¿Mi tsnopajesutik ta stojolal Dios skotol li relijionetike?

Li kʼusi chal Vivliae

Moʼoj. Mu skotoluk koʼol li relijionetike. Li ta Vivliae ta jtabetik ep skʼelobiltak yichʼel ta mukʼ ti muʼyuk lek chil li Diose. Oy chaʼtos li ichʼel ta mukʼe.

1: Li relijionetik ti chichʼik ta mukʼ jecheʼ diosetike

Li Vivliae chal ti mu kʼusi xtun-o mi chkichʼtik ta mukʼ jecheʼ Diosetike (Jeremias 10:​3-5; 16:19, 20). Li Jeovaea xi laj yalbe li j-israeletik ta voʼnee: «Mu me xavichʼ ta mukʼ yan diosetik, skʼan jaʼ noʼox voʼon xavichʼun ta mukʼ» (Eksodo 20:​3, 23; 23:24). Kʼalal laj yichʼik ta mukʼ yan diosetik li j-israeletike, «lik skʼakʼal yoʼonton Jeova ta [stojolalik]» (Numeros 25:3; Levitiko 20:2; Jueses 2:​13, 14).

Li Diose jech-o yakal tsnop ta sventa li yichʼel ta mukʼe «akʼo mi oy buchʼutik ti diosetik chichʼik albel ta alele» (1 Korintios 8:​5, 6; Galatas 4:8). Li buchʼutik tskʼan chtunik ta stojolale ch-albatik ti mu skap sbaik li ta jecheʼ relijionetike. Xi chal li Vivliae: «Lokʼanik ti bu oyike xchiʼuk chʼako abaik» (2 Korintios 6:​14-​17). Ti skotoluk lek li relijionetike xchiʼuk ti tsnopajesutik ta stojol Diose, ¿kʼu yuʼun xanaʼ ti laj yalbutik ti mu jkap jbatik li ta jecheʼ relijione?

2: Li buchʼutik chichʼik ta mukʼ Dios ta alel ti muʼyuk lek chil li Diose

Li Jeovae la spʼaj li j-israeletik kʼalaluk laj yichʼik ta mukʼ jecheʼ diosetike, yuʼun la skapik li yichʼel ta mukʼ Jeovae (Eksodo 32:8; Deuteronomio 12:​2-4). Li Jesuse tsots laj yakʼbe mantal li jnitvanejetik ta relijion ta skoj ti kʼu yelan chichʼik ta mukʼ li Diose, pe ti melel xkaltike, jecheʼ noʼox tskuy sbaik, yuʼun xi albatike: «Jaʼ muʼyuk yakaloxuk spasel li kʼusitik mas tsots skʼoplal ta Mantale, jaʼ xkaltik, li tukʼilale, li xkʼuxul oʼontonale» (Mateo 23:23).

Li relijion ti tsnopajesutik ta stojolal Diose jaʼ mi te tslokʼesik ta Vivlia li kʼusi chchanubtasvanik-oe (Juan 4:​24; 17:17; 2 Timoteo 3:​16, 17). Li kʼusitik chakʼik ta chanel li jecheʼ relijionetike, maʼuk te tslokʼesik tal li ta Vivliae, yuʼun jaʼ noʼox tsnamajesik ta stojolal Dios li krixchanoetike. Yuʼun chalik ti jaʼ la jun trinidad li Diose, ti kuxul la chkom jchʼuleltik mi lijchame xchiʼuk ti chijbat la ta kʼatinbake. Skotol taje chalik ti te la lokʼem tal ta Vivliae, pe maʼuk melel, yuʼun te lokʼem tal ta jecheʼ chanubtaseletik, solel chʼabal sbalil ti kʼu yelan chichʼik ta mukʼ Diose. Yuʼun sjelojik ta jecheʼ chanubtasel li melel yichʼel ta mukʼ Diose (Markos 7:7, 8).

Li melel relijione tsnopajes ta stojolal Dios li krixchanoetike, yuʼun skotol li kʼusitik tsnopik xchiʼuk skotol li kʼusitik tspasike, jaʼ jech tspasik kʼuchaʼal chal li ta Vivliae (Tito 1:16). Jech kʼuchaʼal liʼe: «Mi oy junuk vinik ti tsnop ti oy srelijione, pe mi mu snaʼ spajesel li yokʼe, yakal tsloʼla yoʼonton stuk xchiʼuk chʼabal sbalil ti jech chichʼ ta mukʼ Diose. Li relijion ti sak xchiʼuk ti muʼyuk ikʼ ta sat Jdiostik xchiʼuk Jtotike jaʼ liʼe: jchabitik li ololetik ti chamem stot smeʼike xchiʼuk li antsetik ti chamem smalalik kʼalal oy tsots svokolike xchiʼuk ti chʼabaluk jpaltailtik ta balumile» (Santiago 1:26, 27; tsʼib ta yok vun).