Smantaltak Ajvalilal: Saʼilanel li stukʼilal Diose

CHAKʼOPON alakʼna kʼalal yakal chaxanave. Leʼ xtal chib oxibuk kʼakʼale avakʼoj venta ti tskʼel kʼusi chapas xchiʼuk li avutsʼ avalale. Tstakʼbot tal ek, vaʼun chalbot ti xanopaj batele. Xi chalbote: «Oy kʼusi ta jkʼan ta jakʼbot, ¿mi xuʼ? ¿Kʼu yuʼun ti toj jeleloxuke?». Xi chatakʼbee: «¿Kʼusi chakʼan chaval?». Vaʼun xi chale: «Stestigooxuk Jeova li voʼoxuke, ¿mi mu jechuk? Mu xakoʼolajik xchiʼuk li yantike. Mu xakoʼolajik ta yantik relijion, muʼyuk chapasik kʼinetik, muʼyuk chatikʼ abaik ta politika mi jaʼuk ta paskʼop. Muʼyuk chasikʼolajik. Jech xtok, yileluk li ta avutsʼ avalale chachʼunik mantaletik ti tsots skʼoplal sventa atalelalike. ¿Kʼu yuʼun ti toj jeleloxuk xchiʼuk li yan krixchanoetike?».

Anaʼoj ti jaʼ noʼox ta skoj jtos kʼusi ti jelelutike: jaʼ ti chkichʼtik ventainel yuʼun li Ajvalilal yuʼun Diose. Ta skoj ti jaʼ Ajvalil li Jesuse ta onoʼox slekubtasutik. Jaʼ tskoltautik ti jchanbetik batel stalelal xchiʼuk ti tukʼuk xkakʼ jbatik ti oyutik ta chopol balumile. Li ta jvokʼ liʼe ta jchanbetik skʼoplal oxtos kʼuxi slekubtasoj steklumal Dios li Ajvalilal yuʼun Mesiase: ta mantal, ta stalelal xchiʼuk ti kʼu yelan chapanbile, skotol taje jaʼ sventa xichʼ ichʼel ta mukʼ li Jeovae.