Лыдӟисьёслэн юанъёссы

Вераське-а Екклесиастын 5:7 адями кивалтӥсьёс сярысь гинэ, яке отын вераське Иегова сярысь но?

Та кылбурын гожтэмын: «Кыӵе ке шаерысь-ёросысь начар-куанер муртэ ёртыса воземез, шонертэм судэз, зэмлык сӧронэз адӟид ке, солы эн паймы, малы ке шуоно вылӥ луись муртэ эшшо но вылӥ луисез чакласа-эскерыса возе, нош соос вылын эшшо но вылӥ луисез вань на» (Екк. 5:7).

Адями синмын учконо ке, малпаны луоз: та кылбурын вераське адямиос сярысь гинэ, кудъёсызлы кивалтэт сётэмын. Нош мургес малпаськоно ке, со усьтэ милемлы Иегова сярысь кулэ луись зэмлыкез, кудӥз буйгатэ но юнматэ милемыз.

Екклесиастын 5:7 вераське кивалтӥсь сярысь, кудӥз начар-куанер муртэ ёртыса возе но шонер судить уг кары. Сыӵе кивалтӥсьлы тодаз возёно: ӵем дыръя сое чакла-эскере со, кин эшшо но вылӥ инты басьтэ. Со сяна, вылӥ инты басьтӥсьлэсь эшшо но вылӥ луисез вань на, дыр. Жаляса верано луэ, адями кивалтӥсьёс ӵем дыръя шонерлыктэм судить каро, нош соин сэрен огшоры адямиос курадӟо.

Кыӵе гинэ секыт югдур медаз кылды, милемыз буйгатэ малпан, вылӥ кивалтӥсьёсты но Иегова чакласа-эскерыса возе шуыса. Ми быгатӥськомы Инмарлэсь юрттэт курыны но сюлмаськонъёсмес со кие сётыны (Пс. 54:23; Флп. 4:6, 7). Ми оскиськомы: «Кузё-Инмарлэн синъёсыз быдэс дуннеез адӟо Солы сюлмынызы оскиськымонэсь луисьёсты ӟечкын возён понна» (2 Пар. 16:9).

Йылпумъян лэсьтомы. Екклесиастын 5:7 вераське адями кивалтэтъёсын кылдэм югдур сярысь: котьку но вань со, кин вылӥгес инты басьтэ. Нош тужгес но кулэез, та кылбур тодамы вайытэ, Иегова ваньмызлэсь вылӥ инты басьтэ шуыса. Али со кивалтэ инмысь Эксэйлыкез пыр, кудаз аслэсьтыз Пизэ, Иисус Христосэз, Эксэе пуктӥз. Ваньмызлэсь кужмо Инмар, кудӥз котьмае но котькинэ адӟе, быдэсак шонерлыко луэ. Тае ик вераны луоз Пиез сярысь но.