«Вае кутскоме уж вылын зэмзэ ик яратыса улыны»

1. Кыӵе яратон ваньмызлэсь вылӥынгес луэ? Валэктэ. (Учке статья кутсконысь туспуктэмъёсты.)

ШОНЕРЛЫКО возетъёс вылэ инъяськем яратон (ага́пе) — со Иеговалэн кузьымез. Со Инмар бордысь потэ (1 Иоанн 4:7). Таиз яратон ваньмызлэсь вылӥынгес луэ. Сыӵе яратон пӧлы пыро шуныт эшлыко кусыпъёс. Нош нырысь ик сыӵе яратон адӟиське умой, ӟеч ужъёсысь, кудъёсыз аслыд пайда утчатэк лэсьтэмын. Одӥг справочникын гожтэмын, яратон ага́пе «адӟиське со ужъёсысь гинэ, кудъёссэ лэсьтыны со мылкыдэз лӧпкытэ» шуыса. Куке ми, асьмелы пайда утчатэк, сюлмысьтымы яратӥськомы яке милемыз озьы ярато, милям улонмы шумпотонэн пачылме но улэммыя улэммы потэ.

2, 3. Кызьы Иегова адямиосты сюлмысьтыз яратэмзэ возьматӥз?

² Иегова адямиосты туж яратэ. Со сярысь верало со ужъёсыз но, кудъёссэ со Адамез но Еваез кылдытэмезлэсь трослы азьлогес лэсьтӥз. Со кылдытӥз Музъемез, адямиослы пырак дауръёслы паймымон улон интыез, кытын адями улон понна нюръяськыны кулэ ӧй вал, нош шумпотыса улыны кулэ вал. Ваньзэ сое Иегова ачиз понна ӧз лэсьты, сое со асьмеос понна лэсьтӥз. Собере, музъем вылысь нылпиоссэ сюлмысьтыз яратэменыз, со соослы паймымон луонлык кузьмаз — пырак дауръёс ӵоже райын улыны, кудзэ со соослы дасяз.

³ Адам но Ева пумит ӝутскем бере Иегова возьматӥз, макем юн со адямиосты яратэ. Со оске вал, Адамлэн но Евалэн нылпиоссы пӧлысь кудӥз ке но солэн яратэмез понна тау кароз шуыса. Соин ик со сюлмаськиз, азьланяз соос кулонлэсь но сьӧлыклэсь мозмытэмын мед луозы шуыса (Ул.-выл. 3:15; 1 Иоанн 4:10). Утись лыктоз шуыса кылзэ сётыкуз, Иегова лыдъя вал ини, дун тыремын шуыса. Ог 4 000 ар ортчыса Иегова туж бадӟым дун тыриз: со адямиос понна аслэсьтыз одӥг вордӥськем Пизэ сётӥз (Иоанн 3:16). Ми туж тау кариськомы Иеговалы милемыз сюлмысьтыз яратэмез понна!

4. Кытысь адӟиське, тырбыдэстэм адямиос но, асьсэлы пайда утчатэк, сюлмысьтызы яратыны быгато шуыса?

⁴ Ми Инмарлы укшатыса кылдытэмын, соин ик ми но, асьмелы пайда утчатэк, сюлмысьтымы яратыны быгатӥськомы. Но, сьӧлыко вордӥськеменымы сэрен, милемлы озьы яратыны секыт. Озьы ке но, ми сыӵе быгатонлыкмес ӧм ыштэ. Авель возьматӥз, Инмарез яратэ шуыса, куке вань сюлмысьтыз курбонэ сётӥз самой умойзэ, маиз солэн вал (Ул.-выл. 4:3, 4). Сыӵе ик яратон Нойлэсь но мылкыдзэ ӝутӥз трос аръёс ӵоже котырысьтыз адямиослы Инмарлэсь ӟеч иворзэ вераны, соос сое ӧз кылзэ ке но (2 Пётр 2:5). Авраам понна Иеговаез яратон ваньмызлэсь дуногес вал. Сое адӟыны луэ, куке Авраам, Инмарлэсь кылзӥськыса, дась луиз аслэсьтыз Исаак пизэ курбонэ сётыны (Иак. 2:21). Милям но, со оскымон пиосмуртъёс сямен ик, шуг-секытъёс шоры учкытэк, сюлмысьтымы яратэммы потэ.

ЗЭМОС ЯРАТОН НО ЯРАТЭМЪЯСЬКОН

5. Кызьы ми возьматыны быгатӥськомы, зэмзэ ик яратӥськомы шуыса?

⁵ Мар со сыӵе зэмос яратон? Библия ӧте милемыз кыл вылын, вераськыса гинэ ӧвӧл, нош уж вылын зэмзэ ик яратыса улыны (1 Иоанн 3:18). Соку яратэммес кылъёсын верано ӧвӧл шат? Верано (1 Фес. 4:18). Но яратон со чебер кылъёс гинэ ӧвӧл. Куддыръя сыӵе югдуръёс кылдо, куке яратонэз ужъёс вылын возьматыны кулэ. Кылсярысь, куке кин ке но христианъёс пӧлысь шуге-леке усемын, солы лякыт кылъёс гинэ уз юрттэ, дыр (Иак. 2:15, 16). Озьы ик Иеговаез но матысьёсмес яратон милесьтым мылкыдмес ӝутэ, Инмар «аран дораз ужасьёсты мед ыстоз шуыса» курем сяна, вань кужыммес поныса, тодытон уже пыриськыны (Матф. 9:38).

6, 7. а) Мар со сыӵе «чылкыт сюлмысь» яратон? б) Вералэ учыръёсты, куке яратон пӧяськон гинэ вал.

⁶ Апостол Иоанн гожтӥз, милемлы «уж вылын зэмзэ ик яратоно» шуыса. Со возьматэ, яратонмы чылкыт сюлмысь потыны кулэ шуыса (Рим. 12:9; 2 Кор. 6:6). Ми возьматыны тыршиськомы ке, сыӵе адями луиськомы шуыса, кыӵе зэмзэ ик ум луиське, соку яратӥськомы шуыны уз луы. Нош адями чеберъяськыса гинэ яратыны быгатэ шат? Уг. Со яратон ӧвӧл, яратэмъяськон гинэ.

⁷ Эскеромы учыръёсты, куке яратон пӧяськон гинэ вал. Едем садын Шайтан Ева сярысь сюлмаськемъяськиз, нош зэмзэ ке верано, озьы со ачиз сярысь сюлмаськиз, солы аслыз умой мед луоз шуыса (Ул.-выл. 3:4, 5). Ахитофеллэн но Давидлэн эшъяськонзы зэмос вылымтэ. Ахитофел эксэез вузаз, куке валаз, озьы со аслыз пайда басьтыны быгатэ шуыса (2 Экс. 15:31). Озьы ик асьсэды возё зэмос йыбырттонлэсь палэнскемъёс но мукет адямиос, кудъёсыз кенешын керетон поттыны тыршо. Соос мукетъёссэ яратэмъясько, но соослэн «небыт, чебер кылъёссы» сьӧрын кескич малпанъёс ватскемын (Рим. 16:17, 18).

8. Мае милемлы юано асьмелэсь?

⁸ Чеберъяськыса гинэ яратон тужгес но умойтэм, малы ке шуоно со пӧяськон луэ. Но озьы адямиосты пӧяны луэ, нош Иеговаез уд пӧя. Иисус валэктӥз, чеберъяськисьёс одно ик кыл кутытэмын луозы шуыса (Матф. 24:51). Ми Иеговалэн ужась-тыршисьёсыз, соин ик милям уг поты, яратонмы чеберъяськонэн пыӵамын мед луоз шуыса. Умой луысал юаны асьмелэсь: «Котьку-а мынам яратонэ сюлмысь потэ? Яратонам ачим сярысь гинэ сюлмаськон но пӧяськон пыӵамын ӧвӧл-а?» Ойдолэ эскеромы укмыс амалъёсты, кызьы ми чылкыт сюлмысь яратонмес возьматыны быгатӥськомы.

КЫЗЬЫ «УЖ ВЫЛЫН ЗЭМЗЭ ИК» ЯРАТЫСА УЛОНО

9. Мар карыны косэ милемыз зэмос яратон?

⁹ Ӟеч ужъёс лэсьтэ, соос сярысь нокин ӧз тоды ке но. Ми вын-агайёсмылы ум юрттӥське, мукетъёсыз милемыз мед ушъялозы шуыса, нош юрттӥськомы, соосты сюлмысь яратэменымы. (Лыдӟы Матфейлэсь 6:1—4.) Анания но Сапфира мукет сямен лэсьтӥзы. Соослэн потӥз, мукетъёсыз соослэсь, салам-кузьым карыса, коньдон сётэмзэс мед адӟозы шуыса. Соос пӧязы, кӧня коньдон сётӥзы. Чеберъяськемзы понна Анания но Сапфира кыл кутытэмын вал (Ап. уж. 5:1—10). Зэмос яратон милесьтым мылкыдмес ӝутэ, мукетъёсызлэсь ушъямзэс возьматэк, вын-агайёсмылы шумпотыса юрттыны. Кылсярысь, вын-агайёс, кудъёсыз юртто Кивалтӥсь кенешлы духовной сиён дасяны, асьсэлэсь нимзэс шарае уг потто, асьсэлы дан уг утчало но мар бордын ужамзэс мукетъёсызлы уг верало.

10. Кызьы ми мукетъёссэ асьме сярысь умоесьгес луо шуыса лыдъяны быгатӥськомы?

¹⁰ Мукетъёссэ асьтэ сярысь умоесьгес луо шуыса лыдъялэ. (Лыдӟы Римъёслы 12:10.) Иисус милемлы пример возьматӥз, кызьы мукетъёссэ асьме сярысь умоесьгес луо шуыса лыдъяно. Со дано луисьтэм ужъёслэсь ӧз кышка (Иоанн 13:3—5, 12—15). Милемлы, со кадь зӥбыт-востэм луон понна, трос тыршоно луоз, вылды. Апостолъёс но Иисуслэсь ассэ озьы воземзэ валазы соку гинэ, куке соослы святой дух сётэмын вал (Иоанн 13:7). Ми мукетъёссэ асьме сярысь умоесьгес луо шуыса лыдъяськомы, куке ум малпаське, милям дышетскеммы, ваньбурмы яке Инмарлы ужан-тыршонын оскем ужъёс милемыз мукетъёсызлэсь умойгес каро шуыса (Рим. 12:3). Кинэ ке ушъяло ке, ми ум вожъяськиське солы, нош шумпотӥськомы со адями понна, но ум малпаське, малы милемыз но уг ушъяло шуыса, милемлы потэ ке но, со адямилы азинлыко луыны ми юрттӥмы шуыса.

11. Малы, кинэ ке ушъяськомы ке, сюлмысь ушъяны кулэ?

¹¹ Вын-агайёсты но сузэр-апайёсты сюлмысь ушъялэ. Ог-огмес котьку ушъяны тыршоно, малы ке шуоно Библия вера, сыӵе кылъёс юнмато шуыса (Еф. 4:29). Но ушъяно ке, сюлмысь ушъяно. Ушъяммы сюлмысь ӧз луы ке, ми чеберъяськомы гинэ но сётытэк кылёмы со визь-кенешез, кудзэ сётыны кулэ вал (Мад. 29:5). Адямиез ушъямы ке, нош собере солэн мышказ сое тэргаса куштӥмы ке, соку со чеберъяськем луоз. Апостол Павел ноку но озьы ӧз лэсьты. Со, кызьы со мукетъёссэ ушъяз, возьматэ, со зэмзэ ик яратэ вал шуыса. Павел Коринфын улӥсь христианъёслы гожтэт гожтӥз, кудаз сюлмысь ушъяз соосты (1 Кор. 11:2). Но отын улӥсь христианъёс котьмае шонер уг лэсьто вал, соин ик Павел со сярысь соослы шонерак вераз, но лякытэн (1 Кор. 11:20—22).

12. Кызьы ог-огенызы герӟаськемын куно карон сям но зэмос яратон?

¹² Куно карисесь луэ. Иеговалэн потэ, вын-агайёсмылы но сузэр-апайёсмылы юрттон понна, ми номырмес медам жалялэ шуыса. (Лыдӟы 1 Иоаннлэсь 3:17.) Но юрттыны кулэ чылкыт сюлмын, аслыд пайда утчатэк. Аслэсьтыд юаны луоз: «Кинэ мон нырысь ик куно карисько: матысь эшъёсме, „тодмо“ христианъёсты но соосты, кинъёс мыным ӟечен берыктыны быгатозы? Яке мон утчасько луонлык юрттыны со вын-агайёслы но сузэр-апайёслы, кудъёссэ мон туж умой уг тодӥськы яке соослы, кинъёс ӟечен берыктыны уз быгатэ?» (Лука 14:12—14). Нош мар, кин ке христианъёс пӧлысь, умойтэм ужпумъёс кутэменыз сэрен, шуге-леке усиз ке, яке юрттэммы понна тау но ӧз кары? Сыӵе учыре милемлы Библиысь визь-кенешлэсь кылзӥськоно: «Тӥ доры пырисьёс луизы ке, ӟургетыса эн улэ, сюдэ-вордэ соосты» (1 Пётр 4:9). Озьы лэсьтыса, тӥ шумпотон басьтыны быгатоды, кудзэ басьтыны луэ мукетъёсызлы сюлмысь юрттыса гинэ (Ап. уж. 20:35).

13. а) Кыӵе учыре тужгес но секыт лябъёсызлы юрттыны? б) Кызьы ми лябъёсызлы юрттыны быгатӥськомы?

¹³ Лябъёсызлы юрттэ. Зэмос-а милям яратонмы шуыса, эскерыны юрттоз Библиысь таӵе косон: «Начаръёслы юрттӥське. Котькытын, котьма ласянь чидасесь луэ» (1 Фес. 5:14). Тросэз, кинъёслэн Инмарен кусыпъёссы лябӟизы, дыр ортчемъя осконын юн сылыны кутско. Нош куддыръя милемлы чидан кулэ, малы ке шуоно куд-ог вын-агайёслы но сузэр-апайёслы ялан юрттэт кулэ. Соку луоз соослы Библиысь буйгатӥсь малпанъёсты вераны, ӧтьыны ӵош ӟеч иворез вераны яке кылзыны соосты. Но вын-агайёсты но сузэр-апайёсты «лябъёсызлы» но «кужмоосызлы» люконо ӧвӧл. Тодамы возёно, милям котькудмылэн ляб но кужмо интыосмы вань шуыса. Апостол Павел гинэ но вера вал, солэн ляб интыосыз вань шуыса (2 Кор. 12:9, 10). Соин ик котькудмылы вын-агайёслэн но сузэр-апайёслэн юрттэтсы кулэ.

14. Мар кароно, вын-агайёсын тупаса улон понна?

¹⁴ Тупаса улыны тырше. Ми кариськомы ваньзэ, мае быгатӥськомы, вын-агайёсынымы тупаса улон понна, соку но, куке милемлы потэ, милемыз шонертэм валазы яке милемлы пумит шонерлыктэм уж лэсьтӥзы шуыса. (Лыдӟы Римъёслы 12:17, 18.) Нош кинэ ке ӝоже уськытӥмы ке, сюлмысь куроно милемыз простить карыны. Кылсярысь, «Мыным жаль, озьы луиз шуыса» верам интые, тӥ вераны быгатоды: «Вождэ эн вай, мон кылъёсыным тонэ вӧсь кари шуыса». Озьы тӥ возьматоды тӥ но янгыш вал шуыса валамдэс. Тупаса улыны тужгес но тыршоно кузпалъёслы. Картлы но кышнолы кулэ ӧвӧл адямиос азьын асьсэды шудо семья кадь возьыны, нош доразы вераськытэк улыны яке ог-огзэс ултӥяны но вӧсь карыны.

15. Кызьы ми возьматыны быгатӥськомы, мукетъёссэ сюлмысь простить кариськомы шуыса?

¹⁵ Мылысь-кыдысь простить каре. Милемыз кин ке ӝоже уськытӥз ке, ми сое простить кариськомы но йыркуръяськыса ум улӥське. Огмес огмы гажаса-яратыса, одӥг духен тупаса, огмылкыдын улыны тыршимы ке, ми простить каромы соосты но, кинъёс милемыз ӝоже уськытэмзэс валатэк но кылизы (Еф. 4:2, 3). Яратон «уродэз-лекез сюлмаз уг возьы», соин ик ми сюлмысь простить мед каромы шуыса, кулэ ӧвӧл луэмзэ выльысь но выльысь тодамы вайылыны (1 Кор. 13:4, 5). Простить карытэк йыркуръяськыса улӥмы ке, со кышкыт, малы ке шуоно озьы милям вын-агайёсынымы но сузэр-апайёсынымы гинэ кусыпъёсмы уз сӧриське, Иеговаен кусыпъёсмы но сӧриськыны быгатозы (Матф. 6:14, 15). Милемлы пумит сьӧлыкам муртъёс понна вӧсяськыса, ми возьматӥськомы, соосты сюлмысь простить каримы шуыса (Лука 6:27, 28).

16. Мар кароно, Иеговалы ужан-тыршонын милемлы кыӵе ке уж оско ке?

¹⁶ Дась луэ асьтэлэн мыл потонъёстылэсь куштӥськыны. Иеговалы ужан-тыршонын милемлы кыӵе ке уж оско ке, ми тыршиськомы вын-агайёсмылы но сузэр-апайёсмылы сюлмысь яратэммес возьматыны но, асьмелы пайда утчатэк, мукетъёсызлы пайда утчаны (1 Кор. 10:24). Кылсярысь, конгрессъёсын радъясьёс залэ туж вазь пыро, куке мукетъёссэ пырыны уг лэзё на. Соослэн луонлыксы вань ке но, со вын-агайёс уг тыршо асьсэлы но ас семьязылы самой умой интыос басьтыны, нош тыршо со интыосты мукетъёсызлы кельтыны. Озьы радъясьёс нырысь ик мукетъёсыз сярысь сюлмасько, малы ке шуоно соос мукетъёссэ сюлмысь ярато но асьсэлы пайда уг утчало. Быгатӥськомы-а ми соослэсь адӟем карыны?

17. Мар кароз адями секыт сьӧлыкамез бере, со зэмзэ ик яратэ ке?

¹⁷ Лушкем сьӧлыкъёстэс шарае поттэ но соосты эн лэсьтэ ни. Куддыръя христианъёс, секыт сьӧлыкамзы бере, возьдаськеменызы яке мукетъёссэ вӧсь карыны кышкаменызы, сьӧлыкамзэс ватыны тыршо (Мад. 28:13). Адями сьӧлыксэ ватэ ке, со яратэ шуыны уз луы, малы ке шуоно озьы со изъян вае аслыз но, мукетъёсызлы но. Соин сэрен быдэс кенеш Инмарлэн духезтэк кыльыны но тупаса улонэз ыштыны быгатэ (Еф. 4:30). Адями зэмзэ ик яратэ ке, секыт сьӧлыкамез бере со, юрттэт курыса, тӧроослы вазиськоз (Иак. 5:14, 15).

18. Макем кулэ луэ зэмос яратон?

¹⁸ Яратон — котькыӵе сямлэсь вылӥынгес (1 Кор. 13:13). Яратэменымы ми возьматӥськомы, Христос сьӧры мынӥськомы но Иеговалэсь адӟем кариськомы шуыса, кудӥз бордысь яратон потэ (Еф. 5:1, 2). Павел гожтӥз: «Яратонэ ӧвӧл ке, соку мон ваньлэсь ӧвӧлтэм маке гинэ луисько» (1 Кор. 13:2). Ойдолэ азьланяз но мукетъёссэ кыл вылын, вераськыса гинэ ум, нош «уж вылын зэмзэ ик яратыса» уломы!