Kʼusitik melel sventa Ajvalilal: Chakʼik veʼlil ta mantal

¿MI AVILOJ kʼu yelan chvinaj ta sat ti chmuyubaj tajek junuk jchanun ta skoj ti laj yaʼibe smelolal li kʼusi naka to la achanike? Jech van ta melel. Ta kʼunkʼun xi chalbot li jchanune: «¿Mi jaʼ chakʼan chaval ti chchanubtasvan Vivlia ti xuʼ xijkuxiutik ta jun paraiso ta sbatel osil liʼ ta Balumile?». Li achiʼil ta cholmantale stseʼet noʼox sat xi chale: «Veno, ¿kʼusi chal chavil li Vivliae?». Labal to sba chaʼi li jchanune, vaʼun tsjim sjol xchiʼuk xi chale: «¡Mu jchʼun chkaʼi ti muʼyuk toʼox buchʼu yalojbun taje!». Xvul ta ajol ti leʼ to noʼox jayibuk xemanae jechtik laj yal noxtok kʼalal la xchan ta sba velta ti Jeova sbi li Diose.

¿Mi oy jech ataoj junuk velta? Ep buchʼutik jech kʼotem ta stojolalik li ta steklumal Diose. Taje jaʼ tsvules ta joltik li kʼupil sba matanal jtaojtike: ¡yojtikinel li kʼusi melele! Pe xi xanop jlikeluke: «¿Kʼuxi vul ta jkʼob li matanal liʼe?». Li ta jvokʼ livro liʼe ta jchanbetik skʼoplal li sjakʼobil taje. Ti kʼunkʼun yaʼiojbe tal smelolal kʼusitik ta mantal li steklumal Diose, jaʼ sprevail ti oy ta melel li Ajvalilal yuʼun Diose. Oy xa ta sien jabil ti yakal ch-abtej li Ajvalil yuʼune, li Jesukristoe, sventa xchan kʼusi melel li steklumal Diose.