Дышетске асьтэды кияды возьыны

1, 2. а) Адями ассэ кияз возьыны уг быгаты ке, кытчы со вуттэ? б) Малы асьме нуналъёсы сыӵе шуг-секыт кылдэмын?

«ВОЗИСЬКЫНЫ БЫГАТОН» — со сям, кудзэ Инмарлэн юрттэменыз будэтыны луэ (Гал. 5:22, 23). Со сямез котькинлэсь умой возьматэ Иегова. Нош адямиос тырбыдэстэмесь, соин ик соослы капчи ӧвӧл асьсэзы киязы возьыны. Вераны кулэ, туннэ тросэз шуг-секытъёс, адямиос асьсэзы киязы возьыны быгатымтэен, кылдо шуыса. Тросэз адямиос асьсэзы киязы возьыны уг быгато, соин кулэ луись ужъёссэс дырыз дыръя уг лэсьто, урод дышетско яке урод ужало. Со сяна, адями, кудӥз ассэ кияз уг возьы, быгатэ урод кылъёсын вераськыны, кудӟытозь юыны, мукетъёссэ курадӟытыны, кузпалэныз люкиськыны, кулэтэм пунэмаськонэ пырыны, мултэс сюлмаськыны но мукет урод сямъёслы дышыны. Возиськыны быгатытэк, адями тюрьмае шедьыны быгатэ, азыса-калгыса улыны но соин сэрен висён кутыны но кӧто луыны (Пс. 33:12—15).

² Кызьы адӟиське, асьсэзы киязы возьыны быгатӥсьтэм адямиос шуг-секытъёс кылдыто асьсэлы но, мукетъёсызлы но. Дыр ортчемъя югдур уродгес но уродгес луэ. Кызьы возьматӥз одӥг эскерон, асьме дыръёсы адямиос, 1940-тӥ аръёсын ӵошатыса, асьсэзы шергес киязы возё. Со чик уг паймыты соосты, кинъёс Инмарлэсь Кылзэ дышето, малы ке шуоно Библиын азьло ик верамын вал, берпуметӥ нуналъёсы адямиос асьсэзы киязы возьыны уз быгатэ шуыса (2 Тим. 3:1—3).

3. Малы христианъёслы асьсэзы киязы возьыны кулэ?

³ Малы астэ кияд возьыны кулэ? Эскеромы кык валтӥсь мугъёсты. Нырысетӥез, улон возьматэ, асьсэзы киязы возьыны быгатӥсь адямиос шергес бадӟым шуг-секытъёсын пумисько шуыса. Соос уг лэзё шӧдонъёссылы асэнызы кивалтыны, мукет адямиосын капчиен огкыл шедьто, вожзэс поттыны уг дырто, мултэс сюлмаськонлы но куашкам мылкыдлы уг сётско. Кыкетӥез, визь сынаськонъёслы пумит сылыны но шонертэм мыл потонъёссэ киулаз возьыны быгатӥсь адями Инмарлы ярамон луэ. Со сярысь вера Адамен но Еваен луэм учыр (Ул.-выл. 3:6). Озьы ик малпаськоно со вылын, маин пумиськоно луизы мукет адямиос, кудъёсыз асьсэзы кияны возьыны ӧз быгатэ.

4. Мар мылкыдзэс ӝутыны быгатоз соослэсь, кинъёслы секыт асьсэзы киязы возьыны?

⁴ Ми сьӧлыко адямиос, соин ик милемлы секыт асьмеды киямы возьыны. Иегова сое тодэ, но солэн милемлы юрттэмез потэ шонертэм мыл потонъёсынымы нюръяськыны (3 Экс. 8:46—50). Яратӥсь Эш луыса, со мылысь-кыдысь юрттэ соослы, кинъёслэн солы ужамзы-тыршемзы потэ, но асьсэзы киязы возьыны шуг луэ. Нырысь ойдолэ учкомы, кызьы Иегова ассэ кияз возе. Нош собере вераськомы со сярысь, малы милемыз дышетыны быгато Библиын гожтэм примеръёссы со адямиослэн, кудъёсыз быгатӥзы асьсэзы киязы возьыны, озьы ик кудъёсыз ӧз быгатэ. Со сяна, тодамы ваёмы пайдаё визь-кенешъёсты, кудъёсыз юрттозы асьмеды умойгес киямы возьыны.

ИЕГОВА ВОЗЬМАТЭ, КЫЗЬЫ АСЬМЕДЫ КИЯМЫ ВОЗЁНО

5, 6. Кыӵе пример возьматӥз Иегова со пумысен, кызьы асьмеды киямы возёно?

⁵ Иегова тырбыдэс, со котьку но котьмае шонер лэсьтэ, соин ик со котькинлэсь умой возьматэ, кызьы асьмеды киямы возёно (К. Зак. 32:4). Нош ми тырбыдэстэмесь. Озьы ке но, Иеговалэн примерез вылын малпаськыса, ми быгатӥськомы солэсь адӟем карыны, кызьы асьмеды киямы возёно. Нырысь тодамы ваёмы, кызьы Иегова пӧртэм учыръёсын ассэ кияз возиз.

⁶ Малпаськомы со сярысь, кызьы Иегова ассэ возиз, куке Шайтан солы пумит ӝутскиз. Веранэз ӧвӧл, Шайтанлэн пумит ӝутскемез инмысь оскымон ужась-тыршисьёслэсь сюлэмзэс туж вӧсь кариз но вожзэс поттӥз. Тӥляд но сыӵе шӧдонъёсты кылдо, дыр, куке малпаськиськоды, кӧня куректон но курадӟон вайиз Шайтан адямиослы. Озьы ке но, Иегова дыртыса ужпум ӧз куты. Нырысь со ваньзэ пыр-поч малпаз. Со возьматӥз, со кема чидась но шонерлыко луэ шуыса (Пот. 34:6; Иов 2:2—6). Малы озьы вераны луоз? Иегова лэзиз, кӧня ке дыр мед ортчоз шуыса, малы ке шуоно солэн уг поты кин ке но адямиос пӧлысь бырыны мед шедёз, нош солэн потэ, «ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9).

7. Мае возьматэ милемлы Иеговалэн примерез?

⁷ Иеговалэн примерез возьматэ милемлы, макем кулэ мае ке верамлэсь яке лэсьтэмлэсь азьло, нырысь малпаськыны. Дыртыса ужпум кутоно ӧвӧл. Тӥледлы кыӵе ке кулэ луись ужпум кутоно ке, тырмыт дыр висъялэ, малпаськон но визьмо ужпум кутон понна. Инмарлэсь визьлыксэ куре, кулэ луись кылъёс быръён яке шонер ужъёс лэсьтон понна (Пс. 140:3). Куке вожмы потэ яке ми ӝоже усемын, туж капчи малпаськытэк ужпум кутыны. Тросэз христианъёс дыртыса маке веразы яке лэсьтӥзы, нош собере туж жалязы со сярысь (Мад. 14:29; 15:28; 19:2).

ИНМАРЛЭН УЖАСЬ-ТЫРШИСЬЁСЫЗЛЭН УМОЙ НО УРОД ПРИМЕРЪЁССЫ

8. а) Кытын гожтэмын соос сярысь, кинъёслэн Инмарлы ярамон сямъёссы вал? б) Мар юрттӥз Иосифлы ассэ шонер возьыны, куке Потифарлэн кышноез сое азон-калгон сьӧлыке кыскыны турттэ вал? (Учке статья кутсконысь суредэз.)

⁸ Библиын трос учыръёс гожтэмын соос сярысь, кинъёс секыт югдуръёсын асьсэзы киязы возьыны быгатӥзы. Одӥгез соос пӧлысь — Иосиф, Иаковлэн пиез. Со ужаз Потифарлэн юртаз, кудӥз фараон юртысь возьмаськисьёслэн кивалтӥсьсы вал. Потифарлэн кышноез Иосифлы синмаськиз, уго со «мугорын веськрес, тусбуйын чебер вал». Со нуналлы быдэ Иосифез ёртыса улӥз, Иосиф соин валче мед луоз но соин артэ мед кӧлоз шуыса. Мар юрттэ вал Иосифлы солы пумитъяськыны? Со малпаське вал со сярысь, кыӵе бервылъёсы вуттоз, со сак луэмысь дугдӥз ке. Нош куке Потифарлэн кышноез, Иосифлэн дӥськут бордаз кырмиськыса, шуиз: «Выд мон вӧзы»,— Иосиф бызьыса кошкиз. Со тазьы малпаськиз: «Таӵе уродлэсь но урод ужез лэсьтыны, Инмар азьын сьӧлыканы быгатӥсько шат?» (Ул.-выл. 39:6, 9; лыдӟы Мадёнъёсты 1:10).

9. Мар кароно, визь сынаськонлы медам сётске шуыса?

⁹ Малы ми Иосифлэсь дышетскыны быгатӥськомы? Куддыръя милемлы Иеговалэсь законзэ тӥяны мылкыдлэсь «бызьыса кошкыны» кулэ. Адӟись-Ивортӥсь луэмзылэсь азьло куд-огъёсыз кудӟытозь юо, тамак кыско, наркотикъёсын эшъясько, азыса-калгыса уло но, эсэпсэ тодытэк, сиыса-юыса уло вал. Пылатӥськемзы бере но соослэн мылкыдзы кылдылэ на азьвыл ужъёссы доры берытскыны. Мар кароно, тӥляд сюлэмды сьӧлыке кыске ке? Малпаське со сярысь, макем сӧриськозы Иеговаен кусыпъёсты, тӥ шонертэм мылкыдлы сётскиды ке. Со тӥледлы нюръяськыны кужым сётоз. Тырше азьло ик адӟыны, кыӵе югдурын тӥ визь сынаськонэн пумиськыны быгатоды, но малпаське, кызьы солэсь палэнсконо (Пс. 25:4, 5; Мад. 22:3). Визь сынаськонэн пумиськыкуды, вӧсяське Иеговалы но куре, со тӥледлы визьлык мед сётоз но асьтэды кияды возьыны мед юрттоз шуыса.

10, 11. а) Маин пумиськоно луо тросэз егит христианъёс школаын? б) Мар юрттоз соослы огъёзъёссылэн зӥбемзылы пумит сылыны?

¹⁰ Шуг-секыт, кудӥныз пумиськиз Иосиф, тросэзлы егит христианъёслы тодмо луэ. Тани Ким нимо егит ныллэн примерез. Солэн тросэз ӵош дышетскисьёсыз пиосын-нылъёсын кӧлало но котьку ушъясько вал, макем шулдыр соос шутэтскон нуналъёссэс ортчытӥзы. Нош Кимлы номыр вераны вал. Со вера, мукетъёсызлэсь пӧртэм луэменыз сэрен, куддыръя ассэ куштэмын но огназ кельтэмын кадь шӧдылӥз шуыса. Ким нокинэн ӧз пумиськылы, соин ик ӵош дышетскисьёсыз сое визьтэм шуо вал. Но со визьмо ужпум вал, малы ке шуоно Ким тодэ вал, быдэ вуымтэ дыръя кинэн ке кӧлыны мылкыд туж юн луыны быгатэ шуыса (2 Тим. 2:22). Ӵош дышетскисьёсыз ӵем дыръя юаллязы солэсь, зэмзэ ик-а со та дырозь нокинэн ӧз кӧла на шуыса. Соку солэн луонлыкез вал валэктыны, малы со пиосын уг кӧла. Ми данъяськиськомы егит христианъёсын, кудъёсыз огъёзъёссылэн зӥбемзылы уг сётско но азон-калгонлэсь палэнын возисько. Нош макем данъяське соосын Иегова!

¹¹ Библиын озьы ик гожтэмын соос сярысь, кинъёс асьсэды киязы возьыны ӧз быгатэ но азон-калгон сьӧлыке пыризы. Сокем малпаськытэк асьсэды воземенызы сэрен, соос трос урод бервылъёсын пумиськоно луизы. Тӥ но Кимлэн кадь учыре сюриды ке, малпаське улонэз валасьтэм егит пияшлэн учырез сярысь, кудӥз гожтэмын Мадёнъёс книгалэн 7-тӥ люкетаз. Озьы ик тодады вае, мар лэсьтӥз Амнон но кыӵе кышкыт бервылъёсы со вуттӥз (2 Экс. 13:1, 2, 10—15, 28—32). Нылпиоссэс асьсэзы киязы возьыны но визьмо ужпумъёс кутыны дышетон понна, анай-атайёс, семьяен йыбырттон ортчытыкузы, соосын ӵош эскерыны быгато Библиысь учыръёсты, кудъёсыз сярысь верамын та статьяын.

12. а) Кызьы Иосиф ассэ кияз возиз агайёсыз азьын? б) Кыӵе учыръёсын милемлы асьмеды киямы возёно?

¹² Иосиф эшшо одӥг учырын умой пример возьматӥз на, кызьы астэ кияд возёно. Со вал, куке солэн агайёсыз Египетэ сиён басьтыны лыктӥзы. Иосиф нырысь соослы аслэсьтыз кин луэмзэ ӧз вера, малы ке шуоно солэн тодэмез потӥз, мар соослэн сюлмазы. Куке Иосифлы возиськыны секыт луиз, со пыдлось комнатае кошкиз, солэсь бӧрдэмзэ нокин медаз адӟы шуыса (Ул.-выл. 43:30, 31). Кин ке но христианъёс пӧлысь яке матысь адямиды шонертэм лэсьтэ ке, нош тӥ, Иосиф сямен асьтэды кияды возиськоды, тӥ уд лэсьтэ сое, мар сярысь берло жалясалды (Мад. 16:32; 17:27). Нош ӵыжы-выжыды пӧлысь кин ке но кенешысь поттэмын ке, тӥледлы асьтэды кияды возёно, вылды, кулэ луись мугтэк соин вераськытэк улыны мед быгатоды шуыса. Куддыръя озьы улыны капчи ӧвӧл. Но ми валаськомы ке, озьы улыса Инмарлэсь адӟем кариськомы но солэн визь-кенешезлэсь кылзӥськиськомы шуыса, соку милемлы капчигес луоз.

13. Малы дышетыны быгатэ милемыз Давидлэн примерез?

¹³ Озьы ик умой луысал саклыкмес висъяны Давид эксэйлэн примерезлы. Куке Саул, нош берлогес Семей но, солэсь вожзэ поттыны тыршо вал, Давид, со вылӥ пуктэм мурт вал ке но, вожзэ ӧз потты (1 Экс. 26:9—11; 2 Экс. 16:5—10). Зэм, Давид котьку ик ассэ кияз возьыны ӧз быгаты. Со сярысь вера солэн Вирсавиен сьӧлыкамез но кӧттырмостэм Наваллэн ассэ воземезлы йырзэ кур каремез (1 Экс. 25:10—13; 2 Экс. 11:2—4). Озьы ке но, солэн примерез милемыз тросэзлы дышетыны быгатэ. Нырысетӥез, соослы, кинъёслы Инмарлэн калыказ кивалтыны право сётэмын, быгатыны кулэ асьсэзы киязы возьыны, медаз лэсьтэ шуыса сое, мар карыны соослэн правозы ӧвӧл. Кыкетӥез, нокинлы но кулэ ӧвӧл малпаны, ми ноку ум янгышалэ шуыса (1 Кор. 10:12).

ПАЙДАЁ ВИЗЬ-КЕНЕШЪЁС

14. Кыӵе учыр луиз одӥг вын-агаен но малы сыӵе учыръёсын туж кулэ астэ кияд возьыны?

¹⁴ Кызьы астэ кияд возьыны дышетсконо? Эскеромы Луиджи вын-агаен луэм учырез. Солэсь машиназэ берласянь мукет машина шуккиз. Со машиналэн руль сьӧраз пукись ачиз янгыш вал ке но, со Луиджиез ултӥяны кутскиз но жугиськыны медэ ни вал. Ассэ кияз кутыны мед быгатоз шуыса, Луиджи Иеговалы вӧсяськиз. Озьы ик со тыршиз со пиосмуртэз буйгатыны, но ӧз быгаты. Соку Луиджи со машиналэсь номерзэ гожтӥз но кошкиз, нош пиосмурт кесяськыса ик кылиз. Арня ортчыса, Луиджи лыктӥз кышномурт доры, кудӥз Библиен тунсыкъяськиз. Солэн картэз ӵапак со пиосмурт вылэм, кудӥз Луиджилэсь машиназэ шуккиз! Пиосмуртлы туж возьыт вал соку ассэ озьы воземезлы, но со ассэ простить карыны куриз. Кышномуртлэн картэз ӵектӥз Луиджилэн страховой компаниеныз герӟаськыны но курыны солэсь заявленизэ ӝоггес учкыны. Озьы ик соос Библия сярысь но туж умой вераськизы. Луиджи туж шумпотӥз, соку ассэ кияз возьыны быгатӥз шуыса, малы ке шуоно со ассэ кияз ӧй возьысал ке, таӵе умой емышъёс ӧй луысалзы. (Лыдӟы 2 Коринфъёслы 6:3, 4.)

15, 16. Кызьы Библиез дышетон юрттоз тӥледлы но, тӥляд семьядылы но дышетскыны асьтэды кияды возьыны?

¹⁵ Мылысь-кыдысь но тыршыса Библиез дышетон юрттэ христианъёслы дышетскыны асьсэзы киязы возьыны. Тодамы ваёмы, мар вераз Инмар Иисус Навинлы: «Та законэн книгаез кылыд-ымыд верамысь медаз дугдылы; нош тон соя уй но, нунал но дышетскы, мар отын гожтэмын, ваньзэ сое ӝик-ӝик быдэсъяса мед улод: соку тынад улон сюресэд азинлыко мыноз, визьлыко улод-вылод» (Иис. Н. 1:8). Нош кызьы юрттэ милемлы Библиез дышетон?

¹⁶ Кызьы ми эскеримы, Библиын трос учыръёс гожтэмын, кудъёсыз возьмато, кыӵе емышъёс вае адямилэн ассэ кияз возьыны быгатэмез яке быгатымтэез. Библиын со учыръёс, милемыз дышетон понна, гожтэмын (Рим. 15:4). Милемлы туж кулэ соосты лыдӟыны но эскерыны, нош озьы ик, малпаськыны соос вылын. Тырше адӟыны, малы соос дышетыны быгато тӥледыз но, тӥлесьтыд семьядэс но. Куре Иеговаез тӥледлы юрттыны. Тӥ шӧдӥды ке, кыӵе ке удысын асьтэды кияды возьыны уд быгатӥське шуыса,— дышетске. Вӧсяське со сярысь но валаны тырше, мар кароно, воштӥськон понна (Иак. 1:5). Озьы ик публикациосмес но эскере. Отысь тӥ пайдаё визь-кенешъёсты шедьтоды, кудъёсыз одно ик тӥледлы юрттозы.

17. Кызьы анай-атайёс нылпиоссэс асьсэзы киязы возьыны дышетыны быгато?

¹⁷ Мар карыны быгато анай-атайёс, нылпиоссэс асьсэзы киязы возьыны дышетон понна? Котькуд анай-атай тодэ, нылпиос со сямын уг вордӥсько шуыса, соосты дышетыны кулэ. Мукет сямъёслы дышетонын сямен ик, татын но бадӟым инты басьтэ анай-атайёслэн примерзы (Еф. 6:4). Тӥ адӟиськоды ке, нылпиостылы асьсэзы киязы возьыны секыт шуыса, малпаське: «Мон ачим асме киям возьыны быгатӥсько-а?» Эн вунэтэ, тӥляд ялан тодытон уже пыриськемды, кенешлэн пумиськонъёсаз ветлэмды но семьяен йыбырттонэз ортчытъямды соослы бадӟым пайда вае шуыса. Эн кышкалэ кулэ дыръяз нылпиостылы «уг» шуыны. Иегова Адамлы но Евалы валамон вераз, мар карыны яра, нош мар карыны уг яра, соос солэсь кивалтыны правозэ гажаны мед дышетскозы шуыса. Озьы ик анай-атайёс но нылпиоссылы пример возьматӥзы но соосты визьнодазы ке, со юрттоз нылпиоссылы дышетскыны асьсэзы киязы возьыны. Нылпиостэс Инмарез яратыны но солэсь курон-косонъёссэ гажаны дышетыса, тӥ соослы тужгес но дуно кузьым кузьмаськоды шуыны луоз. (Лыдӟы Мадёнъёсты 1:5, 7, 8.)

18. Малы туж кулэ малпаськыса эшъёс бырйыны?

¹⁸ Веранэз ӧвӧл, милемлы ваньмылы малпаськыса эшъёс быръёно. Быръе эшъёс соос пӧлысь, кинъёс юрттозы тӥледлы шонер ужпумъёс кутыны, соосты быдэстыны но кышкыт югдуръёслэсь палэнскыны (Мад. 13:21). Сыӵе адямиосын эшъяськыса, кудъёсызлэн Иеговаен матысь кусыпъёссы но кудъёсыз асьсэзы киязы возьыны быгато, тӥ пайда басьтоды но тӥляд мылкыдды ӝутскоз соослэсь адӟем карыны. Нош тӥляд умой примерды эшъёстылы пайда ваёз. Асьмеды киямы возьыны дышетскимы ке, со юрттоз милемлы шумпотыса улыны, Инмарлы ярамон луыны но матысь адямиосынымы умой кусыпъёс возьыны.