Дась луон мылкыдды Иеговаез мед данъялоз!

1, 2. а) Кызьы учке Инмар милям ужаммы-тыршеммы шоры, Елифазлэн но Вилдадлэн малпамзыя? б) Кызьы Иегова возьматӥз, мар со малпа ужаммы-тыршеммы пумысен?

«ИНМАРЛЫ пайда сётыны адями быгатэ шат? Валась мурт аслыз ачиз пайда вае. Тон шонер улӥсь шуыса, Дунне Кутӥсьлы мар ӟечез? Аслэсьтыд сюресъёстэ тон дун-шектэм возиськод шуыса, луоз-а Солы пайдаез?» (Иов 22:1—3). Тӥ куке но малпаськылӥды-а та юанъёс вылын? Феманысь Елифаз, та юанъёсты Иовлы сётыкуз, оске вал, соосын соглаш кариськыны уг луы шуыса. Солэн эшез, Шуах выжыысь Вилдад, вераз, адямиос Инмар азьын шонерлыко луыны уг быгато шуыса. (Лыдӟы Иовез 25:4.)

² Елифазлэн но Вилдадлэн верамзы потэ вал, милям ужаммы-тыршеммы Иеговалы пайда уг вайы но Инмар адямиез кейлэсь но нумырлэсь дуноенгес уг лыдъя шуыса (Иов 4:19; 25:6). Нырысь учкыса, Елифазлэн но Вилдадлэн кылъёсысьтызы зӥбыт-востэм сям адӟиське (Иов 22:29). Зэмзэ но, ӝужыт гурезь йылысен яке самолётысен учкыса, музъем вылысь ваньмыз туж пичи адӟиське. Нош озьы-а адӟиське инмысен Иеговалы Эксэйлык понна тыршеммы? Иегова возьматӥз, мар со малпа та пумысен, куке Елифазэз, Вилдадэз но Софарез пӧяськемзы понна судъяз, нош Иовез ушъяз но мынам ляльчие шуыса нимаз (Иов 42:7, 8). Озьыен, «Инмарлы пайда сётыны адями быгатэ шат»? Одно ик!

«МАР СОЛЫ СЁТӤСЬКОД?»

3. Мар вераз Елиуй Иеговалы ужаммы-тыршеммы сярысь? Мае солэн озьы верамез потэ вал?

³ Иегова Елиуез ӧз тупаты, куке со вераз: «Тон шонерлыко улӥсь ке, мар Солы сётӥськод? Яке, тынад киысьтыд мар Со басьтэ?» (Иов 35:7). Верамез потэ вал-а Елиуйлэн, ми Инмарлы юнме ужаськомы-тыршиськомы шуыса? Уг. Солэн верамез потэ вал, Иегова митэк но улыны быгатэ шуыса, ми солы ӧм ужалэ-тырше ке но. Ми сое кужмогес яке узыргес карыны быгатомы шат? Умой сямъёс но быгатонлыкъёс адямиослы Инмарен сётэмын, но со чакла, кызьы ми соосты уже кутӥськомы.

4. Кызьы учке Иегова мукетъёсызлы ӟеч ужъёс лэсьтэммы шоры?

⁴ Ми Иеговалэн ужась-тыршисьёсызлы оскиськымон яратонмес возьматӥськомы ке, Иегова лыдъя, озьы ми возьматӥськомы сое яратӥськомы шуыса. Мадёнъёсын 19:17 верамын: «Куанерлы ӟеч лэсьтӥсь мурт Кузё-Инмарлы пунэмен сётэ, нош Со солэн ӟеч ужез понна пунэмзэ берыктоз». Возьматэ-а со, Иегова милесьтым «куанеръёслы» лэсьтэм котькуд ӟеч ужмес адӟе шуыса? Зэмзэ ик-а Дуннеез Кылдытӥсь лыдъя, солэн пунэмен тыронэз вань шуыса огшоры адямиослы, кудъёсыз ӟеч ужъёс лэсьто? Зэмзэ ик-а со берыктэ пунэм тыронзэ сыӵе адямиослы, соосты бакель карыса? Зэм. Со сярысь вераз солэн Пиез. (Лыдӟы Лукалэсь 14:13, 14.)

5. Кыӵе юанъёсты ми эскеромы?

⁵ Иегова Исаия пророклы солэн нимыныз вераны ӵектӥз. Озьы Иегова возьматӥз, со шумпотыса оскымон адямиосызлы малпанзэ быдэстоназ пыриськыны лэзе шуыса (Ис. 6:8—10). Исаия мылысь-кыдысь соглаш кариськиз со ужез быдэстыны. Асьме дыръёсы трос сюрс адямиос Иеговалы ужан-тыршонын секыт ужъёсты но быдэстыны дасесь. Исаия сямен соос верало: «Тани мон, монэ ысты». Нош кин ке но малпалоз, вылды: «Мон туж дунъясько, Иеговалы ужаны-тыршыны быгатӥсько шуыса. Нош мынам тыршеме солы пайда вае-а? Монэн-а, монтэк-а, Иегова аслэсьтыз малпанзэ быдэстыны уз быгаты шат?» Та юанъёслы валэктонъёс шедьтон понна, ойдолэ эскеромы, мар луиз Девора но Варак улон нуналъёсы.

ИНМАР КЫШКАНЗЭС ВОРМЫНЫ ЮРТТЭ

6. Маин пӧртэм вал израиль пиос Иавинлэн ожгарчиосызлэсь?

⁶ Ханаанысь Иавин эксэй 20 ар ӵоже израиль пиосты «туж курадӟытыса возиз». Израиль калык улон интыосысьтыз потыны ик кышка вал. Иавинлэн ожгарчиосызлэн 900 ожмаськон корт уробоосызa вал, нош израиль пиослэн ожмаськон тӥрлыксы но, ожмаськон дӥськутсы но ӧй вал (Суд. 4:1—3, 13; 5:6—8).

7, 8. а) Мар карыны косӥз Иегова Варакез? б) Кызьы израиль пиос Иавинлэсь ожгарчиоссэ вормизы? (Учке статья кутсконысь суредэз.)

⁷ Озьы ке но, Иегова азьпалзэ тодытыса верась Девора пыр Вараклы таӵе косон сётӥз: «Мын, Фавор гурезь йылэ туб, Неффалим выжыысь, Завулон выжыысь дас сюрс адямиез ас сьӧрад басьты; нош мон тон дӥне, Киссон ӧр доры, Иавинлэсь армиен кивалтӥсьсэ Сӥсараез ваё, ожмаськон уробооссэ но туж трос ожгарчиоссэ, соосты тон кие сёто» (Суд. 4:4—7).

⁸ Со сярысь ивор быдэс Израиле вӧлмиз. Ваньзы, кинъёс вазиськизы ӧтёнлы, Фавор гурезь доры люкаськизы. Варак соку ик соослы Иеговалэсь кылъёссэ вераз. (Лыдӟы Судьяосты 4:14—16.) Фаанахын ожмаськон дыръя шӧдтэк шорысь жаль зорыны кутскиз но, котыр инты нюрлы пӧрмиз. Варак Сӥсаралэн ожгарчиосыз сьӧры Харошеф-Гоим дорозь 24 иськем уйиськыса мынӥз. Сӥсаралэн ожмаськон уробоез пайдатэм луиз, со сое куштыса пыдын Цаанниме бызьыса кошкиз. Со Кеней пи Хеверлэн Иаиль кышноезлэн балаганаз вуиз но, Иаиль сое ас дораз ватӥз. Ож бере жуммем Сӥсара умме усиз. Изьыкуз Иаиль сое вииз. Озьы со кышкасьтэм сямзэ возьматӥз (Суд. 4:17—21). Израильлэн тушмонэз вормемын вал!b

ВАНЬЗЫЛЭН ДАСЬ ЛУОН МЫЛКЫДЗЫ ӦЙ ВАЛ

9. Мае ми тодӥськомы Судьяос книгаысь 5:20, 21 Сӥсаралы пумит ожмаськон сярысь?

⁹ Судьяос книгаысь ньылетӥ но витетӥ люкетъёссэ эскероно ӵош, малы ке шуоно котькуд люкетын вань маиз ке, маиз ӧвӧл мукетаз. Кылсярысь, Судьяос книгаын 5:20, 21 верамын: «Инмысьёс ожмаськизы, инмысь кизилиос сюрес вылысенызы Сӥсараен ожмаськизы. ...Киссон ӧр соосты нуиз». Со кылчинъёслэн юрттэмзы вал-а яке метеорит зор усиз-а? Библиын со сярысь верамын ӧвӧл. Инмар сяна, кин кулэ дыръя но кулэ интыын куазез жаль зорыны косысал, маин сэрен 900 ожмаськон уробоос дэрие нӧдысалзы? Судьяос книгаын 4:14, 15 куинь пол гожтэмын, Иегова вормыны юрттӥз шуыса. Ожмаськыны мынэм 10 000 израиль пиос пӧлысь нокин вераны уг быгаты вал, со ас калыкезлы вормон вайиз шуыса.

10, 11. Кыӵе вал Мероз зэмзэ ик но малы со каргамын вал?

¹⁰ Вормон кырӟанын, кудзэ Девора но Варак кырӟазы Иеговаез данъяса, соослы вормыны юрттэмез понна, таӵе кылъёс вань: «Мероз карез каргалэ,— шуэ Кузё-Инмарлэн Кылчинэз,— солэсь улӥсьёссэ Кузё-Инмарлы юрттӥськыны потымтэзы понна, кышкасьтэмъёсыныз ӵош Кузё-Инмарлы юрттӥськыны потымтэзы понна каргалэ, каргалэ» (Суд. 5:23).

¹¹ Мероз сокем юн каргамын вал, шӧдске, али шонер вераны ик уг луы, кыӵе вал со зэмзэ ик. Оло со вал кар, кудӥзлэн улӥсьёсыз ожмаськыны ӧтёнлэсь ӧз кылзӥське. Оло нош — кар, кытӥ ортчиз Сӥсара, но кудӥзлэн улӥсьёсыз пегӟись Сӥсараез ӧз кырме, соослэн сыӵе луонлыксы вал ке но. Соос но кылӥзы, дыр, Иеговалэсь ӧтёнзэ, малы ке шуоно со палъёсысь 10 000 адямиос, ӧтёнлэсь кылзӥськыса, ожмаськонэ мынӥзы. Пуктэ син азяды таӵе югдурез. Мерозын улӥсьёс адӟо карзы пыр бызьыса кошкись лек ожгарчиез, кудӥз туж тырше аслэсьтыз улонзэ утьыны. Соослы луонлык кылдӥз Иеговалэсь малпанзэ быдэстонэ пыриськыны но бакель каронъёс басьтыны. Нош мар луиз ӵапак со вакытэ? Соос палэнэ кылизы. Макем пӧртэм вал соослэн мылкыдзы кышкасьтэм Иаильлэн мылкыдызлэсь! (Суд. 5:24—27).

12. Кызьы Судьяос книгаын 5:9, 10 возьматэмын, израиль пиос ожмаськыны ӧтён шоры пӧртэм сямен учкизы шуыса? Малы со милемыз дышетэ?

¹² Судьяос книгаысь 5:9, 10 эшшо одӥг пӧртэмлыкез адӟыны луэ на соос вискысь, кинъёс дась луыса Вараклы юрттӥськизы но кинъёс ӧз. Девора но Варак Израильлэсь кивалтӥсьёссэ ушъязы, соос «калык понна сюлмаськисьёс-тыршисьёс» луо, яке дась луон мылкыдзэс возьмато, шуыса. Израильлэн кивалтӥсьёсызлэн мылкыдзы чутрак пумит вал «тӧдьы ишакъёс вылын ветлӥсьёслэн» мылкыдзылы, кудъёсыз вылтӥяськись луэменызы ожмаськыны ӧз мынэ, озьы ик «ковёр вылын пукисьёслэн» мылкыдзылы, кудъёсыз узыр улонэз яратӥзы. Нош ӵошатоно ке «сюрес кузя мынӥсьёсын», кудъёсыз капчи улонэз яратӥзы, 10 000 адямиос дась вал Варакен ӵош Фавор гурезьлэн изо бамалаз но Киссон шурлэн нюромем нёжалаз ожмаськыны. Ваньмыз, кинъёс туж яратӥзы капчи улонэз, малпаськыны косэмын вал. Соослы малпаськоно вал со вылын, соос Иеговалэсь малпанзэ быдэстонэ пыриськыны луонлыксэс ыштӥзы шуыса. Со сярысь малпаськоно ваньмызлы, кин туннэ Иеговалы ужан-тыршонэ вань кужымзэ сётыса уг пыриськы.

13. Маин Рувим, Дан но Асир выжыослэн мылкыдзы пӧртэм вал Завулон но Неффалим выжыослэн мылкыдзылэсь?

¹³ Соос, кинъёс дась луон мылкыдзэс возьматӥзы, ас синмынызы адӟизы, кызьы Иегова аслэсьтыз Кивалтӥсь луэмзэ возьматӥз. Соос мукетъёсызлы Иеговалэн шонерлыко ужъёсыз сярысь вераны быгатӥзы (Суд. 5:11). Судьяос книгаын 5:15—17 нимысьтыз верамын куинь выжыос сярысь — Рувим, Дан но Асир, кудъёсызлы пудо уллё, бадӟым пыжъёс но озонъёс Иеговалэн ужаз пыриськонлэсь дуногес вал. Нош Завулон но Неффалим выжыосысь израиль пиос, Деворалы но Вараклы юрттӥськон понна, улонзэс но сётыны дась вал (Суд. 5:18). Та учырысь ми дышетскыны быгатӥськомы солы, кызьы вазиськоно мар ке карыны ӧтёнлы.

«КУЗЁ-ИНМАРЕЗ ДАНЪЯЛЭ!»

14. Кызьы ми возьматыны быгатӥськомы, Иеговалэн кивалтэтэзлэсь кылзӥськиськомы шуыса?

¹⁴ Туннэ милемыз ожмаськыны уг косо, озьы ке но, ӟеч иворез вераса, ми кышкасьтэм сяммес возьматыны быгатӥськомы. Али Иеговалэн организацияз ас мылкыд каремзыя юрттӥсьёс туж кулэ луо. Трос миллион вын-агайёс но сузэр-апайёс, кудъёсыз пӧлын трос егитъёсыз но, пӧртэм амалэн, вань дырзэс сётыса, Иеговалы мылысь-кыдысь ужало-тыршо: пионер луыса, Вефильын но Эксэйлык юртъёс пуктылыса. Озьы ик вераны кулэ соос сярысь но, кинъёс конгрессъёсты ортчытыны юртто. Малпалэ озьы ик тӧроос сярысь, кудъёсыз эмъюртъёсын герӟаськонъя комитетын тыршо но конгрессъёсты дасянэ пырисько. Иеговалы тӥляд тыршемды туж дуно потэ, но со ноку сое уз вунэты (Евр. 6:10).

15. Кызьы эскероно, ӧз-а сӥя мынам мылкыды Иеговалы ужаны-тыршыны?

¹⁵ Котькудмылы юано асьмелэсь: «Уг кылиськы-а мон палэнэ, куке мукетъёсыз собыдӟа ужез быдэсто? Ваньбур сярысь сюлмаськон Иеговалы тросгес ужаны-тыршыны мылкыдме уг сӥяты-а? Адӟем карисько-а мон Вараклэсь, Деворалэсь, Иаильлэсь но 10 000 израиль пиослэсь: возьматӥсько-а мон осконме но кышкасьтэм сямме, но уже кутӥсько-а мон ваньзэ, маи мынам вань, Иеговалэсь эриксэ быдэстон понна? Мон малпасько ке мукет каре яке мукет шаере кошкон сярысь, кытын тросгес коньдон поттыны луонлык вань, вӧсяськисько-а но малпаськисько-а мон со сярысь, кызьы со семьяе но кенеш вылын шӧдӥськоз?»c

16. Иеговалэн ваньмыз вань ке но, мае ми солы сётыны быгатӥськомы?

¹⁶ Иегова милемлы дан сётӥз солэн кивалтэтэз пала кариськыны. Нош Шайтан адямиосты пӧяз, соос соин ӵош Инмарлы пумит мед султозы но Шайтанлэсь кивалтэтсэ мед быръёзы шуыса. Соин ик, Инмарлэн кивалтэтэзлэсь кылзӥськиськомы ке, ми возьматӥськомы Шайтанлы, кин палан ми луиськомы. Инмарлы оскон но солы оскиськымон луон милесьтым дась луон мылкыдмес ӝутэ, кудӥз Иеговаез туж шумпоттэ (Мад. 23:15, 16). Оскиськымон ужам-тыршеммы Иеговалы луонлык сётэ Шайтанлэн пыкылыса верам кылъёсызлы ответ сётыны (Мад. 27:11). Вераны луоз, Иеговалэсь вань сюлмысьтымы кылзӥськыса, ми солы сётӥськомы сое, мар солэн син азяз туж дуно луэ, мар сое туж шумпоттэ.

17. Кызьы быдэсмозы Судьяос книгаысь 5:31 кылъёс?

¹⁷ Ӝоген музъем вылын улозы со адямиос гинэ, кудъёсыз Иеговаез Вылӥ кивалтӥсен лыдъяло. Ми ӵыдытэк витиськомы со дырез! Милям но Деворалэн но Вараклэн кадь шӧдонъёсмы кылдо, кудъёсыз кырӟазы: «Кузё-Инмаре, тазьы мед бырозы Тынад тушмонъёсыд! Нош Тонэ яратӥсьёс ӝужась шунды кадь кужмоесь мед луозы!» (Суд. 5:31). Та кылъёс быдэсмозы, куке Иегова сьӧлыклэсь кышкасьтэм дуннеез быдтоз, кудӥныз али Шайтан кивалтэ. Армагеддонын вормон понна, Иеговалы адямиослэн юрттэтсы кулэ уз луы. Соку милемлы Инмарлэн таӵе кылъёсызлэсь кылзӥськоно луоз: «Учкыса сылэ Кузё-Инмарлэн тӥ доры ыстэм утиськонэз шоры» (2 Пар. 20:17). Нош али милям трос луонлыкъёсмы вань, кызьы ми кышкатэк но мылысь-кыдысь Иеговалэн ужаз пыриськыны быгатӥськомы.

18. Кызьы Иеговалы ужан-тыршонын дась луон мылкыдмы мукетъёсыз вылын шӧдӥськыны быгатоз?

¹⁸ Варак но Девора вормон кырӟанзэс таӵе кылъёсын кутскизы: «Калык аслэсьтыз сюлмаськемзэ-тыршемзэ возьматӥз; Кузё-Инмарез данъялэ!». Соос Вылысь Инмарез данъязы, нош адямиосты ӧз (Суд. 5:1, 2). Ойдолэ дась луон мылкыдмес возьматомы, кудӥз мукетъёсызлэсь мылкыдзэс ӝутоз Иеговаез данъяны!