LI SLAJEB livro ta Vivlia, ti Apocalipsis o Revelación sbie, chakʼbe spatobil yoʼonton skotol krixchanoetik. Jaʼ la stsʼiba li jtakbol Juane, li livro taje chal kʼusitik akʼbat yil yuʼun Dios ti jaʼ albil kʼopetike xchiʼuk te chlaj ti bu chal kʼuxi chkʼot ta pasel li kʼusi tskʼan tspas Diose.

Li ta baʼyel kʼusi akʼbat yil yuʼun Dios li Juane, laj yil ti tspatbe yoʼonton xchiʼuk tstukʼibtas jayibuk tsobobbailetik li chaʼkuxiem Jesuse. Li yan kʼusi akʼbat yile, chalbutik skʼoplal li xchotleb Dios ta vinajele xchiʼuk chakʼ kiltik anjeletik ti yakal tsmuyubtaik li Jeovae.

Kʼalal poʼot xa chkʼot ta pasel li kʼusi tskʼan tspas Diose, li Chʼiom Chij (Jesucristoe) chichʼ akʼbel jun balbal vun ti oy vukub spakʼe. Kʼalal tstʼolbe li baʼyel chanib spakʼe, chvinaj talel chanib buchʼutik kajajtik ta kaʼ. Li baʼyele jaʼ stuk li Jesuse, ti vaʼanbil xa ta Ajvalil xchiʼuk ti skajlebinoj jkot sakil kaʼe. Li yan oxvoʼe skajlebinojik yan kaʼetik ti jelajtik sbontake, taje jaʼ skʼan xal pas kʼop, viʼnal xchiʼuk chameletik, ti jaʼ jech chvinaj li ta balumil avi ti jutuk xa skʼan xtal slajebe. Kʼalal chichʼ tʼolbel li slajeb spakʼ li balbal vune, chichʼ aʼyel ti chichʼ okʼesel vukub okʼesetik ti jaʼ chalbe skʼoplal jayibuk chapaneletik yuʼun Diose. Taje chakʼ ta aʼyel yan vukub vokoliletik o skʼelobiltak skʼakʼal yoʼonton Dios.

Vaʼun, li Juane chil chvokʼ jun uni olol, taje jaʼ skʼan xal ti chlik ajvalilajuk ta vinajel li Ajvalilal yuʼun Diose. Chlik pas kʼop, li Satanás xchiʼuk spukujtake chichʼik nutsel lokʼel li ta vinajele xchiʼuk chichʼik jipel yalel ta Balumil. Vaʼun chichʼ aʼyel jun tsatsal yechʼomal eil ti xi chale: «Toj abul abaic voʼoxuc ti te to nacaloxuc ta banamil[e]». ¿Kʼu yuʼun? Yuʼun li Diabloe snaʼoj ti jutuk xa yoraile xchiʼuk ilinem ta jyalel (Apocalipsis 12:12).

Li Jesuse chvinaj yan velta ta vinajel kʼuchaʼal jkot chʼiom chij xchiʼuk te oy ta xokon 144,000 krixchanoetik ti tʼujbil sventa «coʼol tspasic mantal[e]». Jaʼ ta Apocalipsis ti bu ta jnaʼtik ti xchaʼvokʼal nitilulale jaʼ 144,000 krixchanoetik (Apocalipsis 14:1; 20:6).

Ta tsʼakale, li ajvaliletik ta Balumile tstsob sbaik ta Armagedón, o li «mucʼta pleito ta scʼacʼalil yuʼun li Dios ti echʼem svuʼele» xchiʼuk jaʼ tstsakik ta kʼop li buchʼu kajal ta sakil kaʼe, li Jesuse, xchiʼuk li yajsoltarotak ta vinajele. Skotol li ajvaliletike chichʼik lajesel xchiʼuk chichʼ chukel li Satanase. Li Jesús xchiʼuk li 144,000 tsventainik jmil jabil li Balumile, mi laj li jmil jabil taje chichʼ lajesel ta j-echʼel li Satanase (Apocalipsis 16:14; 20:4).

¿Kʼusi tspas li Ajvalilal ta Jmil Jabil yuʼun Cristo ta sventa li krixchanoetik ti chchʼunik mantale? Xi chal li Juane: «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apocalipsis 21:4). ¡Tspas ta jun paraiso yan velta li Balumile!

Jaʼ jech tstsuts ta yalbel skʼoplal yaʼyejal Vivlia li slivroal Apocalipsise. Ta stojolal li Ajvalilal yuʼun Mesiase, tsakubtas sbi li Jeovae xchiʼuk jaʼ jech jamal chakʼ ta ilel ta sbatel osil ti jaʼ noʼox stuk oy sderecho ch-ajvalilaje.

(Lokʼem ta slivroal Apocalipsis.)

1. Li Jeovae tspas li Adán xchiʼuk Evae xchiʼuk chal ti xuʼ xkuxiik sbatel osil ta Paraisoe. Li Satanase chchopol kʼoptabe sbi li Jeovae xchiʼuk chchibal kʼoptabe li sderecho ta ajvalile. Li Adán xchiʼuk Evae jmoj la stoy sbaik xchiʼuk li Satanase, jaʼ jech laj yakʼik ta mulil xchiʼuk lajel li krixchanoetike

2. Li Diose chal ti tstoj smul li jtoybaetike xchiʼuk chal ti jun Jpojvanej o Nitilulal chakʼbe slajeb li Satanase xchiʼuk chchaʼlekubtas li kʼusi sokem ta skoj li toybail xchiʼuk li mulile

3. Li Diose chalbe Abraham xchiʼuk David ti ta yutsʼ yalalik chlokʼ tal li Nitilulale, o li Mesías ti ch-ajvalilaj sbatel osile

4. Li Jeovae chal ta stojolal yaj-alkʼoptak ti chakʼbe slajeb mulil xchiʼuk lajelal li Mesiase xchiʼuk ti jaʼ chkʼot ta Ajvalil li ta Ajvalilal yuʼun Diose. Jmoj ch-ajvalilaj xchiʼuk jtsop krixchanoetik, chakʼbeik slajeb li pas kʼopetike, li chameletike xchiʼuk li lajelale

5. Li Jeovae chakʼ ta naʼel ti jaʼ Mesías li Jesuse. La stak tal ta Balumil sventa chcholbe skʼoplal li Ajvalilal yuʼun Diose xchiʼuk ti chakʼ xkuxlejal ta stojolal li krixchanoetike. Kʼalal cham li Jesuse, li Jeovae la xchaʼkuxes kʼuchaʼal jun kuxlejal ti mu xvinaj ta kʼelele

6. Li Diose tsvaʼan ta Ajvalil ta vinajel li Cristoe, vaʼun chlik li slajeb kʼakʼale. Li Jesuse jaʼ tskʼel li chol mantal ta spʼejel Balumile

7. Li Jeovae chalbe ti akʼo xlik sventain Balumil li xNichʼone. Li Ajvalilal yuʼun Diose tslajes li ajvaliletik ta balumile, chchaʼta yav li Paraisoe xchiʼuk chchaʼakʼbe stukʼil li krixchanoetik ti tukʼ yoʼontonike. Li sderecho sventa ch-ajvalilaj li Jeovae muʼyuk xa chichʼ chibal kʼoptael, sak xchiʼuk chʼul-o sbatel osil li sbie