Сюлмаськиськоды-а тӥ оскондылэн бадӟым щитэз сярысь?

1, 2. а) Малы милемлы осконмылэн бадӟым щитэз кулэ, Ефесъёслы 6:16 лыдэ басьтыса? б) Кыӵе юанъёсты ми эскеромы?

ВАНЬ-А тӥляд оскондылэн бадӟым щитэз? (Лыдӟе Ефесъёслы 6:16.) Одно ик вань. Кызьы бадӟым щит ожгарчилэсь быдэс мугорзэ ворса вал, озьы ик оскон уте тӥледыз та дуннеысь вань уродэзлэсь — азыса-калгыса улонлэсь, лек ужъёслэсь но ваньмызлэсь, мар Инмарлэн куронъёсызлы пумит мынэ.

² Но ми «берпум аръёсы» улӥськомы, соин ик осконмы азьланяз но эскериськоз (2 Тим. 3:1). Кызьы валано, осконмылэн щитэз юн шуыса? Но мар юрттоз милемлы сое юн кутыса возьыны? Ойдолэ та юанъёсты эскеромы.

ПЫР-ПОЧ ЭСКЕРЕ, ТӤЛЯД ЩИТТЫ ЮН-А ШУЫСА

3. Кызьы ожгарчиос щитъёссы сярысь сюлмасько вал но малы?

³ Вашкала дыръёсы тросэз щитъёс куэн шобыртэмын вал. Ожгарчиос соосты вӧйын зырало вал, куэз медаз куасьмы но корт люкетъёсыз медаз сыноме шуыса. Ожгарчи щитэзлэсь сӧриськем интыоссэ шедьтэ вал ке, солы соосты тупатоно вал, ожмаськыны котьку дась мед луоз шуыса. Кызьы та пример тӥляд осконэныды герӟаськемын?

4. Малы туж кулэ осконмылэсь щитсэ эскерыны но кызьы сое лэсьтоно?

⁴ Вашкала ожгарчиослы кадь ик, милемлы но осконмылэсь щитсэ эскероно но со сярысь сюлмаськоно, ожмаськонлы котьку дась луон понна. Христианъёс луыса, ми духовной ожмаськон нуиськомы но урод духъёслы пумит нюръяськиськомы (Еф. 6:10—12). Ми сяна, осконмылэн щитэз сярысь нокин но сюлмаськыны уз быгаты. Кызьы валано, милям осконмы юн но ми визь сынаськонъёсын пумиськыны дась шуыса? Нырысетӥез, юрттэт курыса, Инмарлы вӧсяськоно. Нош кыкетӥез, визь-кенеш утчано Библиысь, кудӥз валаны юрттэ, кызьы Инмар ми шоры учке (Евр. 4:12). Отын гожтэмын: «Вань сюлмыныд Кузё-Инмарлы оскиськы, визьмыд вылэ эн пыкиськы» (Мад. 3:5, 6). Та сярысь тодады возьыса, алигес кутэм ужпумъёстэс эскерыны тырше. Оло нош, тӥ коньдонэн герӟаськем бадӟым шуг-секытъёсын пумиськиды? Тодады лыктӥз-а Иеговалэн кыл сётонэз, кудӥз Еврейёслы 13:5 гожтэмын: «Уг кельты тонэ, уг кушты тонэ»? Та кылъёс тӥледыз оскытӥзы ке, Иегова тӥледлы одно ик юрттоз шуыса, озьыен, оскондылэн щитэз юн.

5. Мае валаны луэ, осконмес эскерыкумы?

⁵ Оскондэс пыр-поч эскерыкуды, тӥ паймоды, дыр, солэсь ляб интыоссэ шедьтыса, кудъёссэ азьло ӧд адӟылэ. Кылсярысь, тӥ валаны быгатоды, тӥляд осконды мултэс сюлмаськонъёсын, пӧяськонэн но куашкам мылкыдын сэрен лябӟиз шуыса. Со озьы ке, мар кароно, осконды эшшо но золгес медаз лябӟы шуыса?

УТЕ АСЬТЭДЫ МУЛТЭС СЮЛМАСКОНЪЁСЛЭСЬ, ПӦЯСЬКОНЛЭСЬ НО КУАШКАМ МЫЛКЫДЛЭСЬ

6. Малы вераны луоз, котькыӵе ик сюлмаськон умойтэм ӧвӧл шуыса?

⁶ Котькыӵе ик сюлмаськон умойтэм ӧвӧл. Кылсярысь, ми сюлмаськиськомы, Иеговаез но Иисусэз ӝоже ум уськытӥське-а шуыса (1 Кор. 7:32). Ми секыт сьӧлыкамы ке, ми сюлмаськиськомы, кызьы Инмарен кусыпъёсмес выльысь тупатоно (Пс. 37:19). Со сяна, ми сюлмаськиськомы, кузпалэнымы, ӵыжы-выжыосынымы но кенешысь вын-агайёсынымы но сузэр-апайёсынымы ваньмыз умой-а шуыса (1 Кор. 7:33; 2 Кор. 11:28).

7. а) Кызьы мултэс сюлмаськонъёс осконмес лябӟытыны быгато? б) Малы милемлы адямиослэсь кышкано ӧвӧл, Мадёнъёсты 29:25 лыдэ басьтыса?

⁷ Нош мултэс сюлмаськонъёс осконмес лябӟытыны быгато. Кылсярысь, ми ялан сюлмаськыны быгатӥськомы, милям тырмыт сиёнмы но дӥськутмы луоз-а шуыса (Матф. 6:31, 32). Соин сэрен ми вань саклыкмес ваньбурлы висъяны быгатӥськомы. Со сяна, ми коньдонэз но яратыны быгатомы. Ми солы сётскимы ке, соку Иеговалы осконмы но соин кусыпъёсмы лябӟозы (Марк 4:19; 1 Тим. 6:10). Озьы ик милемыз мукет сюлмаськон но вормыны быгатэ — юн сюлмаськон, мар малпало ми сярысь мукетъёсыз. Соин сэрен ми кышканы быгатомы, милемыз серем карозы яке уйылозы-уллялозы шуыса, но та кышкан Иеговалэсь кышканлэсь кужмогес луыны быгатэ. Сыӵе кышкытлыклэсь утиськон понна, милемлы Иеговалэсь оскон но кышкасьтэм сям куроно, кудъёсыз милемлы чиданы юрттозы. (Лыдӟе Мадёнъёсты 29:25; Лука 17:5.)

8. Кызьы милемлы асьмеды возёно, пӧяськонэн пумиськыку?

⁸ Шайтан, «ӧрекчаськонлэн атаез», аслаз ки улаз возиськись адямиос пыр Иегова но вын-агайёсмы сярысь пӧяськонэз вӧлмытэ (Иоанн 8:44). Кылсярысь, зэмос йыбырттонлэсь палэнскемъёс Иеговалэн организациез сярысь пӧясько яке шонертэмзэ верало интернет, телевидение, радио, газетъёс но журналъёс пыр. Со Шайтанлэн «ӟырдатыса лэзьям... ньӧлъёсыз» пӧлысь одӥгез луэ (Еф. 6:16). Кызьы ми асьмеды возиськомы, куке сыӵе пӧяськонэн пумиськиськомы? Ми сое ум кылзӥське! Малы? Малы ке шуоно ми Иеговалы но вын-агайёсмылы оскиськомы. Ми зэмос йыбырттонлэсь палэнскемъёсын ноку но кусып ум возе. Нокинлы но, номырлы но (огшоры тунсыкъяськонлы гинэ но) лэзёно ӧвӧл милесьтым мылкыдмес ӝутыны соосты кылзыны яке соосын споръяськыны.

9. Кызьы ми вылын шӧдӥськыны быгатэ куашкам мылкыд?

⁹ Куашкам мылкыд но осконмес лябӟытыны быгатэ. Шуг-секытъёсмылы саклыкмес висъятэк улыны ми ум быгатӥське. Визьмо ӧй луысал малпаны, соос ми вылын нокызьы но уз шӧдӥське шуыса. Куддыръя ми шӧдыны быгатӥськомы, мылкыдмы куашкамын шуыса. Но милемлы шуг-секытъёсмы сярысь ялан малпаськыса улоно ӧвӧл. Шуг-секытъёслы сётскыса, ми вунэтыны быгатомы паймымон оскиськонмес, кудзэ милемлы Иегова кузьмаз (Усьт. 21:3, 4). Куашкам мылкыд милемыз лябӟытыны быгатоз, но милям киосмы лэзиськозы (Мад. 24:10). Но солэсь палэнскыны луэ.

10. Малы дышетэ тӥледыз одӥг сузэрмылэн гожтэтэз?

¹⁰ Тани Огазеяськем Штатъёсысь сузэрмылэн учырез, кудӥз секыт висись картсэ утялтоно луэ. Кызьы та сузэр осконзэ юнматэ? Дунневыл валтӥсь кивалтонние гожтэтаз со вера: «Куддыръя милемлы туж секыт, но милям мылкыдмы куашка. Озьы ке но милям осконмы азьло сямен ик юн. Осконмес юнматон понна, Иегова туж троссэ сётэ! Со понна мон солы туж бадӟым тау шуисько. Милемлы туж кулэ солэн визь-кенешъёсыз но юнматэмез. Соос юртто милемлы шуг-секытъёсты чиданы, кудъёссэ Шайтан уже кутэ, милемыз лябӟытон понна». Та сузэрлэн кылъёсысьтыз адӟиське, кызьы куашкам мылкыдэз вормоно. Шуг-секытъёс шоры милемлы учконо Шайтанэн ыстэм визь сынаськонъёс шоры кадь, Иеговалэсь духовной сиёнэз дунъяно но тодамы возёно, со милемыз буйгатыны быгатэ шуыса.

11. Мар сярысь аслэсьтыд юано, оскондэ эскерон понна?

¹¹ Малпаське: оскондылэсь щитсэ тупатоно ӧвӧл-а? Быгатӥды-а тӥ берпуметӥ толэзьёс ӵоже мултэс сюлмаськонъёслы сётскытэк улыны? Быгатӥды-а тӥ зэмос йыбырттонлэсь палэнскемъёсты кылзыны мылкыддэс яке соосын споръяськыны мылкыддэс вормыны? Нош быгатӥды-а тӥ куашкам мылкыддэс вормыны? Быгатӥды ке, соку тӥляд осконды юн. Но милемлы сак луоно, малы ке шуоно Шайтанлэн вань мукет но ожмаськон тӥрлыкез, кудзэ со уже кутыны быгатэ.

УТЕ АСЬТЭДЫ ВАНЬБУР ЛЮКАНЫ МЫЛКЫДЛЭСЬ

12. Кытчы вуттыны быгатэ ваньбур люканы мылкыд?

¹² Ваньбур люканы мылкыдын сэрен милям осконмы лябӟыны быгатоз, но ми ужан-тыршонэ ӧжытгес пыриськыны кутскомы. Апостол Павел вераз: «Армиен кивалтӥсьлы кельшыны тыршыса, нокудӥз но ожгарчи огшоры улонысь ужъёсын ассэ уг герӟа» (2 Тим. 2:4). Рим ожгарчиослы мукет ужъёсын вырыны уг яра вал. Мар луысал, соос та косонлэсь ӧй кылзӥськысалзы ке?

13. Малы ожгарчилы мукет ужъёсын вырыны уг яра вал?

¹³ Пуктэ син азяды таӵе учырез. Ожгарчиос быдэс ӵукна ожмаськыны дышетско, нош одӥгез ожгарчи соос пӧлын ӧвӧл. Со базарын вуз каре. Ӝытазе ваньмыз ожмаськон тӥрлыкъёссэс эскеро но мечъёссэс шеро. Нош соиз ожгарчи дася сое, маин мукет нуналаз вуз кароз. Ӵукнаяз шӧдтэк шорысь тушмон урдске. Кин ожгарчиос пӧлысь ожмаськонлы дась луоз но кивалтӥсезлы ярамон луоз? Но кинэ та ожгарчиос пӧлысь тынад вӧзысьтыд адӟемед потысал: сое, кин ожмаськонлы дасяськиз, яке сое, кин мукет ужъёсын выриз?

14. Мар милемлы, Христослэн ожгарчиосызлы кадь, ваньмызлэсь дуно луэ?

¹⁴ Милемлы адӟем кароно ожгарчиослэсь, кудъёсыз ожмаськонлы дась. Милям валтӥсь ужпуммы — ярамон луыны Ожен Кивалтӥсьёсмылы, Иеговалы но Христослы, но милемлы та ужпуммылэсь палэнсконо ӧвӧл. Ми юн оскиськомы, со трослы дуногес шуыса ваньмызлэсь, мае ӵектыны быгатэ Шайтанлэн дуннеез. Ми тыршиськомы кужым но дыр шедьтыны, Иеговалы ужан-тыршон понна, озьы ик осконмылэн щитэз но мукет ожмаськон тӥрлыкъёсмы сярысь сюлмаськон понна.

15. Мар сярысь алыса вераз апостол Павел но малы?

¹⁵ Милемлы котьку но ожмаськыны дась луоно. Малы? Апостол Павел алыса вераз, «узырмыны мылкыд карисьёс» осконлэсь куштӥськозы шуыса (1 Тим. 6:9, 10). «Куштӥськозы» кыл возьматэ, кулэтэм ваньбур люканы мылкыдлы сётскыса, ми осконмылэсь палэнскыны быгатӥськомы шуыса. Соин сэрен сюлмамы «укылтэм, уродэсь мугорлэн куронъёсыз» кылдыны быгато. Солы сётсконо ӧвӧл, малы ке шуоно сыӵе мылпотонъёс — со ожтӥрлык, кудзэ Шайтан уже кутэ, осконмес лябӟытон понна.

16. Мар сярысь малпаськытэ учыр, кудӥз Лукалэсь 18:18—23 гожтэмын?

¹⁶ Шуом, милям трос арбери басьтыны тырмыт коньдонмы вань, но ми басьтӥськомы сое, мае басьтэммы потэ, со милемлы туж ик кулэ ӧвӧл ке но. Умойтэм-а со? Котьку ик умойтэм ӧвӧл. Но малпаське тани мар сярысь: ми мае ке басьтыны быгатӥськомы ке но, луоз-а милям дырмы но кужыммы, сое уже кутон, чаклан но тупатъян понна? Ми солы укыр трос саклыкмес висъяны ум кутске-а? Ум возе-а ми асьмеды озьы ик, кызьы ассэ возиз егит пиосмурт, кудӥз Иисуслэсь Инмарлы ужан-тыршонын тросгес лэсьтыны ӵектонзэ палэнтӥз? (Лыдӟе Лукалэсь 18:18—23.) Трослы умойгес огшоры улыны но дуно дырмес но кужыммес висъяны Инмарлэсь эриксэ быдэсъянлы.

МАР ЮРТТОЗ МИЛЕМЛЫ ОСКОНМЫЛЭСЬ ЩИТСЭ ЮН КУТЫСА ВОЗЬЫНЫ?

17. Мар сярысь милемлы вунэтоно ӧвӧл?

¹⁷ Ойдолэ ноку но ум вунэтэ, ми ожын шуыса но котькуд нунал милемлы ожмаськонлы дась луоно шуыса (Усьт. 12:17). Вын-агайёсмы но сузэр-апайёсмы ми интые осконмылэсь щитсэ уз нуэ. Ми пӧлысь котькудӥзлы сое аслыз юн кутыса возёно.

18. Малы вашкала дыръя ожгарчиос ожмаськыкузы щитсэс юн кутыны тыршизы?

¹⁸ Вашкала дыръя ожгарчиосты, кудъёсыз ожмаськонын кышкасьтэм луэмзэс возьматӥзы, данъязы. Нош ожгарчи ожмаськонысь щиттэк бертэ вал ке, со понна со туж возьыт вал. История удысысь рим тодосчи Тацит гожъяз: «Ожмаськись понна щитсэ куштыса кельтыны тужгес но возьыт вал». Та одӥгез муг, малы ожмаськон дыръя ожгарчиос щитсэс юн кутыны тыршизы.

19. Мар юрттоз милемлы осконмылэсь щитсэ юн кутыса возьыны?

¹⁹ Мар юрттоз милемлы осконмылэсь щитсэ юн кутыса возьыны? Милемлы христиан пумиськонъёсы ялан ветлоно но мукетъёсызлы Иеговалэн нимыз но Эксэйлыкез сярысь верано (Евр. 10:23—25). Со сяна, милемлы котькуд нунал Библиез лыдӟоно но Иеговалы вӧсяськоно, со милемлы Библиысь визь-кенешъёсты ялан улонамы пыртыны мед юрттоз шуыса (2 Тим. 3:16, 17). Соку Шайтанлэн асьмелы пумит лэсьтэм одӥг ожмаськон тӥрлыкез но милемлы тупатыны луонтэм изъян уз вайы (Ис. 54:17). Осконмылэн бадӟым щитэз милемыз утьыса возёз. Вын-агайёсынымы но сузэр-апайёсынымы ӵош духовной оже ми кышкатэк пыриськомы но осконмы понна котькуд нунал ожмаськонын вормисе потомы. Нош тужгес но кулэез — милемлы дан сётэмын луоз Иисус Христос палан сылыны, куке со Шайтанэз но солы дурбасьтӥсьёсты быдтоз (Усьт. 17:14; 20:10).