Сю ар талэсь азьло: 1922-тӥ ар

«ТА МАЛПАН СЮЛЭМЕЗ БУГЫРТӤЗ»

Тодытон уж золгес мыныны кутскиз, соин ик эшшо но тросгес публикациос кулэ вал. Бруклинысь Вефильысь агайёс журналъёсты печатлазы, нош чурыт вылбамо книгаосты мукет фирмаос печатлазы. Озьы ке но трос толэзьёс ӵоже ини соос заказъёсмес быдэстыны ӧз быгатэ. Та книгаос туж кулэ вал тодытон уж понна. Соку Рутерфорд агай юаз Роберт Мартинлэсь, кудӥз типография понна кыл кутӥз, быгатысалзы-а Вефильысь агайёс книгаосты асьсэос печатланы.

Мартин агай тодаз вае: «Та малпан сюлэмез бугыртӥз, малы ке шуоно, книгаос поттон понна, выль типография усьтыны кулэ вал». Агайёс Бруклинын арендовать каризы одӥг юртэз, кудӥз интыяськемын вал таӵе адресъя: Конкорд-стрит, 18. Озьы ик соос басьтӥзы ваньзэ, мар кулэ вал, та ужпумез быдэстон понна.

Но ваньзы ик шум ӧз потэ, агайёс асьсэос книга печатланы малпало вал шуыса. Выль типографиямы лыктӥз директор, кудӥзлэн компаниез азьло книгаосмес печатла вал. Со вераз: «Тӥляд умой типографиды, но тӥ пӧлысь нокин но умой-умой уг вала, кызьы та выль техникаез уже кутоно. Ӝыны ар ортчыса, та ваньмыз сӧриськоз».

Мартин агай тодаз вае: «Нырысь малпан кылдэ вал, со озьы ик вань шуыса. Но ми тодӥмы, Инмармы милемлы юрттоз шуыса». Со озьы ик луиз. Ӝоген выль типографимы нуналаз 2 000 книгаос печатланы кутскиз.

ТРОС СЮРС АДЯМИОС РАДИО ПЫР ӞЕЧ ИВОРЕЗ КЫЛЗӤЗЫ

Книгаос печатлам сяна, Иеговалэн ужась-тыршисьёсыз радио пыр но ӟеч иворез веразы. 1922-тӥ арын 26-тӥ тулыспалэ, арнянуналэ, Рутерфорд агай радио пыр нырысетӥзэ речь вераз, кудӥз нимаськиз «Трос миллион али улӥсьёс ноку уз кулэ». Та радиостанция интыяськемын вал Лос-Анджелес карын.

Со программаез ог 25 000 адямиос кылзӥзы. Куд-огъёсыз радиопередача понна тау карон кылъёс гожъязы. Соос пӧлысь одӥгез вал Уиллард Ашфорд, кудӥз улӥз Санта-Ана карын (Калифорния штат). Со тау кариз Рутерфорд агаез туж тунсыко речез понна но вераз: «Милям семьяямы куинез висё но ураме потаны уг быгато. Радио ӧй луысал ке, ми тӥлесьтыд речьтэс кылзыны ӧм быгатысалмы, тӥ артысь коркан луысалды ке но».

Кӧня ке арняос ӵоже мукет передачаос но потӥзы. Арлэн пумаз «Возьмаськон башня» журналын верамын вал, «ог 300 000 адямиослы радио пыр ӟеч ивор верамын вал» шуыса.

Библиез Эскерисьёс шумпотӥзы, адямиослы радио пыр ӟеч иворез кылзыны кельше шуыса. Соин ик соос ужпум кутӥзы пуктыны асьсэлэсь радиостанцизэс Статен шормуӵын, кудӥз Бруклинысь Вефильлы кыдёкын ӧй вал. Сое нимазы WBBR. Вуоно аръёсы соос уже кутӥзы та радиостанциез, пӧртэм интыосысь эшшо но тросгес адямиос Эксэйлык сярысь иворез кылыны мед быгатозы шуыса.

ADV

1922-тӥ арын 15-тӥ инвожо понна поттэм «Возьмаськон башняын» ялэмын вал, 5—13-тӥ куарусёнэ Сидар-Пойнтын конгресс ортчоз шуыса. Куке Библиез Эскерисьёс Сидар-Пойнтын люкаськизы, соослэн мылкыдзы лӧптэмын вал.

Кутсконаз Рутерфорд агай лыктэмъёслы вазиськиз таӵе кылъёсын: «Мон юн оскисько, Инмар... та конгрессэз бакель кароз, озьы ик ӟеч ивор быдэс музъем вылын эшшо но золгес верамын луоз шуыса». Конгрессын речь верасьёс лыктэмъёслэсь трос пол мылкыдзэс ӝутӥзы тодытон уже пыриськыны.

8-тӥ куарусёнэ, удмуртарняе, ог 8 000 адямиос залэ люкаськизы. Соослэн туж потэ вал Рутерфорд агаез кылзэмзы. Ваньзы соос оскизы, Рутерфорд агай валэктоз шуыса ADV букваосты, кудъёсыз программкаосын печатламын вал. Интыосазы пуксьыкузы, тросэз адӟизы, луоз, бадӟым басма рулонэз. Артур Клаус, кудӥз конгрессэ лыктӥз Талсаысь (Оклахома штат), шедьтӥз инты, кытысен ваньмыз туж умой кылӥське вал. Соку со туж ик капчи ӧй вал, малы ке шуоно со дыре куараез бадӟыматон аппаратура уг кутӥськы на вал.

Пумиськонэз радъясь агай ялӥз, Рутерфорд агай речь вераку, залэ пырыны уз лэзе шуыса, малы ке шуоно со речез кылзыны люкетоз. 9:30 часын Рутерфорд агай речь вераны кутскиз. Нырысь со вераз Иисуслэсь кылъёссэ, кудъёсыз гожтэмын Матфейлэсь 4:17: «Матэ вуиз Ин Эксэйлык». Куке со вераз, кызьы адямиос Эксэйлык сярысь ӟеч иворез кылозы, со шуиз: «Ачиз Иисус ялӥз, Эксэй луонэз дыръя со аран ужен кивалтоз но оскымон адямиосты ас дораз ваёз шуыса».

Клаус агай тодаз вае: «Милям котькуд кылзэ кылэммы потэ вал». Но малпамтэ шорысь со ассэ урод шӧдыны кутскиз но, солы залысь потоно луиз. Артур валаз, залысь потоно луиз ке, со выльысь отчы берытскыны уз быгаты ни шуыса. Соин ик со мылыз потытэк отысь потӥз.

Кӧня ке минут ортчыса, Артурлы капчигес луиз. Берытскыкуз со кылӥз, кызьы залын туж зол чабыны кутскизы. Солэн туж тодэмез потӥз, мар отын верало. Речез пумозяз кылзон понна, Артур липет йылэ но тубыны дась вал. Соку солы 23 арес гинэ вал, соин ик со отчы тубыны быгатӥз. Липет вылын кӧня ке укноос усьтэмын вал. Соос доры матэгес лыктыса, со валаз, отысен ваньмыз туж умой кылӥське шуыса.

Нош Артур липет йылын огназ ӧй вал — отын солэн куд-ог эшъёсыз вал ини.

Соос пӧлысь одӥгез, Фрэнк Джонсон, бызьыса лыктӥз но юаз:

— Тынад пуртэд вань-а?

— Вань, кызьы сотэк! — вераз Артур.

— Ми ӵапак та сярысь вӧсяськимы! — шуиз Фрэнк. — Адӟиськод-а бадӟым рулонэз? Со плакат. Сак кылзы судьяезa. Куке со вералоз «тӥ но кулэ тодытыны, тодытыны», та ньыль гозыосты ванды.

Озьыен, Артур кияз пуртэн возьмаз, ку гозыосты вандоно луоз. Ӝоген Рутерфорд агай речезлэсь валтӥсь малпанъёссэ вераны кутскиз. Со юн мылкыдын но бадӟым куараен вераз: «Инмарлэн оскымон адӟись-ивортӥсьёсыз луэ. Вавилон бырытозь нюръяськемысь эн дугдэ. Ӟеч иворез котькытын вералэ. Дунне тодыны кулэ: Иегова — со Инмар, нош Иисус Христос — эксэйёслэн Эксэйзы но кузёослэн Кузёзы. Та самой кулэ луись нунал! Тани, Эксэй кивалтэ! Та сярысь тӥ ваньмызлы вераны кулэ. Соин ик тодытэ, тодытэ, тодытэ Эксэй но солэн Эксэйлыкез сярысь!»

Куке Артур но мукет агайёс гозыосты вандӥзы, ваньзы адӟизы, мае возьмато ADV букваос. Плакатын гожтэмын вал: «Тодытэ Эксэй но Эксэйлык сярысь». Англи кылын со гожтэмын вал тазьы: Advertise the King and Kingdom. ADV — та веранлэн нырысетӥ куинь букваосыз.

КУЛЭ ЛУИСЬ УЖ

Сидар-Пойнтын ортчем конгресс агайёслы возьматӥз, макем кулэ Эксэйлык сярысь иворез тодытыны. Тросэз шумпотыса та уж борды басьтӥськизы. Оклахомаысь одӥгез книга вӧлмытӥсь (соку озьы нимазы пионеръёсты) гожтӥз: «Ми тодытӥськом ёросын, кытын шахтёръёс уло. Татын адямиос куанересь. Ӵем дыръя соослэн синкылиоссы ик пото, куке соос „Зарни даур“ журналысь ӟеч иворез кыло». Та агай вера: «Сыӵе адямиосты буйгатон туж бадӟым шумпотон вае!»

Библиез Эскерисьёс валазы, макем кулэ луо Иисуслэн кылъёсыз, кудъёсыз гожтэмын Лукалэсь 10:2: «Аран трос, нош ужасьёс ӧжыт». 1922-тӥ арлэн пумаз соослэн юн мылкыдзы вал котькытын Эксэйлык сярысь иворез вераны.