Skarta li Jtsop Jbeiltasvaneje

Kuni ermanotak:

«Skotol ora ta jtojbekutik ta vokol Dios kʼalal ta jpaskutik tal orasion ta atojolalik akotolike, yuʼun mu xchʼay jutebuk ta jolkutik li atukʼil abtelike, li kʼusitik chapasik ta skoj ti chakʼanvanike xchiʼuk ti kuchem avuʼunik ta skoj ti apatoj avoʼontonik ta stojolal Kajvaltik Jesukristo ta yeloval li Jdiostik ti jaʼ Jtotike.» (1 Tes. 1:2, 3.) Li kʼusi chal li teksto taje, ¡jaʼ me jech chkaʼikutik ta atojolalik! Ta jtojbekutik tajek ta vokol Jeova ta skoj li alekil abtelike xchiʼuk ti jmoj tsobolutike.

Li echʼ jabile solel ep la apasik ‹tukʼil abtelal› ta sventa li Ajvalilal yuʼun Dios ta «skoj ti chakʼanvanike». Ep buchʼutik oy kʼusi laj apasik sventa xacholik mas li mantale. Jech kʼuchaʼal liʼe, oy jlom ti bat tunanik ta yan lum o te noʼox ta alumalik ti bu chtun mas jcholmantaletike. Oy jlome la acholik mantal ta buyuk noʼox xchiʼuk grupo. Ep buchʼutik tunik ta prekursor auksiliar li ta yorail Snaʼobil slajel Kristoe, kʼalal jaʼo ay vulaʼanvanuk li jkʼelvanej ta sirkuitoe o li ta kampanya ti stuk noʼox jech laj yichʼ pasel ta agosto ta 2014. Ta jkʼupil kʼoptaotkutik ti ta sjunul avoʼontonik chatunik ta stojolal Jeova ti bu kʼalal xuʼ avuʼunike (Kol. 3:23, 24). Ta skoj li «atukʼil abtelike» ta jtojbekutik tajek ta vokol li Jdiostike.

Jech xtok ta jtojkutik ta vokol li kʼusitik chapasik ta sventa li svaʼanel naetik ti chtun sventa spasbel yabtel Diose. Ta skoj ti yakal chchʼi batel li slumal Jeovae, toj jtunel li naetik taje (Is. 60:22). Li echʼ jabile kʼot ta 8,201,545 jcholmantaletik xchiʼuk te van 9,499,933 laj yich akʼel estudio jujun u. Ta skoj ti yantik xij-epajutike, skʼan mukʼibtasel xchiʼuk achʼubtasel epal Beteletik. Jech xtok, skʼan vaʼanel mas Salonetik sventa Tsobobbail. Xchiʼuk li ta epal lumetike skʼan vaʼanel naetik ti bu xuʼ xnakiik li jelubtasej kʼopetik sventa teuk x-abtejik ti bu jech chkʼopojik li krixchanoetike.

Ta sventa li kʼusi laj xa kaltik tale, ¿mi oy van kʼusi xuʼ jpastik sventa xijkoltavan li ta abtelal taje? Xuʼ van oy jlom ti xuʼ xijkoltavan ta abtele. Akʼo mi jnaʼtik jtosuk abtelal ta sventa svaʼanel na o muʼyuk, pe jkotoltik xuʼ xkakʼtik «li cʼusitic oy [kuʼuntike]» (Prov. 3:9, 10). Kʼalal skʼan toʼox xichʼ vaʼanel li chʼulna pasbil ta nukule, li j-israeletike toj ep laj yichʼik tal li kʼusitik chtune jaʼ yuʼun laj yichʼik albel ti mu xa xichʼik tale (Éx. 36:5-7). Li skʼelobil taje tstij koʼontontik sventa jechuk jpastik ek. Kuni ermanotak, li kʼusitik chapasik ta sventa li chʼul abtelal taje jaʼ yan srasonal sventa jtojbekutik ta vokol li Jeovae.

Li kʼusi mas chkʼot ta koʼontonkutike jaʼ kʼalal chkilkutik kʼu yelan chkuch batel yuʼun svokolik li ermanoetike. Jun skʼelobile, leʼ xa tal ta 1950, li stestigotak Jeova ta Corea del Sur ti keremik toe jelajtik kʼu sjalil yichʼojik tikʼel ta chukel ta skoj ti mu skʼan spasik li servisio militare. Voʼne xa tajek kuchem tal yuʼunik epal ermanoetik li vokolil taje. Tstsatsubtas tajek xchʼunel koʼontonkutik ti kʼu yelan kuchem tal yuʼunike.

Li ta Eritreae, oy oxvoʼ kermanotaktik ti mas xa ta jtob jabil te tikʼilik ta chukele. Jech xtok, oy jlom ermanaetik ti yichʼojik tikʼel ta chukel kʼuk sjaliluk xchiʼuk yalabike. Akʼo mi ep kʼusitik yichʼoj pasel sventa xlokʼik li ta chukele, pe muʼyuk to chapajem li avie. Manchuk mi jech, li kermanotaktik taje tukʼ-o yakʼoj sbaik ta stojolal Jeova akʼo mi oy bakʼintik ti solel tsots chil svokolike. Ta onoʼox me jpaskutik orasion ta stojolalik (Rom. 1:8, 9).

Melel onoʼox ti mu akotolikuk tikʼiloxuk ta chukel ta skoj li xchʼunel avoʼontonike. Pe chavil avokolik ta skoj li yijubele, li chameletike, ti chkontrainvan avutsʼ avalalik ta skoj ti maʼuk jchʼunolajeletike xchiʼuk yan vokoliletik ti voʼoxuk noʼox anaʼojik kʼusi jaʼe. Akʼo mi jech, tukʼ chatunik-o ta stojolal Jeova (Sant. 1:12). ¡Toj lek ti jech chapasike! Ti tukʼ chavakʼ abaike jaʼ yan srasonal sventa jtojbekutik ta vokol li Jeovae.

Li atukʼil abtelike, li kʼusitik chapasik ta skoj ti chakʼanvanike xchiʼuk ti kʼu yelan chkuch batel avuʼunik li avokolike, jaʼ me srasonal sventa xkalbetik «colaval [...] ti Diose, yuʼun oy slequil yoʼnton» (Sal. 106:1, Ch). Jkʼanojotkutik tajek xchiʼuk ta jpaskutik orasion ta atojolalik sventa stsatsubtasoxuk li Jeovae, ti xikoxuke xchiʼuk ti xakʼboxuk bendision sventa xatunik ta stojolal ta sbatel osile.

Li avermanotakik

Jtsop Jbeiltasvanej yuʼun Stestigotak Jeova