Иеговалэн организациезлы оскондэс юнматэ

1. Кызьы радъямын вал Иеговалэн ужась-тыршисьёсызлэн ужзы нырысетӥ даурын?

КУКЕ Иегова ужась-тыршисьёсызлы уж сётэ, со возьма, соос сое умой-умой, радызъя быдэстозы шуыса (1 Кор. 14:33). Кылсярысь, Инмарлэн потэ, быдэс дунне вылын ӟеч ивор верамын мед луоз шуыса (Матф. 24:14). Та ужен кивалтыны Иегова Иисусэз пуктӥз. Иисус чакла, тодытон ужез сётэм кивалтэтъя но огкылысь мед быдэстозы шуыса. Нырысетӥ даурын кенеш кылдэ вал ке, отчы тӧроосты пукто вал, соос тодытон ужен мед кивалтозы шуыса (Ап. уж. 14:23). Иерусалимын кивалтӥсь кенеш пӧлы пыро вал апостолъёс но тӧроос, кудъёсыз ужпумъёс кутылӥзы, собере кутэм ужпумъёссэс кенешъёсы ыстылӥзы (Ап. уж. 15:2; 16:4). Кенешъёс сётэм кивалтэтлэсь кылзӥськыны кулэ вал. Кыӵе пайда вае вал кылзӥськемзы? Кылзӥськемзылы луыса кенешъёс «оскон пыр юнмазы, нуналлы быдэ соослэн лыдзы тросгес но тросгес луиз» (Ап. уж. 16:5).

2. Кызьы Иегова 1919-тӥ арысен кивалтэт но духовной сиён сётъя?

² Иегова сюлмаськиз, асьме нуналъёсы но калыкезлэн ужез радъямын мед луоз шуыса. 1919-тӥ арысен Иисус зырӟемъёс пӧлысь куд-ог пиосмуртъёс пыр тодытон ужен кивалтэ но аслаз дышетскисьёсызлы духовной сиён сётъя (Лука 12:42)a. Веранэз ӧвӧл, Иегова та пиосмуртъёслэсь ужзэс бакель каре (Ис. 60:22; 65:13, 14).

3, 4. а) Маин умой, асьмелэн ужмы радъямын шуыса? б) Мае ми эскеромы та статьяын?

³ Асьмелэн ужмы радъямын ӧй луысал ке, ми Иисуслэсь косонзэ быдэстыны ӧм быгатысалмы (Матф. 28:19, 20). Малпалэ ай, мар луысал, тодытонлы участокъёс ӧй луысалзы ке но котькудӥз мынысал ке отчы, кытчы мынэмез потэ. Куд-ог адямиос доры ивортӥсьёс туж ӵем вуысалзы, нош куд-огъёсыз доры воксё но ӧй вуысалзы. Маин эшшо умой на, милям ужмы радъямын шуыса?

⁴ Музъем вылын улыкуз, Иисус дышетскисьёсызлэсь ужзэс радъяз. Туннэ но со милесьтым ужмес радъя. Та статьяысь асьмеос тодомы, кызьы Иисус дышетскисьёсызлэсь ужзэс радъяз но кызьы туннэ Иеговалэн организациез Иисусэн сётэм кивалтэтлэсь кылзӥське. Со сяна, асьмеос тодомы на, кызьы ми возьматыны быгатӥськомы, Иеговалэн организациезлы оскиськомы шуыса.

ОРГАНИЗАЦИМЫ ИИСУСЛЭСЬ АДӞЕМ КАРЕ

5. Кызьы Иеговалэн организациез Иисуслэсь адӟем каре? (Иоанн 8:28).

⁵ Иисус ваньзэ лэсьтӥз но вераз озьы, кызьы дышетӥз сое Атаез. Кызьы Иеговалэн организациез Иисуслэсь адӟем каре? Куке со милемлы кивалтэт сётэ но вера, мар шонер, нош мар шонертэм, ваньзэ сое со Инмарлэн Кылысьтыз басьтэ (лыдӟе Иоаннлэсь 8:28; 2 Тим. 3:16, 17). Милемлы ӵем тодамы вайыто, Библиез лыдӟоно но тодэммес улонамы пыртоно шуыса. Кыӵе со пайда вае?

6. Кызьы Библиез лыдӟон но со вылын малпаськон Иеговалэн организациезлы осконмес юнматэ?

⁶ Библиез лыдӟыса но со вылын малпаськыса, асьмеос ӵошатыны быгатӥськомы сое, мар вера Библия, соин, кыӵе кивалтэт сётэ Иеговалэн организациез публикациос пыр. Асьмеос адӟиськомы ке, сётэм кивалтэт Библиысь басьтэмын шуыса, милям Иеговалэн организациезлы осконмы юнма (Рим. 12:2).

7. Кыӵе ивор вераз Иисус но кызьы Иеговалэн организациез солэсь адӟем каре?

⁷ Иисус «Инмар Эксэйлык сярысь Ӟеч Иворез» вераз (Лука 4:43, 44). Сое ик лэсьтыны со косӥз дышетскисьёссэ но (Лука 9:1, 2; 10:8, 9). Туннэ но Иеговалэн Адӟись-Ивортӥсьёсыз Инмар Эксэйлык сярысь ӟеч иворез верало, кытын гинэ соос медам улэ но кыӵе гинэ ужез Иеговалэн организацияз медам быдэсъялэ.

8. Кыӵе дан асьмелы сётэмын?

⁸ Адямиослы Инмар Эксэйлык сярысь ӟеч иворез вераны — ми понна бадӟым дан! Но та уж котькудӥзлы оскемын ӧвӧл. Кылсярысь, куке Иисус музъем вылын улӥз, со ӧз лэзьы периослы ачиз сярысь вераны (Лука 4:41). Туннэ но адямилэн потэ ке Иеговалэн калыкеныз ӵош тодытон уже пыриськемез, солы аслэсьтыз улонзэ воштоно но Инмарлэн куронъёсызъя улоно. Котькуд тупась учыре тодытыса, ми возьматӥськомы, Инмар Эксэйлык сярысь ӟеч ивор веранэз данэн лыдъяськомы шуыса. Милям потэ, Иисуслэсь адӟем карыса, адямиослы ӟеч иворез вераммы но соосты зэмлыклы дышетэммы (Матф. 13:3, 23; 1 Кор. 3:6).

9. Мар каре Иеговалэн организациез, адямиослы Инмарлэсь нимзэ веран понна?

⁹ Иисус юрттӥз адямиослы Инмарлэсь нимзэ тодыны. Инмысь Атаезлы вӧсяськыкуз, со шуиз: «Мон... Тынэсьтыд нимдэ тодмо кари» (Иоанн 17:26). Иеговалэн организациез, Иисус кадь, трос кужым понэ, адямиослы Инмарлэсь нимзэ веран понна. Та ужын туж юрттэ «Библия. „Выль дунне“ берыктэм» (ӟуч). Отын Инмарлэн нимыз гожтэмын котькытын, кытын со луыны кулэ. Туннэ та берыктэмез яке солэсь люкетъёссэ лыдӟыны луэ 270-лэсь тросгес кылъёсын. Та берыктэмын пӧртэм приложениос вань. Кылсярысь, А4 но А5 приложениосысь тодыны луэ, малы но кызьы Инмарлэн нимыз выльысь гожтэмын вал Библиын. Озьы ик A5 приложениысь тросгес тодыны луэ, малы Христиан Грек Гожтэмъёсын Инмарлэн нимыз 237 пол гожтэмын луыны кулэ.

10. Мар вераз Мьянмаысь кышномурт Инмарлэсь нимзэ тодэмез бере но малы со милемыз дышетэ?

¹⁰ Иисус тыршиз адямиослы Инмарлэн нимыз сярысь вераны. Милям но потэ, тросгес адямиос сое мед тодозы шуыса. Тани мар бӧрдыса ик вераз Мьянмаысь 67 аресъем кышномурт сузэрлы, кудӥз соин Библиез дышетӥз: «Кӧня улӥсько ни, нош али гинэ тодӥ, Инмарлэн нимыз — Иегова шуыса. Тон... мыным туж кулэзэ верад». Та учыр возьматэ, Инмарлэсь нимзэ тодыса, адямиослэн улонзы ик воштӥськыны быгатэ шуыса.

ИЕГОВАЛЭН ОРГАНИЗАЦИЕЗЛЫ ОСКЕ

11. Кызьы тӧроос возьматыны быгато, Иеговалэн организациезлы оско шуыса? (Озьы ик учке суредъёсты.)

¹¹ Кызьы тӧроос возьматыны быгато, Иеговалэн организациезлы оско шуыса? Выль кивалтэт вуэ ке, агайёслы сое сак лыдӟоно но уже кутоно. Кылсярысь, Иеговалэн организациез соослы вера, кызьы кенешлэсь пумиськонъёссэ ортчытоно, кызьы кенеш сярысь вӧсяськоно но кызьы Христослэн ыжъёсыз сярысь сюлмаськоно. Тӧроос сётэм кивалтэтлэсь кылзӥсько ке, агайёс но сузэръёс шӧдо, Иегова соос сярысь сюлмаське но соосты яратэ шуыса.

12. а) Малы тӧроослэсь кылзӥськоно? (Еврейёслы 13:7, 17). б) Малы тӧроослэсь умой сямъёссэс адӟыны тыршоно?

¹² Куке тӧроос кыӵе ке кивалтэт сёто, милемлы соку ик кылзӥськоно. Соку тӧроослы капчигес луоз соослы оскем ужзэс быдэстыны. Библия ӧте милемыз тӧроослэсь кылзӥськыны. (Лыдӟе Еврейёслы 13:7, 17.) Со котьку ик капчи ӧвӧл, малы ке шуоно тӧроос сьӧлыкоесь. Нош ми соослэсь урод сямъёссэс гинэ адӟимы ке, со тушмонъёсмес шумпоттоз. Малы? Малы ке шуоно соку ми Иеговалэн организациезлы оскемысь дугдомы. Нош тушмонъёсмы сое ик возьмало. Кызьы ми быгатомы тушмонъёсмылэсь кескич малпанъёссэс валаны но соосты палэнтыны?

НОКИНЛЫ НО ЭН ЛЭЗЕ ОРГАНИЗАЦИМЫЛЫ ОСКОНДЭС БЫДТЫНЫ

13. Кызьы Инмарлэн тушмонъёсыз организациезлэсь ӟеч нимзэ саптаны тыршо?

¹³ Инмарлэн тушмонъёсыз организациезлэсь ӟеч нимзэ саптаны тыршо. Кылсярысь, Библиысь асьмеос тодӥськомы, Иегова возьма, солэн ужась-тыршисьёсыз котьма ласянь чылкыт луозы шуыса. Инмар вера, кин сьӧлыка но воштӥськемез уг поты, кенешын луыны уг быгаты шуыса (1 Кор. 5:11—13; 6:9, 10). Асьмеос кылзӥськиськомы та косонлэсь. Нош тушмонъёсмы верало, ми адямиосты ум яратӥське но соосты, кинъёс милесьтым пӧртэм луо, палэнтӥськомы шуыса.

14. Кин Иеговалэн организациез сярысь кыл вӧлдэ?

¹⁴ Валалэ, кин зэмзэ ик Иеговалэсь организацизэ сантэма. Со Шайтан. Библиын со «ӧрекчаськонлэн атаез» шуыса нимамын (Иоанн 8:44; Ул.-выл. 3:1—5). Соин ик ми чик ум паймиське, со тушмонъёсмы пыр Иеговалэн организациез сярысь кыл вӧлдэ шуыса. Озьы ик вал нырысетӥ даурын но.

15. Мар каризы религиозной кивалтӥсьёс, Иисуслэсь но солэн дышетскисьёсызлэсь ӟеч нимзэс саптан понна?

¹⁵ Инмарлэн Пиез, Иисус, сьӧлыктэм вал но трос паймымон ужъёс лэсьтӥз. Озьы ке но Шайтан адямиос пыр со сярысь шонертэмзэ вераз. Кылсярысь, религиозной кивалтӥсьёс веразы, периосты улляны Иисуслы «периослэн эксэйзы» кужым сётӥз шуыса (Марк 3:22). Нош куке Иисусэз судъязы, религиозной кивалтӥсьёс веразы, со Инмарез сантэма шуыса, но калыкез Иисусэз виыны ӝутказы (Матф. 27:20). Берлогес, куке Христослэн дышетскисьёсыз ӟеч иворез веразы, тушмонъёссы «язычникъёслэсь сюлэмъёссэс вожомытӥзы, соослы пумит берыктӥзы» (Ап. уж. 14:2, 19). Тани мар вераське 1998-тӥ арын 1-тӥ толсур понна поттэм «Возьмаськон башняын» со сярысь, мар гожтэмын Апостолъёслэн ужъёсазы 14:2: «Иудейёс, христианъёслэн тушмонъёссы, зэмлыкез палэнтэм сяна, кыл вӧлдыса ветлӥзы но язычникъёслэсь сюлэмъёссэс Иисуслэн дышетскисьёсызлы пумит берыктылӥзы».

16. Мае тодамы ваёно, Иеговалэн организациез сярысь шонертэм веранъёсты кылӥмы ке?

¹⁶ Шайтан туннэ но пӧяське. Со «быдэс дуннелэсь визьзэ» туга (Усьт. 12:9). Соин ик туннэ Иеговалэн организациез сярысь но агайёс сярысь ми шонертэм веранъёсты кылыны быгатомы. Соку тодамы ваёно, кызьы нырысетӥ даурын Инмарлэн тушмонъёсыз Иисус сярысь но солэн дышетскисьёсыз сярысь шонертэмзэ веразы. Куке ми кылӥськомы, кызьы туннэ Иеговалэн ужась-тыршисьёсыз сярысь урод кылъёс верало, милемлы паймоно ӧвӧл, малы ке шуоно со сярысь азьло ик верамын вал (Матф. 5:11, 12). Ми ум оске шонертэм веранъёслы, тодӥмы ке, кин бордысь соос пото, но сыӵе веранъёсты палэнтӥмы ке.

17. Мар кароно, пӧяськонлы медам оске шуыса? (2 Тимофейлы 1:13). (Озьы ик учке «Мар кароно, шонертэм веранъёсты кылыку» рамкаез.)

¹⁷ Эн кылзэ шонертэм веранъёсты. Апостол Павел валамон вераз, мар кароно, ми пӧяськемез кылӥмы ке. Со вераз Тимофейлы, со ачиз но «ярантэм-кулэтэм супыльтонъёслэсь» мед палэнскоз, мукетъёссэ но палэнскыны мед косоз шуыса (1 Тим. 1:3, 4; 4:7). Милям пичи нылпиос кадь луэммы уг поты, кудъёсыз выж вылысь мае ке шедьто но соку ик сое ымазы поно. Бадӟым муртъёс озьы уг лэсьто. Асьмеос пӧяськемез ум кылзӥське, малы ке шуоно тодӥськомы, кин бордысь со потэ. Асьмеос «визьмо дышетонэз» гинэ кылзӥськомы. (Лыдӟе 2 Тимофейлэсь 1:13.)

18. Кызьы возьматоно, ми Иеговалэн организациезлы оскиськомы шуыса?

¹⁸ Асьмеос эскеримы куинь удысъёсты гинэ, кудъёсаз Иеговалэн организациез Иисус кадь лэсьтэ. Библиез эскерыкуды, адӟыны тырше, мар эшшо возьматэ на, Иеговалэн организациез Иисуслэсь адӟем каре шуыса. Юрттэ кенешысь агайёслы но сузэръёслы организацилы оскыны. Асьтэос но возьматэ, солы оскиськоды шуыса, Иеговалы ужаса-тыршыса но солэн организациеныз валче ужаса (Пс. 36:28). Иеговалэн калыкеныз валче ужаны — ми понна бадӟым дан. Ойдолэ сое дунъяломы!