TI MOISESE tal sabe sveʼel xchijtak kʼalal to ta vits Horeb. Te la jyil jpets tsʼiʼlel ti xleblun skʼakʼale, ¡pe mi jaʼuk bu chkʼakʼ la jyil!

¡Toj labal sba chkil!, xi li Moisese. Jaʼ lek chbat jkʼelkik, xi. Kʼalal nopaj batele, te lokʼ tal yechʼomal eil li ta jpets tsʼiʼlele, xi la jyale: Mu xa xa nopaj tal, xi. Lokʼo li axonobe, yuʼun chʼul li balumil ti bu oyote. Jaʼ Dios ti chkʼopoj ta jun anjele, jaʼ yuʼun la smak sat li Moisese.

Vaʼun ti Dios ne, xi la jyale: Kiloj ti yakal ta xichʼ svokol te ta Egipto li jlumale. Ta jkolta, jech oxal ta jtakot batel sventa cha lokʼes tal li ta Egiptoe. Li Jeovae ta xikʼ batel yaʼi ta jun alakʼ sba yosilal Canaán li slumale.

Pe li Moisese xi la stakʼe: Li voʼone mu kʼusi xi tun-o, xi. ¿Kʼuxi xa noʼox ta spas kuʼun taje? Ati jech xi bate; li j-israeletike xi chi yalbikune: ¿Buchʼu la stakot tal? ¿Kʼusi ta xkal un bi?, xi.

Xi cha vale, xi li Diose. Li Jeova, jaʼ li Dios yuʼun jmoltotaktik ta voʼnee, jaʼ li Dios yuʼun Abraham, Isaac, xchiʼuk li Jacobe, jaʼ la stakun talel liʼ ta atojolike, uto. Oy to kʼusi la jyal ti Jeovae: Liʼe jaʼ jbi ti te oy-o sbatel osile.

Pe li Moisese xi la stakʼe, ¿ti jech mu xi xchʼunbeik kʼalal mi la jkal ti voʼot la atakun batel ne?

Li Diose xi la sjakʼe, ¿kʼusi li te atsakoje?

Jnamteʼ, xi li Moisese.

Telano ta lum, xi li Diose. Kʼalal jech la spas ti Moisese, li snamteʼe kʼataj ta jkot kiletel chon. Vaʼun ti Jeovae la to jyakʼbe yil yan skʼelobil juʼelal li Moisese. Xi la jyale: Tikʼo akʼob li ta yut akʼuʼe, xi. Ti Moisese la stikʼ ochel, pe kʼalal la slokʼes li skʼobe, ¡la jyil ti solel sakloman kʼuchaʼal taive! Ip ta kʼaʼemal chamel yileluk. Ta tsʼakal ne ti Jeovae la jyakʼbe sjuʼel Moisés sventa tspas li yoxibal skʼelobil juʼelale. Ta slajebal ne xi la jyal ti Diose: Li skʼelobiltak juʼelal liʼe jaʼ sventa chchʼun li j-israeletik ti voʼon la jtakot batele.

Ta tsʼakal ne sut batel ta sna ti Moisese, jech kʼot yalbe li Jetroe: Avokoluk akʼo batkun ta Egipto sventa chba jkʼel kʼu x-elan oyik li kutsʼ kalaltake. Batan chaʼa x-utat, vaʼun ti Moisese la stam batel sbe ta Egipto.

KʼALAL sut batel ta Egipto li Moisese, kʼot xchapbe Aarón li skʼelobiltak juʼelale. Kʼalal Moisés xchiʼuk Aarón la jyakʼbeik yil skʼelobiltak juʼelal li j-israeletike, skotol la xchʼunik ti te chiʼinbilik yuʼun ti Jeovae.

Vaʼun ti Moisés xchiʼuk Aarone bat skʼelik li Faraone. Xi la jyalbeike: Jeova li sDios Israele xi la jyale: Akʼo batuk oxib kʼakʼal li jlumale sventa chi smuyubtaik ta xokol balumil. Pe li Faraone xi la stakʼe: Muʼyuk jchʼunoj Jeova. Muʼyuk chkakʼ batuk li Israele.

Ilin tajek li Faraone, yuʼun li jteklume chikta yaʼi komel yabtelik sventa chbat smuyubtaik ti Jeovae. Jaʼ yuʼun, mas to sujatik ta spasel tsatsal abtel. Li j-israeletike la jyakʼbeik smulin Moisés ti tsots abtel akʼbatike, jech oxal ti Moisese lik svul yoʼonton. Pe ti Moisese patbat yoʼonton yuʼun Jeova, yuʼun xi albate: Voʼon ta jpas ti akʼo yakʼ lokʼuk jlumal li Faraone.

Li Moisés xchiʼuk Aarone bat skʼelik noxtok li Faraone. Avi une la spasik jun skʼelobil juʼelal. La jyakʼ ta balumil snamteʼ li Aarone, vaʼun kʼataj ta mukʼta kiletel chon. Pe li spʼijil viniktak Faraone la jyakʼik ta balumil ek li snamteʼike, kʼataj ta kiletel chonetik ek. Pe ¡kʼelavil!, li skiletel chon Aarone yakal ta sbikʼ li skiletel chon li pʼijil viniketike. Muʼyuk to la jyakʼ batuk j-israeletik li Faraone.

Jaʼ yuʼun kʼot skʼakʼalil ti ch-akʼbat svokol yuʼun Jeova li Faraone. ¿Mi xa naʼ kʼuxi la spas li Jeovae? La jyakʼ tal lajuneb tsatsal vokoliletik ta Egipto.

Kʼalal ep xaʼox la jyil svokol li Faraone ta stakilan ta ikʼel li Moisese, xi ta xalbee: Pajeso li vokolile, ta xkakʼ batuk li Israele, xi. Pe kʼalal ta xpaj li vokolile, li Faraone tsjel snopbenal. Muʼyuk bu chakʼ batuk li Israele. Pe kʼalal echʼ li slajunebal vokolile la skolta lokʼel.

¿Mi xa vojtikin ta jujuntal li slajunebal vokolile? Jelavan li ta jkʼole, jchanbetik skʼoplal.

KʼELO li lokʼoletike. Ta jujun lokʼole chakʼ ta ilel kʼusi vokolal akʼbat yuʼun Jeova li Egiptoe. Li ta baʼyele te cha vil Aarón ti yakal tsmaj ta snamteʼ li ukʼum Niloe. Vaʼun ti ukʼume kʼataj ta chʼichʼ, cham li choyetik tee xchiʼuk lik tuibuk.

Ta tsʼakal ne, ti Jeovae la jyakʼ lokʼuk chʼuchʼetik li ta ukʼum Niloe. Xlamet ta svotsʼobil ixim, ta staʼajesobil kʼusitik, ta temetik xchiʼuk ta butikuk noʼox. Kʼalaluk cham li chʼuchʼetike li j-egiptoal krixchanoetike la svolik ta juju tsop, vaʼun lik tuibuk li lume.

Vaʼun ti Aarone la smaj ta snamteʼ li balumile, kʼalal jech la spas ne li pukuke kʼataj ta usetik, uni bikʼtal chonetik ti xviletik xchiʼuk ti chtiʼvanike. Taje jaʼ li yoxibal vokolile.

Li yantik vokolile kʼajomal xa noʼox la jyakʼbe svokol li j-egiptoal krixchanoetike, li Israele muʼyuk bu la jyil svokol. Li xchanibal vokolile jaʼ mukʼta vovetik ti la stikʼ sba ta sna skotol li j-egiptoal krixchanoetike. Li ta svoʼobal vokolile jaʼ kʼot ta stojolal li chonetike. Toj ep xa noʼox cham xvakaxtak, xchijtak xchiʼuk stentsuntak li j-egiptoetike.

Laj ne li Moisés xchiʼuk Aarone la sjopik tan, ep ta velta la staniik muyel ta vinajel, ta skoj taje chʼi mukʼtik chin ta sbekʼtal li krixchanoetike xchiʼuk li chonetike. Taje jaʼ li svakibal vokolile.

Kʼalal echʼ xaʼox taje, li Moisese la stoy muyel skʼob ta vinajel, vaʼun ti Jeovae la jyakʼ taluk chauketik xchiʼuk bot. Li tsatsal bot la jyakʼe, muʼyuk bu jech xakʼ-o ta Egipto.

Li ta xvaxakibal vokolile jaʼ epal kʼulubetik. Kʼajomal noʼox jun velta la jyichʼ ilel jech ti toj echʼ xa noʼox xlamamet li kʼulubetike. La slajesik skotol li kʼusi la jyikta li bote.

Li sbalunebal vokolile jaʼ ikʼubel osil. Oxib kʼakʼal solel toj ikʼ kom li jteklume, yan ti bu oyik li j-israeletike sakjaman kom.

Ta slajebal xa ne, ti Diose la jyalbe slumal ti akʼo sbonbeik ta xchʼichʼel uni bikʼit tentsun o uni neneʼ chij li yoyaltak stiʼ snaike. Vaʼun ti yaj-anjel Diose ch-echʼ ta Egipto. Kʼalal mi la jyil chʼichʼ li anjele, muʼyuk buchʼu ta smil li ta jpʼej na taje. Pe mi muʼyuk bonbil ta chʼichʼ la jyile, ta smil li ba nichʼonile xchiʼuk li sba ol li chonetike. Taje jaʼ li slajunebal vokolile.

Kʼalal echʼ li vokolil taje, li Faraone la jyakʼ batuk li j-israeletike, chapalik xa onoʼox, jech oxal li akʼobal taje la stam batel sbeik.