Иеговалэн кивалтэтэзлы дурбасьтэ!

1, 2. Марлы оскыны кулэ котькудмылы? (Учке статья кутсконысь суредэз.)

КЫЗЬЫ ми азьвыл статьяысь адӟимы, Шайтан вера, Иегова урод кивалтӥсь луэ но адямиос асьсэос кивалтӥзы ке, соослы умойгес луоз шуыса. Озьы-а со? Малпалэ ай, адямиос пырак улыны но асьсэос кивалтыны быгатысалзы ке, луысалзы-а соос шудогес? Улонзы умойгес луысал-а? Луысалды-а тӥ шудогес, пырак улысалды но нокинлэсь но кылзӥськоно ӧй луысал ке?

² Та юанъёслы милемлы асьмелы валэктон сётыны кулэ. Котькудмылы соос вылын умой-умой малпаськоно. Соку ми юн оскомы, Инмар самой умой кивалтӥсь шуыса, но милемлы вань сюлмысьтымы солэн кивалтэтэзлы дурбасьтоно. Ми солы оскыны быгатӥськомы, малы ке шуоно озьы гожтэмын Библиын. Эскеромы, кылсярысь, мар верамын Библиын Иеговалэн кивалтыны правоез сярысь.

ИЕГОВАЛЭН КИВАЛТЫНЫ ПРАВОЕЗ ВАНЬ

3. Малы Иеговаез гинэ Дуннелэн Кузёез шуыса ниманы луоз?

³ Иеговаез Дуннелэн Кузёез шуыса ниманы луоз, малы ке шуоно со Ваньмызлэсь Кужмо Инмар но Кылдытӥсь (1 Пар. 29:11; Ап. уж. 4:24). Усьтӥськонын 4:11 гожтэмын, кызьы инмын Христосэн ӵош 144 000 кивалтӥсьёс верало: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд, ваньмыз Тынад эрикедъя улэ-вылэ, кылдытэмын». Иегова ваньзэ кылдытӥз бере, солэн правоез вань кивалтыны адямиосын но кылчинъёсын.

4. Малы со, кин Инмарлэн кивалтэтэзлы пумит ӝутске, бырйыны правозэ шонертэм амалэн уже кутэ?

⁴ Шайтан номыре но ӧз кылдыты. Соин ик солэн нокыӵе но правоез ӧвӧл Дуннелэн кивалтӥсез луыны. Иеговалэн кивалтэтэзлы пумит ӝутскеменыз, со, нош озьы ик Адам но Ева, Инмарез ултӥязы (Иер. 10:23). Соос асьсэос бырйыны быгато вал ке но, сётэ вал-а со соослы право Иеговалэсь кивалтэмзэ кулэтэм карыны? Уг, уг сёты вал. Адямиослы бырйыны но пӧртэм ужпумъёс кутыны право сётэмын вал, нош Кылдытӥсьсылы пумит ӝутскыны право сётэмын ӧй вал. Соин ик Инмарлы пумит ӝутскон — со бырйыны правоез шонертэм амалэн уже кутон. Асьмеос, адямиос, Иеговалэн шонерлыко кивалтэтэзлэсь кылзӥськыса улыны кылдытэмын.

5. Малы ми оскыны быгатӥськомы, Иеговалэн вань кутэм ужпумъёсыз шонересь луо шуыса?

⁵ Эшшо муг вань на, малы Иеговаез Дуннелэн Кузёез шуыса ниманы луоз. Со самой шонерлыко кивалтӥсь. Тани мар вера Иегова ачиз сярысь: «Мон — Кузё-Инмар, музъем вылын гажан-жалян возьматӥсь, зэмлыко, шонерлыко суд лэсьтӥсь луисько... та гинэ Мыным ярамон уго» (Иер. 9:24). Мар шонерлыко луэ, нош мар шонерлыктэм луэ шуыса валан понна, солы кулэ ӧвӧл тырбыдэстэм адямиосын гожтэм катъёс. Со ачиз шонерлыклы эсэпъёс пуктэ. Иегова, шонерлыко Инмар луыса, ачиз адямиослы законъёс сётӥз, соос тодыны мед быгатозы шуыса, мар шонер луэ. «[Инмарлэн] престолэ[з]лэн инъетэз — шонер суд, шонер улон», соин ик ми оскыны быгатӥськомы, солэн вань законъёсыз, возетъёсыз но кутэм ужпумъёсыз шонер луо шуыса (Пс. 88:15; 118:128). Шайтан Иеговаез урод кивалтӥсь шуэ ке но, ачиз со ӧз быгаты кылдытыны дуннеез, кытын шонерлык кузёяське.

6. Малы Иеговалэн правоез вань Дуннелэн Кузёез луыны?

⁶ Озьы ик, Иеговаез Дуннелэн Кузёез шуыса ниманы луоз, малы ке шуоно солэн тодон-валанэз но визьлыкез вань, кудъёсыз туж кулэ луо Дуннеен кивалтон понна. Кылсярысь, тодамы ваёмы, Инмар аслаз Пиезлы адямиосты эмъяны луонтэм висёнъёслэсь йӧнатыны кужым сётӥз шуыса (Матф. 4:23, 24; Марк 5:25—29). Адямиос понна со паймымон уж вал ке но, Иегова понна со паймымон ӧй вал. Со тодэ, кызьы адямилэн лулмугорыз ужа но быгатэ котькыӵе висёнлэсь бурмытыны. Со сяна, со быгатэ на кулэмъёсты улӟытыса султытыны но инкуазь шимучыръёсты дугдытыны.

7. Малы вераны луоз, Иеговалэн визьлыкез, Шайтанлэн дуннеезлэн визьлыкез сярысь, трослы вылӥынгес луэ шуыса?

⁷ Шайтанлэн дуннеяз улӥсь адямиос нокызьы но уг быгато тупаса улон вайыны кызьы одӥг шаере, озьы ик пӧртэм шаеръёс куспы но. Иеговалэн гинэ визьлыкез вань, музъем вылэ тупаса улон вайыны (Ис. 2:3, 4; 54:13). Малпаськыса со сярысь, макем трос Иеговалэн тодон-валанэз но визьлыкез, ми но шӧдӥськомы сое ик, мае шӧдӥз Павел, кудӥз святой духлэн кивалтэмез улсын гожтӥз: «Э, Инмарлэн тодонэзлэн, визьлыкезлэн пыдэстэм узырлыкез! Валаны луонтэмесь Солэн судъёсыз, эскерыны луонтэмесь Солэн сюресъёсыз!» (Рим. 11:33).

ИЕГОВАЛЭН КИВАЛТЭТЭЗ САМОЙ УМОЙ

8. Мае тӥ шӧдӥськоды, Иеговалэн кивалтэмез сярысь малпаськыкуды?

⁸ Библиын валэктэмын, малы Иеговалэн кивалтыны правоез вань. Со сяна, отын верамын на, малы солэн кивалтэтэз самой умой луэ. Одӥгез муг, малы озьы вераны луэ,— со яратыса кивалтэ. Ми малпаськиськомы ке со сярысь, кызьы Иегова кивалтэ, со мур сюлмамы пыре. Со «адямиез яратӥсь, гажась-жалясь, кема чидась, туж гажась-жалясь, зэмлыко Инмар» (Пот. 34:6). Инмар гажа аслэсьтыз ужась-тыршисьёссэ. Со ми сярысь милесьтым но умойгес сюлмаське. Шайтан вера, Иегова ужась-тыршисьёсызлэсь мае ке но умойзэ ватэ шуыса, но со озьы ӧвӧл. Иегова аслэсьтыз яратоно пизэ но сётӥз, ми пырак дауръёс ӵоже улыны мед быгатомы шуыса. (Лыдӟы Псалтирез 83:12; Римъёслы 8:32.)

9. Кытысь ми тодӥськомы, Иегова нимысьтыз адямиослы саклык висъя но соос сярысь сюлмаське шуыса?

⁹ Иегова быдэс калыкез сярысь гинэ уг сюлмаськы, нош котькуд ужась-тыршисеныз нимысьтыз тунсыкъяське но сюлмаське со сярысь. Тодамы ваёмы, кызьы куинь сю ар ӵоже Иегова аслаз калыкезлы судьяосты сётъяз, кудъёсыз калыкез тушмонъёслэсь утизы. Со дыре ик Иегова саклык висъяз нимысьтыз адямиослы но, кылсярысь, мукет калыкысь Руфь нимо кышномуртлы. Со дась вал троссэ сётыны, Инмарлэн ужась-тыршисез луон понна. Иегова Руфез бакель кариз: со бызиз но пи вайиз. Но та ваньмыз ӧвӧл на. Куке Руфь улӟытэмын луоз, со тодоз, солэн пиезлэн выжыысьтыз Мессия вордскиз шуыса. Малпалэ ай, мае со шӧдоз, куке тодоз, со сярысь Библиын гожтэмын вал шуыса, книгаын, кудӥз солэн нимыныз нимамын! (Руфь 4:13; Матф. 1:5, 16).

10. Малы Иеговаез лек но сюлэмтэм кивалтӥсь шуыны уз луы?

¹⁰ Иеговаез лек но сюлэмтэм кивалтӥсь шуыны уз луы. Со аслаз ужась-тыршисьёсызлы эрик сётэ, но соос солы шумпотыса ужало-тыршо (2 Кор. 3:17). Давид Иегова сярысь вераз: «Солэн азьпалаз данлык но быдӟымлык, Солэн интыяз кужымлык но шумпотон уло» (1 Пар. 16:7, 27). Со выллем кылъёсты псаломъёсты гожъясь Ефан но вераз: «Гумы куараен ӟечкыланэз тодӥсь калык шудо! Кузё-Инмаре, ымнырыдлэн югыт азьтӥз соос ветло. Нунал лумбыт Тон бордын шумпотыса соос уло, шонерлыкед соосты вылӥе ӝутэ» (Пс. 88:16, 17).

11. Кызьы осконмес юнматыны луоз, Иеговалэн кивалтэтэз самой умой шуыса?

¹¹ Иеговалэн ӟечлыкез сярысь ӵемгес малпаськимы ке, со милесьтым осконмес юнматоз, солэн кивалтэтэз самой умой шуыса. Милям но псаломъёсты гожъясьлэн кадь шӧдонъёсмы кылдозы, кудӥз гожтӥз: «Тынад азбаръёсад одӥг нунал улон умойгес мукет интыын сюрс нуналъёс улонлэсь» (Пс. 83:11). Солы паймонэз ӧвӧл, малы ке шуоно Иегова, милям Кылдытӥсьмы луыса, тодэ, мар кулэ милемлы шудо луон понна, но жалятэк сётэ ваньзэ, мар кулэ, куддыръя солэсь но трос. Иеговалэсь куронъёссэ быдэсъяськомы ке, со милемлы пайда но бадӟым шумпотон вае, со понна милемлы мае ке сётоно яке кельтоно луэ ке но. (Лыдӟы Исаиялэсь 48:17.)

12. Кыӵе валтӥсь муг, малы милям Иеговалэсь кылзӥськыса улэммы потэ?

¹² Библия верамъя, Христослэн Сюрс ар ӵоже кивалтэмез йылпумъяськем бере куд-ог адямиос Иеговалэн кивалтэтэзлы пумит ӝутскозы (Усьт. 20:7). Малы? Куке Шайтан эрике поттэмын луоз, со адямиосты дышем амалэныз Инмар дорысь палэнтыны тыршоз. Со соослэсь мылкыдзэс ӝутоз асьсэды гинэ яратыны но асьсэ сярысь гинэ сюлмаськыны. Оло нош, со адямиосты оскытыны тыршоз, соос Иеговалэсь кылзӥськытэк но пырак улыны быгатозы шуыса. Но адямиос Иеговатэк нокызьы но улыны уз быгатэ. Нош Шайтанлэн кылъёсыз милемлы ӧжыт ке но тунсыко уз потэ меда? Ми Иеговаез яратӥськомы но оскиськомы ке, со Дуннелэн ӟечлыко но шонерлыко Кузёез шуыса, Шайтанлэн кылъёсыз милемлы юрӟым кадь потозы. Милям малпанмы но уз кылды, шонерлыко но яратӥсь Иегова Инмармылэн кивалтэмезтэк улыны.

КОТЬКУ ИНМАРЛЭН КИВАЛТЭТЭЗЛЫ ДУРБАСЬТЭ

13. Кызьы ми возьматыны быгатӥськомы, Иеговалэн кивалтэтэзлы дурбасьтӥськомы шуыса?

¹³ Кызьы адӟимы, Иеговалэн кивалтыны правоез вань но со самой умой кивалтӥсь луэ. Соин ик ми солы вань сюлмысьтымы дурбасьтыны кулэ. Ми солы дурбасьтӥськомы, куке солы оскымон кылиськомы но солэсь адӟем кариськомы. Вань кужмысьтымы тыршиськомы ке лэсьтыны озьы, кызьы Иегова лэсьтэ, ми возьматӥськомы, сое яратӥськомы но солэн кивалтэтэзлы дурбасьтӥськомы шуыса. (Лыдӟы Ефесъёслы 5:1, 2.)

14. Кызьы тӧроос но семьяослэн йыръёссы Иеговалэсь адӟем карыны быгато?

¹⁴ Библиез дышетыса, ми адӟимы, Иегова яратыса кивалтэ шуыса. Сое тодазы возьыса, семьяослэн йыръёссы но тӧроос, кудъёсыз Иеговалэсь кивалтэтсэ гажало, асьсэды лек уз возе но котькинэ весяк чакласа уз улэ. Нош соос Иеговалэсь адӟем карозы. Озьы улӥз Павел: со Инмарлэсь но солэн Пиезлэсь адӟем кариз (1 Кор. 11:1). Павел ноку но мукетъёссэ ӧз косы лэсьтыны сое, мар, со малпамъя, шонер луэ, но ӧз лэсьты озьы, адямиос асьсэды янгышен мед шӧдозы шуыса. Со соосты сюлворыса куре вал (Рим. 12:1; Еф. 4:1; Флм. 8—10). Озьы Иегова адямиосын ассэ возе но озьы лэсьтыны кулэ ваньмызлы, кин солэсь кивалтэтсэ гажа но солы дурбасьтэ.

15. Малы, Иеговалэн организацияз тупатэм радлыклэсь кылзӥськыса, ми возьматӥськомы, Иеговалэсь кивалтэтсэ гажаськомы шуыса?

¹⁵ Кызьы ми асьмеды возиськомы соосын, кинъёслы Иегова кивалтыны право сётӥз? Ми соослэн визь-кенешъёссылэсь кылзӥськиськомы, озьы возьматӥськомы, Иеговалэн кивалтэтэзлы дурбасьтӥськомы шуыса. Ми пумозяз ум валаське яке кутэм ужпумен соглаш ум луиське ке но, ми кылзӥськиськомы Инмарлэн организациеныз тупатэм радлыклэсь. Со чутрак пумит луэ солы, кызьы та дуннеысь адямиос асьсэды кивалтӥсьёсын возё! Милям Иеговалэн кивалтэтэзлы дурбасьтэммы потэ ке, милемлы одно ик кылзӥськыны кулэ тупатэм радлыклэсь (Еф. 5:22, 23; 6:1—3; Евр. 13:17). Озьы улӥськомы ке, Иегова милемыз бакель каре, малы ке шуоно солэн потэ, ми шудо мед луомы шуыса.

16. Ужпум кутыкузы, мае лыдэ басьто соос, кинъёс Иеговалэн кивалтэтэзлы дурбасьто?

¹⁶ Кызьы эшшо возьматыны быгатӥськомы на, Инмарлэн кивалтэтэзлы дурбасьтӥськомы шуыса? Кылсярысь, пӧртэм ужпумъёс кутыса. Иегова милемлы уг вера, мар кароно котькуд нимысьтыз учыре. Нош со юрттэ милемлы валаны, мар со малпа со яке та пумысен. Кылсярысь, нокытын но Библиын гожтэмын ӧвӧл, мар яра, нош мар уг яра нуллыны христианъёслы. Но Библиез лыдӟыса, ми тодӥськомы, Инмарлэн потэ, милям вылтусмы но дӥськутмы ӝикыт мед луоз но мед возьматоз, ми солэн ужась-тыршисьёсыз луиськомы шуыса (1 Тим. 2:9, 10). Озьы ик со возьма, ми мукет адямиослэн шӧдонъёссы сярысь но малпаськомы шуыса (1 Кор. 10:31—33). Асьмелэн мыл потонъёсмы сярысь гинэ малпаськыса, ужпум ум ке кутӥське, нош тодыны тыршиськомы ке, мар со сярысь малпа Иегова, ми возьматӥськомы, солэсь кивалтэтсэ гажаськомы но солы дурбасьтӥськомы шуыса.

17, 18. Кызьы кузпалъёс возьматыны быгато, Иеговалэн кивалтэтэзлы дурбасьто шуыса?

¹⁷ Ойдолэ малпаськомы одӥг югдур сярысь, кудаз кузпалъяськем христианъёслы Иеговалэн кивалтэтэзлы дурбасьтоно. Кылсярысь, кузпалъёс валазы, кузпалъяськыса соос малпамзылэсь тросгес шуг-секытъёсын пумиськизы шуыса. Яке кузпалъяськон соослы шумпотон ваемысь дугдӥз. Сыӵе учыре соос быгатозы малпаськыны, кызьы Иегова израиль калыкен ассэ возиз. Со ачиз сярысь калыклэн кузпалыз сярысь кадь вераз (Ис. 54:5; 62:4). Макем секыт вал кусыпъёс со «кузпалъяськонын»! Озьы ке но, Иегова ӧз дырты кусып воземысь дугдыны. Со выльысь но выльысь израиль калыкез жаляз но аслэсьтыз сётэм кылзэ быдэсъяз. (Лыдӟы Псалтирез 105:43—45.) Сыӵе гажан-жалян Иеговаез яратонмес уг юнматы-а?

¹⁸ Иеговаез яратӥсь кузпалъёс солэсь адӟем карыны тыршо. Куспазы шуг-секытъёс кылдо ке, соос уг дырто люкиськыны но озьы Библиысь возетъёсты тӥяны. Соос валало, Иегова соосты огазеяз но солэн уг поты, соос мед люкиськозы шуыса. Библия верамъя, одӥг гинэ муг, малы кузпалъёс люкиськыны но выль семья кылдытыны быгато,— со азон-калгон (Матф. 19:5, 6, 9). Христианъёс вань кужмысьтызы тыршо ке семьязэс утьыны но сое шудо карыны, озьы соос Иеговалэн шонерлыко кивалтэтэзлы дурбасьто.

19. Мар кароно, ми янгышамы ке?

¹⁹ Ми тырбыдэстэмесь но куддыръя лэсьтӥськомы сое, мар Иеговалэсь сюлэмзэ вӧсь каре. Иегова сое тодэ но яратэ милемыз, соин ик, милемыз сьӧлыклэсь мозмытон понна, со Пизэ сётӥз. Озьыен, ми янгышамы ке, милемлы куроно, Иегова простить мед кароз шуыса (1 Иоанн 2:1, 2). Асьмеды ялан йырйыса улытозь, умойгес луоз янгышысьтымы малы ке дышетскыны. Иеговаен матысь кусыпъёс возиськомы ке, со милемыз простить кароз, сюлэммес каньыл кароз но азьланяз со выллем учыръёсысь потыны юрттоз (Пс. 102:3).

20. Малы али туж тупась дыр Инмарлэн кивалтэтэзлы дурбасьтыны?

²⁰ Выль дуннеын ваньмыз Иеговалэн кивалтэтэзлы дурбасьтозы, озьы ик, со сямен малпаськыны дышетскозы но солэсь адӟем карозы (Ис. 11:9). Ми туннэ ик солы дышетскиськомы ини. Ӝоген нокинлэн но юанэз уз кылды: вань-а Иеговалэн кивалтыны правоез? Али туж тупась дыр Инмарлэн кивалтэтэзлы дурбасьтыны, солы оскымон ужаса-тыршыса но ваньзэ лэсьтыса озьы, кызьы Инмар лэсьтэ.