Соос Иисус сярысь гожъязы

Адӟиськод-а та адямиосыз суред вылысь?~ Со Матфе́й, Марк, Лука́, Иоа́нн, Пётр, Иа́ков, Иу́да но Па́вел. Та пиосмуртъёс Иисус Христосэн одӥг дыре улӥзы но солэн улонэз сярысь гожтӥзы. Ойдо тросгес тодомы соос сярысь.

Та пиосмуртъёс пӧлысь куинез апостолъёс вал но Иисусэн ӵош ӟеч иворез веразы. Быгатод-а соослэсь нимъёссэс вераны?~ Со Матфей, Иоанн но Пётр. Матфей но Иоанн апостолъёс Иисусэз умой тодо вал, но кыксы ик солэн улонэз сярысь книга гожтӥзы. Апостол Иоанн гожтӥз на Усьтӥськон книгаез но куинь гожтэтъёсыз, кудъёсыз нимасько: Иоаннлэн Нырысетӥ, Кыкетӥ но Куинетӥ гожтэтэз. Апостол Пётр но кык гожтэт гожтӥз, кудъёсыз Библие пыртэмын вал. Соос нимасько: Пётрлэн Нырысетӥ но Кыкетӥ гожтэтэз. Пётрлэн Кыкетӥ гожтэтысьтыз ми тодӥськомы, Иегова инмысен Иисус сярысь таӵе кылъёс вераз шуыса: «Та мынам яратоно пие. Мон соин данъяськисько!»

Мукет адямиос но, кудъёссэ тон суред вылысь адӟиськод, озьы ик асьсэлэн книгаосазы Иисус сярысь веразы. Соос пӧлысь одӥгезлэн нимыз — Марк. Со ачиз адӟиз, луоз, кызьы Иисусэз возьмаськисьёс кырмизы. Мукетызлэн нимыз — Лука. Со эмъясь вал но христиан мурт луиз Иисуслэн кулэмез бере гинэ, вылды.

Мукет кык пиосмуртъёс, кудъёсыз Иисус сярысь гожъязы, солэн вынъёсыз вал. Тодӥськод-а тон соослэсь нимъёссэс?~ Соослэн нимъёссы вал Иаков но Иуда. Нырысь соос Иисуслы ӧз оске. Со сяна, соос малпазы, Иисус визьзэ ыштӥз шуыса. Нош собере соос оскизы солы но христиан муртъёс луизы.

Берпуметӥез соос пӧлысь, кинэ тон адӟиськод суред вылысь, — со Павел. Христиан мурт луэмезлэсь азьло солэн нимыз вал Савл. Со христианъёсты адӟемпотостэм кариз но соосты кышкатыны но виылыны выриз. Тодӥськод-а тон, малы Павел христиан мурт луиз?~ Одӥг пол, Дамаске мыныкуз, Павел шӧдтэк шорысь инмысь куара кылӥз. Со Иисуслэн куараез вал! Со юаз Павеллэсь: «Малы тон урод лэсьтӥськод соослы, кинъёс мыным оско?» Иисуслэн со кылъёсыз Павеллэсь мылкыдзэ ӝутӥзы воштӥськыны, но со христиан мурт луиз. Павел Библиысь 14 книгаосыз гожтӥз, Римъёслы гожтэтысен кутскыса Еврейёслы гожтэтозь.

Библиез ми котькуд нунал лыдӟиськомы, озьы-а?~ Куке ми Библиез лыдӟиськомы, Иисус сярысь троссэ тодӥськомы. Нош потэ-а тынад со сярысь тросгес тодэмед?~