Tukʼil oʼontonal ta stojolal Dios
¿Kʼusi skʼan xal ti tukʼ koʼontontik ta stojolal Diose?
Sl 18:23-25; 26:1, 2; 101:2-7; 119:1-3, 80.
Loʼiletik ta Vivlia ti tskoltautike:
Le 22:17-22. Li chikʼbil matanal chonbolom tskʼan Jeovae jaʼ ti muʼyukuk ipe. Kʼalal chal ta ebreo «muʼyuk ip» xie, te snitojbe sba skʼoplal xchiʼuk li tukʼil oʼontonal ta stojolal Diose, jaʼ xkaltik, ti lek tsʼakale. Taje jaʼ chakʼ ta aʼiel ti jaʼ noʼox skʼan xijtun ta stojolal Jeovae.
Job 1:1, 4, 5, 8; 2:3. Li kʼusi la spas ta xkuxlejal li Jobe te chakʼ ta ilel ti jaʼ noʼox skʼan xkichʼtik ta mukʼ Jeova ta sjunul koʼontontik xchiʼuk ti mu jpastik li kʼusi chopol chile, vaʼun tukʼ koʼonton chilutik.
¿Kʼu yuʼun skʼan ti tukʼuk koʼontontik ta stojolal Diose?
¿Kʼusi tskoltautik sventa tukʼuk-o koʼontontik ta stojolal li Diose?
¿Kʼuxi xuʼ tukʼ koʼontontik ta stojolal Dios xchiʼuk ti jechukutik-oe?
Kʼelo xtok Dt 5:29; Is 48:17, 18.
Loʼiletik ta Vivlia ti tskoltautike:
Job 31:1-11, 16-33. Li Jobe laj yakʼ ta ilel skotol kʼakʼal ti tukʼ yakʼoj sba ta stojolal Jeovae, muʼyuk xmulivaj, laj yakʼ ta ilel slekil yoʼonton ta stojolal yantik, jaʼ noʼox laj yichʼ ta mukʼ Jeova, muʼyuk laj yichʼ ta mukʼ santoetik xchiʼuk maʼuk bat ta yoʼonton li kʼusi x-ayan yuʼune.
Da 1:6-21. Li Daniel xchiʼuk li oxvoʼ yamigotake la xchʼunbeik li smantaltak Jeovae, yuʼun muʼyuk la slajesik li kʼusi muʼyuk lek chil Jeovae akʼo mi mu jechuk tspasik li krixchanoetik te ta spat xokonike.
Li jun krixchano ti ep ta velta oy kʼusitik chopol tspase, ¿mi xuʼ to van tukʼ xakʼ sba ta stojolal Jeova ta tsʼakal?
Loʼiletik ta Vivlia ti tskoltautike:
1Re 9:2-5; Sl 78:70-72. Ta skoj ti la sutes yoʼonton li ajvalil Davide, akʼat ta perton yuʼun li Jeovae xchiʼuk jech-o tukʼ yoʼonton ilat.
Is 1:11-18. Akʼo mi chopolik toʼox tajek li kʼusitik la spasik li j-israeletike, li Jeovae laj yalbe ti chakʼanan ta perton mi tsutes yoʼontonik xchiʼuk mi muʼyuk xa tspasik li kʼusitik chopolike.