots skʼoplal. Yuʼun mi la anaʼ li kʼusi tsnop Dios ta sventa li paskʼope xuʼ xjel li kʼusi chanop ta stojolale. ¿Kʼu yuʼun ti jech chkaltike? Mi oy aviloj avokol ta skoj li paskʼope, jech kʼuchaʼal kʼotem ta stojolalik ta smiyonal noʼox krixchanoetike, ta van xakʼan chanaʼ mi te stikʼoj sba li Diose xchiʼuk mi jaʼ chakʼ ti oyuk li paskʼope. O xuʼ van chajakʼbe aba mi oy ta yoʼonton li buchʼutik chil svokolike.

Pe labal to van chavaʼi ti chal Vivlia ti mu jechuk tspas li Diose. Jech xtok, chal ti muʼyuk jelem-o li kʼusi tsnop ta sventa paskʼope. Jkʼeltik batel kʼusi chal Vivlia li kʼusi toʼox tsnop Dios ta sventa li paskʼopetik ta voʼnee xchiʼuk kʼalal ay ta Balumil li Jesukristoe. Li ta mantaletik liʼe tskoltautik yoʼ xkaʼibetik smelolal kʼusi tsnop Dios ta sventa li paskʼopetik avie xchiʼuk chakʼ jnaʼtik mi chlaj skʼoplal ta jelavel li paskʼope.

Ti la spas kʼop xchiʼuk j-ejiptoetik li Diose chakʼ iluk ti oy jlom paskʼopetik ti muʼyuk chopol chile. Jech xtok, oy junantik velta ti laj yakʼ akʼo spasik kʼop xchiʼuk yan lumetik li jteklum Israele. Jech kʼuchaʼal liʼe, laj yalbe mantal li j-israeletik ti akʼo spasik kʼop xchiʼuk li jkanaanetik ti toj echʼ xa noʼox chopolike (Deuteronomio 9:5; 20:17, 18). Li ajvalil Davide albat yuʼun Dios ti akʼo xbat stsak ta kʼop li xibal sba jfilistaetike xchiʼuk albat kʼusi skʼan spas sventa xkuch yuʼun li paskʼope (2 Samuel 5:17-25).

Li loʼiletik ta Vivlia taje chakʼ iluk ti kʼalal lajik ta ilbajinel li j-israeletike, li Diose laj yakʼ ti xbatik ta paskʼop sventa xchabi li slumale xchiʼuk sventa mu xchʼay li melel yichʼel ta mukʼe. Pe oy oxtos kʼusi skʼan tsakel ta venta ti kʼu yuʼun laj yakʼ ti oyuk paskʼop li Diose, taje ta jchanbetik batel skʼoplal.

1. JAʼ NOʼOX CHAL STUK DIOS BUCHʼUTIK CHBATIK LI TA PASKʼOPE. Oy jun veltae, li Diose xi laj yalbe li j-israeletike: «Mu persauc chapasic pleito». ¿Kʼu yuʼun ti jech laj yalbee? Yuʼun jaʼ tspas kʼop stuk li Diose (2 Crónicas 20:17; 32:7, 8). Ep ta velta jech la spas kʼop li Diose, june jaʼo kʼalal la stsak ta kʼop li j-ejiptoetike. Ta yan velta xtoke, li Diose laj yalbe slumal ti akʼo xbatik ta paskʼop sventa xuʼuninik li Albil Balumile xchiʼuk sventa spakbeik skʼoplal (Deuteronomio 7:1, 2; Josué 10:40).

2. JAʼ NOʼOX CHAL STUK DIOS KʼUSI ORA TSLIKESIK LI PASKʼOPE. Li yajtuneltak Dios ta voʼnee, skʼan oyuk smalael yuʼunik ta sventa ti kʼusi ora chal Dios yoʼ stsakik ta kʼop li chopol jteklumetik ti te oy ta spat xokonike. Mu xuʼ xbatik ta paskʼop mi muʼyuk albilike. Mi batike muʼyuk chkoltaatik yuʼun li Diose. Jech xtok, li ta Vivliae chal ti kʼalal mi oy buchʼu tspas sba ta mantal stuk sventa chbat li ta paskʼope, toj echʼ xa noʼox chopol li kʼusi chkʼot ta pasele.a

3. 

   LI DIOSE MU SKʼAN TI OY BUCHʼU XCHAME. Li Jeova Diose jaʼ «li nioʼ sventa cuxlejale» xchiʼuk jaʼ smeltsanoj li krixchanoetike (Salmo 36:9). Mu skʼan ti oyuk buchʼu xchame yuʼun skʼanoj li kuxlejale. Chopol ta aʼiel, pe oy buchʼutik ti tsnopik kʼuxi xuʼ chilbajinik o tsmilik li yan krixchanoetike (Salmo 37:12, 14). Oy junantik veltae, li Diose yakʼoj oyuk paskʼop sventa tspajtsan li choplejale. Akʼo mi jech, kʼalal la stak batel ta paskʼop j-israeletik li Diose, skotol velta laj yakʼ ta ilel xkʼuxul yoʼonton xchiʼuk smalael yuʼun ta stojolal li yajkontra Israele (Salmo 86:15). Jtos ti kʼu yelan laj yakʼ ta ilele, jaʼ ti laj yalbe j-israeletik ti skʼan baʼyuk xalbeik li jteklum «me tscʼanic ti muʼyucuc [pleito]» yuʼunike, skʼan sjel stalelalik li jnaklejetike, vaʼun muʼyuk tspasik kʼop (Deuteronomio 20:10-13). Xi jamal chal li kʼusi oy ta yoʼontone: «Mu jcʼan ti te xcuchoj smul chcham li jpasmulile; jaʼ ta jcʼan ti acʼo scomtsan li chopol be stamoje yuʼun jech xuʼ chcuxi» (Ezequiel 33:11, 14-16).b

Jech kʼuchaʼal laj xa jchantik tale, li ta voʼnee, li Diose tstunes toʼox li paskʼop sventa tslajesbe skʼoplal li choplejale xchiʼuk li utsʼintaele. Pe jaʼ noʼox stuk Jeova xuʼ xal kʼusi ora xchiʼuk buchʼutik xuʼ xbat li ta paskʼope, maʼuk chal jun krixchano. ¿Pe mi tskʼupin van tajek Dios li paskʼope xchiʼuk ti muʼyuk xkʼuxul yoʼonton tsmil sbaike? Moʼoj, yuʼun li stuke chopol chil li utsʼintavaneje (Salmo 11:5). Pe ¿mi jel snopben Dios kʼalal lik xchol mantal ta baʼyel siglo li Xnichʼone?

¿Kʼu yuʼun muʼyuk bu la spoj li judaetik jech kʼuchaʼal la spas ta voʼnee? ¿O kʼu yuʼun muʼyuk laj yakʼ ti akʼo spak skʼoplalike? ¿Mi yuʼun van jel xa li kʼusi tsnop Dios ta sventa li paskʼope? Moʼoj. Li kʼusi jele jaʼ ti kʼu yelan xil sbaik xchiʼuk Dios li judaetike, yuʼun muʼyuk la xchʼamik ti jaʼ Mesias li Jesukristoe (Echos 2:36). Ta skoj taje li Diose muʼyuk xa lek laj yil xchiʼuk maʼuk xa stʼujbil lumal kom (Mateo 23:37, 38).

Li jteklum Juda xchiʼuk li Albil Balumile muʼyuk xa bu chabiat yuʼun Dios. Jech oxal, li judaetike mu xa xuʼ xalik ti te chiʼinbilik yuʼun Dios kʼalal mi batik ta paskʼope. Jech kʼuchaʼal laj yal li Jesuse, li jteklum Israele muʼyuk xa lek ilatik, jaʼ yuʼun muʼyuk xa koltaatik. Vaʼun, li buchʼu xa lek chil li Diose jaʼ xa jun achʼ jteklum, li Vivliae tsbiiltas «li Israel yuʼun Diose» (Galatas 6:16; Mateo 21:43). «Li Israel yuʼun Diose» jaʼ jtsop yajtsʼaklomtak Kristo ti tʼujbilik yuʼun Diose. Jaʼ yuʼun xi albatik li ta baʼyel sigloe: «Li avie steklumaloxuk xa Dios» (1 Pedro 2:9, 10).

Mi jaʼ xa steklumal Dios kʼot li yajtsʼaklomtak Kristoe, ¿mi laj van spoj ti kʼalal lajik ta utsʼintael ta stojolal Romae xchiʼuk kʼalal tsakatik ta kʼope? ¿Mi laj van yakʼ ti spak skʼoplalik ta stojolal li yajkontraike? Muʼyuk. Pe, ¿kʼu yuʼun? Jech kʼuchaʼal la jchantik ta yan mantale, jaʼ noʼox chal stuk Dios kʼusi ora xuʼ xbatik li ta paskʼope. Li ta baʼyel sigloe, li Diose muʼyuk bu la spas kʼop sventa tspoj li yajtsʼaklomtak Kristoe xchiʼuk muʼyuk bu laj yalbe ti xbatik ta paskʼope. Lek jamal xvinaj ti maʼuk to yorail sventa tslajesbe skʼoplal choplejal xchiʼuk utsʼintael li Diose.

Li baʼyel yajtsʼaklomtak Kristo taje skʼan oyuk smalael yuʼunik ti kʼusi ora chpojatik yuʼun li Diose, jech kʼuchaʼal la spasik li tukʼil yajtuneltak Dios ta voʼnee. Kʼalal mu to chkʼot yorail taje, li Diose muʼyuk laj yakʼ permiso ti xbat spasik kʼope. Li Jesukristoe lek jamal laj yal ta sventa taje; muʼyuk la stijbe yoʼonton li yajchankʼoptak yoʼ xbatik ta paskʼope. Yuʼun jaʼ noʼox xi laj yalanbee: «Kʼanik-o me li avajkontratakike xchiʼuk pasik-o me orasion ta stojolal li buchʼutik chilbajinoxuke» (Mateo 5:44). Kʼalal laj yalbe skʼoplal ti chichʼ jinesel li Jerusalen ta stojolal jromaetike, li Jesuse muʼyuk laj yalbe yajchankʼoptak ti akʼo spasik kʼope, moʼoj, kʼajomal laj yalbe ti xjatavike, taje jaʼ li kʼusi la spasike (Lukas 21:20, 21).

Jech xtok, li jtakbol Pabloe xi la stsʼibae: «Mu me xapak akʼoplalik, [...] yuʼun xi tsʼibabile: ‹Voʼon oy ta jba ta jpak; voʼon chkakʼbe stojol, xi li Jeovae›» (Romanos 12:19). Li Pabloe jaʼ laj yalbe skʼoplal li kʼusi laj yal Dios ta voʼnee, ti te tsʼibabil ta Levítico 19:18 xchiʼuk Deuteronomio 32:35. Laj xa kiltik tal ti kʼalal chbat stsakik ta kʼop yajkontraik li j-israeletik ta voʼone chkoltaatik toʼox yuʼun Dios. Li kʼusi la xchaʼal Pabloe, chakʼ iluk ti muʼyuk bu jelem-o li kʼusi Dios tsnop ta sventa li paskʼope. Li ta baʼyel sigloe jech-o tsnop ti jaʼ sventa tspakbe-o skʼoplal yajtuneltak li paskʼope xchiʼuk ti jaʼ sventa tslajesbe-o skʼoplal li choplejale xchiʼuk li utsʼintaele. Jech kʼuchaʼal kʼot ta pasel ta voʼnee, jaʼ Jeova chal stuk kʼusi ora xchiʼuk buchʼutik chbatik li ta paskʼope.

Lek jamal xvinaj ti muʼyuk laj yakʼ permiso Dios ti spasik kʼop li baʼyel yajtsʼaklomtak Kristoe. Li avie, ¿mi oy van jtsopuk krixchano liʼ ta Balumil ti ch-akʼbatik bendision yuʼun Dios kʼalal chbatik ta paskʼope? ¿Mi kʼot xa van yorail sventa tspoj yajtuneltak li Diose? ¿Kʼusi van tsnop Dios ta sventa li paskʼopetik avie? Li oxib sjakʼobil taje ta jchantik li ta yan mantal chtale.

Mu me teuk xchibet avoʼonton: li Diose yiloj li vokoliletik oy ta balumile xchiʼuk oy me kʼusi tspas sventa chakʼbe slajeb (Salmo 72:13, 14). Li ta Vivliae chal ti ch-akʼbat spatobil yoʼonton yuʼun Dios li buchʼutik ‹chil tsots svokolike›. ¿Kʼusi ora tspas taje? Jaʼo «kʼalal mi vinaj ta vinajel [...] li Kajvaltik Jesus xchiʼuk li yaj-anjeltak ti oy sjuʼelike. Vaʼun jaʼo chakʼbe kastigo li buchʼutik mu xojtikinik Diose xchiʼuk li buchʼutik mu xchʼunik li kʼusi chal lekil aʼyejetik ta sventa li Kajvaltik Jesuse» (2 Tesalonisenses 1:7, 8). Li kʼusi ora chvinaj ta vinajel li Jesuse jaʼ to me ta tsʼakal, jaʼ li ta «paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune», ti ojtikinbil xtok kʼuchaʼal Armajedone (Apokalipsis 16:14, 16).

Kʼalal mi kʼot skʼakʼalil taje, li Diose maʼuk chakʼ akʼo spas kʼop li krixchanoetike, moʼoj, yuʼun jaʼ tspas kʼop li Jesukristo, ti jaʼ li Xnichʼon Diose xchiʼuk li kuxlejaletik ti mu xvinaj ta kʼelel sventa chakʼbe slajeb li chopol krixchanoetike. Li kuxlejaletik ti mu xvinaj ta kʼelele jaʼ chakʼbe slajeb li ilbajinele (Isaías 11:4; Apokalipsis 19:11-16).

Jech kʼuchaʼal chkiltike, li Diose muʼyuk jelem-o ti kʼu yelan chil li paskʼopetike. Yuʼun jaʼ tstunes sventa tslajesbe-o skʼoplal li choplejal xchiʼuk li utsʼintaele. Jech kʼuchaʼal ta voʼnee, jaʼ noʼox Jeova chal stuk kʼusi ora xchiʼuk buchʼutik chbatik li ta paskʼope. Laj xa kiltik ti yaloj xa Dios ti chakʼbe slajeb li choplejale xchiʼuk ti tspakʼbe skʼoplal li buchʼutik chlajik ta utsʼintaele, xchiʼuk ti jaʼ tspas kʼop li Jesukristoe. Taje chakʼ iluk ti Diose muʼyuk lek chil jtosukal paskʼop li ta jkʼakʼaliltike, akʼo me oy srasonal yileluk ti chichʼ pasele.

Kalbetik junuk skʼelobil: nopo ti chlik smaj sbaik chaʼvoʼ keremetik ti xchiʼil sbaik ta vokʼel kʼalal chʼabal te oy li stotike. Tspajtsan sbaik jlikel xchiʼuk tskʼoponik batel ta telefono li stotike. Li june chal ti jaʼ baʼyel lik majvanuk li xchiʼil ta vokʼele, li jun xtoke chal ti jaʼ la baʼyel lik utilanvanuk li stuke. Xchaʼvoʼalik tskʼanik ti akʼo xchʼunbat yuʼun stotik li kʼusi chalike. Pe, kʼalal chikintabatike, albatik ti mu xa smaj sbaike xchiʼuk ti akʼo smalaik ti sut tale. La xchʼunik kʼuk sjalil, pe lik smaj sbaik yan velta. Kʼalal kʼot li stotike, ilin ta stojolalik, ta skoj ti muʼyuk la xchʼunik mantale akʼbatik kastigo.

Li avie, li lumetik ti tspasik kʼope nopolik noʼox tskʼanbeik koltael Dios. Pe li stuke muʼyuk tstikʼ sba li ta paskʼopetik taje. Yuʼun li Vivliae xi chale: «Mu me chopoluk kʼusi xapakbe abaik sutel» xchiʼuk xi to chale: «Mu me xapak akʼoplalik» (Romanos 12:17, 19). Jech xtok, li Diose yalojbe krixchanoetik ti oyuk smalael yuʼunik sventa jaʼuk xpojvan li stuke, taje jaʼ to chkʼot ta pasel ta Armajedon (Salmo 37:7). Muʼyuk lek chil ti tstsak sbaik ta kʼop li lumetike; xkoʼolaj kʼuchaʼal tspas sbaik ta mantal stukik chil. Jaʼ yuʼun, li ta Armajedone chakʼ iluk ti chopol chil li paskʼopetike xchiʼuk chakʼbe slajeb ta spʼejel Balumil (Salmo 46:9; Isaías 34:2). Ta melel, li Armajedone jaʼ tslajesbe skʼoplal skotol li paskʼopetike.

Li Ajvalilal yuʼun Diose chichʼ talel epal bendisionetik, li jtose jaʼ ti tslajesbe skʼoplal li paskʼopetike. Li Jesuse xi laj yalbe skʼoplal ta jun orasion li ajvalilal taje: «Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele» (Mateo 6:10). Pe maʼuk noʼox tslajes li paskʼopetike, yuʼun tslajesbe skʼoplal xtok li buchʼutik tslikesike (Salmo 37:9, 10, 14, 15).a Mu labaluk ta aʼiel ti ta xa jkʼantik ti akʼo xichʼ talel bendisionetik li Ajvalilal yuʼun Diose (2 Pedro 3:13).

Li Ajvalilal yuʼun Diose, ¿mi jal to van skʼan xakʼbe slajeb skotol li vokolile, li ilbajinele xchiʼuk li choplejale? Ti kʼu yelan chkiltik chkʼot ta pasel li albil kʼopetik ta Vivliae, chakʼ iluk ti «ta slajebal xa [kʼakʼal]» kuxulutik li ta chopol balumile (2 Timoteo 3:1-5).b Jutuk xa tajek skʼan sventa xlik spas mantal liʼ ta Balumil li Ajvalilal yuʼun Diose, taje jaʼo chkʼot ta pasel kʼalal mi echʼ li Armajedone.

Li buchʼutik chlajik li ta paskʼop ta Armajedone, laj xa kiltik tal ti jaʼik li buchʼutik muʼyuk chchʼunik li «lekil aʼyejetik ta sventa li Kajvaltik Jesuse» (2 Tesalonisenses 1:8). Pe teuk me ta ajol ti muʼyuk lek chil Dios ti xcham li krixchanoetike, akʼo mi chopol li kʼusitik tspasike (Ezequiel 33:11). Ta skoj ti «mu skʼan ti oy buchʼu» xlaj li ta paskʼop ta Armajedone, oy ta yoʼonton ti ‹xichʼ cholel ta spʼejel balumil li lekil aʼyejetik sventa xaʼi skotol jteklumetik› kʼalal mu to chtal li slajebe (2 Pedro 3:8, 9; Mateo 24:14; 1 Timoteo 2:3, 4). Koliyal ti chcholik mantal ta spʼejel Balumil li stestigotak Jeovae, li krixchanoetike xuʼ xojtikinik li Diose, xchʼunik li lekil aʼyejetik ta sventa li Kajvaltik Jesuse xchiʼuk ti xkuxiik ta jun balumil ti bu chʼabal xa paskʼope.