Li ta yuilal septiembree, oy kʼusi achʼ chichʼ talel li Programa xchiʼuk bu chijtsʼibaj[e], ti xi sbie: «Kakʼtik ta chanel li kʼusi melele». Li kʼusi ta jkʼantike jaʼ ti xichʼ akʼel ta ilel li kʼusi chchanubtasvan Vivliae, jaʼ yuʼun chichʼ jakʼel xchiʼuk chichʼ takʼel ta junuk teksto ta Vivlia.

Mi oy ta yoʼonton chkiltik li yajval nae, xuʼ me xkiktabetik jlikuk vun o xkakʼbetik yil junuk video ti te oy ta jw.org yoʼ xbat jchaʼkʼeltik ta yan veltae. Sut noʼox me jkʼeltik sventa jloʼiltatik mas ta sventa li kʼusi laj kalbetik komele. Li kʼusi achʼ chichʼ pasel xchiʼuk li parteiletik ch-echʼ ta tsobajele, jaʼ me te chlokʼ li ta livro Chchanubtasvan li ta rekuadro ta slajeb kapituloe, taje xuʼ te jtatik yan tekstoetik ti tskoltautik ta spasel revisita o yakʼel estudio ti jaʼ noʼox ta jtunestik li Vivliae.

Jun noʼox me li be sventa kuxlejale (Mt 7:13, 14). Ta skoj ti mu jchopuk noʼox li krixchanoetik ta jchiʼintik ta loʼil li bu ta jcholtik mantale, ti ep ta tos li kʼusi xchʼunojike xchiʼuk ti jelel bu likemik tale, skʼan me xkʼot ta yoʼonton kuʼuntik li kʼusi chkalbetik ta sventa li Vivliae (1Ti 2:4). Kʼalal chnop xkaʼitik stunesel li jeltos mantaletik lokʼemik ta Vivliae xchiʼuk mi ta jchantik lek stunes «li kʼop ti jaʼ sventa li kʼusi melele», ta me jkʼupintik mas xchiʼuk lek me kʼusitik chkʼot ta pasel kuʼuntik kʼalal chkakʼbetik xchan kʼusi melel ta Vivlia li krixchanoetike (2Ti 2:15).

Li ta spʼejel Balumile, li krixchanoetike tskʼanik patbel yoʼontonik (Ec 4:1). Li ta yuilal septiembree, skʼan me xkakʼtik persa ta yakʼel li revista Li Jkʼel osil ta toyole numero 5, ti chalbe skʼoplal li spatel oʼontonale. Kakʼtik persa ta spukel batel ti bu kʼalal xuʼ kuʼuntike. Ta skoj ti ta jkʼan ta jpatbetik yoʼonton li krixchanoetike, jaʼ me mas lek mi ta jchiʼintik ta loʼil stuke. Jaʼ yuʼun, mu me xkiktatik li revistaetik mi muʼyuk buchʼu te ta jtatike.

KʼUXI XUʼ XKAKʼTIK LI REVISTAE

«¿Mi mu jechuk xanaʼ ti jkotoltik ta jkʼantik ti oyuk buchʼu spatbutik koʼontontike? Pe ¿bu xuʼ jtatik xanaʼ? [Kʼelo 2 Korintios 1:3, 4]. Li revista liʼe te chalbe skʼoplal ti kʼuxi tspatbutik koʼontontik li Diose».

Mi oy ta yoʼonton mantal chavil li krixchanoe xchiʼuk mi laj yichʼ komel li revistae:

AKʼBO YIL LI VIDEO ¿KʼU YUʼUN SKʼAN JCHANTIK LI VIVLIAE?

Vaʼun albo mi tskʼan junuk chanubtasel ta Vivlia.

OYUK KʼUSI XAJAKʼBE SVENTA XBAT AKʼEL YAN VELTA LI KRIXCHANOE

Iktabo junuk sjakʼobil yoʼ xatakʼbe mi sut akʼel ta yan veltae, jech kʼuchaʼal liʼe: ¿Kʼu yuʼun yakʼoj to permiso Dios ti oyuk vokolile?