Дась-а тӥ кема чидаса возьманы?

1, 2. а) Малы куддыръя милям но кема-а чидано на шуыса юаммы потэ? б) Малы вашкала дыръёсысь оскымон ужась-тыршисьёслэн примерзы милемыз буйгатыны быгатэ?

ОСКЫМОН Исаия пророк юа вал: «Кемалы-а, Кузё-Инмаре?» Со выллем юанъёс сётъяз Аввакум пророк но: «Трос пол-а Тыныд вазиськоно на?» (Ис. 6:11; Авв. 1:2). 12-тӥ псаломез гожъякуз, Давид эксэй но ньыль пол со сярысь ик юаз (Пс. 12:2, 3). Иисус Христос но юаз соослэсь, кинъёслэн осконзы ляб вал: «Кема-а чидало на тӥледыз?» (Матф. 17:17). Соин ик паймоно ӧвӧл, куддыръя милям но кема-а чидано на шуыса юаммы потэ ке.

² Малы милям сыӵе юанмы кылдыны быгатоз? Кылсярысь, милемлы пумит кыӵе ке шонертэм уж лэсьтӥзы. Яке ми бадӟым арлыдэн, висёнэн яке маин ке мукетыныз герӟаськем шуг-секытъёсты чидано луиськомы, кудъёсыз туж ӵем пумисько та «секыт дыръёсы» (2 Тим. 3:1). Оло нош, милесьтым мылкыдмес туж куашкатэ со, кызьы котырысьтымы адямиос асьсэды возё. Трос мугъёс луыны быгато, малы сыӵе юан кылдэ. Вашкала дыръёсысь оскымон ужась-тыршисьёслэн но кылдылӥз сыӵе юанзы, но соос ӧз кышкалэ сое Иеговалы сётыны. Нош Иегова со понна соослы вожзэ ӧз потты. Со милемыз туж буйгатэ.

3. Мар милемлы юрттыны быгатоз, шуг-секытъёсын пумиськыкумы?

³ Мар милемлы юрттыны быгатоз, шуг-секытъёсын пумиськыкумы? Иаков, Иисус Христослэн выныз но дышетскисез, святой духлэн кивалтэмез улсын гожтӥз: «Агай-вынъёс, Кузё-Инмар лыктытозь, юн чидаса улэ» (Иак. 5:7). Зэм, милемлы ваньмылы чидан кулэ. Нош мар со сыӵе чидан но кытысь адӟиськоз, милям сыӵе умой сяммы вань шуыса?

МАР СО СЫӴЕ ЧИДАН?

4, 5. а) Мар со сыӵе чидан но кытысь адӟиське, милям чиданмы вань шуыса? б) Кыӵе пример вылын Иаков валэктӥз чидан сямез? (Учке статья кутсконысь суредэз.)

⁴ Библия верамъя, чидан Инмарлэн святой духез сётэ. Инмар ӧй юрттысал ке, ми, тырбыдэстэм адямиос, туж секыт югдуръёсын чиданы ӧй быгатысалмы. Чидан — со Инмарлэн кузьымез. Ми чидаськомы ке, возьматӥськомы, Иеговаез но мукет адямиосты яратӥськомы шуыса. Чиданлы луыса, милям ог-огмес но адямиосты яратонмы юнма, нош чиданмы уг тырмы ке, яратонмы лябӟе (1 Кор. 13:4; Гал. 5:22). Чидан пӧлы пыро пӧртэм кулэ луись христиан сямъёс. Сыӵе сямъёс юртто милемлы, шумпотонмес ыштытэк, шуг-секытъёсты вормыны (Кол. 1:11; Иак. 1:3, 4). Со сяна, чидась адями уродэзлы уродэн уг берыкты, но, мар гинэ медаз лу, юн кыле. Библия ӧте милемыз дась луыны кема возьманы. Со сярысь верамын Иаковлэн 5:7, 8 (лыдӟы).

⁵ Малы милемлы дась луоно Иеговаез кема возьманы? Иаков сое музъем ужасьлэн примерез вылын валэктӥз. Музъем ужась туж тыршыса ужа, емышъёс басьтон понна. Но со уг быгаты кивалтыны инкуазен, емышъёслэн будэменызы, дыр но солэн киулаз ӧвӧл. Со дась «ас музъемезлэсь дуно емышсэ» кема возьманы. Озьы ик ми но возьмаськомы со дырез, куке Иегова аслэсьтыз сётэм кылзэ быдэстоз. Но вань тросэз, мае ми воштыны ум быгатӥське (Марк 13:32, 33; Ап. уж. 1:7). Соин, музъем ужасьлы сямен ик, милемлы но кема чидаса возьмано.

6. Малы милемыз дышетыны быгатэ Михей пророклэн примерез?

⁶ Югдуръёс, кудъёсаз ми али улӥськомы, туж тупало югдуръёслы, кудъёсаз ужаз-тыршиз Михей пророк. Со улӥз, куке кивалтӥз Ахаз эксэй, кудӥз Инмарлы уг йыбыртъя вал. Со дыре Иеговалэн калыкез туж трос пӧртэм сьӧлыкъёсы пыриз. Израиль калык сярысь Михей вераз: «Соослэн киоссы уродэз лэсьтыны быгато» (Лыдӟы Михейлэсь 7:1—3). Пророк вала вал, ачиз со югдурез воштыны уз быгаты шуыса. Соку мар солы кароно вал? Со гожтӥз: «Нош мон Кузё-Инмар шоры учкыса уло, монэ утись Инмар вылэ оскиськыса уло: Инмаре монэ кылоз» (Мих. 7:7). Михейлы сямен ик, милемлы но кема чидаса возьмано.

7. Малы тырмыт ӧвӧл огшоры гинэ возьманы, ку Иегова сётэм кылзэ быдэстоз?

⁷ Милям но осконмы Михейлэн кадь ик ке, ми дась луомы Иеговаез возьманы. Кылсярысь, тюрьмаын пукисьлы возьмано луэ, ку сое виыны приговор быдэстэмын луоз. Солы возьмано казнить карон нуналэз. Малпалэ гинэ: макем секыт солы сое возьманы. Нош милям югдурмы чылкак мукет. Ми дась Иеговаез возьманы, малы ке шуоно ми оскиськомы, милемлы пырак улон кузьманы сётэм кылзэ со дырыз дыръя быдэстоз шуыса. Соин ик ми быгатӥськомы «куасаськыны сётскисьтэмесь, ваньзэ чидасесь» луыны но шумпотонмес утьыны (Кол. 1:11, 12). Нош Иегова уг дырты шуыса ӝожтӥськыса но ӟургетыса улӥськомы ке, ми Инмарлэсь сюлэмзэ вӧсь кариськомы (Кол. 3:12).

СООСЛЭН ПРИМЕРЪЁССЫ, КИНЪЁС ВОЗЬМАНЫ ДАСЬ ВАЛ

8. Мае юаны луоз асьмелэсь, Инмарлы оскымон пиосмуртъёслэн но кышномуртъёслэн примеръёссы вылын малпаськыкумы?

⁸ Милемлы капчигес луоз Иеговаез возьманы, ми малпаськимы ке вашкала дыръёсысь Инмарлы оскымон пиосмуртъёслэн но кышномуртъёслэн примеръёссы вылын, кудъёсыз кема чидаса возьмазы, ку Иегова сётэм кылъёссэ быдэстоз (Рим. 15:4). Малпаськыны луоз со сярысь, мар кема соослы возьмано луиз, малы соос возьманы дась вал но кызьы соос со понна бакель каремын вал.

9, 10. Мар кема возьмано луиз Авраамлы но Сарралы, Иегова аслэсьтыз сётэм кылзэ быдэстытозь?

⁹ Ойдолэ малпаськомы Авраамлэн но Сарралэн примерзы вылын. Соос сярысь гожтэмын, соос «осконэн улӥсьёс, ваньзэ чидаса, Инмарлэсь сӥзиськонъёссэ басьтӥсьёс» луо шуыса. Библиын верамын, «кема чидаса улэмез понна», Иегова Авраамез бакель карыны но солэсь выжызэ йылэтыны кылзэ сётӥз шуыса (Евр. 6:12, 15). Авраамлы возьмано вал, ку Иегова сётэм кылзэ быдэстоз. Со понна солы чидан кулэ вал. Тупанкыл, кудзэ Иегова кутӥз Авраамен, ужаны кутскиз а. э. азьло 1943-тӥ арын 14-тӥ нисанэ, куке Авраам Сарраен но киулаз улӥсь вань калыкеныз Евфрат шур вамен потӥз но Сӥзем музъеме пыриз. Авраамлы 25 ар возьмано луиз со дырез, куке а. э. азьло 1918-тӥ арын солэн Исаак пиез вордӥськоз. Собере эшшо 60 ар ортчиз на, но а. э. азьло 1858-тӥ арын солэн пиезлэн пиосыз вордӥськизы — Исав но Иаков (Евр. 11:9).

¹⁰ Кӧня музъем сётэмын вал Авраамлы? Библиын верамын: «Отын Инмар Авраамлы пыдтыш быдӟа но люкет музъем ӧз сёты. Но Инмар Авраамлы кыл сётӥз, Авраамлы но, со бӧрсьы кылем солэн выжыезлы но та музъемез Со люкетлы сётоз шуыса. Нош Авраамлэн соку нылпиосыз ӧй вал на» (Ап. уж. 7:5). Авраам Евфрат шур вамен потэм бере 430 ар ортчыса гинэ, солэн нылпиосыз луизы самой со калык, кудӥз та музъемез люкетлы басьтыны кулэ вал (Пот. 12:40—42; Гал. 3:17).

11. Малы Авраам Иеговаез возьманы дась вал? Кызьы Иегова сое со понна бакель кароз?

¹¹ Авраам дась вал Иеговаез кема возьманы, малы ке шуоно со солы юн оске вал. (Лыдӟы Еврейёслы 11:8—12.) Авраам шумпотыса возьмаз, Инмарлэн сётэм кылызлэсь быдэсак быдэсмемзэ адӟыса ӧз вуы ке но. Нош малпалэ ай, мае шӧдоз Авраам, куке Инмар сое музъем вылын райын улӟытоз. Со туж паймоз, куке тодоз, Библиын солэн но солэн нылпиосызлэн улонзы сярысь пыр-поч гожтэмын шуыса!a Нош макем со шумпотоз, куке тодоз, Инмарлэсь Мессия пумысен эриксэ быдэстонын со бадӟым инты басьтӥз шуыса! Со валалоз: кема возьмамез юнме ӧй вал.

12, 13. Малы Иосифлы кема возьманы дась луоно вал но кыӵе солэн мылкыдыз вал?

¹² Авраам выжыысь потэм Иосиф но Иеговаез кема возьманы дась вал. Солы пумит трос пол шонертэм ужъёс лэсьтӥзы. Иосифлы 17 арес котырын вал, куке агайёсыз сое ляльчие вузазы. Собере сое янгыше уськытӥзы, со кузёезлэсь кышнозэ сантэманы турттэ вал шуыса, но тюрьмае пытсазы (Ул.-выл. 39:11—20; Пс. 104:17, 18). Инмарлы оскымон луэмез понна, Иосиф, бакель карем интые, кыл кутытэмын вал кадь потоз. Но 13 ар ортчыса, ваньмыз чутрак воштӥськиз: сое тюрьмаысь поттӥзы но, со Египетын фараон бере кыкетӥ адями луиз (Ул.-выл. 41:14, 37—43; Ап. уж. 7:9, 10).

¹³ Шуг-секытъёсын пумиськыса, Иосиф лек луиз-а? Быриз-а солэн Иегова Инмарезлы осконэз? Ӧз. Нош мар юрттӥз солы кема чиданы? Со Иеговалы оскиз но котькытысь солэсь юрттэмзэ адӟиз. Иосиф аслаз агайёсызлы вераз: «Эн кышкалэ, мон Инмар ӧвӧл ук. Тани, тӥ мыным пумит урод уж малпады, нош Инмар сое ӟечлы берыктӥз — мар али вань, сое лэсьтон понна: туж трос калыклэсь лулзэ утён понна» (Ул.-выл. 50:19, 20). Озьы Иосиф валаз, юнме ӧз возьма шуыса.

14, 15. а) Маин тӥледыз паймытэ Давидлэн чиданэз? б) Мар юрттэ вал Давидлы кема возьманы?

¹⁴ Давид эксэй но пумиськылӥз учыръёсын, куке солы пумит урод ужъёс лэсьтылӥзы. Егит дыръяз Иегова сое Израиль калыклы эксэе бырйиз. Нош аслаз калыкеныз кивалтыны кутскытозяз, солы 15 ар пала возьмано луиз (2 Экс. 2:3, 4). Со вакытэ сое утчаса ветлӥз Иеговалэсь кылзӥськемысь дугдэм Саул эксэй, кудӥз сое виыны малпа валb. Давидлы мурт музъемтӥ пегаса ветлоно но кыр дуннеысь пещераосын ватскыса улоно луиз. Саулэз ожмаськонын виемзы бере но Давидлы, быдэс Израиль калыклы эксэй луон азяз, сизьым ар пала возьмано на вал (2 Экс. 5:4, 5).

¹⁵ Малы Давид дась вал кема возьманы? Та юанлы валэктонэз шедьтыны луоз со псаломысь ик, кудаз Давид ньыль пол кема чидано на-а шуыса юа. Тани мар со вера: «Нош мон Тынад гажан-жалянэдлы [«оскиськымон яратонэдлы», ВД] оскиськыса улӥсько, утён сётонэдлы сюлмы шумпотоз; монэ ӟеч карись Кузё-Инмарез данъяса кырӟало» (Пс. 12:6). Давид тодэ вал, Иегова сое яратэ но ноку уз кельты шуыса. Шумпотонзэ ыштытэк, со возьмаз, ку Иегова сое тушмонъёсызлэсь мозмытоз, но малпаськиз со вылын, кызьы Иегова сое бакель кариз ини. Кызьы адӟиське, Давид вала вал, со возьмаз ке, Иегова сое одно ик бакель кароз шуыса.

16, 17. Кыӵе пример возьмато Иегова но Иисус Христос со пумысен, кызьы кема чидаса возьмано?

¹⁶ Иегова уг куры милемыз лэсьтыны сое, мае со ачиз ӧй лэсьтысал. Со умой пример возьматэ, кызьы кема чидаса возьмано. (Лыдӟы 2 Пётрлэсь 3:9.) Иегова сюрс аръёс возьма ини, куке Едем садын ӝутэм кулэ луись юанъёс пыр-поч сэрттэмын-пертчемын луозы. Со возьма со дырез, куке солэн нимыз быдэсак шонере поттэмын луоз. Куке ваньмыз со быдэсмоз, «ваньмыз Со вылэ оскиськисьёс», яке сое возьмасьёс, бакель каремын луозы (Ис. 30:18).

¹⁷ Иисус но возьманы дась. Музъем вылын улыкуз, солэн Инмарлы оскымон луэмез эскеремын вал. Асьме эраысь 33-тӥ арын, улӟемез бере инме тубыса, со Инмарлы аслэсьтыз мозмытӥсь курбонэзлэсь дунзэ тыриз. Но солы возьмано на вал 1914-тӥ арозь, ку со Эксэй луоз (Ап. уж. 2:33—35; Евр. 10:12, 13). Иисуслэн сюрс ар ӵоже кивалтэмез бере гинэ солэн вань тушмонъёсыз быдтэмын луозы (1 Кор. 15:25). Со дырез но кема возьмано на, но оскыны быгатӥськомы, чидан бакель каремын луоз шуыса.

МАР МИЛЕМЛЫ ВОЗЬМАНЫ ЮРТТОЗ?

18, 19. Мар юрттоз милемлы чидась луыны но кема возьманы?

¹⁸ Озьыен, котькудмылы чидась луоно но кема возьманы дась луоно. Нош мар милемлы юрттоз? Вӧсяське Инмарлы, солэсь святой духсэ курыса. Эн вунэтэ, чидан Инмарлэн святой духезлэн емышез пӧлы пыре шуыса (Еф. 3:16; 6:18; 1 Фес. 5:17—19). Соин ик куре Иеговаез юрттыны тӥледлы юнэсь луыны но кема чиданы.

¹⁹ Тодады возе сое, мар юрттэ вал Авраамлы, Иосифлы но Давидлы возьманы со дырез, куке Иегова аслэсьтыз сётэм кылъёссэ быдэстоз. Соос Иеговалы оскизы. Асьсэ сярысь гинэ малпаськыса, соос ӧз улэ. Ми малпаськиськомы ке со сярысь, кызьы соос бакель каремын вал, со юрттоз милемлы чидась луыны но кема возьманы.

20. Мар карыны ми дась?

²⁰ Пӧртэм шуг-секытъёсын пумиськыса но, ми дась кема возьманы. Веранэз ӧвӧл, куддыръя ми юаськомы Инмарлэсь: «Кема на-а, Иегова?» (Ис. 6:11). Нош Инмарлэн святой духезлэсь юрттэмзэ шӧдыса, ми, Иеремия сямен, вераны быгатомы: «Со [Иегова] вылэ оскиськыса уло [«сое возьманы дась луо», ВД]» (Бӧрд. 3:21, 24).