26-ТӤ ЛЮКЕТ
Музъем вылын выльысь рай!
Эксэйлык пыр, кудаз Христос кивалтэ, Иегова аслэсьтыз нимзэ дун-чылкыт каре, кивалтонзэ шонере поттэ но ваньзэ уродзэ быдтэ
БИБЛИЛЭСЬ берпуметӥ книгазэ, кудӥз Усьтӥськон шуыса нимаське, апостол Иоанн гожтӥз. Со вань адямиослы оскиськон сётэ. Та книгаын адӟонъёс сярысь верамын, кудъёсаз Иеговалэн малпанэзлэн пумозяз быдэсмемез возьматэмын.
Нырысетӥяз адӟонын улӟытэм Иисус куд-ог кенешъёсты ушъя но пусъе, кыӵе удысын соослы воштӥськоно. Мукетыз адӟон милемыз Инмарлэн престолэз доры вуттэ. Инмысь престолэз духовной кылдытэмъёс котырто, кудъёсыз Инмарез данъяло.
Ыжпи, Иисус Христос, сизьым печатен книга басьтэ. Нырысетӥ ньыль печатьёссэ куштэм бере, ньыль вал вылын пукисьёс пото. Нырысетӥез, тӧдьы вал вылын мынӥсез,— со эксэе пуктэм Иисус. Со бӧрсьы пӧртэм гонъем валъёс вылын пукисьёс пото. Вал вылын пукисьёс символъёс луо. Соос возьмато ожъёсты, сютэм улонэз но черъёсты — шугадӟонъёсты, кудъёсыз та дуннелэн берпуметӥ нуналъёсаз луо. Сизьыметӥ печатез куштыку, Инмарлэн судъёсыз сярысь ивортыса, сизьым гумыос пельто. Собере сизьым вӧсь каронъёс кисьтӥсько, кудъёсыз Инмарлэсь йыркуръяськонзэ возьмато.
Инмарлэн Эксэйлыкез, кудӥз пи нуныен возьматэмын, инмын пуктэмын. Отын ожмаськон кутске но, Шайтанэз лек кылчинъёсыныз ӵош музъем вылэ сэрпалто. «Музъем вылын, зарезьын улӥсьёслы куректон-кайгу,— вера кужмо куара,— тӥ доры туж бадӟым йыркурен диавол васькиз,— со тодэ уго, солы ӧжыт дыр кылемын ни шуыса» (Усьтӥськон 12:12).
Инмын Иоанн адӟе Ыжпиез, Иисусэз, но соин ӵош адямиос пӧлысь 144 000 быръемъёсты. Со соос, кинъёс Иисусэн ӵош эксэй радын луозы. Озьыен, Усьтӥськонын возьматэмын, кидыс-выжылэн кыкетӥ люкетаз 144 000 быръемъёс пырозы шуыса (Усьтӥськон 14:1; 20:6).
Музъем вылысь эксэйёсты «Дунне Кутӥсь Инмарлэн быдӟым нуналаз ожмаськонэ» люкало. Со Армагеддон шуыса нимаське. Музъем вылысь кивалтӥсьёс ожмасько тӧдьы вал вылын пукисен — Иисусэн, кудӥз инмысь ожмаськисьёсын кивалтэ. Та дуннелэн вань кивалтӥсьёсыз быдтэмын, нош Шайтан думемын. Иисус но 144 000 музъемен «сюрс ар ӵоже» кивалто, нош соос йылпумъяськем бере, Шайтан пыраклы быдтэмын (Усьтӥськон 16:14; 20:4).
Кыӵе улон ваёз кылзӥськись адямиослы Христослэн но соин ӵош кивалтӥсьёсызлэн сюрс ар ӵоже кивалтэмзы? Иоанн гожтэ: «Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ, уго мар вал азьвыл, ваньмыз со ортчиз-кошкиз» (Усьтӥськон 21:4). Музъем вылын выльысь рай!
Озьы Усьтӥськон книгаын Библилэн валтӥсь темаез йылпумъяське. Мессиялэн Эксэйлыкез пыр Иеговалэн нимыз пыраклы дун-чылкыт каремын но солэн кивалтонэз быдэсак шонере поттэмын!
Пыкиськемын: Усьтӥськон книга.