Li ta j-organisasionkutike muʼyuk paleetik o pastoretik ti tojbilike. Yuʼun jech kʼuchaʼal chichʼ toʼox pasel kʼalal naka toʼox lik li stsobobbail yajtsʼaklom Kristoe, chichʼ vaʼanel moletik ti lek chapalik ‹sventa xchabiik li stsobobbail Diose› (Echos 20:28). Li moletik ta tsobobbail taje lek tsotsik ta mantal xchiʼuk jaʼ chchabiik li tsobobbaile, chchʼunik li mantal liʼe: «Mu me sujbiluk xavaʼi abaik, ta slekiluk me avoʼonton xapasik ta stojolal Dios; jech xtok, mu me jaʼuk ta skoj ti chakʼanik takʼine, ti chaloʼlavanike, moʼoj, ta sjunuluk me avoʼonton xapasik» (1 Pedro 5:1-3). ¿Kʼusitik abtelal tspasik ti xuʼ jtabekutik sbalile?

Tskʼelunkutik xchiʼuk chchabiunkutik. Li moletike jaʼ tsbeiltasik xchiʼuk chchabiik ta mantal li tsobobbaile. Ta skoj ti snaʼojik ti jaʼ akʼbilik yuʼun Dios li yabtelik ti tsots skʼoplale, muʼyuk tsots tspasunkutik ta mantal, yuʼun tskoltaunkutik ti lekuk noʼox oyunkutike xchiʼuk ti ximuyubajkutik noʼoxe (2 Korintios 1:24). Jech kʼuchaʼal jun jchabichij ti ta jujukot tskʼel li xchijtake, jaʼ jech chakʼ ta yoʼontonik yojtikinel ta jujuntal xchijtak Dios li moletik eke (Proverbios 27:23).

Chchanubtasunkutik ta spasel li kʼusi tskʼan yoʼonton Diose. Jujun xemana li moletike jaʼ oy ta sbaik li tsobajeletik ta tsobobbail ti jaʼ sventa stsatsub xchʼunel koʼontonkutike (Echos 15:32). Li viniketik taje yichʼojik tajek ta mukʼ Dios, jaʼ jbabeik li ta cholmantale, chchiʼinunkutik ta cholmantal, jech noxtok, chchanubtasunkutik ta spasel kʼusuk abtelal sventa Dios.

Tspat koʼontonkutik ta jujuntal. Sventa chakʼbunkutik ta jujuntal li kʼusitik chtun kuʼunkutik ta mantale, li moletike chbat svulaʼanunkutik ta jnakutik xchiʼuk chchiʼinunkutik ta loʼil li ta Salon sventa Tsobobbaile. Tstunesik Skʼop Dios sventa tskoltaunkutik xchiʼuk tspat koʼontonkutik (Santiago 5:14, 15).

Akʼo mi oy yabtelik ta tsobobbail li moletike, jutuk mu skotolikuk oy yabtelik noxtok xchiʼuk oy yutsʼ yalalik ti skʼan xchabiik xchiʼuk skʼelike. Li ermanoetik taje sta-o ti xkichʼkutik ta mukʼe, yuʼun tsots ch-abtejik (1 Tesalonisenses 5:12, 13).

• ¿Kʼusitik tspasik li moletik ta tsobobbaile?

• ¿Kʼu yelan chakʼik ta ilel slekil yoʼontonik ta jtojolalkutik ta jujuntal?

Li Vivliae chal ti oy chaʼvokʼ viniketik ti tskʼelik li kʼusitik skʼan pasel ta tsobobbaile, taje jaʼik «li jkʼelvanejetik xchiʼuk li siervo ministerialetike» (Filipenses 1:1). Ta jutuk mu skotoluk tsobobbailetike, oy jayvoʼ moletik xchiʼuk siervo ministerialetik. ¿Kʼusitik abtelal tspasik li siervo ministerialetik ti xuʼ jtabekutik sbalile?

Tskoltaik li moletik ta tsobobbaile. Li siervo ministerialetike, manchuk mi keremik to o mi oy xa sjabilalik, tsotsik ta mantal, tspasik li kʼusi ch-akʼbat sbainike xchiʼuk baxbolik ta abtel. Jaʼ tspasik li kʼusitik skʼan pasel ta tsobobbail xchiʼuk li kʼusi chtun ta salone. Li abtelaletik taje tsotsik skʼoplal, jaʼ noʼoxe mu xkoʼolaj kʼuchaʼal li chanubtasvanej xchiʼuk li xchabiel chijetik ti jaʼ oy ta sba li moletike. Kʼalal jech tspasik li siervo ministerialetike, li moletike oy noʼox yorail yuʼunik sventa tspas li yabtelike.

Ep sbalil li kʼusitik tspasike. Jlom siervo ministerialetike ta xchʼamvanik xchiʼuk ta sabeik yavil li buchʼutik chkʼotik ta tsobajeletike. Yantik xtoke jaʼ oy ta sbaik skʼelel li sonidoe, ta spukik vunetik, oy ta sbaik li stakʼin tsobobbaile xchiʼuk jaʼ chalik bu jotukal chichʼ cholel mantal. Jech xtok, chkoltavanik sventa lekuk noʼox oy li Salon sventa Tsobobbaile xchiʼuk tskoltaik li buchʼu mol meʼelik xae, jech tspasik kʼuchaʼal ch-albatik yuʼun li moletike. Ta skoj ti ta sjunul yoʼonton tspasik li kʼusi ch-akʼbat sbainike, lek ichʼbilik ta mukʼ yuʼun li tsobobbaile (1 Timoteo 3:13).

Chakʼik ta ilel ti stakʼ chanbel stalelalike. Ta skoj ti chʼiemik lek ta mantale, chtʼujatik sventa xkʼotik ta siervo ministerial. Ta stsatsubtas xchʼunel koʼontonkutik kʼalal ch-echʼ yalik mantal ta plataformae; tstij koʼontonkutik kʼalal lek baxbolik ta cholmantale xchiʼuk ta skoj ti lek xkoltavanike, lek jmoj tsobolunkutik xchiʼuk ximuyubajkutik noʼox (Efesios 4:16). Ta tsʼakale, xuʼ xkʼotik ta mol ta tsobobbail ek.

• ¿Kʼu yelan stalelal li siervo ministerialetike?

• ¿Kʼu yelan chkoltavanik li siervo ministerialetik sventa lekuk noʼox oy li tsobobbaile?

Li ta Tsʼibetik ta Griego Kʼope, ep ta velta chalbe skʼoplal Bernabe xchiʼuk jtakbol Pablo. Taje jaʼik toʼox jech kʼuchaʼal li jkʼelvanejetik ta sirkuito avie, yuʼun la svulaʼanik tsobobbailetik li vaʼ kʼakʼale. ¿Kʼusi van tijbat-o yoʼontonik? Jaʼ ti oy tajek ta yoʼontonik li yermanotakike. Li Pabloe laj yakʼ ta ilel ti oy ta yoʼonton tsut skʼel li yermanotak sventa tsnaʼ kʼu yelanike. Ta skoj ti tskʼan tspatbe yoʼonton li yermanotake, mu sventauk mi ta sienal noʼox kilometro chanav (Echos 15:36). Li jkʼelvanejetik ta sirkuito avie jaʼ chtijbat-o yoʼontonik ek.

Chtal spat koʼontonkutik. Li jkʼelvanejetik ta sirkuitoe tsvulaʼanik 20 tsobobbailetik ti jaʼ jech yepal ta jun sirkuitoe, jun xemana chjalij ta jujun xchiʼuk chib velta ta jabil jech tspas. Ta jtabekutik ep sbalil li kʼusitik snaʼik li ermanoetik xchiʼuk yajnilik mi nupultsʼakalike. Chakʼik persa ta yojtikinel li kerem tsebetike xchiʼuk li buchʼutik mol meʼelik xae, jech xtok, oy tajek ta yoʼontonik ti chchiʼinunkutik ta cholmantale xchiʼuk oy tajek ta yoʼontonik chbat xchiʼinunkutik kʼalal chkakʼkutik chanubtasel ta Vivliae. Li jkʼelvanejetik taje chchiʼinik batel li moletik sventa tspatbeik yoʼonton li ermanoetik ta snaike. Jech xtok, chalik mantaletik ta tsobajeletik xchiʼuk ta asambleaetik sventa tspat koʼontonkutik (Echos 15:35).

Oy ta yoʼontonik skotol li ermanoetike. Li jkʼelvanejetik ta sirkuitoe oy tajek ta yoʼontonik snaʼel kʼu yelan oyik ta mantal li tsobobbailetike. Jaʼ yuʼun, tstsob sbaik xchiʼuk li moletik ta tsobobbaile xchiʼuk li siervo ministerialetik sventa tskʼelik ti kʼu yelan xbat li tsobobbaile xchiʼuk sventa ch-akʼbatik tojobtaseletik ti chtun yuʼunik sventa spas li yabtelike. Tskoltaik li prekursoretik sventa mas xlekub li yabtelike, jech xtok, xmuyubajik ti chojtikinik li buchʼutik achʼ to chkʼotik ta tsobajele xchiʼuk ti yakal chchʼiik ta mantale. Ta jujuntal li ermanoetik taje tsots ch-abtejik xchiʼuk ‹jaʼ jkoltavanejetik sventa jlekilalkutik› (2 Korintios 8:23). Jchanbetik li xchʼunel yoʼontonik xchiʼuk ti kʼu yelan chichʼik ta mukʼ Diose (Ebreos 13:7).

• ¿Kʼu yuʼun tsvulaʼanik tsobobbailetik li jkʼelvanejetik ta sirkuitoe?

• ¿Kʼuxi xuʼ xatabe sbalil kʼalal chvulaʼanvanike?

Kʼalal chkʼot vokolil ta skoj nikel, nojelal ta voʼ o yan kʼusitike, li stestigounkutik Jeovae ta jchapan jbakutik ta anil sventa ta jkoltakutik li kermanotakutik ti oy svokolike. Taje jaʼ jech chkakʼkutik ta ilel ti ta jkʼan jbakutik ta melele (Juan 13:34, 35; 1 Juan 3:17, 18). ¿Kʼu yelan ta jkolta jbakutik?

Ta jkolta jbakutik ta takʼin. Li yajtsʼaklomtak Kristo ta Antiokiae la stakik batel takʼin sventa tskolta li yermanotakik ta Judea kʼalal echʼ tsatsal viʼnal tee (Echos 11:27-30). Jaʼ jech li avi eke, kʼalal chkaʼikutik ti yakal chil svokolik li kermanotakutik ta junuk lume, li ta jtsobobbailkutike ta jtakutik batel takʼin sventa ta jkoltakutik (2 Korintios 8:13-15).

Chbat jkʼelkutik kʼusitik chtun yuʼunik. Li moletik ta stsobobbailik li buchʼutik chil svokolik ta skoj nikel, nojelal ta voʼ o yan kʼusitike ta saʼik ta jujuntal li ermanoetik jaʼ to mi laj yakʼik venta ti lek oy skotolike. Yikʼaluk van jaʼ sbain skʼelel jun komite ti chtun ta skoltael ermanoetik ti chil svokolike sventa xichʼ sveʼelik, yaʼalik, skʼuʼ spokʼik, xpoxilik xchiʼuk ti bu xuʼ xvayike. Ep stestigotak Jeova ti lek xtojobike tslokʼes batel stakʼin stukik sventa chbat skoltaik ermanoetik ti chil svokolike o sventa chbat xchaʼmeltsanik naetik xchiʼuk Salonetik sventa Tsobobbail. Ta skoj ti jmoj oyunkutik xchiʼuk ti lek xa jchanojkutik ti jmoj chi-abtejkutike, xuʼ ta anil xbat koltavankunkutik kʼalal jaʼo chtune. Maʼuk noʼox ta jkoltakutik ‹li buchʼutik koʼol xchʼunel koʼontonkutik xchiʼuke›, yuʼun bu kʼalal xuʼ kuʼunkutike ta jkoltakutik yan krixchanoetik manchuk mi yan-o srelijionik (Galatas 6:10).

Ta jkoltaankutik ta mantal xchiʼuk ta jpatbekutik yoʼontonik. Li kʼusi mas chtun yuʼunik li buchʼutik chil svokolik ta skoj nikel, nojelal ta voʼ o yan kʼusitike jaʼ ti xichʼik patbel yoʼontonike. Kʼalal jech taje, jaʼ ch-akʼbat stsatsal yoʼontonik yuʼun li Jeovae, ti jaʼ «li Dios ti tspat koʼontontik ta skotole» (2 Korintios 1:3, 4). Jaʼ yuʼun, li buchʼutik chat yoʼontonik ta skoj li svokolike chkakʼbekutik yil li kʼusitik chal Vivlia ti chkʼot ta pasele. Yuʼun te chal ti poʼot xa slajes skotol kʼusitik chakʼ vokolil xchiʼuk at-oʼonton li Ajvalilal yuʼun Diose (Apokalipsis 21:4).

• ¿Kʼu yuʼun anil xuʼ xikoltavankutik li stestigounkutik Jeova kʼalal chkʼot vokolil ta skoj nikel, nojelal ta voʼ o yan kʼusitike?

• ¿Kʼuxi ta jpatbekutik yoʼontonik li buchʼutik kuxul komike?

Kʼalal jutuk xa ox skʼan xcham li Jesuse, parte la xchiʼin ta loʼil li Pedro, Santiago, Juan xchiʼuk Andres ti jaʼik yajtakboltake. Kʼalal laj xa ox yalbe skʼoplal kʼusi senyail ti kʼalal liʼ xa oy li ta slajebal kʼakʼale, oy kʼusi tsots skʼoplal xi la sjakʼe: «¿Buchʼu jaʼ ta melel li tukʼil xchiʼuk pʼijil mosoil ti akʼbat sbain yuʼun yajval li yan mosoiletik sventa chakʼbe sveʼel ta yoraile?» (Mateo 24:3, 45; Markos 13:3, 4). Kʼalal jech laj yal li Jesuse, ti jaʼ li yajval abtel xkaltike, jamal laj yal ti tsvaʼan jtsop krixchanoetik ta slajebal kʼakʼal sventa jaʼ tspukbe-o sveʼelik ta mantal li yajtsʼaklomtake. ¿Buchʼu skʼoplalik taje?

Jaʼ uni jtsop yajtsʼaklomtak Kristo ti tʼujbilik ta chʼul espiritue. Li «mosoil» taje jaʼ skʼoplal jtsop yajtsʼaklomtak Kristo ti jaʼik li Jtsop Jbeiltasvanej yuʼun Stestigotak Jeovae. Lek ta yorail chakʼbe sveʼel ta mantal li xchiʼiltak ti koʼol chichʼik ta mukʼ Jeovae. Jech oxal, jaʼ jmalaojkutik ‹chakʼ jveʼelkutik ta yorail ti kʼu yepal chtun kuʼunkutik› li tukʼil mosoil taje (Lukas 12:42).

Chchabibeik li sna Diose (1 Timoteo 3:15). Li Jesuse laj yakʼbe sbain mosoil li jvokʼ s-organisasion Jeova liʼ ta balumile. Taje te tsakal skʼoplal ti chbeiltasvanik ta cholmantale, ti chchanubtasunkutik ta tsobobbailetike xchiʼuk ti tskʼelik li yan kʼusitik oy yuʼun liʼ ta balumile. Jaʼ yuʼun, sventa chakʼbunkutik li kʼusi chtun kuʼunkutik ta mantal li «tukʼil xchiʼuk pʼijil [mosoile]», tslokʼesik epal vunetik ti ta jtuneskutik ta cholmantale, ta jtsobajelkutike xchiʼuk li ta j-asambleakutike.

Li ‹mosoile› tukʼ ta skoj ti jech tajek tspas kʼuchaʼal chal li kʼusitik melel ta Vivliae xchiʼuk chchʼun li mantal albat komel ti skʼan xchol li lekil aʼyeje. Jech xtok, pʼij ta skoj ti snaʼ lek stunesel li kʼusitik yuʼun Kristo ta balumile (Echos 10:42). Li Jeovae chakʼbe bendision li yabtelike, yuʼun epajem xa li stestigotak Jeovae xchiʼuk ep kʼusitik oy yuʼunik ta mantal (Isaias 60:22; 65:13).

• ¿Buchʼu la svaʼan Jesus sventa tspukbe sveʼelik ta mantal li yajtsʼaklomtake?

• ¿Kʼuxi chakʼ ta ilel ti tukʼ xchiʼuk pʼij li mosoile?

Li ta baʼyel sigloe, oy toʼox jayvoʼ krixchanoetik ti xkoʼolajik kʼuchaʼal jtsop jbeiltasvaneje, te skʼoplalik li «jtakboletik xchiʼuk moletik» ta Jerusalene, taje kʼotemik kʼuchaʼal jkʼopojel ta stojolal skotolik li yajtsʼaklom Kristo ti tʼujbil chbatik ta vinajele, yuʼun jaʼ tsnopik li kʼusi chichʼ pasele (Echos 15:2). Sventa koʼol kʼusi chkʼot ta nopel yuʼunike, tsabeik skʼoplal li ta Skʼop Diose xchiʼuk chakʼ sbaik ta beiltasel yuʼun li xchʼul espiritu Diose (Echos 15:25). Li Jtsop Jbeiltasvanej avie jaʼ jech tspas ek.

Jaʼ tstunes Dios sventa tspas li kʼusi tskʼan yoʼontone. Li ermanoetik ti tʼujbil chbatik ta vinajel ti chtunik jlom li ta Jtsop Jbeiltasvaneje oy tajek ta yoʼontonik li kʼusi chal Skʼop Diose xchiʼuk chanemik lek xchapanel li kʼusitik skʼan pasele xchiʼuk li kʼusitik sventa mantale. Ta jujun xemana tstsob sbaik sventa tskʼelik ti kʼusi chtun yuʼun li ermanoetik ta spʼejel balumile. Jaʼ chchanbeik ti kʼu yelan tspasik toʼox ta baʼyel sigloe, yuʼun ta Vivlia tslokʼesik li chanubtasel chakʼike, oy stakik batel ta karta o stakik batel jkʼelvanejetik ta sirkuito xchiʼuk yan ermanoetik sventa xalik li ta tsobobbailetike. Jaʼ jech tstijbe yoʼontonik sventa jmojuk snopbenik xchiʼuk jmojuk kʼusi tspasik li steklumal Diose (Echos 16:4, 5). Jaʼ oy ta sbaik xchapanel li veʼlil ta mantale, tstijik oʼontonal ta xcholbel skʼoplal li Ajvalilal yuʼun Diose xchiʼuk jaʼ oy ta sbaik skʼelel kʼalal chichʼ biiltasel junuk ermano sventa tsta yabtel ta tsobobbaile.

Chakʼ sba ta beiltasel yuʼun li xchʼul espiritu Diose. Li Jtsop Jbeiltasvaneje tskʼanbeik beiltasel li Mukʼul Jpasmantal ta vinajel balumil ti jaʼ li Jeovae xchiʼuk li Jolil yuʼun tsobobbail ti jaʼ li Jesuse (1 Korintios 11:3; Efesios 5:23). Li jtsop ermanoetik taje maʼuk jbabe xa chaʼi sbaik ta stojolal li steklumal Diose. Jaʼ jech tspasik kʼuchaʼal li yan yajtsʼaklom Kristo ti tʼujbil chbatik ta vinajele, «tstsʼakliik batel li Chʼiom Chij [Jesus] ti mu ventauk bu chbate» (Apokalipsis 14:4). Li Jtsop Jbeiltasvaneje tstojik tajek ta vokol kʼalal ta jpaskutik orasion ta stojolalike.

• ¿Buchʼutik toʼox li jtsop jbeiltasvanej ta baʼyel sigloe?

• ¿Kʼuxi tsaʼ beiltasel ta stojolal Dios li Jtsop Jbeiltasvanej avie?

Li jpʼel kʼop Betel ta ebreoe jaʼ skʼan xal «sna Dios» (Jenesis 28:17, 19, tsʼib ta yok vun). Jaʼ yuʼun, sta-o tajek ti jech sbi li mukʼtikil naetik oy kuʼunkutik li stestigounkutik Jeova ta spʼejel balumile, yuʼun jaʼ te chichʼ chapanel xchiʼuk chichʼ beiltasel li cholmantale. Li Jtsop Jbeiltasvaneje te oy li ta smeʼ nail abtelal ta Nueva York (Estados Unidos), te to tskʼel talel li abtelaletik chichʼ pasel ta Beteletik ta epal mukʼtik lumetike. Li ermanoetik ti te ch-abtejike ojtikinbilik kʼuchaʼal jtuneletik ta Betel. Xkoʼolajik ta jun utsʼ alalil: jmoj chveʼik, nakalik, ch-abtejik xchiʼuk lek jmoj chchanik li Vivliae (Salmo 133:1).

Stuk xa noʼox jech ti bu ch-abtejike. Li ta jujun Betele te ch-abtejik viniketik xchiʼuk antsetik ti lek yijik ta mantal ti ta tsʼakal ora ch-abtejik sventa tspasik li kʼusi tskʼan Diose xchiʼuk ti tspasik li kʼusi sventa Ajvalilal yuʼun Diose (Mateo 6:33). Mi junuk buchʼu chichʼ stojol, jaʼ noʼox chichʼik akʼbel bu chvayik, ch-akʼbat sveʼelik xchiʼuk chichʼik koltael jutuk ta takʼin sventa li kʼusi chtun yuʼunike. Jujuntal akʼbil yabtelik: jlome ch-abtejik ta ofisinaetik, ta veʼebal o tsmeltsanik veʼlil; li yane ta imprenta o ti bu tspakʼbeik spat livroetike. Oy jlom xtoke tsmes chchʼubaik li kuartoetike, chchukʼik kʼuʼil pokʼil, tskolta sbaik sventa lekuk noʼox li naetike xchiʼuk yantik.

Toj ep abtel chichʼ pasel te ti jaʼ sventa cholmantale. Ti kʼu yuʼun chichʼ pasel epal abtelal ta jujun Betele jaʼ ti xkʼot ta stojolal epal krixchanoetik li kʼusi melel chal Vivliae. Li foyeto liʼe jaʼ chtun-o taje. Jaʼ la skʼel Jtsop Jbeiltasvanej kʼalal laj yichʼ tsʼibaele, laj yichʼik takbel ta komputadora li buchʼutik tsjelubtasik ta yan kʼop ti oyik ta spʼejel balumile, laj yichʼ pasel imprimir ta mukʼtik makinaetik ti anil ch-abtejik ti oy ta epal mukʼtik lumetike xchiʼuk laj yichʼ takel batel mas ta 110,000 tsobobbailetik. Ta jujutos li kʼusi chichʼ pasele, li buchʼutik te ch-abtejik ta Betele tskolta sbaik ta spasel li jun abtelal ti anil xa skʼan pasele: jaʼ xcholel li lekil aʼyejetike (Markos 13:10).

• ¿Buchʼutik te ch-abtejik li ta Betele, xchiʼuk kʼusitik chichʼik akʼbel?

• ¿Kʼusi abtelal tsots skʼoplal tskolta sbaik ta spasel li ta jujun Betele?

Li buchʼutik ch-abtejik ta Betele jelajtik yabtelik, tskolta sbaik sventa li cholmantal ta jun lum o mas lumetike. Jlome tsjelubtasik ta yan kʼop li vunetike, tspasik imprimir revistaetik, tspakʼbeik spat livroetik, tskʼejik vunetik, tspasik gravar xchiʼuk tspasik video o yan kʼusitik tspasik.

Jun Komite sventa Betel tskʼel li abtelaletike. Li Jtsop Jbeiltasvaneje oy svaʼanoj komiteetik sventa tskʼel li Beteletike. Ta jun komitee oy oxvoʼ moletik o mas ti lek xtojobike. Li komiteetike jaʼ chalbeik batel ti kʼu yelan xbat li abtelal ti bu kʼalal oy ta sbaik skʼelele xchiʼuk li kʼusitik vokol tsnuptanike. Taje jaʼ chkoltaatik-o sventa snaʼik kʼusi tslokʼesik ta vunetik ta mas tsʼakal, kʼusi ch-echʼ li ta tsobajeletike xchiʼuk li ta asambleaetike. Li Jtsop Jbeiltasvaneje tstakilan batel yajkʼopojeltak sventa tsvulaʼanik li Beteletike xchiʼuk tskoltaik li komite yoʼ spas lek yuʼun li yabtelike (Proverbios 11:14). Kʼalal yakal li vulaʼale, ch-echʼ jun tsobajel tsots skʼoplal ti tsjelubtas jun mantal li yajkʼopojel smeʼ nail abtelale, taje jaʼ sventa tspatbe yoʼonton li buchʼutik te nakalik ti bu kʼalal smakoj li Betele.

Chichʼ koltael li tsobobbailetike. Li ta Betele oy ermanoetik ti jaʼ chalik ti bu xuʼ xlik achʼ tsobobbailetike. Jech xtok, tsbeiltasbe yabtel li prekursoretike, li misioneroetike xchiʼuk li jkʼelvanejetik ta sirkuito ti bu kʼalal sbainoj skʼelel li Betele. Chchapanik asambleaetik, tskʼelik li svaʼanel Salonetik sventa Tsobobbaile xchiʼuk tstakik batel revistaetik, livroetik xchiʼuk yan kʼusitik ta jujun tsobobbail. Skotol li kʼusitik chichʼ pasel ta Betele jaʼ sventa lek noʼox ta smelolal xichʼ pasel li cholmantale (1 Korintios 14:33, 40).

• ¿Kʼuxi tskoltaik Jtsop Jbeiltasvanej li Komite sventa Betele?

• ¿Kʼusi abtelaletik tspasik li ta Betele?

Sventa xichʼ cholel li «lekil aʼyejetik [...] ta skotol lumetik, nitilulaletik, jeltos kʼopetik xchiʼuk ta skotol [jteklumetike]», ta jpaskutik vunetik xchiʼuk yan kʼusitik mas ta 750 kʼopetik (Apokalipsis 14:6). ¿Kʼu yelan ta jpaskutik li epal abtelal taje? Jaʼ koliyal ti ep jtsʼibajom kuʼunkutik ta spʼejel balumile xchiʼuk ti oy jtsop jelubtasej kʼopetik ti tsots ch-abtejik ti jaʼik stestigo Jeova skotolike.

Baʼyel chichʼ tsʼibael ta inglés. Li Jtsop Jbeiltasvaneje jaʼ oy ta sba skʼelbel yabtel li Departamento de Redaccione. Li departamento taje jaʼ oy ta sba chalbe kʼusitik skʼan spasik li jtsʼibajometik ti te noʼox oyike xchiʼuk li ta junantik Betele. Ta skoj ti epik li jtsʼibajometike, xuʼ stsʼibabeik skʼoplal kʼusitik tsots tsnuptanik li krixchanoetik ta yan lumetike, jaʼ yuʼun buchʼuuk noʼox xuʼ xkʼot ta yoʼonton li kʼusi chal li jvunkutike.

Chichʼ takbel batel li jelubtasej kʼopetike. Mi laj xa ox yichʼ tsʼibael xchiʼuk mi laj yichʼ akʼel permiso sventa xichʼ lokʼesel li mantale, chichʼ takbel batel ta komputadora li jelubtasej kʼopetik ta spʼejel balumile, vaʼun jaʼ xa chlik sjelubtasik xchiʼuk tskʼelik. Li jelubtasej kʼopetike chakʼik persa ‹tstsʼibaik lek li kʼusitik melel› sventa jech xiktaik kʼuchaʼal chal li inglese (Eklesiastes 12:10).

Mas anil chlokʼ abtel ta skoj li komputadoraetike. Li kʼusi tspas jun jtsʼibajom xchiʼuk jun jelubtasej kʼope mu spas yuʼun li jun komputadorae. Pe toj jtunelik kʼalal oy kʼusi chichʼ saʼel ta diksionario o kʼalal oy kʼusi yan chichʼ saʼele. Li stestigounkutik Jeovae jpasojkutik jun programa sventa komputadora ti Sistema Electrónico de Edición Plurilingüe sbie (li sletrailtak ta inglese jaʼ MEPS), koliyal taje xuʼ xichʼ tsʼibael jayibuk sien kʼopetik ta jun komputadora, xuʼ xichʼ akʼbel slokʼoltak xchiʼuk xichʼ chapanel sventa xichʼ pasel imprimir.

¿Kʼu yuʼun chkakʼkutik tajek persa sjelubtasel ta yan kʼopetik manchuk mi oy noʼox jaymiluk krixchanoetik ti jech chkʼopojike? Yuʼun li kʼusi tskʼan yoʼonton Jeovae «jaʼ ti akʼo koluk skotol li krixchanoetike xchiʼuk ti akʼo yojtikinik lek li kʼusi melele» (1 Timoteo 2:3, 4).

• ¿Kʼusitik abtelal chichʼ pasel sventa chichʼ tsʼibael li jvunkutike?

• ¿Kʼu yuʼun ta jelubtaskutik ta epal kʼopetik li jvunkutike?

Jujun jabil li stestigounkutik Jeovae ta jpaskutik xchiʼuk ta jpukutik ta moton ta sienal noʼox miyon Vivliaetik xchiʼuk yan vunetik, ta jvaʼankutik Salonetik sventa Tsobobbail, Beteletik xchiʼuk ta jchabikutik sventa lekuk noʼox oy, chkakʼbekutik kʼusi chtun yuʼunik li buchʼutik ch-abtejik ta Betel ti ta smilal noʼoxe xchiʼuk li misioneroetike, jech xtok, ta jtakbekutik batel koltael li buchʼutik chil svokolik ta skoj nojelal ta voʼ, nikel o yan kʼusitike. ¿Bu chlokʼ skotol li takʼin taje?

Muʼyuk bu ta jkʼankutik diesmo mi jaʼuk ta jkʼankutik o ta jtsobkutik takʼin. Akʼo mi toj ep chtun takʼin li ta abtelal ta cholmantale, muʼyuk bu ta jkʼanbekutik takʼin li krixchanoetike. Oy xa mas ta sien jabile, li ta xchibal velta lokʼ Li Jkʼel-osil ta toyole laj yal ti jpatoj lek koʼontonkutik ti jaʼ tskoltaunkutik li Jeovae. Xi to laj yale: «[Li j-organisasionkutike] mi jaʼuk tskʼan jutuk limoxna mi jaʼuk tskʼanbe koltael li krixchanoetike». Taje jaʼ jech kʼotem ta pasel (Mateo 10:8).

Ta matanal takʼin chichʼ pasel skotol. Epal krixchanoetik lek chilik ti chichanubtasvankutik ta Vivliae xchiʼuk chlokʼ ta yoʼontonik yakʼel matanal takʼin sventa li abtelal taje. Li stestigounkutik Jeova eke ta jkolta jbakutik kʼalal ta jchʼak jkʼakʼalkutik, kipalkutik xchiʼuk kʼusitik oy kuʼunkutik sventa xichʼ pasel li kʼusi tskʼan yoʼonton Dios ta spʼejel balumile (1 Kronikas 29:9). Li ta Salonetik sventa Tsobobbaile xchiʼuk ti bu ch-echʼ asambleaetike oy te kaxaetik ti bu xuʼ xakʼ stakʼinik mi jech chlokʼ ta yoʼonton li krixchanoetike. Xuʼ xavakʼ matanal takʼin li ta jpajinakutik ta jw.org/tzo. Jutuk mu jkotolkutik ti chkakʼkutik matanal takʼine abol noʼox jbakutik, jech kʼuchaʼal li povre ants ti chamem smalal ti kʼupil kʼoptaat yuʼun Jesus ta skoj ti la stikʼ chaʼsep yuni takʼin ta kaxa te ta temploe (Lukas 21:1-4). Buchʼuuk noʼox xuʼ xchʼak ‹ti kʼu yepal chlokʼ ta yoʼonton› sventa xakʼ ta matanal takʼine (1 Korintios 16:2; 2 Korintios 9:7).

Jpatoj koʼontonkutik ti jaʼ jech-o tstijbe yoʼonton Jeova li buchʼutik tskʼan chichʼik-o ta mukʼ li kʼusitik ep sbalil yuʼunik sventa xkoltavanik ta spasel li kʼusitik sventa cholmantale, vaʼun jech chkʼot ta pasel li kʼusi tskʼan yoʼontone (Proverbios 3:9).

• ¿Kʼusi mu xkoʼolaj-o li j-organisasionkutik xchiʼuk li yan relijionetike?

• ¿Kʼu yelan chichʼ tunesel li matanal takʼine?

Li bu ta jtsob jbakutike Salon sventa Tsobobbail sbi kuʼunkutik, te ta jchanbekutik skʼoplal kʼusi chal Vivlia ta sventa li Ajvalilal yuʼun Dios ti jaʼ mas laj yalbe skʼoplal kʼalal la xchol mantal li Jesuse (Lukas 8:1).

Jaʼ ti bu chkichʼkutik ta mukʼ Dios ta jlumalkutike. Jaʼ te chichʼ chapanbel skʼoplal li xcholel lekil aʼyejetike (Mateo 24:14). Li salonetike jeltos smukʼtikil xchiʼuk yelanil, pe lekik noʼox sba pasbil. Ta junantik salone maʼuk noʼox jun tsobobbail te tstsob sbaik. Li echʼ jabiletike ta sjaylajunmilal xa noʼox salonetik laj yichʼ vaʼanel, jutuk mu voʼpʼejuk salon ta kʼakʼal, sventa jechuk x-epaj batel salonetik kʼuchaʼal ch-epaj batel li tsobobbailetike. ¿Kʼuxi ti jech pasem kuʼunkutike? (Mateo 19:26).

Chichʼ vaʼanel ta matanal takʼin ti yichʼoj tsobel sventa svaʼanobil salonetike. Ti kʼu yepal tstsob matanal takʼin li tsobobbaile tstak batel li ta Betel bu ventainbile, vaʼun li Betele chakʼbe xchʼamun li tsobobbailetik ti mas chtun yuʼunik sventa tspasik achʼ salon o ti chchaʼachʼubtasike.

Li buchʼutik tsvaʼanike jeltos bu likemik tal xchiʼuk muʼyuk chichʼik tojel. Ta epal mukʼta lumetike oy Grupoetik ti Tsvaʼanik Salonetik sventa Tsobobbaile. Li ta grupoetik taje oy buchʼutik chbatik ta jujun tsobobbail sventa tsvaʼanik salonetik, jmoj chbatik xchiʼuk yan ermanoetik ti chkoltavanik kʼuk noʼox sjalile. Skotol li ermanoetik taje nom bu chbatik sventa tskoltaik ermanoetik ta svaʼanbel li salonike. Li grupoetik taje muʼyuk chbatik ta abtel ta yan lum, jaʼ noʼox li ta yosilal bu nakalike. Ta yan lumetike oy buchʼutik vaʼanbil sventa tsbeiltasik li spasel achʼ salon xchiʼuk xchaʼachʼubtasel ti bu kʼalal staojik skʼelele. Akʼo mi oy buchʼutik lek chanemik ti chkoltavanike, jutuk mu skotoluk li buchʼutik chkoltavanik ta svaʼanel jpʼej salone jaʼik li buchʼutik te tstunesike. Ti jech kʼotem ta pasel taje jaʼ ta skoj li xchʼul espiritu Jeovae xchiʼuk ti chakʼik persa li steklumale (Salmo 127:1; Kolosenses 3:23).

• ¿Kʼu yuʼun chichʼ vaʼanel Salonetik sventa Tsobobbail?

• ¿Kʼuxi chvaʼi kuʼunkutik ta spʼejel balumil li Salonetik sventa Tsobobbaile?

Ta skoj ti yichʼojbe sbi Dios skotol li Salon sventa Tsobobbail yuʼun Stestigotak Jeovae, skʼan ti lek sake xchiʼuk ti lekuk noʼox oye. Taje jaʼ jun matanal chkaʼikutik spasel, yuʼun jaʼ jtos ti kʼu yelan xuʼ xkichʼkutik ta mukʼ Diose. Ta sventa taje, jkotolkutik xuʼ xikoltavankutik.

Ta jkolta jbakutik ta smesel xchiʼuk xchʼubael salon mi laj tsobajele. Ta jujukoj chlaj tsobajele li buchʼutik teunkutike chlokʼ ta koʼontonkutik smesel xchiʼuk xchʼubael li salone. Jun velta ta xemanae mas to lek chichʼ mesel xchiʼuk chichʼ chʼubael xtok. Jun mol ta tsobobbail o jun siervo ministerial jaʼ oy ta sba li abtelaletik taje, chichʼ tsakel ta vun li kʼusitik chichʼ pasele: skʼan mesel xchiʼuk pokel li pisoe; chichʼ kusel xchiʼuk chichʼ cholel li xilaetike, chichʼ mesel xchiʼuk pokel li vanyoe; skusel ventanaetik xchiʼuk nenetik; stenel kʼaʼep xchiʼuk skʼelbel spat xokon li salone. Te junuk velta ta jabile ta jkolta jba jkotolkutik ta spasel skotol li kʼusitik skʼan pasel ta salone. Kʼalal chichʼ akʼbel kʼusi xuʼ spasik li kʼox kerem tsebetike, jaʼ jech chichʼik chanubtasel sventa xichʼik ta mukʼ ti bu chbat kaʼikutik mantale (Eklesiastes 5:1).

Chikoltavankutik kʼalal oy kʼusi skʼan meltsanele. Jujun jabil chichʼ kʼelel kʼu yelan oy ta yut xchiʼuk ta spat xokon li salone, taje jaʼ sventa chichʼ kʼelel kʼusitik skʼan meltsanel sventa lekuk noʼox oy xchiʼuk sventa mu jecheʼuk noʼox xlaj takʼin ta mas jelavel (2 Kronikas 24:13; 34:10). Kʼalal lek sak xchiʼuk lek noʼox oy li Salon sventa Tsobobbaile, lek sta-o sventa te chichʼ ichʼel ta mukʼ li Diose. Kʼalal oy ta koʼonton ta jkolta jbakutik sventa lekuk noʼox oye, jech chkakʼkutik ta ilel ti tsots skʼoplal chkilkutik li jsalonkutike xchiʼuk ti jkʼanojkutik tajek li Jeovae (Salmo 122:1). Jech xtok, xuʼ lek x-ilvanik li ta jteklume (2 Korintios 6:3).

• ¿Kʼu yuʼun skʼan jkʼelkutik sventa lekuk noʼox oy ti bu chkaʼikutik mantale?

• ¿Kʼusitik ta jpaskutik sventa lekuk noʼox sak xvinaj li Salon sventa Tsobobbaile?

¿Mi chakʼan chanaʼ mas ta sventa li Vivliae? ¿Mi chakʼan chanabe skʼoplal junuk versikulo, skʼoplal junuk krixchano ta voʼne, junuk lum xchiʼuk jtosuk kʼusi kʼot ta pasel ti chal Vivliae? ¿Mi oy ajakʼojbe aba mi xuʼ skoltaot ta jtosuk avokol li Skʼop Diose? Mi «tana» o mi «oy» xachi ta junuk sjakʼobile, jaʼ me lek ti xabat li ta vivlioteka ti oy ta Salon sventa Tsobobbaile.

Li ta vivliotekae oy kʼusitik xuʼ xkoltavan ta sventa li kʼusitik chichʼ chanbel skʼoplale. Xuʼ van muʼyuk avuʼun skotol li vunetik lokʼem ta Vivlia ti slokʼesojik li stestigotak Jeova ta akʼope, pe li ta vivlioteka oy ta Salon sventa Tsobobbaile xuʼ te xata jutuk mu skotoluk li vunetik lokʼem ta Vivlia ti mas achʼik toe. Xuʼ van oy te ep ta tos Vivliaetik, jlikuk lekil diksionario xchiʼuk livroetik ti chalbe skʼoplal li kʼusitik chakʼan chanaʼe. Xuʼ xatunes kʼalal skʼan toʼox xlik o mi laj xa ox li tsobajele. Mi oy junuk komputadora tee, xuʼ van oy yuʼun li Watchtower Library ti bu xuʼ xichʼ tael li kʼusitik lokʼemike xchiʼuk ti ta anil noʼox xuʼ jtatik jtosuk chanubtasel, jpʼeluk kʼop o junuk versikulo ta Vivliae.

Toj jtunel sventa li Tsobajel Jkuxlejaltik xchiʼuk Kabteltik sventa Diose. Xuʼ me xbat achapan ta vivlioteka li mantal chavetʼese. Li buchʼu sbainoj li Tsobajel Jkuxlejaltik xchiʼuk Kabteltik sventa Diose jaʼ oy ta sba skʼelel ti oyuk li vunetik mas achʼik to chlokʼe xchiʼuk ti lekuk chapale. Li ermano taje o li buchʼu chchanubtasot ta Vivliae xuʼ xchanubtasot kʼu yelan ta tael li kʼusi chakʼan chanabe skʼoplale. Jaʼ noʼoxe vuleso me ta ajol ti mu xuʼ xavichʼ lokʼel li livroetik ta vivliotekae, skʼan me xachabi lek xchiʼuk mu me xabon.

Li Vivliae chal ti sventa ‹xkojtikintik li Diose›, skʼan oyuk ta koʼontontik saʼel jech «kʼuchaʼal li kʼulejal ti mukule» (Proverbios 2:1-5). Li ta vivlioteka oy ta Salon sventa Tsobobbaile jaʼ me te xuʼ xlik jsaʼtik.

• ¿Kʼusitik xuʼ xichʼ tunesel ta vivlioteka ta Salon sventa Tsobobbail kʼalal oy kʼusi chichʼ chanbel smelolale?

• ¿Buchʼu xuʼ skoltaot sventa xachan stunesel li vivliotekae?

Li Jesukristoe xi laj yalbe li yajtsʼaklomtake: «Akʼo xojobajuk ta stojolal krixchanoetik li sakil osil avuʼunik sventa xilik ti lek avabtelike, vaʼun jaʼ jech chalbeik yutsilal li Atotik ta vinajele» (Mateo 5:16). Sventa taje, ta jtuneskutik li kʼusitik achʼ chlokʼanuke, jech kʼuchaʼal li Internete. Li jw.org jaʼ jpajinakutik ta Internet ti chal kʼusitik jchʼunojkutik xchiʼuk kʼusitik ta jpaskutik li stestigounkutik Jeovae. ¿Kʼusi xuʼ xata te?

Stakʼobiltak ta Vivlia li kʼusitik mas chichʼ jakʼele. Te chatabe stakʼobiltak li kʼusitik tsotsik skʼoplal mas tsjakʼbe sbaik li krixchanoetike. Jech kʼuchaʼal li tratadoetik ¿Mi ta van xlaj li jvokoltike? xchiʼuk ¿Mi xuʼ to van xkuxiik yan velta li animaetike? ti oy mas ta vakib sien kʼopetike. Jech xtok, xuʼ xata te li Xchʼul Kʼop Dios sventa Achʼ Balumil ti oy mas ta 130 kʼopetike xchiʼuk ep kʼusitik ti xuʼ xachan-o li Vivliae, jech kʼuchaʼal li livro ¿Kʼusi chchanubtasvan li Vivliae? xchiʼuk li mas achʼik revista ¡Vikʼiluk me jsatik! xchiʼuk Li Jkʼel-osil ta toyole. Taje jutuk mu skotoluk xuʼ te noʼox xichʼ kʼelel o xichʼ aʼiel o xuʼ xichʼ yalesel ta formato ti lek ojtikinbil jech kʼuchaʼal MP3, PDF o EPUB. Mi jech oy ta avoʼontone, xuʼ xapas imprimir jayibuk pajina ti oy ta akʼope sventa xavakʼbe li buchʼu oy ta yoʼonton li aʼyej sventa Ajvalilal yuʼun Diose. Oy videoetik ta jaylajuntos senya kʼop, jech xtok, xuʼ xichʼ yalesel audiodramaetik, dramaetik ti lokʼemik ta Vivliae xchiʼuk kʼupil sba sonetik ti xuʼ xachikinta kʼalal jaʼo chakux avoʼontone.

Melel aʼyejetik ta sventa li stestigotak Jeovae. Li ta pajina taje chalbe skʼoplal kʼusitik achʼ to kʼotem ta pasel, videoetik sventa li yabtel Dios ta jpaskutik ta spʼejel balumile, sventa li kʼusitik ta jta-o jvokolkutik li stestigounkutik Jeovae xchiʼuk li koltael chkakʼkutik kʼalal oy kʼusitik tsots chkʼot ta pasele. Jech xtok, te chal bakʼin ch-echʼ li asambleaetike xchiʼuk chal kʼuxi xuʼ xakʼopoj batel li ta Betele.

Ta skoj ti ta jtuneskutik li kʼusitik achʼ chlokʼanuke, li kʼusi melele chojobaj-o batel ta stojol krixchanoetik manchuk mi nom to tajek oyik, jech kʼuchaʼal li ta jot-o to namal balumil ti Antártida sbie. Ta jpaskutik orasion sventa ta spʼejeluk balumil «jech-o xvinaj batel ta anil li skʼop Jeovae», ti jaʼ sventa yichʼobil ta mukʼ li Diose (2 Tesalonisenses 3:1).

• ¿Kʼuxi chkoltavan li jpajinakutik jw.org sventa chojtikinik-o mas krixchanoetik li kʼusi melel chal Vivliae?

• ¿Kʼusi chakʼan chasaʼ li ta jpajinakutik ta Internete?