Тодӥськоды-а тӥ?

Маин мынэ вал эфиоп пиосмурт, кудӥзлы Филипп тодытӥз?

ГРЕК кыл, кудӥз Библиын «уробо» шуыса берыктэмын, пӧртэм уробоосты возьматыны быгатэ (Ап. уж. 8:28, 29). Но соиз уробо, кудӥныз эфиоп пиосмурт мынӥз, ожмаськон яке спортэн вырон уроболэсь бадӟымгес вал, вылды. Эскеромы, малы озьы вераны луэ.

Эфиоп пиосмурт кузёйыр вал, кудӥз кузь сюрес вылэ потӥз. Со «Эфиопияысь эксэй кышномуртлэн, кандакиялэн, юртаз кузёйыр, солэсь вань узырлыксэ возьмаса улӥсь мурт» вал (Ап. уж. 8:27, сноска). Вашкала Эфиопияе пыре вал туала Судан но туала Египетлэн лымшор люкетэз. Кузь сюрес вылэ потыса, эфиоп пиосмуртлы трос маин ке мыноно луиз, вылды. Озьы ик солэн сьӧраз котырез но вал, дыр. Нош асьме вакытысь нырысетӥ даурын сюрес вылын адямиосты пӧртэм маин ке нуллӥзы, озьы ик ньыль питрано но липето уробоосын. Одӥг книгаынa гожтэмын: «Сыӵе уробое тросгес котырез басьтыны луэ вал, мыныны каньылгес вал но кузьгес сюресэз ортчыны луэ вал, дыр».

Эфиоп пиосмурт лыдӟиське вал, куке Филипп соин вераськыны кутскиз. Библия вера, Филипп уроболэн матаз мынӥз но кылӥз, эфиоп пиосмурт «Исаия пророклэсь гожъямзэ лыдӟе шуыса» (Ап. уж. 8:30). Уробоос, кудъёсыныз кузь сюрес вылын ветлӥзы, ӝог ӧз ветлылэ. Тае лыдэ басьтыса, валаны луэ, малы эфиоп пиосмурт лыдӟиськыса мынӥз, нош Филипп сое сутыны быгатӥз.

Эфиоп пиосмурт «Филиппез уробояз тубыны но асэныз артэ пуксьыны косӥз» (Ап. уж. 8:31). Спортэн вырон уробоосын сылыны гинэ луэ вал. Нош уробоос, кудъёсыныз кузь сюрес вылын ветлӥзы, бадӟымгес вал. Соин ик эфиоп пиосмурт но Филипп кыкназы ик пукыса мыныны быгатӥзы.

Апостолъёслэн ужъёссы книгаысь 8-тӥ люкетэз но историез лыдэ басьтыса, берло дыре ми мукет сямен суреданы кутскимы уробоез, кудӥныз эфиоп пиосмурт мынӥз. Ожмаськон яке спортэн вырон уроболэсь со бадӟымгес вал.