Jun sjakʼobil ti kʼun noʼox ta pasele

LI Mari xchiʼuk Johnea jaʼik jun nupultsʼakal ti te nakalik ta jun jteklum ti bu chkʼot jsaʼabteletik ti likemik tal ta Filipinase. Li nupultsʼakale ta xcholbeik mantal li krixchanoetik taje. Kʼalal jaʼo yakal li chamel COVID-19, li Marie maʼuk noʼox laj yakʼbe chanubtasel ta Vivlia li krixchanoetik ti te jmoj slumalik xchiʼuke, yuʼun laj yakʼbe chanubtasel xtok li krixchanoetik ti yan-o slumalike. ¿Kʼuxi pas yuʼun taje?

Xi nopem xaʼi tsjakʼbe li buchʼu chchanubtas ta Vivlia li Marie: «¿Mi oy buchʼu xavojtikin ti tskʼan chchan li Vivliae?». Mi ch-albat ti oye, chalbe mi xuʼ x-akʼbat yojtikin. Kʼalal jech tsjakʼe, lek kʼusi kʼotem ta pasel yuʼun. ¿Kʼu yuʼun? Yuʼun li krixchanoetik ti oy ta yoʼontonik li Skʼop Diose tskʼan chalbeik batel yutsʼ yalalik xchiʼuk yamigotakik li kʼusi yakal chchanike. Jkʼeltik kʼusi kʼot ta stojolal li Marie.

Jun yaj-estudio ti Jasmin sbie laj yakʼbe yojtikin chanvoʼ krixchanoetik ti tskʼan chchanik li Vivlia eke. June Kristine sbi ti tskʼupin tajek xchanel li Vivliae, jaʼ yuʼun la skʼan chib velta ta xemana s-estudio. Kʼalal la sjakʼbe Kristine mi oy buchʼu xojtikin ti tskʼan chchan Vivlia eke, xi laj yale: «Oy, chkakʼ avojtikin li kamigatake». Jun chib xemana ta tsʼakale, laj yakʼbe yojtikin chanvoʼ yamigatak ti oy ta yoʼontonik xchanel li Vivlia eke. Ta mas tsʼakale, li Kristine laj yakʼbe yojtikin yan krixchanoetik li Marie. Li krixchanoetik taj eke jaʼ jech laj yakʼbeik yojtikin yan krixchanoetik li Marie.

Li Kristine oy ta yoʼonton ti xlik xchanik Vivlia li yutsʼ yalal ti te nakalik ta Filipinase, jaʼ yuʼun la skʼopon batel stseb ti Andrea sbie. Li Andreae xi toʼox tsnop ta stojolal li Stestigotak Jeovae: «Li stestigotak Jeovae toj yanik-o. Muʼyuk xchʼunojik ta stojolal Jesus xchiʼuk jaʼ noʼox tstunesik li Pokoʼ Testamentoe». Pe kʼalal laj yichʼ estudio ta sba veltae, laj yakʼ venta ti mu meleluk li kʼusi tsnope. Kʼalal chichʼ s-estudio jujukoje, xi mal xale: «Mi jaʼ jech chal li Vivliae, ¡jaʼ melel un chaʼa!».

Ta mas tsʼakale, li Andreae laj yakʼbe yojtikin Mari chaʼvoʼ yamigatak xchiʼuk jun xchiʼil ta abtel, vaʼun lik yichʼik estudio. Jech xtok, li Andreae oy jun sjunmeʼ ti Angela sbie xchiʼuk ti maʼsate. Nopem xaʼi chchikinta jujun velta kʼalaluk chichʼ s-estudio li Andreae, pe mu snaʼ li Marie. Jun veltae, li Angelae laj yalbe Andrea ti tskʼan chojtikin li Marie, yuʼun tskʼan chchan li Vivlia eke. Li Angelae la skʼupin tajek li s-estudioe. Kʼalal mu toʼox sta jun u chichʼ s-estudioe, ep xa ox tekstoetik komem ta sjol, maʼuk noʼox, yuʼun laj yal ti chanib velta ta xemana tskʼan li s-estudioe. Ta skoj ti koltaat yuʼun li Andreae, lik ochuk ta jtsobajeltik ta videollamada li Angelae.

Kʼalal jaʼo chichʼ chanubtasel li Kristine, li smalal ti Joshua sbie nopem xaʼi ti te nopol chchoti sventa xchikintae. Kʼalal laj yakʼ venta li Marie, la sjakʼbe mi tskʼan chchiʼinvan. Xi la stakʼe: «Lek, pe naka noʼox ta jchikinta. Mu me kʼusi xajakʼbun, mi moʼoje, chilokʼ batel». Akʼo mi kʼajomal to noʼox voʼob minuto ti te chchikintae, mas xa ox ep kʼusitik la sjakʼ xchiʼuk laj yal ti tskʼan chchan li Vivlia eke.

Ta skoj li kʼusi la sjakʼ Marie, ep krixchanoetik lik xchanik li Vivliae. Li Marie la skʼanbe koltael yan ermanoetik xchiʼuk ermanaetik sventa xuʼ xakʼbeik estudio li krixchanoetik taje. Ta skotole 28 krixchanoetik xa ox chakʼbe chanubtasel ta Vivlia li Marie ti te nakalik ta chanib lumetike.

Li baʼyel yaj-estudio ti jaʼ li Jasmine laj yichʼ voʼ ta avril ta 2021. Li Kristine laj yichʼ voʼ ta mayo ta 2022 xchiʼuk sut nakluk yan velta ta Filipinas xchiʼuk li yutsʼ yalale. Li yan chaʼvoʼ s-estudiotak ti jaʼ laj yakʼ ta ojtikinel li Kristine laj yichʼik voʼ ek. Jun-chib u ta jelavele, li Angelae laj yichʼ voʼ xchiʼuk jaʼ xa prekursora regular. Li smalal Kristine ti Joshua sbi xchiʼuk li stseb ti Andrea sbie yakal chchʼiik ta mantal. Jaʼ jech yakal chchʼiik ta mantal ek li yan s-estudiotake.

Li ta baʼyel siglo eke, kʼalal laj yaʼiik lekil aʼyejetik li krixchanoetike, ta anil noʼox laj yalbeik batel li yutsʼ yalalik xchiʼuk li yamigotakike, jaʼ yuʼun puk batel ta anil (Juan 1:​41, 42 sbavokʼal; Ech. 10:​24, 27, 48; 16:​25-33). ¿Kʼu yuʼun mu xiuk xajakʼbe avaj-estudio xchiʼuk li yan krixchanoetik ti oy ta yoʼontonik li Skʼop Diose: «¿Mi oy buchʼu xavojtikin ti tskʼan chchan li Vivliae?»? Mi jech la ajakʼ eke, xuʼ van xata epal krixchanoetik ti tskʼan chchanik li Vivliae.