Иисус Христос виемын

ИИСУС тодӥз, солэн музъем вылын улонэз йылпумъяське ини шуыса. Куинь но ӝыны ар со тодытӥз но адямиосты дышетӥз. Иудеяысь религиозной кивалтӥсьёс Иисусэз виыны вераськизы, но калыкын бугыръяськонлэсь кышказы, малы ке шуоно адямиос Иисусэз пророкен лыдъязы. Со куспын Искариот Иуда, 12 апостолъёс пӧлысь одӥгез, Шайтанлэн мылкыдызлы сётӥськиз но вузаса сётӥсь луиз. Валтӥсь священникъёс Иудалы 30 азвесь манет сётомы шуизы, со Иисусэз вузаса сётӥз ке.

Улонэзлэн берпуметӥ уяз Иисус апостолъёсыныз ӵош Пасхаез пусйиз. Иуда кошкем бере, Иисус выль йылол пыртӥз — Господьлэсь Ӝытанзэ пусйыны. Со нянь басьтӥз, Инмарлы тау карыса вӧсяськиз но сое 11 кылем апостолъёсызлы сётӥз. «Та Мынам Мугоры,— шуиз Иисус,— со тӥ понна сётӥське; Монэ буре вайыса, тае быдэсъялэ». Собере со винаен чашаез кутыса сётӥз но шуиз: «Та чаша Мынам Вирам Выль Сӥзён луэ» (Лука 22:19, 20).

Со уе Иисус апостолъёсызлы троссэ вераны кулэ вал. Со соослы выль курон-косон сётӥз — ог-огзэс вань сюлмысьтызы яратыны — но валэктӥз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:34, 35). Иисус соосты вуоно кышкыт югдуръёс сярысь сюлмаськытэк улыны ӧтиз но сюлмысь вӧсяськиз соос понна. Пумаз соос данъян гуръёс кырӟазы но Гефсиман садэ мынӥзы.

Садын Иисус пыдесъяськыса Инмарлы ӟырдыт вӧсяськиз. Ӝоген, сое кутыса нуон понна, со доры ож тӥрлыкъёсын трос адямиос лыктӥзы. Соос пӧлын ожгарчиос но, священникъёс но вал. Иуда Иисус доры лыктӥз но, соослы тодмет сётыса, сое чупаз. Соку ожгарчиос Иисусэз кутӥзы, нош апостолъёс пегӟизы.

Иудеяысь вылӥ суд азьын сылыкуз, Иисус ӧз пыкиськы, со Инмарлэн пиез ӧвӧл шуыса. Суд сое янгыше уськытӥз, со Инмарез сантэма шуыса, но со понна сое виыны кулэ шуыса ялӥз. Со бере Иисусэз Понтий Пилат рим кивалтӥсь доры нуизы. Пилат солэсь нокыӵе янгышсэ ӧз шедьты ке но, со калыклэсь Иисусэз виыны куронзэ быдэстӥз.

Голгофа шуон интыын рим ожгарчиос Иисусэз юбо вылэ кортӵогазы. Нуназе шӧдтэк шорысь пеймыт луиз. Берлогес, Иисус кулэм бере, музъем юн зурказ. Иисуслэсь мугорзэ гурезьысь из пушкы гудӟыса лэсьтэм шайгуэ понӥзы. Мукет нуналэ священникъёс шайгуэз пытсась из вылэ печать нюртӥзы но со вӧзы возьмаськисьёсты пуктӥзы. Нош Иисус пырак азелы шайгуэ кылиз-а? Ӧз, малы ке шуоно паймымонлэсь но паймымон уж луиз.

Пыкиськемын: Матфей, 26-тӥ но 27-тӥ люкетъёс; Марк, 14-тӥ но 15-тӥ люкетъёс; Лука, 22-тӥ но 23-тӥ люкетъёс; Иоанн, 12—19-тӥ люкетъёс.