Tsatsal kontrainel
¿Kʼu yuʼun snaʼojik ti ta onoʼox xichʼik kontrainel li yajtsʼaklomtak Kristoe?
¿Kʼu yuʼun skʼan jkʼanbetik koltael Jeova kʼalal chkichʼtik kontrainele?
Sl 55:22; 2Ko 12:9, 10; 2Ti 4:16-18; Ebr 13:6
Loʼiletik ta Vivlia ti tskoltautike:
1Re 19:1-18. Kʼalal laj yichʼ kontrainel li j-alkʼop Eliase, laj yalbe Jeova ti kʼu yelan chaʼi sbae, vaʼun patbat yoʼonton.
Ech 7:9-15. Kʼalaluk laj yichʼ kontrainel yuʼun sbankiltak li Josee, koltaat yuʼun Jeova, muʼyuk x-iktaat, pojat xchiʼuk tunesat sventa skolta li yutsʼ yalale.
¿Kʼutik yelan chkichʼtik kontrainel?
Kʼalal chkichʼtik labanel o chopol kʼoptaele
2Kr 36:16; Mt 5:11; Ech 19:9; 1Pe 4:4
Loʼiletik ta Vivlia ti tskoltautike:
2Re 18:17-35. Li Rabsake ti jaʼ yajkʼopojel li ajvalil ta Asiriae la xchopol kʼopta li Jeovae xchiʼuk la slaban li jnaklejetik ta Jerusalene.
Lu 22:63-65; 23:35-37. Li Jesuse chopol kʼoptaat yuʼun li yajkontratake xchiʼuk kʼexlaltasat kʼalal jaʼo chukule xchiʼuk kʼalal jaʼo te jokʼol ta jtel teʼe.
Kontrainel ta kutsʼ kalaltik
Chkichʼtik chukel xchiʼuk chkichʼtik ikʼel batel ta stojolal j-abteletik
Majel, ilbajinel
Tstsakvanik ta kʼop epal krixchanoetik
Chkichʼtik milel
¿Kʼusi skʼan spasik li yajtsʼaklomtak Kristo kʼalal chichʼik kontrainele?
Mt 5:44; Ech 16:25; 1Ko 4:12, 13; 1Pe 2:23
Loʼiletik ta Vivlia ti tskoltautike:
Ech 7:57–8:1. Kʼalal jutuk xa ox skʼan xichʼ milel yuʼun epal krixchanoetik li jchankʼop Estebane, la skʼanbe vokol Dios ti akʼo yakʼbe ta ilel xkʼuxul yoʼonton li buchʼutik chkontrainvanike ti te skʼoplal li Saulo ta Tarsoe.
Ech 16:22-34. Akʼo mi laj yichʼ majel xchiʼuk laj yichʼ latsʼbel yakan ta latsʼob teʼ li jtakbol Pabloe, ta slekil yoʼonton la skʼopon li jchabichukinabe, vaʼun pasik ta jchʼunolajel xchiʼuk yutsʼ yalal.
¿Kʼusi kʼot ta stojolalik junantik yajtsʼaklom Kristo li ta baʼyel sigloe?
¿Kʼu yelan skʼan xkiltik li kontrainele?
Li spatobil koʼontontike, ¿kʼuxi tskoltautik kʼalal chkichʼtik kontrainele?
¿Kʼu yuʼun muʼyuk chijkʼexav, muʼyuk chijxiʼ xchiʼuk muʼyuk chijchibaj-o kʼalal chkichʼtik kontrainele? ¿Kʼu yuʼun muʼyuk chkikta jbatik ta spasbel yabtel li Jeovae?
Sl 56:1-4; Ech 4:18-20; 2Ti 1:8, 12
Loʼiletik ta Vivlia ti tskoltautike:
2Kr 32:1-22. Li ajvalil Esekiase la spat yoʼonton ta stojolal Jeova xchiʼuk la stsatsubtasbe yoʼonton li jteklum kʼalal tsakatik ta kʼop yuʼun li ajvalil Senakeribe, vaʼun lek kʼusi kʼot ta pasel.
Ebr 12:1-3. Li Jesuse kʼexlaltasat yuʼun li yajkontratake, pe muʼyuk bu xchibaj-o.
¿Kʼusitik lek xuʼ xkʼot ta pasel yuʼun li kontrainele?
Xmuyubaj me Jeova mi kuch kuʼuntik li prevaetike xchiʼuk jaʼ jech chkichʼbetik-o ta mukʼ li sbie
Loʼiletik ta Vivlia ti tskoltautike:
Job 1:6-22; 2:1-10. Li Jobe muʼyuk la skontrain Jeova ta skoj li svokoltake akʼo mi mu toʼox snaʼ ti jaʼ ch-akʼbat svokol yuʼun li Satanase. Yuʼun tukʼ-o laj yakʼ sba ta stojolal Jeova, la smuyubta-o xchiʼuk laj yakʼ ta ilel ti jaʼ jun jutkʼop li Satanase.
Da 1:6, 7; 3:8-30. Li Ananias, Misael xchiʼuk Asariase (Sadrak, Mesak xchiʼuk Abednego) tukʼ laj yakʼ sbaik xchiʼuk la xchʼunbeik-o smantal Jeova akʼo mi chichʼik xa ox milel. Ti jech la spasike, li ajvalil Nabukodonosore la skʼupil kʼopta-o Jeova ta yeloval krixchanoetik.
Kʼalal chkichʼtik kontrainele, xuʼ me jech xojtikinik-o Jeova li krixchanoetike
Loʼiletik ta Vivlia ti tskoltautike:
Ech 11:19-21. Li baʼyel yajtsʼaklomtak Kristoe la spuk sbaik batel kʼalal laj yichʼik kontrainele, vaʼun puk batel ta epal lumetik li lekil aʼyejetike.
Flp 1:12, 13. Kʼalal laj yaʼi jtakbol Pablo ti puk xa batel li lekil aʼyejetike, muyubaj-o tajek akʼo mi te tikʼil ta chukel.
Kʼalal chkuch kuʼuntik li kontrainele, xuʼ me stsatsubtasbat-o yoʼontonik li kermanotaktike.
¿Buchʼutik chkontrainatik yuʼun li yajtuneltak Jeovae?
Jer 26:11; Mr 3:6; Jn 11:47, 48, 53; Ech 25:1-3
Loʼiletik ta Vivlia ti tskoltautike:
Ech 19:24-29. Junantik krixchanoetik ta Efeso ti tspasbeik slokʼol santoetike la skontrainik li yajtsʼaklomtak Kristo ti tspukbeik batel skʼoplal li lekil aʼyeje, yuʼun la snopik ti muʼyuk xa chchʼam li santoetik tspasike.
Gal 1:13, 14. Kʼalal skʼan toʼox xkʼot ta yajtsʼaklom Kristo li Pabloe (Saulo), laj toʼox spakbe skʼoplal li kʼusi xchʼunoj judaetike, jaʼ yuʼun la skontrain toʼox li yajtsʼaklomtak Kristoe.