-
¿Kʼusi jaʼ li Ajvalilal yuʼun Diose?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 31
¿Kʼusi jaʼ li Ajvalilal yuʼun Diose?
Li kʼusi mas chalbe skʼoplal Vivliae jaʼ li Ajvalilal yuʼun Diose, yuʼun li Ajvalilal taje jaʼ tstunes Jeova sventa xakʼ kʼotuk ta pasel li kʼusi tskʼan yoʼonton liʼ ta balumile. ¿Kʼusi jaʼ li Ajvalilal yuʼun Diose? ¿Kʼuxi jnaʼojtik ti yakal xa tspas mantale? ¿Kʼusitik xa spasoj talel? Xchiʼuk ¿kʼusi tspas li ta jelavele? Taje te ta xichʼ takʼel li ta xchanobil liʼe xchiʼuk li ta xchanobil 32 xchiʼuk 33.
1. ¿Kʼusi jaʼ li Ajvalilal yuʼun Diose xchiʼuk buchʼu ch˗ajvalilaj?
Li Ajvalilal taje jaʼ xchapanoj li Jeovae. Li Ajvalile jaʼ li Jesukristoe xchiʼuk te to ta vinajel chventainvan talel (Mateo 4:17; Juan 18:36). Li Vivliae xi chalbe skʼoplal li Jesuse: ‹Chventainvan sbatel osil› (Lukas 1:32, 33). Ta skoj ti jaʼ tʼujbil ta Ajvalil yuʼun Dios li Jesuse, jaʼ tsventain skotol li jnaklejetik ta balumile.
2. ¿Mi oy buchʼutik chchiʼin ta Ajvalilal li Jesuse?
Mu stukuk ch˗ajvalilaj li Jesuse, yuʼun oy «krixchanoetik ti jeltos snitilulalik, skʼopik, steklumalik xchiʼuk slumalike [...] ch˗ajvalilajik» (Apokalipsis 5:9, 10). ¿Jayvoʼ ch˗ajvalilajik xchiʼuk li Kristoe? Ti kʼu xa sjalil ay ta balumil li Jesuse ta smiyonal noʼox krixchanoetik stsʼakliojik talel. Pe jaʼ noʼox 144 mil chbatik ta vinajel sventa xchiʼinik ta ajvalilal li Jesuse (kʼelo Apokalipsis 14:1-4). Li yantik une liʼ chnakiik ta balumil ti jaʼ chventainatik tal li Ajvalilal yuʼun Diose (Salmo 37:29).
3. ¿Kʼu yuʼun mas lek li Ajvalilal yuʼun Dios ti jaʼ mu sta li ajvaliletik ta balumile?
Akʼo mi oy ajvaliletik ti tskʼan tspasik li kʼusi leke, mu spas yuʼunik. Vaʼun, chichʼ sabel xkʼexolik ti xuʼ van mi jsetʼuk oy ta yoʼontonik li krixchanoetike. Pe jaʼuk mi lik ajvalilajuk li Jesus ti jaʼ tʼujbil yuʼun Diose, muʼyuk buchʼu ch˗och ta xkʼexol. Li Ajvalilal la svaʼan Diose ‹muʼyuk bu chichʼ chʼaybel-o skʼoplal› (Daniel 2:44). Tsventain spʼejel balumil li Jesuse xchiʼuk mu tʼujbiluk buchʼu chkʼuxubin. Snaʼ xkʼanvan, lek yoʼonton xchiʼuk tukʼ kʼusi tspas xchiʼuk chchanubtas yantik sventa jechuk stalelalik ek: ti snaʼuk xkʼanvanike, ti lekuk yoʼontonike xchiʼuk ti tukʼuk kʼusi spasbeik li yantike (kʼelo Isaias 11:9).
JCHANTIK TO BATEL MAS
Jkʼeltik batel kʼu yuʼun stuk xa noʼox jech li Ajvalilal yuʼun Diose ti jaʼ mu sta li ajvaliletik ta balumile.
4. Jun Ajvalil ti tsots sjuʼel ti tsventain spʼejel balumile
Li Jesuse oy sjuʼel xchiʼuk mas xtojob ta ajvalil ti jaʼ mu sta li buchʼutik echʼemik xa talele. Kʼelik Mateo 28:18 xchiʼuk albeik skʼoplal li sjakʼobil liʼe:
¿Kʼu yuʼun jaʼ mas tsots yabtel akʼbil Jesus ti jaʼ mu sta li ajvaliletik ta balumile?
Li ajvaliletik ta balumile oy noʼox spajeb ti bu tspasik mantale xchiʼuk chlaj skʼoplalik. ¿Mi jaʼ van jech li Ajvalilal yuʼun Dios eke? Kʼelik Daniel 7:14 xchiʼuk albeik skʼoplal li sjakʼobiltak liʼe:
¿Kʼusi sbalil ta jtabetik ti muʼyuk chlaj˗o skʼoplal li Ajvalilal yuʼun Diose?
¿Kʼusi sbalil ta jtabetik ti tsventain spʼejel li balumile?
5. Chichʼ sabel xkʼexol li ajvaliletik ta balumile
¿Kʼu yuʼun ta jkʼantik xa ti xlik sventainutik li Ajvalilal yuʼun Diose? Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusitik vokoliletik yakʼoj li ajvaliletik ta balumile?
Kʼelik Eklesiastes 8:9 xchiʼuk albeik skʼoplal li sjakʼobiltak liʼe:
¿Mi mas lek xanaʼ ti jaʼ sventainutik li Ajvalilal yuʼun Diose? ¿Kʼu yuʼun ti jech chavale?
6. Li Jesus xchiʼuk li 144 mile snaʼojik kʼu yelan chkaʼi jbatik
Ta skoj ti echʼ kʼuchaʼal krixchano ta balumil li Jesuse, xuʼ «xijkʼuxubaj ta yoʼonton ta skoj ti kʼunutike» (Ebreos 4:15). Li 144 mil ti tʼujbilik yuʼun Jeova sventa x˗ajvalilajik xchiʼuk Jesuse jaʼik viniketik xchiʼuk antsetik ti ‹jeltos snitilulalik, skʼopik, steklumalik xchiʼuk slumalik› (Apokalipsis 5:9).
¿Mi tspat avoʼonton ti xaʼibeik smelolal kʼu yelan chkaʼi jbatik li buchʼutik tsventainutike? ¿Kʼu yuʼun ti jech chavale?
Li Jeovae stʼujoj viniketik xchiʼuk antsetik ti jeltos slumalik sventa xchiʼinik ta ajvalilal li Jesuse.
7. Li Ajvalilal yuʼun Diose mas to lek li mantaletik chakʼe
Li ajvaliletik ta balumile chakʼik mantaletik sventa xchabiik xchiʼuk skoltaik li krixchanoetike. Li Ajvalilal yuʼun Dios eke yakʼojan mantaletik xchiʼuk tskʼan ti xchʼunik li buchʼutik sventainojane. Kʼelik 1 Korintios 6:9-11 xchiʼuk albeik skʼoplal li sjakʼobiltak liʼe:
¿Kʼu van yelan jkuxlejaltik xanaʼ ti tauk jchʼunbetik smantal Dios ta sventa ti kʼu yelan skʼan xkakʼ ta ilel jtalelaltike?a
¿Mi sta˗o xanaʼ ti xalbutik Jeova ti kʼu yelan skʼan xkakʼ ta ilel jtalelaltike? ¿Kʼu yuʼun ti jech chavale?
¿Kʼuxi jnaʼojtik ti xuʼ xjel stalelal li krixchanoetike? (Kʼelik li versikulo 11).
Li ajvaliletike chakʼik mantaletik sventa xchabiik xchiʼuk skoltaik li krixchanoetike. Pe mas to lek li mantaletik chakʼ li Ajvalilal yuʼun Diose, yuʼun chchabi xchiʼuk tskolta li buchʼutik tsventainane.
JUNANTIKE XI TSJAK’IKE: «¿Kʼusi jaʼ li Ajvalilal yuʼun Diose?».
¿Kʼusi van chatakʼbe mi oy buchʼu jech la sjakʼbote?
¿KʼUSI LA ACHAN?
Li Ajvalilal yuʼun Diose te to tspas talel mantal ta vinajel xchiʼuk jaʼ tsventain spʼejel li balumile.
Svulesobil ta joltik
¿Buchʼutik tspasik mantal li ta Ajvalilal yuʼun Diose?
¿Kʼu yuʼun mas lek li Ajvalilal yuʼun Dios ti jaʼ mu sta li ajvaliletik ta balumile?
¿Kʼusi tskʼan Jeova ti akʼo spasik li buchʼutik chventainatik yuʼun li Ajvalilal yuʼun Diose?
XUʼ TO XAKʼEL LIʼE
Kʼelavil kʼusi laj yal Jesus ti bu chichʼ chotanel li Ajvalilal yuʼun Diose.
«¿Mi tey ta koʼontontik li Ajvalilal yuʼun Diose?» (Xu’ te xata ta jw.org)
¿Kʼu yuʼun mas tsots skʼoplal chaʼi stestigotak Jeova ti tukʼ xakʼ sbaik ta stojolal li Ajvalilal yuʼun Diose?
Tukʼ laj yakʼ sbaik ta stojolal li Ajvalilal yuʼun Diose (1:43)
Kʼelavil kʼusi chal Vivlia ta sventa li 144 mil ti tʼujbilik yuʼun Jeova sventa xchiʼinik ta ajvalilal li Jesuse.
Jun ants ti ochem toʼox ta chukele laj yakʼ venta ti jaʼ noʼox tukʼ chchapanvan li Ajvalilal yuʼun Diose.
«Laj kakʼ venta buchʼu xuʼ xakʼbe slajeb li choplejale» (¡Vikʼiluk me jsatik!, noviembre ta 2011)
a Li ta yoxvokʼale, te ta jkʼeltik junantik mantaletik ta sventa ti kʼu yelan skʼan xkakʼ ta ilel jtalelaltike.
-
-
¡Chventainvan xa li Ajvalilal yuʼun Diose!¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 32
¡Chventainvan xa li Ajvalilal yuʼun Diose!
Li Ajvalilal yuʼun Diose lik spas mantal ta vinajel ta 1914. Li vaʼ jabil xtoke, te vinaj talel ti mu xa jaluk tspas mantal ta balumil li krixchanoetike. ¿Kʼu yuʼun ti jech chkaltike? Jkʼeltik avil kʼusi yaloj xa onoʼox li Vivliae, li kʼusi yakal chkʼot ta pasel ta balumile xchiʼuk ti lik sokuk stalelal krixchanoetik leʼ xa talel ta 1914.
1. ¿Kʼusi xa onoʼox yaloj li Vivliae?
Li slivroal Daniele yaloj xa onoʼox ti jaʼo chlik spas mantal li Ajvalilal yuʼun Dios mi echʼ xa ox li vukub jabil chal Vivliae (Daniel 4:16, 17). Ta mas tsʼakale, xi laj yalbe skʼoplal Jesus li vukub jabile: «Yorail ti akʼbil li jteklumetike». Jech xtok, laj yakʼ ta chanel ti muʼyuk toʼox tsutsem li yorail taje (Lukas 21:24). Jech kʼuchaʼal ta jchantik batele, li vukub jabile tsuts ta 1914.
2. ¿Kʼuxi sokem tal balumil xchiʼuk stalelal krixchanoetik leʼ xa ta 1914?
Xi la sjakʼbeik Jesus li yajchankʼoptake: «¿Kʼusi senyail ti liʼ xa oyote xchiʼuk ti kʼalal poʼot xa xlaj skotol li kʼusitik oy ta balumile?» (Mateo 24:3). Li Jesuse laj yal ti oy kʼusitik chkʼotanuk ta pasel mi lik xa ox ajvalilajuk ta vinajele. Yuʼun laj yalbe skʼoplal ti chlik paskʼop, viʼnal xchiʼuk nikel ta buyuk noʼoxe (kʼelo Mateo 24:7). Li Vivliae yaloj xa onoʼox ti tsok tajek stalelal krixchanoetik «li ta slajebal xa kʼakʼale». Ta skoj taje, «toj echʼ noʼox xibal sba» (2 Timoteo 3:1-5). Skotol taje lik kʼotuk ta pasel ta 1914 xchiʼuk li avie mas to jamal xvinaj.
3. ¿Kʼu yuʼun sokem tajek balumil ti kʼuxi lik spas mantal li Ajvalilal yuʼun Diose?
Kʼalal jaʼtik toʼox och ta Ajvalil li Jesuse, lik jun paskʼop ta vinajel, vaʼun la stsak ta kʼop li Satanas xchiʼuk spukujtake. Ta jkoj ti muʼyuk kuch yuʼun li Satanase, «jipat yalel ta balumil, koʼol jipatik yalel xchiʼuk li yaj-anjeltake» (Apokalipsis 12:9, 10, 12). Kapem tajek li Satanase, yuʼun snaʼoj ti jutuk xa skʼan xichʼ lajesele. Jech oxal, toj ep vokolil xchiʼuk sokem tajek li balumile. Pe li Ajvalilal yuʼun Diose tslajesbe skʼoplal skotol li vokoliletik taje.
JCHANTIK TO BATEL MAS
Jkʼeltik batel sprevailtak kʼu yuʼun chkaltik ti lik spas mantal ta 1914 li Ajvalilal yuʼun Diose. Jech xtok, ta jkʼeltik kʼusi tstij koʼontontik spasel.
4. Li kʼusi yaloj xa onoʼox Vivliae kʼot ta pasel ta 1914
Jun ajvalil ta voʼneal Babilonia ti Nabukodonosor sbie oy kʼusi akʼbat yil ta xvayich yuʼun li Diose. Li kʼusi akʼbat yil xchiʼuk li kʼusi skʼan xale jaʼ skʼoplal ti kʼu yelan la spas mantal li Nabukodonosore xchiʼuk te skʼoplal ek li Ajvalilal yuʼun Diose (kʼelik Daniel 4:17).a
Kʼelik Daniel 4:20-26. Sventa xatakʼik li sjakʼobiltak liʼe, kʼelik li rekuadro ti bu chal: «Li jtekʼ teʼ xchiʼuk li Ajvalilal yuʼun Diose».
A) ¿Kʼusi laj yil ta xvayich li Nabukodonosore? (Kʼelik li versikulo 20 xchiʼuk 21).
B) ¿Kʼusi chichʼ pasbel li teʼe? (Kʼelik li versikulo 23).
C) ¿Kʼusi chkʼot ta pasel mi echʼ xa ox li vukub jabile? (Kʼelik li versikulo 26).
Li jtekʼ teʼ xchiʼuk li Ajvalilal yuʼun Diose
LI KʼUSI YALOJ XA ONOʼOX VIVLIAE (Daniel 4:20-36)
Ch-ajvalilaj
A) Natil teʼ
Muʼyuk to ch-ajvalilaj
B) «Tsʼetik li teʼe» xchiʼuk te komuk vukub jabil
Ch-ajvalilaj yan velta
C) «Chachaʼoch ta ajvalil»
Sba velta kʼot ta pasel:
D) ¿Buchʼu skʼoplal li jtekʼ teʼe? (Kʼelik li versikulo 22).
E) ¿Kʼusi ora laj yichʼ pojbel yabtel ta ajvalilal? (Kʼelik Daniel 4:29-33).
F) ¿Kʼusi kʼot ta stojolal Nabukodonosor kʼalal echʼ xa ox li vukub jabile? (Kʼelik Daniel 4:34-36).
SBA VELTA KʼOT TA PASEL
Ch-ajvalilaj
D) Nabukodonosor ti jaʼ ajvalil ta Babiloniae
Muʼyuk to ch-ajvalilaj
E) Kʼalal echʼ xa ox li 606 m.t.J.b, li Nabukodonosore lik xchuvaj xchiʼuk vukub jabil muʼyuk x-ajvalilaj
Ch-ajvalilaj yan velta
F) Vul xchʼulel li Nabukodonosore xchiʼuk lik ajvalilajuk yan velta
Xchibal velta kʼot ta pasel:
G) ¿Buchʼutik skʼoplal li jtekʼ teʼe? (Kʼelik 1 Kronikas 29:23).
H) ¿Kʼusi ora laj yichʼ pojbel yabtelik ta ajvalilal? ¿Kʼuxi jnaʼojtik ti muyuk xa onoʼox ch-ajvalilajik kʼalal tal ta balumil li Jesuse? (Kʼelik Lukas 21:24).
I) ¿Kʼusi ora xchiʼuk bu lik spas mantal li Ajvalilal yuʼun Diose?
XCHIBAL VELTA KʼOT TA PASEL
Ch-ajvalilaj
G) Li j-israeletik ti ajvalilajike jaʼ skʼelobil li Ajvalilal yuʼun Diose
Muʼyuk to ch-ajvalilaj
H) Laj yichʼ lajesel li Jerusalene; muʼyuk xa x-ajvalilajik 2,520 jabil li j-israeletike
Ch-ajvalilaj yan velta
I) Li Jesuse lik ajvalilajuk ta vinajel
¿Kʼu sjalil smakoj li vukub jabile?
Oy junantik tekstoetik ta Vivlia ti tskoltautik ta yaʼibel smelolal yan kʼusitike. Jech kʼuchaʼal liʼe, kʼalal ta xal oxib jabil xchiʼuk j-oʼlol li ta Apokalipsise, jaʼ skʼan xal 1,260 kʼakʼal (Apokalipsis 12:6, 14). Mi la jchaptik chib velta li 1,260 kʼakʼale, jaʼ chkʼot 2,520 kʼakʼal ti jaʼ skʼan xal li vukub jabile. Bakʼintike, kʼalal chal jun kʼakʼal li Vivliae, jaʼ skʼan xal jun jabil (Esekiel 4:6). Jaʼ yuʼun, li vukub jabil chalbe skʼoplal ta slivroal Daniele jaʼ 2,520 jabil.
5. Li balumile jelem talel leʼ xa ta 1914
Li Jesuse yaloj xa onoʼox kʼusi chkʼot ta pasel ta balumil kʼalal mi ch-ajvalilaj xa oxe. Kʼelik Lukas 21:9-11 xchiʼuk albeik skʼoplal li sjakʼobil liʼe:
Li kʼusitik yaloj xa onoʼox Vivlia liʼe, ¿mi oy jech avaʼioj o aviloj ti jech yakal chkʼot ta pasele?
Li jtakbol Pabloe laj xa onoʼox yal kʼu yelan stalelal krixchanoetik kʼalal jutuk xa ox skʼan xlaj skʼoplal li ajvaliletik ta balumile. Kʼelik 2 Timoteo 3:1-5 xchiʼuk albeik skʼoplal li sjakʼobil liʼe:
Jech kʼuchaʼal chal li tekstoe, ¿mi oy jech stalelal aviloj li krixchanoetike?
6. ¿Kʼusi tstij koʼontontik spasel ti ch-ajvalilaj xa li Jesuse?
Kʼelik Mateo 24:3, 14 xchiʼuk albeik skʼoplal li sjakʼobiltak liʼe:
¿Kʼusi abtelal yakal chichʼ pasel ti chakʼ ta ilel ti ch-ajvalilaj xa li Jesuse?
¿Kʼusi xuʼ xapas sventa xakolta aba li ta abtelal taje?
Yakal xa chventainvan li Ajvalilal yuʼun Diose xchiʼuk jutuk xa tajek skʼan ti sventain spʼejel li balumile. Kʼelik Ebreos 10:24, 25 xchiʼuk albeik skʼoplal li sjakʼobil liʼe:
Ta skoj ti chnopaj xa talel li skʼakʼalile, ¿kʼusi skʼan jpas jkotoltik?
Kaltik noʼox ti oy kʼusi achanoj ti xuʼ xkoltaat xchiʼuk ti xuʼ sta-o xkuxlejal li yantike, ¿kʼusi van tstij avoʼonton spasel?
JUNANTIKE XI TSJAKʼIKE: «¿Kʼu yuʼun tsots skʼoplal chilik 1914 li stestigotak Jeovae?».
Ti jech xavichʼ jakʼbele, ¿kʼusi van chatakʼ?
¿KʼUSI LA ACHAN?
Li kʼusitik yaloj Vivlia xchiʼuk li kʼusitik chkʼot ta pasel ta balumile chakʼ ta ilel ti chventainvan xa li Ajvalilal yuʼun Diose. Kʼalal chkalbetik skʼoplal li Ajvalilal taje xchiʼuk mi ta jtsob jbatike, chkakʼtik ta ilel ti jchʼunojtik ti chventainvan xae.
Svulesobil ta joltik
¿Kʼusi kʼot ta pasel kʼalal tsuts xa ox li vukub jabil chal ta slivroal Daniele?
¿Kʼu yuʼun achʼunoj ti lik ventainvanuk ta 1914 li Ajvalilal yuʼun Diose?
¿Kʼuxi xuʼ xavakʼ ta ilel ti achʼunoj ti chventainvan xa li Ajvalilal yuʼun Diose?
XUʼ TO XAKʼEL LIʼE
Kʼelavil kʼusi chal junantik j-al-loʼiletik xchiʼuk yan buchʼutik ti xchanojbeik skʼoplal ti kʼuxi jelem talel balumil leʼ xa ta 1914.
«¿Bak’in lik sokuk stalelalik?» (¡Vikʼiluk me jsatik!, avril ta 2007)
Kʼelavil kʼuxi jelbat-o xkuxlejal jun vinik li kʼusi chal Mateo 24:14.
«Batsʼi lek tajek xkaʼi xitajin ta beisbol» (Li Jkʼel˗osil ta toyole, num. 3 2017)
¿Kʼuxi jnaʼojtik ti jaʼ skʼoplal Ajvalilal yuʼun Dios li kʼusi chal ta kapitulo 4 ta Daniele?
Li kʼusi chal ta kapitulo 4 ta Daniele, ¿kʼuxi tskoltautik ta snaʼel ti tsuts ta 1914 li vukub jabile?
a Kʼelo li slajeb chib mantal ti te talem yoʼ bu chal: «Xuʼ to xakʼel liʼe».
b Kʼalal m.t.J. xie, jaʼ skʼan xal kʼalal muʼyuk toʼox talem Jesuse. Kʼalal t.J. xie, jaʼ skʼan xal kʼalal talem xa ox Jesuse.
-
-
Li kʼusitik tspas li Ajvalilal yuʼun Diose¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 33
Li kʼusitik tspas li Ajvalilal yuʼun Diose
Yakal xa chventainvan li Ajvalilal yuʼun Diose. Jutuk xa tajek skʼan ti oy kʼusitik lekik tspas li ta balumile. Jkʼeltik batel avil junantik li kʼusitik lekik tspas li Ajvalilal yuʼun Diose.
1. ¿Kʼusi tspas li Ajvalilal yuʼun Dios yoʼ oyuk jun oʼontonal xchiʼuk tukʼilale?
Li Jesus ti jaʼ li Ajvalil ti tʼujbil yuʼun Diose tslajesbe skʼoplal chopol krixchanoetik xchiʼuk ajvaliletik li ta paskʼop ta Armajedone (Apokalipsis 16:14, 16). Li vaʼ ora taje, kʼot xa ox ta pasel lek li kʼusi chal Vivlia liʼe: «Mu xa jaluk skʼan, vaʼun chchʼay skʼoplal li buchʼutik toj chopolike» (Salmo 37:10). Li Jesus ti jaʼ tʼujbil yuʼun Diose chichʼ talel jun oʼontonal xchiʼuk tukʼilal li ta balumile (kʼelo Isaias 11:4).
2. ¿Kʼu yelan jkuxlejaltik mi kʼot xa ox ta pasel li kʼusi tskʼan Dios ta balumile?
Mi jaʼ xa ox chventainvan li Ajvalilal yuʼun Diose, «chuʼuninik balumil li buchʼutik tukʼike xchiʼuk te chkuxiik˗o sbatel osil» (Salmo 37:29). ¡Nopo xa noʼox avaʼi skotol taje! Lek skotol li krixchanoetike, skʼanojik Jeova xchiʼuk skʼanoj sbaik ta jujuntal. ¿Mi mu jechuk ti toj kʼupil sbae? Muʼyuk xa buchʼu ch˗ipaj xchiʼuk chkuxiik sbatel osil li krixchanoetike.
3. ¿Kʼusitik to yan tspas li Ajvalilal yuʼun Diose?
Mi yichʼoj xa ox lajesel li chopol krixchanoetike, li Jesuse ch˗ajvalilaj ta jmil jabil. Li vaʼ sjalile, li Jesus xchiʼuk li 144 mil ti jmoj ch˗ajvalilajike tskoltaik lokʼel ta mulil li krixchanoetike xchiʼuk tskoltaik sventa spasik ta tukʼil krixchanoetik. Mi tsuts li jmil jabil une, pasem xa ox ta jun kʼupil sba nichimaltik li balumile, chnoj ta krixchanoetik ti xmuyubajik noʼoxe, yuʼun chchʼunbeik smantal li Jeovae. Laje, li Jesuse chakʼbe sutel Stot li Ajvalilale. Vaʼun, jaʼ to chichʼ chʼultajesbel sbi li Diose (Mateo 6:9, 10). Jaʼ jech jamal chvinaj ti jaʼ jun lekil Ajvalil li Jeovae xchiʼuk ti chchabi li steklumale. Mi laj une, li Jeovae tslajesbe skʼoplal li Satanase, li spukujtake xchiʼuk buchʼuuk noʼox ti tstoy sba ta stojolal li Ajvalilal yuʼune (Apokalipsis 20:7-10). Skotol li kʼusitik tspas li Ajvalilal yuʼun Diose ta me jkʼupintik ta sbatel osil.
JCHANTIK TO BATEL MAS
Jkʼeltik batel kʼu yuʼun xuʼ jpat koʼontontik ta stojolal Dios ti chkʼot ta pasel yuʼun li kʼusi yaloj ta Vivlia ta sventa li kʼusi tspas ta jtojolaltik li Ajvalilal yuʼune.
4. Li Ajvalilal yuʼun Diose tslajesbe skʼoplal li ajvaliletik ta balumile
«Ti kʼu sjalil spasoj sbaik ta mantal li krixchanoetike yakʼojbe sba svokol stukik» (Eklesiastes 8:9). Li Jeovae tstunes li Ajvalilal yuʼun sventa slajesbe skʼoplal li kʼusitik chopol spasoj li krixchanoetike.
Kʼelik Daniel 2:44 xchiʼuk 2 Tesalonisenses 1:6-8 xchiʼuk albeik skʼoplal li sjakʼobiltak liʼe:
Li Jeova xchiʼuk Jesuse, ¿kʼusi tspasbeik li ajvaliletik ta balumil xchiʼuk li buchʼutik koʼol sjolik xchiʼuke?
Li kʼusi achanoj xa ta sventa li stalelaltak Jeova xchiʼuk Jesuse, ¿kʼuxi chakʼ avil ti lek li kʼusi tspasik ta jelavele?
5. Jaʼ noʼox stuk lekil Ajvalil li Jesuse
Ta skoj ti jaʼ tʼujbil yuʼun Dios li Jesuse, ep kʼusitik tspas ta stojolal li jnaklejetik ta balumile. Sventa xakʼel kʼuxi laj yakʼ ta ilel Jesus ti oy ta yoʼonton tskolta li krixchanoetike xchiʼuk ti jaʼ akʼbil sjuʼel yuʼun Dios sventa spase, kʼelik li VIDEOE.
Li kʼusitik la spas Jesus kʼalal ay ta balumile jaʼ noʼox senyail li kʼusi tspas ta jelavel mi ajvalilaje. Li kʼusitik yaloj tspas Dios ti liʼ chchol batele, ¿bu junukal ti chakʼan xa chkʼot ta pasele? Kʼelik skotol li tekstoetik ti bu chal li kʼusi tskʼan tspas li Diose.
LI TA BALUMILE, LI JESUSE...
LI TA VINAJELE, LI JESUSE...
... la spas ta mantal li tsatsal ikʼaloʼe (Markos 4:36-41)
... tsmeltsan li kʼusitik sokesojik li krixchanoetike (Isaias 35:1, 2)
... la smakʼlin ta smilal noʼox krixchanoetik (Mateo 14:17-21)
... tslajesbe skʼoplal li viʼnale (Salmo 72:16)
... la xpoxta ep krixchanoetik (Lukas 18:35-43)
... ta xpoxtaan skotol krixchanoetik (Isaias 33:24)
... la xchaʼkuxes junantik krixchanoetik (Lukas 8:49-55)
... tslajesbe skʼoplal li lajelale (Apokalipsis 21:3, 4)
6. Koliyal li Ajvalilal yuʼun Diose, oy kʼusi lek ta jkʼupintik
Li Ajvalilal yuʼun Diose chakʼ ti akʼo skʼupin xkuxlejal krixchanoetik jech onoʼox kʼuchaʼal oy ta yoʼonton li Diose. Chkuxiik sbatel osil ta balumil mi pasem xa ox ta jun kʼupil sba nichimaltike. Li Jeovae tstunes Xnichʼon sventa spas li kʼusi oy ta yoʼontone. Sventa xanaʼ kʼuxi tspase, kʼelik li VIDEOE.
Kʼelik Salmo 145:16 xchiʼuk albeik skʼoplal li sjakʼobil liʼe:
¿Kʼu yelan chavaʼi aba ti chakʼbe «kʼusi tskʼan yoʼontonik» skotol kʼusi kuxajtik li Jeovae?
JUNANTIKE XI CHALIKE: «Mi laj kakʼ kipaltik ta jujuntale, chchapaj kuʼuntik li vokoliletik ta balumile».
¿Kʼusitik vokolil aviloj ti mu xchapaj yuʼunik li ajvaliletik ta balumil ti jaʼ noʼox xchapaj yuʼun li Ajvalilal yuʼun Diose?
¿KʼUSI LA ACHAN?
Li Ajvalilal yuʼun Diose tspas li kʼusi oy ta yoʼonton Jeovae. Tspas ta jun kʼupil sba nichimaltik li balumile xchiʼuk chnoj ta lekil krixchanoetik ti chichʼik ta mukʼ Jeova ta sbatel osile.
Svulesobil ta joltik
¿Kʼusi tspas li Ajvalilal yuʼun Dios sventa xchʼultajesbe sbi li Jeovae?
¿Kʼuxi jnaʼojtik ti chakʼ kʼotuk ta pasel kʼusi chal Vivlia li Ajvalilal yuʼun Diose?
Li kʼusitik tspas li Ajvalilal yuʼun Diose, ¿bu junukal ti chakʼan xa chkʼot ta pasele?
XUʼ TO XAKʼEL LIʼE
Kʼelavil kʼusi jaʼ li Armajedone.
Kʼelavil kʼusi chkʼot ta pasel kʼalal yakal li «mukʼta tsatsal vokolil» laj yalbe skʼoplal Jesuse (Mateo 24:21).
«¿Kʼusi jaʼ li mukʼta tsatsal vokolile?» (Xu’ te xata ta jw.org)
Kʼelavil kʼuxi tsnopbeik skʼoplal jun utsʼ alalil li bendisionetik tstaik mi chventainvan xa ox li Ajvalilal yuʼun Dios ta Paraisoe.
La stabe stakʼobil kʼusitik tsjakʼbe sba jun politiko ti tstoy sba ta stojolal ajvalile. Kʼelbo avil li sloʼil xkuxlejale, «Oy toʼox kʼusitik ta jkʼan ta jnabe skʼoplal».
«Jelbat˗o xkuxlejalik yuʼun li Vivliae» (Li Jkʼel-osil ta toyole, xchanobil)
-