Мон адӟи, кызьы Иегова оскымон ужась-тыршисьёссэ бакель каре

Мынам сереме ик потӥз, малы ке шуоно эше оскись адямилы уг кельшы вал. «Мае тон тодӥськод Библия сярысь?» — юай мон. Со соку ик мыным ӧз вера. Кӧня ке дыр ортчыса, эше вераз мыным, анаез Иеговалэн Адӟись-Ивортӥсез луэ но со солэсь мар но со тодӥз шуыса. Мынам туж потэ вал та сярысь тросгес тодэме. Соин ик мон эшме кури тодэмзэ мыным но вераны.

Ми быдэс уй ӵоже вераськыса потӥмы. Эше валэктӥз мыным, Библиын гожтэмъя, дунне Шайтанлэн ки улаз возиське шуыса (Иоанн 14:30). Та сярысь тӥ вань улонды ӵоже тодӥськоды ини, дыр. Нош мон та сярысь нырысьсэ кылӥ. Та малпан мынам сюлмам ик пыриз. Мыным котьку веразы, та дуннеен ӟеч но шонерлыко Инмар кивалтэ шуыса. Но дуннеысь югдурез адӟыса, мыным тае валаны секыт вал. Мыным 26 арес гинэ вал ке но, мон трос шуг-секытъёсты адӟыса вуи.

Мынам атае Огазеяськем Штатъёсын военной лётчик вал. Соин ик мон пичи дыръям ик умой валай, одӥг кнопкаез гинэ зӥбыса, ядерной ож кутскыны быгатэ шуыса. Куке мон Калифорниысь колледжын дышетски, Вьетнамын ож мынӥз. Мукет студентъёс сямен ик, мон бугыръяськонъёсы пыриськылӥ. Полиция милемыз бодыосын но газовой баллончикъёсын улляз. Соку улон огыр-бугыр вал. Политикаен сэрен адямиосты виылӥзы, пӧртэм бугыръяськонъёс ортчылӥзы. Вӧлмемын вал туж пӧртэм малпанъёс, кудъёссэ валаны но уг луы вал.

1970-тӥ арын мон Аляскалэн уйпалаз ужаны кутски но трос коньдон басьтӥ. Мон Лондонэ кошки, мотоцикл басьтӥ но мынӥ отчы, кытчы мынэме потэ вал. Кӧня ке толэзьёс ортчыса, мон Африкае вуи. Сюрес вылын мон пумитай пӧртэм адямиосты, кудъёсыз, мон сямен ик, кытчы ке но пегӟыны малпало вал. Соослэн пегӟемзы потэ вал шуг-секытъёслэсь, кудъёсыз соослы гань-гань улыны ӧз сётэ.

Мон оломае но адӟи. Соин ик, куке мон тодӥ, Библия верамъя, музъемен лек кылчин кивалтэ шуыса, та мыным туж валамон кадь потӥз. Соку мар бен каре Инмар? Мынам тае туж тодэме потэ вал.

Кӧня ке толэзьёс ортчыса, мон валэктон шедьтӥ. Нош берлогес мон трос адямиосын тодматски но соосты яратӥ. Соос пӧртэм шуг-секытъёссы шоры учкытэк, зэмос Инмарлы оскымон кылизы.

УЙПАЛ ИРЛАНДИЯ — «БОМБАОСЫН НО ПУЛЯОСЫН ТЫРМЕМ МУЗЪЕМ»

Лондонэ берытскеме бере мон эшелэн анаеныз герӟаськи. Со мыным Библия сётӥз. Берлогес, куке мон Амстердамын вал, одӥг агай адӟиз, кызьы мон пеймыт куазен фонарь улын Библиез лыдӟисько. Та агай юрттӥз мыным Библия сярысь тросгес тодыны. Собере мон Дублинэ кошки но Иеговалэн Адӟись-Ивортӥсьёсызлэсь филиалзэс шедьтӥ. Отын мон тодматски Артур Маттьюз агаен, кудӥз визьмо но быгатӥсь вал. Мон кури сое монэн Библиез дышетыны. Со соглаш луиз.

Мон быдэсак выйи дышетон пӧлы. Мон дугдылытэк лыдӟи книгаосты но журналъёсты, кудъёссэ Адӟись-Ивортӥсьёс поттӥзы. Озьы ик мон Библиез но лыдӟи. Мон туж шумпотэмын вал! Кенешлэн пумиськонъёсаз мон адӟи, кызьы пичи нылпиос но валазы юанъёсты, кудъёссэ визьмо адямиос трос сю аръёс ӵоже эскеризы, кылсярысь: «Малы лек ужъёс вӧлмемын? Кин со Инмар? Мар луэ кулэм бере?» Мон Адӟись-Ивортӥсьёсын гинэ вераськылӥ. Со секыт ӧй вал, малы ке шуоно быдэс шаерын, соосты сяна, мон нокинэ но ӧй тоды. Соос юрттӥзы мыным Иеговаез яратыны но мылкыдме будэтӥзы солэсь эриксэ быдэсъяны.

1972-тӥ арын мон пылатӥськи. Ар ортчыса, мон пионер луи но Уйпал Ирландиын Ньюри карысь пичи кенешын ужай-тырши. Мон улӥ гурезь бамалын из коркан. Артысь бусыын скалъёсты возьмазы. Соос азьын мон дышетски речьёсме вераны. Мыным потэ вал, сыскиськыса сылыкузы, соос монэ туж сак кылзо шуыса. Зэм но, скалъёс ӧз быгатэ мыным визь-кенешъёс сётъяны, но соос юрттӥзы мыным, кылзӥсьёсы шоры учкыса, речьёсме вераны. 1974-тӥ арын мон нимысьтыз пионер луи. Мон ужай-тырши Найджел Питт агаен, кудӥз мыным быдэс улонэлы умой эш луиз.

Со дыре Уйпал Ирландиын пӧртэм бугыръяськонъёс мынӥзы. Кин ке но сое «бомбаосын но пуляосын тырмем музъем» шуыса нимаз. Ульчаосын ӵем дыръя бугыръяськонъёс ортчылӥзы, ыбылӥськизы но машинаосты пуштытъязы. Шуг-секытъёс кылдылӥзы политика но религия сэрен. Протестантъёс но католикъёс тодӥзы, Иеговалэн Адӟись-Ивортӥсьёсыз политикае уг пырисько шуыса. Соин ик ми, номырлэсь кышкатэк, тодытыны быгатӥмы. Адямиос, кудъёсызлы ми тодытӥмы, ӵем дыръя тодо вал, кытын но ку бугыръяськонъёс луозы, но милемлы верало вал, ми отчы медам ветлэ шуыса.

Озьы ке но кышкыт югдуръёс луылӥзы. Одӥг пол ми Денис Карриган агаен, кудӥз пионер луыса ужаз-тыршиз, артысь карын тодытӥмы. Отын Адӟись-Ивортӥсьёс ӧй вал. Талэсь азьло ми та каре одӥг пол гинэ вуылӥмы. Отын одӥг кышномурт милемыз янгыше уськытӥз, ми мукет дӥськутэн дӥсяськем Великобританиысь солдатъёс шуыса. Со озьы малпаз, дыр, малы ке шуоно ми Ирландиын улӥсьёс сямен ӧм вераське. Ми туж кышкамы, малы ке шуоно, солдатъёсын эшъяськемен гинэ но, адямиез виыны яке пыдесаз ыбыны быгато вал. Автобусэз кынмыса возьмакумы, ми адӟимы, кызьы кафе доры, кудаз та кышномурт вал, машина вуиз. Кышномурт потӥз но машинаысь кык пиосмуртъёсын вераськыны кутскиз, ми шоры чиньыеныз возьматыса. Собере пиосмуртъёс каллен гинэ ми доры лыктӥзы но юазы, кызьы автобус ветлэ. Куке автобус вуиз, соос водителен вераськизы. Ми вераськемзэс ӧм кылэ. Ми сяна, автобусын нокин но ӧй вал ини. Соин ик ми малпамы, кар сьӧрын соос милемыз виёзы шуыса. Но со озьы ӧз луы. Автобусысь потыкумы, мон водительлэсь юай: «Со пиосмуртъёс... Соос ми сярысь юазы-а?» Водитель вераз: «Мон тӥледыз тодӥсько, соослы но тӥ сярысь верай. Эн сюлмаське. Тӥледын номыр но уз луы».

1976-тӥ арын Дублинын ортчем улосысь конгрессын мон Полина Ломакс сузэрез пумитай. Со Англиын нимысьтыз пионер луыса ужаз-тыршиз. Та зӥбыт-востэм но чебер сузэрлэн Инмарен юнэсь кусыпъёсыз вал. Со но солэн Рей выныз зэмлыкез вань улонзы ӵоже тодӥзы. Ар ортчыса, ми Полинаен кузпалъяськимы но Уйпал Ирландиын Баллими́н карын нимысьтыз пионеръёс луыса ужан-тыршонмес азьланьтӥмы.

Кӧня ке но дыр ӵоже мон ёросэз чаклась луыса ужай-тырши Бе́лфаст но Лондонде́рри каръёсын, озьы ик мукет кышкыт интыосын но. Ми туж паймиськомы вал агайёсмылэн но сузэръёсмылэн осконзылы. Иеговалы ужан-тыршон понна, соос дась вал палэнтыны мур пыӵам сям-йылолъёссэс но адямиосты адӟемпотостэм каронзэс. Адӟиське вал: Иегова соосты утиз но бакель кариз.

Мон Ирландиын 10 ар улӥ. Собере 1981-тӥ арын милемыз ӧтизы Галаад школалэн 72-тӥ классаз дышетскыны. Дышетсконмы йылпумъяськем бере милемыз ыстӥзы Сьерра-Леоне шаере (Шундыпуксёнпал Африка).

СЬЕРРА-ЛЕОНЕ: КУАНЕРЕСЬ, НО ОСКЫМОНЭСЬ

Миссионеръёслэн коркаязы милемын ӵош 11 вын-агайёс но сузэр-апайёс улӥзы на. Милям вал одӥг сиён пӧран интымы, куинь туалетмы, кык душмы, телефонмы, мисьтаськон машинамы но дӥськут куасьтонмы. Ӵем но шӧдтэк шорысь тылмы кысылӥз. Корка сигтӥ комакъёс бызьылӥзы, нош подвалын кобраос вал.

Улонмы капчи ик ӧй вал ке но, ужан-тыршон трос шумпотон вайиз. Адямиос Библиез гажазы но милемыз кылзӥзы. Тросэз Библиез дышетӥзы но Адӟись-Ивортӥсьёс луизы. Со интыын улӥсьёс монэ «мистер Роберт» шуыса нимазы, нош Полинаез — «миссис Роберт». Дыр ортчыса, мон филиаллы юрттыны кутски но тодытыны шергес поталляй. Соин ик адямиос Полинаез «миссис Полина» шуыса нимазы, нош монэ — «мистер Полина». Полиналы со туж кельшиз!

Тросэз агайёс куанер улӥзы. Но Иегова котьку но соос сярысь сюлмаськиз, ӵем дыръя туж паймымон амалэн (Матф. 6:33). Тодӥсько на, одӥг сузэрлэн аслыз но нылпиосызлы сиён басьтыны гинэ коньдонэз вал. Но со та коньдонзэ сётӥз висись агайлы, кудӥзлэн маляриялэсь эмъюм басьтыны коньдонэз уг тырмы вал. Малпалэ гинэ: со нуналэ ик малпамтэ шорысь одӥг кышномурт куриз сузэрмес сое ӵышкыны. Озьы сузэрмы коньдонтэк ӧз кыльы. Сыӵе учыръёс трос вал.

НИГЕРИЯ: ВЫЛЬ СЯМ-ЙЫЛОЛЪЁСЫН ТОДМАТСКОН

Сьерра-Леоне шаерын ми укмыс ар ужамы-тыршимы, собере милемыз Нигериысь Вефиле ыстӥзы. Ми бадӟым филиалэ сюримы. Мон азьланьтӥ со ик ужме, кудзэ азьвыл шаерын быдэсъяй. Нош Полиналы та воштӥськон секытэн сётӥськиз. Со дышемын вал котькуд толэзе 130 час ужаны-тыршыны. Солэн туж умой Библия дышетонъёсыз вал. Нош татын солы сётӥзы вуриськон уж. Быдэс нуналъёсын со дӥськутъёсты тупатъяз. Та ужлы дышыны солы дыр кулэ вал. Но со валаны кутскиз, агайёс но сузэръёс солэсь ужзэ дунъяло шуыса. Озьы ик со юнматыны тыршиз Вефильын мукет ужасьёсты.

Нигериысь сям-йылолъёсын ми тодмо ӧй вал. Милемлы тросэзлы дышетскыны кулэ вал. Одӥг пол мон доры офисэ пыриз агай. Солэн монэ тодматэмез потэ вал сузэрен, кудзэ али гинэ Вефиле ӧтизы. Куке мон султӥ соин ӟечбуръяськыны, со мынам пыд азям уськытскиз. Мон туж пайми! Мынам соку ик тодам лыктӥзы Библиысь кык учыръёс: Апостолъёслэн ужъёссы 10:25, 26 но Усьтӥськон 19:10. Мон малпай: «Оло нош, верано солы, озьы медаз лэсьты шуыса?» Со дыре ик мон валасько вал, сое Вефиле ӧтизы бере, со тодэ, малы дышетэ Библия.

Сузэрен вераськыкумы, мыным солэсь умой ӧй вал. Соин ик вераськонмы бере мон одӥг эскерон ортчытӥ. Мон тодӥ, та шаерлэн куд-ог интыосаз таӵе сям-йылол вал на шуыса. Соин ик сузэрмы озьы лэсьтӥз. Пиосмуртъёс но пыд азе уськытско вал. Со йыбырттон ӧй вал, нош озьы соос гажамзэс возьматӥзы. Со сяна, сыӵе учыръёс Библиын но гожтэмын (1 Экс. 24:9). Мон туж шумпотӥ, соку сузэрмылы номыр ӧй вера но сое ӧй возьдаськыты шуыса.

Нигериын ми тодматскимы пӧртэм агайёсын но сузэръёсын, кудъёсыз быдэс улонзы ӵоже оскымонэсь вал. Тани Айзая Адагбонаa агайлэн учырез. Со егит дыръяз зэмлыкен тодматскиз. Но берлогес со проказаен висьыны кутскиз. Сое келязы нимысьтыз эмъяськон интые, кытын, со сяна, мукет Адӟись-Ивортӥсьёс ӧй вал. Пумитъяськонъёс шоры учкытэк, со 30-лэсь но тросгес проказаен висисьёслы зэмлыкен тодматскыны юрттӥз, озьы ик со отын кенеш кылдытӥз.

КЕНИЯ: АГАЙЁС МЫНЫМ ЧИДАНЗЭС ВОЗЬМАТӤЗЫ

1996-тӥ арын милемыз Кениысь филиалэ ыстӥзы. Талэсь азьло та шаерын мон одӥг пол гинэ вал, самой соку, куке ми эшеным тылскем котырын вераськыса пукимы. Ми Вефильын улӥмы. Ми доры ӵем пыраллязы верветкаос — пичиесь вож обезьянъёс. Кыӵе ке сузэр емышъёс вае вал ке, обезьянъёс, сое котыртыса, сиёнзэ лушканы туртто вал. Одӥг пол Вефильысь сузэр укнозэ ворсаны вунэтӥз. Бертэмез бере со адӟиз, обезьянъёс быдэс семьяенызы солэсь сиёнзэ сиё вал шуыса. Сузэр кеськыса комнатаысьтыз потӥз, нош обезьянъёс черетскыса укнотӥ кошкизы.

Ми Полинаен суахили кылын вераськись кенеше ветлыны кутскимы. Ӝоген монэ куризы книга дышетонэз ортчытъяны (али со кенешын Библиез дышетон шуыса нимаське). Но та кылын мон пичи мурт кадь вераськисько вал. Эскероно материалэз мон азьло ик учкыса потӥсько вал, соин ик юанъёсты лыдӟеме луэ вал. Агайёслэн но сузэръёслэн валэктонъёссы гожтэмлэсь пӧртэм луэ вал ке, мон соосты уг валаськы вал. Валамон, туж ик капчи ӧй вал! Агайёс но сузэръёс мыным жаль пото вал. Мон туж пайми: куке монэ та пумиськонэз ортчытыны куризы, агайёс но сузэръёс чидась но зӥбыт-востэм луэмзэс возьматӥзы.

ОГАЗЕЯСЬКЕМ ШТАТЪЁС: УЗЫРЕСЬ, НО ОСКЫМОНЭСЬ

Кениын ми ар но ӧм улэ. 1997-тӥ арын милемыз ӧтизы Бруклинысь Вефиле (Нью-Йорк). Табере ми сюримы узыр шаере. Таин сэрен но адямиослэн шуг-секытъёссы вал (Мад. 30:8, 9). Озьы ке но агайёс но сузэръёс юн осконэн уло. Соос асьсэлэсь дырзэс но ваньбурзэс узырмон понна уг куто, нош тыршо Иеговалэн организациезлы юрттӥськыны.

Улонмы ӵоже ми адӟимы, кызьы агайёс но сузэръёс пӧртэм югдуръёсын оскымон кылё. Ирландиын, йыружъёс шоры учкытэк, оскымон кылё; Африкаын, куанер но мукетъёсызлэсь палэнын улон шоры учкытэк, оскымон кылё; Огазеяськем Штатъёсын, узыр улон шоры учкытэк, оскымон кылё. Кыӵе шумпотэ Иегова, куке адӟе, кызьы адямиос пӧртэм югдуръёсын сое яратыса уло!

Аръёс лобо — «куиськон сусолэсь но ӝоггес бызё» (Иов 7:6). Али ми мукет агайёсын но сузэръёсын ӵош Уорвикысь валтӥсь кивалтонниын ужаськомы-тыршиськомы. Ми шумпотӥськомы ужаны адямиосын, кудъёсыз зэмзэ ик ог-огзэс ярато. Ми шудоесь, малы ке шуоно вань сюлмысьтымы тыршиськомы юрттыны Эксэймылы, Иисус Христослы, кудӥз ӝоген трос оскымон адямиосты бакель кароз (Матф. 25:34).