Иегова — Ваньмызлэсь Кужмо но шӧдӥсь-валась Инмар

1, 2. а) Кызьы адямиос шоры учко соос, кинъёслэн та дуннеын кивалтыны правозы вань, нош кызьы учке Иегова? б) Мае ми эскеромы та статьяын?

АДЯМИОС, кудъёсызлэн кивалтыны правозы вань, ӵем дыръя мукетъёсыныз кузёясько но ултӥяло соосты (Екк. 8:9; Матф. 20:25). Иегова чылкак мукет. Со Ваньмызлэсь Кужмо ке но, со тырбыдэстэм адямиосты шӧдэ-вала. Со туж ӟеч но сюлмаськись Инмар, кудӥз вала милесьтым шӧдонъёсмес но кулэяськонъёсмес. Иегова «тодэ, асьмеос сюй-тузон луиськомы шуыса», соин ик со ноку но уг куры милемыз лэсьтыны сое, мае ми ум быгатӥське (Пс. 102:13, 14).

² Библиын гожтэмын трос учыръёс, куке со ужась-тыршисьёсыз сярысь сюлмаськиз. Ойдолэ эскеромы соос пӧлысь куиньзэ. Нырысь ик ми эскеромы, кызьы Иегова юрттӥз егит Самуиллы вераны Илийлы, быдӟым священниклы, Инмарлэсь приговорзэ. Собере ми вераськомы со сярысь, макем чидаса Иегова кылзӥз пумит веранъёссэ Моисейлэсь, кудӥзлы Израиль калыклы кивалтӥсь луоно вал. Пумаз ми эскеромы, кызьы Иегова Израиль калык сярысь сюлмаськиз, сое Египетысь поттыкуз. Та учыръёс вылын малпаськыкуды, тырше адӟыны, кыӵе сямъёсты возьматӥз Иегова но малы ми солэсь дышетскыны быгатӥськомы.

ПИЯШЕЗ ШӦДОН-ВАЛАН

3. Кыӵе учыр луиз егит Самуилэн но кыӵе юан кылдэ соин сэрен? (Учке статья кутсконысь суредэз.)

³ Самуил пичи дырысеныз ик скиния бордын Иеговалы ужаны-тыршыны кутскиз (1 Экс. 3:1). Одӥг уе, куке Самуил изьыны выдӥз вал ини, паймымон учыр луизa. (Лыдӟе 1 Эксэйлыкъёслэсь 3:2—10.) Со кылӥз, сое кин ке ӧте шуыса. Самуил малпаз, сое Илий ӧте шуыса, соин соку ик со доры бызьыса мынӥз но шуиз: «Тани, мон татын! Тон монэ ӧтид-а?» — «Мон тонэ ӧй ӧтьы»,— шуиз соиз. Озьы со Илий доры эшшо кык пол бызьылӥз на. Соку Илий валаз, Самуилэз Инмар ӧте шуыса. Со вераз пияшлы, мар верано, но соиз кылзӥськиз солэсь. Малы Иегова, кылчин пыр вераськыкуз, соку ик ӧз валэкты Самуиллы, кин сое ӧте? Библиын со сярысь уг вераськы, но бератаз луэм учыръёсысь адӟиське, Инмар егит Самуиллэсь шӧдонъёссэ лыдэ басьтӥз шуыса.

4, 5. а) Кыӵе шӧдонъёсыз вал Самуиллэн, куке Иегова солы уж сётӥз, но мар луиз ӵукнаяз? б) Мае ми тодыны быгатӥськомы Иегова сярысь та учырысь?

⁴ Лыдӟе 1 Эксэйлыкъёслэсь 3:11—18. Иеговалэн Законаз вераське вал, нылпиослы арлыдоосты гажано шуыса, тужгес но кивалтӥсьёсты (Пот. 22:28; Лев. 19:32). Быгатӥськоды-а тӥ син азяды пуктыны, кызьы ӵукна Самуил арлыдо Илий доры лыктэ но кышкатэк вера солы Инмарлэсь кышкыт приговорзэ? Уд, уд быгатӥське! Библиын гожтэмын, «аслэсьтыз адӟемзэ Илийлы вераны Самуил кышказ» шуыса. Но Инмар Илийлы валаны юрттӥз, Самуилэз со ӧтиз шуыса. Соин ик Илий Самуиллэсь ачиз юаз, мар вераз солы Иегова. Со пияшез косӥз: «Мынэсьтым сое эн ваты». Самуил кылзӥськыса «солы ваньзэ вераз».

⁵ Та ивор Илий понна шӧдтэк шорысь верам ивор ӧй вал. Иеговалэн приговорез сярысь солы вераз вал ини «Инмарлэн адямиез», кудӥзлэн нимыз сярысь Библиын уг вераськы (1 Экс. 2:27—36). Самуилэн но Илиен луэм учыр возьматэ, макем Иегова шӧдӥсь-валась но визьлыко Инмар.

6. Малы ми дышетскиськомы отысь, кызьы Иегова егит Самуиллы юрттӥз?

⁶ Егит вын-агайёс но сузэр-апайёс, та учыр возьматэ, Иегова вала шуыса, кыӵе шуг-секытъёсын тӥ пумиськиськоды но мар тӥ шӧдӥськоды. Тӥ возьдаськисесь, вылды, яке кышкаськоды арлыдын тӥлесьтыд бадӟымгес адями доры лыктыны но солы Эксэйлык сярысь иворез вераны, яке тӥ шӧдӥськоды, огъёзъёстылэсь пӧртэм луиськоды шуыса. Эн вунэтэ: Иеговалэн тӥледлы юрттэмез потэ. Соин ик вӧсяськыкуды солы асьтэлэсь сюлэмдэс усьтэ (Пс. 61:9). Малпаське Самуиллэн но Иеговалэн мукет егит ужась-тыршисьёсызлэн примеръёссы вылын, кудъёсыз сярысь гожтэмын Библиын. Эшъяське мукет христианъёсын — егитъёсыныз но, арлыдоосыныз но. Кин ке но соос пӧлысь сыӵе ик шуг-секытъёсын пумиськиз, вылды, но со тӥледлы вераны быгатоз, кызьы Иегова солы юрттӥз, куддыръя туж паймымон амалэн.

МОИСЕЕЗ ШӦДОН-ВАЛАН

7, 8. Кызьы Иегова возьматӥз, Моисеез шӧдэ-вала шуыса?

⁷ Куке Моисейлы 80 арес вал, Иегова солы секыт уж сётӥз — израиль пиосты Египетысь ляльчи луонлэсь мозмытыны (Пот. 3:10). Пудо возьмасез, кудӥз 40 ар ӵоже Мадиамын ыж возьмаз, та уж туж паймытӥз. Моисей шуиз: «Кин мон сыӵе фараон доры мыныны но израиль пиосты Египетысь поттыны?» Инмар оскытӥз сое: «Мон тонэныд огазьын луо» (Пот. 3:11, 12). Озьы ик со Моисейлы кыл сётӥз, Израиль калыклэн тӧроосыз солы оскозы шуыса. Озьы ке но Моисей шуиз: «Соос... верам кылме санэ ӧз понэ ке?» (Пот. 3:18; 4:1). Малпалэ гинэ: Моисей Инмарен споръяськиз, шуыны луоз! Но Иегова чиданзэ ӧз ышты. Со сяна, со Моисейлы паймымон ужъёсты лэсьтыны быгатонлык сётӥз. Моисей вал нырысетӥез адями, кин сярысь Библиын верамын, солэн сыӵе кужымез вал шуыса (Пот. 4:2—9, 21).

⁸ Фараон доры мынонтэм вылысь, Моисей нош ик муг шедьтӥз. Таяз учыре со шуиз: «Мон секытэн, могаса вераськисько». Нош Иегова солы вераз: «Вераськыкуд Мон тонэн огазьын луо, дышето, мар вераны кулэ». Оскытӥз-а со Моисеез? Ӧз, со куриз Инмарез кинэ ке мукетсэ ыстыны. Иеговалэн вожез потӥз ке но, со Моисейлэсь шӧдонъёссэ вала вал, соин ик со ыстӥз Ааронэз, Моисей интые веран понна (Пот. 4:10—16).

9. Кызьы Иеговалэн чидамез но шӧдӥсь-валась луэмез Моисейлы ужзэ быдэстыны юрттӥз?

⁹ Мае ми тодӥмы Иегова сярысь та учырысь? Ваньмызлэсь Кужмо Инмар Моисеез кышкатыны но аслэсьтыз кылзӥськытыны быгатысал. Но Иегова озьы ӧз лэсьты. Со чидаса но лякытэн оскытӥз зӥбыт-востэм ужась-тыршисьсэ, солы юрттоз шуыса. Кызьы со шӧдӥськиз Моисей вылын? Со ас калыкезлы туж усто кивалтӥсь луиз, кудӥз, Иегова сямен, мукетъёссэ шӧдыны-валаны тыршиз (Лыд. 12:3).

10. Кыӵе емышъёс ваёз Иеговалэсь шӧдӥсь-валась луэмзэ адӟем кареммы?

¹⁰ Картъёс, анай-атайёс, тӧроос, кызьы тӥ Иеговалэсь адӟем карыны быгатӥськоды? Инмар тӥледлы кивалтыны право сётӥз, соин ик солэсь адӟем карыны тырше: шӧдӥсь-валась, лякыт но чидась луэ соосын, кинъёс сярысь тӥ сюлмаськиськоды (Кол. 3:19—21; 1 Пётр 5:1—3). Тӥ Иеговалэсь но Иисус Христослэсь адӟем кариды ке, соку вын-агайёслы но сузэр-апайёслы капчигес луоз тӥледлы вазиськыны, юрттэт курыса, но со соослы буйгатскон ваёз (Матф. 11:28, 29). Озьы ик, тӥ асьтэос но адӟем карымон луоды (Евр. 13:7).

КУЖМО, НО СЮЛМАСЬКИСЬ МОЗМЫТӤСЬ

11, 12. Мар кариз Иегова, Египетысь потыкуз, калык медаз кышка шуыса?

¹¹ Асьме вакытлэсь азьло 1513-тӥ арын, куке Израиль калык Египетысь потӥз, солэн лыдыз куинь миллионлэсь тросгес вал, вылды. Соос пӧлын вал нылпиос, арлыдоос, висисьёс но лябӟем адямиос. Сокем трос калыкез Египетысь поттыны быгатысал валась но сюлмаськись Кивалтӥсь гинэ. Ӵапак сыӵе Кивалтӥсь луиз соос понна Иегова, кудӥзлэн нимыныз вераськиз Моисей. Тӥни малы израиль пиос кышкатэк потӥзы Египетысь, кудзэ соос доренызы лыдъяло вал (Пс. 77:52, 53).

¹² Мар кариз Иегова, калык медаз кышка шуыса? Нырысетӥез, со Израиль калыкез Египетысь «ожгарчиосты кадь, радэн-радэн султытыса», поттӥз (Пот. 6:26). Сыӵе умой радъян оскытӥз соосты, Инмар ваньзэ чакласа возе шуыса. Кыкетӥез, Иегова возьматӥз, со ас калыкеныз шуыса, куке «нуназе соосты пилем сьӧрын нуиз, нош быдэс уй ӵоже тыллэн югытэзъя валтӥз» (Пс. 77:14). Иегова шуиз кадь соослы: «Эн кышкалэ. Мон тӥледын, тӥледыз нуон но утён понна». Ӝоген та оскытон соослы туж юрттӥз.

13, 14. а) Кызьы Иегова сюлмаськиз Израиль калык сярысь Горд Кам зарезь дурын? б) Кызьы Иегова египет пиослы кужымзэ возьматӥз?

¹³ Лыдӟе Потонэз 14:19—22. Пуктэ син азяды, тӥ Израиль калыкен ӵош сьӧлтэтэ сюриды шуыса: берады фараон ожгарчиосыныз, нош азяды — Горд Кам зарезь. Но татын уже пыриське Иегова. Пилем юбо мынэ но египет ожгарчиосын тӥ вискы пыре. Египет калык тём-тём пеймытэ кыле, нош тӥледлы яркыт тыл пиштэ! Но тани тӥ адӟиськоды, кызьы Моисей кизэ зарезь вылэ вӧлъя. Шундыӝужан палась кужмо тӧл ӝутске, кудӥз зарезь вуосты мыд-мыд пала вайя. Собере Израиль пиос зарезь вамен сюй вылтӥ радэн-радэн мыно — соос пӧлын тӥ семьяеныды но тӥляд пудо-животъёсты. Соку тӥ паймымон мае ке адӟиськоды: зарезьлэн пыдэсыз нӧд но, гылыт но ӧвӧл — со кӧс но чурыт, но со вылтӥ мыныны секыт ӧвӧл. Соос но, кинъёслы ветлыны секыт, умоен вуо зарезьлэн мукет ярдураз.

¹⁴ Лыдӟе Потонэз 14:23, 26—30. Со дыре вылтӥяськись фараон тӥ сьӧры уйиськыны кутске. Моисей нош ик кизэ зарезь вылэ вӧлъя но, египет ожгарчиосты кык палазы ик борддор кадь сылӥсь вуос шобырто. Фараонлэн но ожгарчиосызлэн улэп кыльыны луонлыксы уг кыльы ни! (Пот. 15:8—10).

15. Мае ми тодӥськомы Иегова сярысь та учырысь?

¹⁵ Та учырысь адӟиське, Иегова — радлыклэн Инмарез шуыса, соин ик ми кышкатэк улыны быгатӥськомы (1 Кор. 14:33). Озьы ик Иегова возьматӥз, со яратӥсь возьмась луэ шуыса, кудӥз уж вылын сюлмаське ужась-тыршисьёсыз сярысь. Со вӧзын милемлы нокыӵе тушмонъёс кышкыт ӧвӧл. Та лек дуннелэн пумыз матын ини, но малпаськон со сярысь, кызьы Инмар ужась-тыршисьёссэ уте, милемлы кужым сётэ (Мад. 1:33).

16. Малы милемлы вунэтоно ӧвӧл, кызьы Иегова Израиль калыкез фараонлэсь мозмытӥз?

¹⁶ Туннэ но Иегова быдэс калыкез сярысь сюлмаське. Со соослы асэныз умой кусыпъёс возьыны юрттэ но соосты тушмонъёссылэсь уте. Со сюлмаськоз ас калыкез сярысь бадӟым куректон дыръя но, кудӥз туж матын ини (Усьт. 7:9, 10). Куке со вуоз, Инмарлэн ужась-тыршисьёсыз — егитъёсыз но арлыдоосыз, тазаосыз но висисьёсыз — кышканлы уз сётскеb. Соос асьсэды чылкак мукет сямен возёзы. Соос тодазы возёзы Иисус Христослэсь кылъёссэ: «Шонертӥськыса йырдэс ӝутэ,— тӥляд мозмытсконды матэ вуэ» (Лука 21:28). Соку но, куке соос вылэ урдскоз Гог — калыкъёслэн огазеяськонзы, кудӥз трослы кужмогес фараонлэн ожгарчиосыз сярысь, соос оскемысь уз дугдэ, Иегова аслэсьтыз ужась-тыршисьёссэ утёз шуыса (Иез. 38:2, 14—16). Малы Инмарлэн ужась-тыршисьёсыз солы сокем оскозы? Соос тодо: Иегова уг вошъяськы. Инмар нош ик возьматоз, со шӧдӥсь-валась но сюлмаськись Мозмытӥсь луэ шуыса (Ис. 26:3, 20).

17. а) Кыӵе пайда ваёз милемлы малпаськон со вылын, кызьы Инмар ас калыкез сярысь сюлмаськиз? б) Мае ми эскеромы вуонояз статьяын?

¹⁷ Ми эскеримы Библиысь куинь учыръёсты гинэ, кудъёсыз возьмато, макем шӧдӥсь-валась но лякыт сямо луыса Иегова сюлмаське аслаз калыкез сярысь, кивалтэ соин но уте сое. Та выллем учыръёс вылын малпаськыкуды, саклыктэс висъялэ солы, мар возьматэ Иеговалэсь туж умой сямъёссэ, кудъёссэ соку ик адӟыны уг луы. Солы луыса тӥляд Иеговаен кусыпъёсты но солы осконды эшшо но юнмалозы. Вуонояз статьяын ми вераськомы со сярысь, кызьы, Иеговалэсь адӟем карыса, мукетъёссэ шӧдӥсь-валась луоно — семьяын, кенешын но ужан-тыршонын.