Визьлык ульчаысен шара ивортэ»

1. Кызьы туннэ тросэз зэмос визьлык шоры учко? (Мадёнъёс 1:20, 21).

ТРОС шаеръёсын ӵем дыръя адӟыны луэ вын-агайёсты но сузэр-апайёсты, кудъёсыз трос калыко ульчаосын шумпотыса мукетъёсызлы журналъёс ӵекто. Тӥ куке но таӵе амалэн тодытӥды-а? Тодытӥды ке, тӥледлы тодады лыктӥз, дыр, со, мар гожтэмын Мадёнъёсын книгаын. Отын вераське, кызьы визьлык трос калыко ульчаосын адямиосты ӧте сое кылзыны. (Лыдӟе Мадёнъёсты 1:20, 21.) Библиысь но публикациосысьтымы зэмос визьлыкез шедьтыны луэ. Со Иеговалэн визьлыкез. Улон сюрес вылэ султон понна, адямиослы сое тодыны кулэ. Ми шумпотӥськомы, куке адямиос милемыз кылзо но публикациосмес басьто. Но куд-огъёсызлэн тодэмзы ик уг поты, мар гожтэмын Библиын. Мукетъёсыз милемыз серем каро. Соос малпало, Библия вужмемын ини шуыса. Нош куд-огъёсызлы Библиысь вылӥ эсэпъёс уг кельшо. Сыӵе адямиос малпало, соос, кинъёс сыӵе эсэпъёсъя уло, асьсэды укыр шонер адямиосын лыдъяло шуыса. Озьы ке но Иегова ваньмызлы яратэмзэ возьматэ но зэмос визьлыкез шедьтыны юрттэ. Кызьы?

2. Кытысь зэмос визьлыкез шедьтыны луэ но кызьы асьсэды возё тросэз адямиос?

² Иегова сюлмаськиз, солэсь Кылзэ, Библиез, музъем вылысь котькуд адями кадь лыдӟыны мед быгатоз шуыса. Нош мар вераны луоз Библия вылэ пыкиськыса гожтэм публикациосмы сярысь? Иеговалэн юрттэменыз соос 1 000-лэсь но тросгес кылъёсы берыктӥсько. Соос, кинъёс визьлыкез кылзо, яке Инмарлэсь Кылзэ лыдӟо но сое улоназы пырто, шудогес луо. Но туннэ тросэз адямиос Иеговалэсь уг кылзӥсько. Ужпум кутыкузы, соос асьсэос вылэ яке мукет адямиос вылэ оскисько. Ми Библияя улӥськомы бере, куддыръя соос милемыз ултӥяло но. Та статьяысь ми тодомы, малы соос асьсэды озьы возё. Но нырысь ойдолэ тодомы, кызьы Иеговалэсь визьлыксэ шедьтоно.

ИЕГОВА СЯРЫСЬ ТОДОН-ВАЛАН ЮРТТЭ ВИЗЬЛЫКЕЗ ШЕДЬТЫНЫ

3. Мар кароно, зэмос визьлыкез шедьтон понна?

³ Визьлыко луон понна, басьтэм тодон- валанмес улонамы пыртоно. Но зэмос визьлык пӧлы та гинэ уг пыры. Библия вера: «Визьлыклэн кутсконэз Кузё-Инмарлэсь кышкан бордысь потэ; Дун-Сьӧлыктэмез тодон — со визьлык» (Мад. 9:10). Озьыен, кулэ луись ужпумъёсты кутыку, лыдэ басьтоно, мар малпа та сярысь Иегова. Нош кытысь сое тодоно? Библиез но со вылэ пыкиськыса гожтэм публикациосты эскерыса. Та юрттоз милемлы зэмос визьлыкез шедьтыны (Мад. 2:5—7).

4. Малы Иегова гинэ зэмос визьлык сётыны быгатэ?

⁴ Зэмос визьлыкез Иегова гинэ сётыны быгатэ (Рим. 14:26). Малы вераны луоз, визьлык со бордысь потэ шуыса? Нырысетӥез, со — Кылдытӥсь. Соин ик аслэсьтыз кылдытэмъёссэ со котькинлэсь умой тодэ (Пс. 103:24). Кыкетӥез, Инмар ваньзэ визьлыкен лэсьтэ (Рим. 11:33). Куинетӥез, Иегова визьлыко визь-кенешъёс сётэ. Адямиос та визь-кенешъёсты уже куто ке, соос котьку но пайда ваё (Мад. 2:10—12). Озьыен, зэмос визьлыкез шедьтон понна, та куинь малпанъёсты тодамы возёно но, ужпумъёс кутыкумы, соосты лыдэ басьтоно.

5. Адямиос Иеговалэсь визьлык уг утчало бере, кытчы со вуттӥз?

⁵ Тросэз адямиос, кудъёсызлы ми тодытӥськомы, соглаш карисько, дуннеын ваньмыз туж паймымон шуыса. Но со дыре ик соос Кылдытӥсьлы уг оско. Мукетъёсыз верало, Инмарлы оско шуыса. Но со дыре ик, соослэн малпамзыя, Библиысь эсэпъёс вужмизы ини но ас тодэмъяд улыны кулэ. Кытчы со вуттӥз? Инмарлэсь визьлыксэ палэнтыса, улон умойгес луиз-а? Ас тодэмзыя улыса, адямиос шудогес луизы-а? Вань-а соослэн вуоноезлы зэмос осконзы? Та дуннеысь югдур возьматэ, Библия шонер вера шуыса: «Кузё-Инмарлы пумитъяськыны визьлык но, визь-нод но, визь-кенеш но уз юрттэ» (Мад. 21:30). Соин ик туж кулэ Иеговалэсь визьлык утчаны. Но тросэз озьы уг лэсьто. Малы?

МАЛЫ АДЯМИОС ЗЭМОС ВИЗЬЛЫКЕЗ ПАЛЭНТО

6. Кинъёс зэмос визьлыклэсь куаразэ уг кылзо? (Мадёнъёс 1:22—25).

⁶ Куке «визьлык ульчаысен шара ивортэ», тросэз сое уг кылзо. Библия верамъя, вань куинь пумо адямиос, кудъёсыз сое уг кылзо: «укылтэмъёс», яке ваньмызлы оскисьёс, «керетӥсь-даллашисьёс» но «вакчи визьёс». (Лыдӟе Мадёнъёсты 1:22—25.) Ойдолэ эскеромы, малы соос Инмарлэсь визьлыксэ палэнто но мар кароно, соос кадь медам луэ шуыса.

7. Малы куд-огъёсыз ваньмызлы оскыса уло?

⁷ «Укылтэмъёс», яке ваньмызлы оскисьёс, котькыӵе верам кыллы оско. Соин ик соосты пӧяны туж капчи (Мад. 14:15). Тодытыкумы сыӵе адямиосты ми ӵем пумитаськомы. Кылсярысь, туж трос адямиос священникъёслэн яке кивалтӥсьёслэн пӧяськемзылы оско. Нош куке та адямиос валало, соосты пӧязы шуыса, соос туж паймо. Но ваньмызлы оскисьёс, кудъёсыз сярысь Мадёнъёсын 1:22 вераське, асьсэос пӧяськонлы сётско. Соослы сыӵе улон яра (Иер. 5:31). Та адямиослы кельше ас мылпотэмзыя улыны. Библиысь дышетонъёсты валаны яке солэн курон-косонъёсызъя улыны соослэн мылкыдзы ик ӧвӧл. Тросэз малпасько озьы ик, кызы малпаське Квебекысь одӥг кышномурт. Агаймылы со шуиз: «Священник монэ пӧя ке, со янгыш. Мон номыр шонертэмзэ ӧй лэсьты ук». Милям уг поты луэммы адямиос кадь, кудъёсыз валаса вылысь асьсэды пӧяны лэзё (Мад. 1:32; 27:12).

8. Мар кароно, быдэ вуон понна?

⁸ Библия ӧте милемыз, котькинлы но котьмалы оскыса улоно ӧвӧл шуыса. Отын гожтэмын: «Визьдыя быдэ вуэмъёс кадесь луэ» (1 Кор. 14:20). Ми быдэ вуиськомы, Библиысь возетъёсты уже кутӥськомы ке. Ас выламы ми шӧдӥськомы, Библиысь возетъёс шуг-секытъёслэсь палэнскыны но шонер ужпумъёс кутыны юртто шуыса. Дырын-дырын эскероно, макем умой ми быгатӥськомы соосты уже кутыны. Ми кӧня ке дыр ӵоже Библиез дышетӥськомы но пумиськонъёсы ветлӥськомы ке ини, ми асьмелэсь юаны быгатӥськомы: «Мар люкетэ мыным улонме Иеговалы сӥзьыны но пылатӥськыны?» Нош ми пылатӥськимы ке ини, тыршиськомы-а ми эшшо но умойгес ӟеч иворез тодытыны но адямиосты дышетыны? Кутэм ужпумъёсысьтымы адӟиське-а, ми Библиысь возетъёсъя улӥськомы шуыса? Ми мукетъёсыныз асьмеды Христос сямен возиськомы-а? Ми адӟиськомы ке, мае ке эшшо но умойгес карыны быгатӥськомы шуыса, ойдолэ мур малпаськомы Иеговалэн дышетонэз вылын, кудӥз «огшоры калыкез визьма» (Пс. 18:8).

9. «Керетӥсь-даллашисьёслэн» кыӵе ужъёссы возьмато, соос визьлыкез палэнто шуыса?

⁹ Вань на мукет адямиос, кудъёсыз Инмарлэсь визьлыксэ палэнто,— со «керетӥсь-даллашисьёс». Куддыръя сыӵе адямиосты ми тодытыкумы пумитаськомы. Соослы кельше мукетъёсты ултӥяса возьыны (Пс. 122:4). Библиын вераське, берпум нуналъёсы сыӵе адямиос туж трос луозы шуыса (2 Пётр 3:3, 4). Шонерлыко улӥсь Лотлэн эмеспиосыз сямен, туннэ но куд-огъёсыз Инмарлэн алонъёсызлэсь уг кылзӥсько. Тросэз серем каро соосты, кинъёс Библиысь куронъёсъя уло. Мыскылляськисьёс «мугорзылэн юрӟым кулэ каронъёссылы сётӥськыса» уло (Иуда 7, 17, 18). «Керетӥсь-даллашисьёс» пӧлы пыртыны луэ зэмос йыбырттонлэсь палэнскемъёсты но соосты, кинъёслэн Иеговаез тодэмзы уг поты.

10. Мар кароно, керетӥсь-даллашисьёс медам луэ шуыса? (Псалтирь 1:1).

¹⁰ Мар кароно, керетӥсь-даллашисьёс медам луэ шуыса? Кылсярысь, эшъяськоно ӧвӧл соосын, кинъёс тэргаськыса уло. (Лыдӟе Псалтирез 1:1.) Со понна кылзоно но лыдӟоно ӧвӧл сое, мае верало но гожъяло зэмос йыбырттонлэсь палэнскемъёс. Ми валаськомы: ӧм ке чаклаське, соку ӝожтӥськыны кутскомы, озьы ик Иеговалы но солэн кивалтэтэзлы сокем юн ум оске ни. Озьы медам луы шуыса, малпаськоно таӵе юан вылын: «Тэргасько-а мон выль кивалтэтэз, валэктонэз яке вын-агайёсты, кудъёсызлы кенешын кивалтэт сётэмын?» Ми таӵе мылкыдэз соку ик палэнтыны тыршимы ке, Иеговаез шумпоттомы (Мад. 3:34, 35).

11. Кызьы «вакчи визьёс» Иеговалэн вылӥ эсэпъёсыз шоры учко?

¹¹ Вань на эшшо мукет адямиос, кудъёсыз визьлыкез палэнто,— со «вакчи визьёс». Библия соосты озьы нима, малы ке шуоно соослэн Инмарлэн вылӥ эсэпъёсызъя улэмзы уг поты. Соослэн ас мылпотэмзыя гинэ улэмзы потэ (Мад. 12:15). Сыӵе адямиос палэнто Иегова Инмарез, кудӥз бордысь визьлык потэ (Пс. 52:2). Соослы тодытыкумы, Библияя улэммы понна соос ӵем дыръя милемыз пыкыло. Нош соос асьсэос умой визь-кенеш сётыны быгато-а? Библия верамъя, сыӵе адямиос понна «визьлык укыр вылӥын сылэ» (Мад. 24:7). Соос зэмзэ ик умой визь-кенеш сётыны уг быгато. Соин ик Иегова милемыз косэ сыӵе адямиослэсь палэнскыны (Мад. 14:7).

12. Мар кароно, «вакчи визьёс» кадь медам улэ шуыса?

¹² «Вакчи визьёсын» ӵошатоно ке, ми тыршиськомы эшшо но золгес яратыны Иеговалэсь визь-кенешъёссэ, озьы ик вань законъёссэ но. Соосты эшшо но золгес яратон понна, ӵошатоно, кытчы вуттэ Инмарлэсь кылзӥськон но солэсь кылзӥськытэк улон. Кыӵе гинэ шуг-секытъёсын уг пумиськыло соос, кинъёс Иеговалэсь визьлыксэ палэнто! Нош кыӵе бадӟым пайда вае милемлы Инмарлэсь кылзӥськон (Пс. 31:8, 10).

13. Кужмысь косэ-а Иегова визь-кенешъёсызлэсь кылзӥськыны?

¹³ Иегова аслэсьтыз визьлыксэ котькинлы жалятэк сётэ. Но сое басьтыны со нокинэ кужмысь уг косы. Со валэктэ, мар луэ адямиосын, кудъёсыз солэсь визьлыксэ палэнто (Мад. 1:29—32). Кинъёслэн Иеговалэсь кылзӥськемзы уг поты, «ас ужъёссылэсь емышъёссэс сиёзы». Дыр ортчемъя, соос трос урод бервылъёсын пумиськозы. Соосты вӧсь луон, курадӟонъёс но кулон возьма. Нош соос, кинъёс Иеговалэсь кылзӥсько, ас синъёсынызы адӟозы, кызьы быдэсмоз Иеговалэн таӵе кылсётонэз: «Мынэсьтым верамме кылзӥськыса улӥсь мурт уродлэсь кышкатэк, куалекъятэк, каньылэн улоз» (Мад. 1:33).

КЫӴЕ ПАЙДА ВАЕ ЗЭМОС ВИЗЬЛЫК

14, 15. Малы дышето милемыз кылъёс, кудъёсыз гожтэмын Мадёнъёсын 4:23?

¹⁴ Иеговалэн визьлыкез милемлы котьку но пайда вае. Кызьы ми эскеримы ини, Инмар сюлмаськиз, солэсь визь-кенешъёссэ шедьтыны капчи мед луоз шуыса. Кылсярысь, Мадёнъёсын книгаын гожтэмын туж трос визь-кенешъёс, кудъёсыз ноку уг вужмо но улонмес умойгес каро. Ойдолэ эскеромы соос пӧлысь ньыльзэ гинэ.

¹⁵ Сюлэмдэс уте. Библиын гожтэмын: «Вань утёноос пӧлысь тужгес но сюлэмдэ уть, малы ке шуоно отысь пото улон ошмеслэн сиосыз» (Мад. 4:23). Малпаське, мар кароно, тазалыкмы юн мед луоз но сюлэммы умой мед ужалоз шуыса. Со понна пайдаё сиён сиёно, мугорез кыдатоно но урод сямъёслэсь палэнсконо. Тае ик вераны луэ мукет сюлэммы сярысь но: малпанъёсмы, мылпотонъёсмы но шӧдонъёсмы сярысь. Ми котькуд нунал Инмарлэсь Кылзэ лыдӟиськомы. Озьы ик христиан пумиськонъёслы дасяськиськомы, отчы ветлӥськомы но пыриськиськомы. Со сяна, ми, кужыммес жалятэк, ялан тодытӥськомы. Ми палэнскиськомы умойтэм сямъёслэсь, кудъёсыз визьмес сураны-пожаны быгато. Кылсярысь, ми палэнскиськомы урод шутэтскон амалъёслэсь но адямиослэсь.

16. Кыӵе пайда вае визь-кенеш, кудӥз гожтэмын Мадёнъёсын 23:4, 5?

¹⁶ Шумпотэ солы, марды вань. Библия умой визь-кенеш сётэ: «Узырлык люкан сярысь эн сюлмаськы... Со шоры тон синмыныд мыльккиськод, нош со ӧвӧл ини, малы ке шуоно со аслыз бурдъёс лэсьтоз но ӧрӟи кадь инме лобӟыса кошкоз» (Мад. 23:4, 5). Коньдонэз но ваньбурез ыштыны туж капчи. Озьы ке но узыръёс но, куанеръёс но туж тыршо узырмыны. Соин ик куддыръя соос лэсьто сыӵе ужъёс, кудъёсыз ӟеч нимзэс саптало, мукетъёсыныз кусыпъёссэс сӧро но тазалыксылы изъян ваё (Мад. 28:20; 1 Тим. 6:9, 10). Нош милям визьлыкмы луиз ке, соку ми коньдон сярысь мултэс ум сюлмаське. Со милемыз тырмостэм луонлэсь утёз но юрттоз шумпотыны солы, мармы вань (Екк. 7:12).

17. Мар кароно, верам кылмы «визьмо муртлэн кылыз» кадь мед луоз шуыса? (Мадёнъёс 12:18).

¹⁷ Мае ке верамдылэсь азьло малпаське. Ми ӧм ке чаклаське, кылъёсмы бадӟым изъян вайыны быгатозы. Библия вера: «Юнме кыл тэкшерись пуртэн кадь вандэ, нош визьмо муртлэн кылыз эмъя» (Мад. 12:18). Ми кыл нуллыса ӧм ветлэ ке, соку мукетъёсыныз кусыпъёсмы умоесь луозы (Мад. 20:19). Кылъёсмы мукетъёссэ вӧсь медам каре, нош мед эмъялозы шуыса, сюлэммес Инмарлэн Кылысьтыз тодон-валанъёсын тырмытоно (Лука 6:45). Куке ми малпаськиськомы со сярысь, мар гожтэмын Библиын, кылъёсмы «визьлыклэн ошмесэз» кадь луозы но мукетъёссэ юнматозы (Мад. 18:4).

18. Кызьы возет, кудӥз гожтэмын Мадёнъёсын 24:6, милемлы ужан-тыршонын юрттэ?

¹⁸ Организацимылэн кивалтэтэзлэсь кылзӥське. Библия милемыз ӧте: «Ожмаськондэ малпаськыса ну, умой кенешем-малпам бере вормон басьтод» (Мад. 24:6). Кызьы та возет юрттыны быгатэ тодытыку но дышетскисьёсты дасяку? Ас валаммыя тодытэм но дышетскисьёсты дасям интые, ми тыршиськомы сётэм кивалтэтлэсь кылзӥськыны. Умой визь-кенешъёс ми кылӥськомы христиан пумиськонъёсын. Отын адӟыны луэ, кызьы мукетъёсыз Библия вылэ пыкиськыса дасям речьёс верало но дышетскон ужъёссэс возьмато. Озьы ик Иеговалэн организациез милемлы пайдаё тӥрлыкъёс сётэ. Отчы пыро публикациос но видео, кудъёсыз адямиослы Библиез валаны юртто. Тыршиськоды-а тӥ та тӥрлыкъёсты быгатыса кутыны?

19. Кызьы тӥ учкиськоды визьлык шоры, кудзэ сётэ Иегова? (Мадёнъёс 3:13—18).

¹⁹ Лыдӟе Мадёнъёсты 3:13—18. Ми туж тау кариськомы Иеговалы солэн Кылысьтыз пайдаё визь-кенешъёс понна! Кызьы ми улысалмы соостэк? Та статьяын ми эскеримы Мадёнъёсын книгаысь куд-ог кулэ луись возетъёсты. Нош быдэс Библиез учконо ке, отын соос туж трос гожтэмын. Ойдолэ котьку но Иеговалэсь кылзӥськомы. Та дуннеысь тросэз адямиос Иеговалэсь визьлыксэ уг дунъяло. Нош ми тодӥськомы: «Шудоесь... [визьлыкез] утьыса улӥсь муртъёс».