Xchaʼkuxesel Jesús kʼalal to ti la jyichʼ tikʼel ta chukel li Pabloe

Kʼalal lokʼ xaʼox oxib kʼakʼal slajel li Jesuse, la jyichʼ chaʼkuxesel. Li vaʼ kʼakʼal taje, la jyakʼ sba ta ilel voʼob velta ta stojolal li yajchankʼoptake, 40 kʼakʼal la jyakʼolan sba ta ilel. Vaʼun, kʼalal te oy jlom yajchankʼoptak li Jesuse la jyilik ti muy batel ta vinajele. Echʼ lajuneb kʼakʼal, li Diose la jyakʼ tal chʼul espiritu ta stojolal li yajchankʼoptak Jesús ti muʼyuk xlokʼik ta Jerusalene.

Ta mas tsʼakal, li yajkontratak Diose la stikʼik ta chukel li jtakboletike, pe lokʼesatik yuʼun jun anjel. Jech noxtok li jkontrainvanejetike la smilik ta ton li jchankʼop Estebane. Ta jchantik noxtok ti Jesuse la stʼuj lokʼel li ta jkontrainvanejetik taje, jun vinik sventa chkʼot ta yajtunel, jaʼ li buchʼu kʼot ta jtakbol Pabloe. Vaʼun, kʼalal lokʼ xaʼox oxib jabil xchiʼuk oʼlol slajel li Jesuse, li Pedroe takat batel yuʼun Dios sventa chcholbe mantal Cornelio ti maʼuk judío vinike xchiʼuk sventa chcholbe mantal li yutsʼ yalaltak Cornelioe.

Kʼalaluk lokʼ oxlajuneb jabile, li Pabloe lik xchol mantal ta yantik lum ta sba velta. Li ta xchibal velta xanvil ta xcholel mantale, li Timoteoe la xchiʼin batel. Li Pablo xchiʼuk li xchiʼiltak ta xanvile ep kʼusitik labalik sba kʼot ta xkuxlejalik ti kʼalaluk yakal chtunik ta stojolal Diose. Ta mas tsʼakal, li Pabloe la jyichʼ tikʼel ta chukel ta Roma. Ta xchibal jabile lokʼ, pe la jyichʼ chaʼtikʼel ta chukel noxtok, vaʼun la jyichʼ milel. Li ta SVUKVOKʼALE jalij 32 jabil.